1 Ināianei ā, i pahawa ake, nā, i muri iho i tā Arami kōrerotanga atu i ēnei kupu ki a rātou ka noho iho ia i runga i te papa, kātahi ka tū ake a Amureke, ā, ka tīmata tana whakaako i a rātou, e mea ana:

2 E aku teina, ki aku whakaaro e kore koutou e āhei kia kuare ki ēnei mea kua kōrerotia ake nei e pā ana ki te haerenga mai a te Karaiti, kua whakaakona e mātou koia te Tama a te Atua; āe rā, e mōhio ana ahau kua kaha whakaakona ēnei mea ki a koutou i mua i tā koutou wehenga atu i waenganui i a mātou.

3 Ā, nā te mea kua hiahia koutou i tōku tuakana aroha kia whakamōhiotia atu e ia ki a koutou me aha rā koutou, nā ō koutou whakamamaetanga; ā, kua āhua kōrero nei ia ki a koutou kia whakaritea ai ō koutou hinengaro; āe rā, nāna koutou i whakahau kia whakapono, ā, kia manawanui—

4 Āe rā, kia nui rā anō tō koutou whakapono hei whakatō iho i te kupu ki roto i ō koutou ngākau, kia whakamātauria e koutou tōna painga.

5 Ā, kua kite mātou ko te pātai nui kei roto i ō koutou hinengaro, arā, mehemea kei roto te kupu i te Tama a te Atua, mehemea rānei kāore e puta mai te Karaiti.

6 Ā, i kite anō koutou kua whakaatu atu taku tuakana ki a koutou, i ngā wā maha, kei roto te kupu i te Karaiti ki te whakaoranga.

7 Kua karangatia ake taku tuakana ngā kupu a Henohi, nā, ka puta mai te hokonga mā roto i te Tama a te Atua, ā, kua karangatia anōtia ngā kupu a Henoka; ā, kua tono atu ki a Mohi, kia whakaatu ai ia kei te pono ēnei mea.

8 Ināianei ā, nana, ka whakaatu au ki a koutou mōku ake anō kei te pono ēnei mea. Nana, ko taku kupu tēnei ki a koutou, nā, e mōhio ana ahau ka puta mai te Karaiti ki waenganui i ngā tamariki a te tangata, kia tango ki runga ki a ia ngā hē o tana iwi, ā, ka whakamārie ia i ngā hara o te ao; nā te mea kua kōrerotia e te Ariki te Atua.

9 Nā te mea e tika pū ana anō te meatanga i tētahi whakamārietanga; nā te mea e ai ki te mahere nui o te Atua Mau Tonu me matua mea ai tētahi whakamārietanga, ki te kore kua tino ngaro rawa atu ngā tāngata katoa; āe rā, kua whakapakekehia te katoa; āe rā, kua taka, ā, kua ngaro te katoa, ā, me mate anō ki te kore e māwhiti atu mā roto atu i te whakamārietanga e tika pū ana anō tana meatanga ake.

10 Nā te mea e tika pū ana anō tētahi whakaherenga whakamutunga nui; āe rā, ehara i te whakaherenga o te tangata, ehara rānei i te kararehe, ehara rānei i tētahi tūmomo manu; nā te mea kāore tēnei hei whakaherenga tangata; engari me tika ia hei whakaherenga mutunga kore, ā, hei whakaherenga mau tonu.

11 Nā, kāore kau he tangata kotahi e taea nei te whakahere i ōna ake toto kia whakamārie ai i ngā hara o tētahi atu. Nā, ki te kōhuru tētahi tangata, nana ka mea tō tātou ture, e tika ana, kia muru ai i te oranga o tana teina? ko taku kupu tēnei ki a koutou, Kāo.

12 Engari e tono ana te ture i te oranga o te tangata nāna te kōhuru; nō reira kāore e taea ana tētahi mea e iti iho ana i tētahi whakamārietanga mutunga kore e whakaherehia ai mō ngā hara katoa o te ao.

13 Nō reira, e tika pū ana anō kia mea ai tētahi whakaherenga whakamutunga nui, kātahi ka puta mai, e tika pū ana anō rānei kia puta mai, te whakamutunga ki te whakaheke toto; kātahi ka tutuki te ture a Mohi; āe rā, ka tutuki te katoa, ia tongi me ia mātohu, ā, kua kore e hē ngā rā o tētahi mea.

14 Nana rā, koinei te tikanga katoa o te ture, ia mea moroiti e aro pū ana ki taua whakahere whakamutunga nui; ā, ko taua whakaherenga whakamutunga nui, arā, koia ko te Tama a te Atua, āe rā, mutunga kore, ā, mau tonu.

15 Ā, pēnei ka puta i a ia te whakaoranga ki te hunga katoa e whakapono nei i tōna ingoa; koinei te tikanga o tēnei whakaherenga whakamutunga, kia whakaputa mai i ngā whēkau o te aroha, e taea nei te tika, ā, e whakaputa mai ana i te huarahi kia whai whakapono rātou tae atu ki te rīpenetātanga.

16 Ā, pēnei tutuki ai ngā tono a te tika i te aroha, ā, e karapotia ana rātou i roto i ngā ringaringa o te haumarutanga, i te tangata kāore nei ōna whakapono tae atu ki te rīpenetātanga e pāhore ana ki te ture katoa o ngā tono o te tika; nō reira ka whakaputa te mahere mau tonu nui o te hokonga ki te tangata anake e whai whakapono ana tae atu ki te rīpenetātanga.

17 Nō reira mā te Atua e tuku ki a koutou, e aku teina, kia taea ai e koutou te tīmata ki te whakamahi i tō koutou whakapono tae atu ki te rīpenetātanga, kia tīmata tā koutou karanga i tōna ingoa tapu, kia aroha mai ia ki a koutou;

18 Āe rā, karanga atu ki a ia mō te aroha; nā te mea e kaha ana ia ki te whakaora.

19 Āe rā, whakaiti koutou i a koutou anō, ā, kia hono tonu te inoi ki a ia.

20 Karanga ake ki a ia i a koutou i roto i ā koutou māra, āe rā, i runga i ā koutou kāhui katoa.

21 Karanga ake koutou ki a ia i ō koutou whare, āe rā, i runga i ō koutou kāinga katoa, i te ata, i te poutūmārōtanga o te rā, i te ahiahipō anō hoki.

22 Āe rā, karanga ake ki a ia kia hē te mana o ō koutou hoariri.

23 Āe rā, karanga ake ki a ia kia hinga te rēwera, koia nei tētahi hoariri ki te tika katoa.

24 Karanga ake ki a ia i runga i ngā kai i ā koutou māra, kia kake koutou i ēnā mea.

25 karanga ake i runga i ā koutou kāhui me ā koutou māra, kia whai hua ake ai.

26 Engari ehara tēnei i te katoa; me riringi iho i ō koutou wairua i ō koutou rūma, me ā koutou meatanga muna, i ō koutou koraha hoki.

27 Āe rā, i ngā wā kāore koutou e karanga ake ki te Ariki, tukua ō koutou ngākau kia kī, e aro atu ana i te inoi tonutanga hei painga mō koutou, ā, hei painga mō te hunga e karapoti ana i a koutou.

28 Ināianei ā nana, e aku teina aroha, ko taku kupu tēnei ki a koutou, kaua e whakaaro ake koinei te katoa; nā te mea whai muri iho i tā koutou mea ai i ēnei mea katoa, ki te pei atu koutou i te hunga e hapa ana, i te hunga kākahu kore, ki te kore hoki e toro atu ki te hunga tūroro me te hunga e mamae ana, me te wāwāhi atu i ō koutou rawa, mēnā kei a koutou, ki te hunga e hapa ana—Ko taku kupu tēnei ki a koutou, ki te kore koutou e mahi noa i tētahi o ēnei mea, nana, kua auare ake tō inoi, ā, kāore he painga ki a koutou, ā, e rite ana koutou ki te hunga ngutu kau e whakakore nei i te whakapono.

29 Nō reira, ki te kore koutou e mahara kia atawhai tangata, he rite koutou ki te paranga, e makaia atu nei e ngā kaiwhakamahine, (kāore ōna painga) ā, kua takatakahia i raro i ngā waewae o te tangata.

30 Ināianei ā, e aku teina, e hiahia ana ahau, whai muri iho i tā koutou kite atu i ngā whakaaturanga maha, e kite ana kei te whakaatu ngā karaipiture tapu i ēnei mea, ka haere mai koutou me te whakaputa i ngā hua ki te rīpenetātanga.

31 Āe rā, e hiahia ana au kia haere mai koutou, ā, kia kaua koutou e whakapakeke tonu i ō koutou ngākau; nana rā, ko nāianei te wā me te rā mō tō koutou whakaoranga; nō reira, ki te rīpenetā koutou, ā, ki te kore koutou e whakapakeke i ō koutou ngākau, ka whakaputaina wawetia iho te mahere nui o te hokonga ki runga i a koutou.

32 Nana rā, he wā tēnei kia whakarite ai te tangata kia tūtaki ai i te Atua; āe rā, nana ko te rā o tēnei oranga te rā me mahi ngā tāngata i ā rātou mahinga.

33 Ināianei ā, he pērā ki tāku i kī ake ai ki a koutou i mua, nā te mea he maha ā koutou whakaaturanga, nō reira, e tohe ana au i a koutou kia kaua koutou e whakaroaroa atu i te rā o tō koutou rīpenetātanga tae atu ana ki te mutunga; nā te mea whai muri iho i tēnei rā o te ora, kua homai nei ki a tātou kia whakarite ai mō te āke tonu atu, nana, ki te kore e pai ake ā tātou whakapau wā i a tātou i tēnei oranga, ko reira puta mai ai te pō uriuri kāore e taea ana i reira ētahi mahi anō te mahi.

34 Kāore e taea e koutou te kī ake, ina kūmea atu koutou ki taua aituā whakarihariha, ka rīpenetā ahau, ka hoki au ki tōku Atua. Kāo, tē taea tēnei te kī ake e koutou; nā te mea ko taua wairua anō e nōhia ana ō koutou tīnana i te wā e puta atu koutou i tēnei oranga, ka whaikaha anō taua wairua kia nōhia ai tō tīnana i tērā ao mau tonu.

35 Nana rā, mehemea kua whakaroaroa koutou i te rā o tā koutou rīpenetātanga tae atu ana ki te mate, nana, kua uru koutou i raro i te mana o te wairua o te rēwera, ā, ka hīri ia i a koutou hei mea māna; nō reira, kua neke atu te Wairua o te Ariki i a koutou, ā, kāore ōna wāhi i roto i a koutou, ā, kua whaimana katoa te rēwera i runga i a koutou; ā, koinei te āhuatanga whakamutunga o te hunga whakarihariha.

36 Ā, e mōhio ana au ki tēnei, nā te mea kua kī mai te Ariki e kore ia e noho nei i roto i ngā temepara tapu kore, engari kei roto i ngā ngākau o te hunga tika ia noho ai; āe rā, kua kī anō ia ka noho iho te hunga tika i tōna kīngitanga, e kore e puta atu anō ki waho; engari ka whakamākia ō rātou kāmana mā roto atu i te toto o te Reme.

37 Ināianei ā, e aku teina aroha, e hiahia ana ahau kia mahara koutou ki ēnei mea, ā, kia whakatutuki koutou i tō koutou whakaoranga i runga i te wehi i te aroaro o te Atua, ā, kia kore tonu e whakakore i te haerenga mai a te Karaiti;

38 Kia kore tonu e tautohetohe atu ki te Wairua Tapu, engari kia whiwhi koutou i a ia, me te tango ki runga i a koutou te ingoa o te Karaiti; kia whakaiti koutou i a koutou anō tae iho ki te puehu, me te koropiko i te Atua, ahakoa ko hea ngā wāhi e noho nei koutou, i te wairua me te pono; ā, kia noho koutou i runga i te whakawhetai ia te rā, ia te rā, mō ngā arohatanga maha me ngā manaakitanga maha e whakatau iho ki runga i a koutou.

39 Āe rā, e whakahau ana anō au ki a koutou, e aku teina, kia mataara koutou kia inoi tonu, kia kore ai koutou e ārahina atu e ngā whakawai o te rēwera, kia kore ai ia e whaikaha ki runga i a koutou, kia kore ai koutou e meinga hei pononga māna hei te rā whakamutunga; nana rā, kāore ia e utu i a koutou ki tētahi mea pai.

40 Ināianei ā e aku teina aroha, ka tohe atu au ki a koutou kia manawanui ai, ā, kia pīkauria ki ngā momo whakamamaetanga katoa; kia kore koutou e taunu i te hunga e makaia atu koutou nā tō koutou tino rawakoretanga, kei meinga koutou hei kaihara pēnā i a rātou;

41 Engari kia manawanui koutou, me te ū i roto i ērā whakamamaetanga, i runga i te tūmanako kaha hei tōna rā ka okioki i ā koutou mamaetanga.