1 Ināianei ā i pahawa ake, nā, ka māia te ngākau o Moronai i tana whiwhinga i tēnei pukapuka, ā, ka kī rawa i te hari nui whakaharahara nā te ū o Pahorana, ā, ehara ia i te kaikaiwaiū ki te herekoretanga me te kara o tōna whenua.

2 Engari i tino tangi hotuhotu anō hoki ia nā te kino o te hunga nā rātou a Pahorana i pei atu ai i te nohoanga-whakawā, āe rā, hei whakarāpoto nā te hunga kua haututū ki tō rātou whenua me tō rātou Atua anō hoki.

3 Ā, i pahawa ake, nā, ka kūmea e Moronai tētahi ope tāngata iti, e rite ana ki te hiahia a Pahorana, ka hoatu e ia te mana whakahau ki a Rīhai rāua ko Teanakumu i runga i te toenga atu o te tana tauā, ā, ka whakatika atu tana hīkoi whakatewhenua o Kiriona.

4 Ā, ka hīkina ake e ia te kara herekoretanga i roto i ngā wāhi katoa i tomo ai ia, ā, ka whakakaongia e ia ngā tāngata katoa i taea ai e ia i runga i tana hīkoi whakatewhenua o Kiriona.

5 Ā, i pahawa ake, nā, ka karapinepine atu ngā mea manomano ki tana kara, ā, ka hāpai ake i ō rātou hoari hei tiaki i tō rātou whenua, kia kore ai rātou e heke atu ki raro i te hereheretanga.

6 Ā pēnei, i te wā kua whakakaongia e Moronai ngā tāngata katoa i taea ai e ia i runga i tana hīkoi, ka tae atu ia ki te whenua o Kiriona; ā, ka pakari rawa atu rātou i tana whakakotahi i āna tāngata ki ērā o Pahorana, he kaha ake anō i ērā tāngata o Pakuha, koia te kīngi o aua kaitītore nā rātou nei i āia atu ai ngā tāngata herekore ki waho atu i te whenua o Harahemara, ā, kua riro i a rātou te whenua.

7 Ā, i pahawa ake, nā, ka heke atu a Moronai rāua ko Pahorana me ā rāua tauā ki roto i te whenua o Harahemara, ā, ka tū atu ki te pā, ā, ka tūtaki ki ngā tāngata a Pakuha, nā konā tutū ai te puehu i te whawhai.

8 Ā nana, ka whakamatea a Pakuha kātahi ka mauheretia atu āna tāngata, ā, ka whakahokia atu a Pahorana ki tōna nohoanga-whakawā.

9 Ā, ka whakawākia ngā tāngata o Pakuha, e rite ana ki te ture, me ērā tāngata-kīngi kua kahakina atu, ā, kua makaia atu ki roto i te whareherehere; ā, ka whakamatea rātou e rite ana ki te ture; āe rā, ērā tāngata o Pakuha me ērā tāngata-kīngi, ko ngā tāngata katoa kīhai i whakaae ki te hāpai patu hei tiaki i tō rātou whenua, engari ki te whawhai ki a ia, ka whakamatea.

10 Ā pēnei ka tika pū anō kia ngohengohe rawa tēnei ture hei oranga mō tō rātou whenua; āe rā, ka whakamatea wawetia te tangata e kitea ai e whakaparahako ana i tōna herekoretanga e rite ana ki te ture.

11 Ā pēnei te whakamutunga o te tau toru ngahuru o te whakahaeretanga a ngā kaiwhakawā i runga i te iwi o Nīwhai; kua whakahokia mai e Moronai rāua ko Pahorana te maungārongo ki runga i te whenua o Harahemara, ki waenganui i tō rātou ake iwi, kua whakamatea te hunga katoa kāore i pono ki te tikanga herekoretanga.

12 Ā, i pahawa ake i te tīmatanga o te tau toru ngahuru mā tahi o te whakaheretanga a ngā kaiwhakawā i runga i te iwi o Nīwhai, ka mea a Moronai kia tukuna atu he ō me tētahi tauā anō hoki o ngā tāngata ono mano ki a Heramana, hei āwhina i a ia i tana tiaki i taua wāhanga o te whenua.

13 Ā, i mea anō ia kia tonoa atu ai tētahi tauā ono mano tāngata me ētahi kai ki ngā tauā a Rīhai rāua ko Teanakumu. Ā, i pahawa ake, nā, kua pēneitia hei whakatūwatawata i te whenua ki ngā Rāmana.

14 Ā, i pahawa ake, nā, ka waiho e Moronai rāua ko Pahorana tētahi ope tāngata nunui i te whenua o Harahemara, kātahi ka whakatika atu tā rātou hīkoi me tētahi ope tāngata nui whakatewhenua o Nīwhaihā, e ū ana te whakaaro ki te tūraki iho i ngā Rāmana i taua pā.

15 Ā, i pahawa ake, nā, i te hīkoi rātou whakatewhenua, ka hopukia e rātou tētahi ope tāngata Rāmana nunui, ā, ka whakamatea ngā mea tokomaha o rātou, ā, ka murua atu ā rātou ō me ā rātou rākau whawhai.

16 Ā, i pahawa ake i muri iho i tā rātou hopuranga i a rātou, ka meatia rātou e rātou kia uru atu ai ki roto i tētahi kawenata kia kaua rawa e hāpai rākau whawhai anō ki ngā Nīwhai.

17 Ā, i te wā i uru atu ai rātou ki roto i tēnei kawenata ka tonoa atu rātou e rātou kia nohotahi ai me te iwi o Amona, ā, neke atu i te whā mano te tokomahatanga kua whakamatea nei.

18 Ā, i pahawa ake, nā, i te wā i tonoa atu rātou e rātou ka haere tonu atu tā rātou hīkoi whakatewhenua o Nīwhaihā. Ā, i pahawa ake, nā, i tā rātou taenga atu ki te pā o Nīwhaihā, ka whakatūria e rātou ō rātou tēneti i ngā mānia o Nīwhaihā, e tū tata ana ki te pā o Nīwhaihā.

19 Nā, i te hiahia a Moronai kia puta mai ngā Rāmana ki te whawhai ki a rātou, i runga i ngā mānia; engari ko ngā Rāmana, e mōhio ana ki tō rātou māia nui whakaharahara, me tā rātou tirohanga atu i tō rātou tokomahatanga, nō reira kāore rātou i māia kia puta atu ki a rātou; nō reira kīhai rātou i puta mai ki te whawhai i taua rā.

20 Ā, i te taunga ihotanga o te pō, ka haere atu a Moronai i roto i te pōuriuritanga o te pō, ā, ka tae ki runga i te taiapa kia tirotiro atu ai kei tēhea wāhanga o te pā e noho puni ana ngā Rāmana me tō rātou tauā.

21 Ā, i pahawa ake, nā, i te taha rāwhiti rātou, e tata ana ki te tomokanga; ā, i te moe katoa rātou. Ināianei ā, ka hoki atu a Moronai ki tana tauā, ā, ka mea ia i a rātou kia whakarite wawe rātou i ngā aho kaha me ngā arawhata, kia tukuna iho ai i runga i te taiapa ki te taha whakaroto o te taiapa.

22 Ā, i pahawa ake, nā, ka mea a Moronai kia hīkoi atu ana tāngata me te eke ake ki runga i te taiapa, kātahi ka tukuna iho rātou e rātou anō ki roto i taua wāhanga o te pā, āe rā, ki te taha rāwhiti pū anō, kāore i reira ngā Rāmana e noho puni ana me ō rātou tauā.

23 Ā, i pahawa ake, nā, kua tukuna iho rātou katoa ki roto i te pā i te pō, he mea nā ā rātou aho kaha me ā rātou arawhata; pēnei i te tākiritanga o te ata kei roto katoa rātou i ngā taiapa o te pā.

24 Ināianei ā, i te ohonga ake o ngā Rāmana me tā rātou kitenga atu i ngā tauā o Moronai kei roto nei i ngā taiapa, i te mataku rawa atu rātou, nā konā tahuti atu ai rātou mā te putanga.

25 Ināianei ā, i te kitenga atu o Moronai i tā rātou tahutitanga atu i tōna aroaro, ka mea ia i āna tāngata kia hīkoi atu ki a rātou, ā, ka patua ngā mea tokomaha, ā, ka karapotia ērā atu mea tokomaha, ā, ka mauheretia atu rātou; ā, ka tahuti atu te toenga atu o rātou ki roto i te whenua o Moronai, kei roto nei i ngā rohe e tata ana ki te takutai moana.

26 Pēnei i riro anō ai a Moronai rāua ko Pahorana i te pā o Nīwhaihā kīhai i ngaro tētahi wairua kotahi; ā, he tokomaha ngā Rāmana i patua ai.

27 Nā, i pahawa ake, nā, i hiahia ngā Rāmana tokomaha ki te hono atu ki te iwi o Amona, ā, kia meinga he iwi herekore.

28 Ā, i pahawa ake, nā, ko te hunga katoa i hiahia, nā, ka whakaaehia atu e rite ana ki ō rātou hiahia.

29 Nō reira, ka hono atu ngā mauhere Rāmana katoa ki te iwi o Amona, ā, ka tīmata tā rātou mahi kaha, e ngaki ana i te whenua, e whakatupu ana i ngā kākano katoa o ia āhua, o ia āhua, me ngā kāhui o ia tū, o ia tū; ā, pēnei ka wātea ngā Nīwhai i taua taumahatanga nui; āe rā, nā konā kua wātea rātou i ngā mauhere katoa nō ngā Rāmana.

30 Nā, i pahawa ake i a Moronai, whai muri iho i te rironga i a ia te pā o Nīwhaihā, i te mea kua kahakina atu ngā mauhere maha, nā konā tino iti haere ai ngā tauā Rāmana, ā, kua whakahokia mai ngā Nīwhai tokomaha kua kahakina hereheretia atu i mua, nā konā ka whakakaha rawa ake i te tauā o Moronai; nō reira ka haere atu a Moronai i te whenua o Nīwhaihā ki te whenua o Rīhai.

31 Ā, i pahawa ake, nā, i te kitenga o ngā Rāmana i te haerenga mai a Moronai ki a rātou, ka mataku anō rātou kātahi ka tahuti atu anō rātou i mua i te aroaro o te tauā a Moronai.

32 Ā, i pahawa ake, nā, ka aruaru a Moronai rātou ko tana tauā i a rātou mai i tētahi pā ki tētahi pā, tae noa ki tā rātou tūtakiranga ki a Rīhai rāua ko Teanakumu; ā, ka tahuti ngā Rāmana i a Rīhai rāua ko Teanakumu, tae iho ana ki ngā rohe e tata ana ki te takutai moana, tae atu ana ki tā rātou taenga atu ki te whenua o Moronai.

33 Ā, i te huihui ngatahitia ngā tauā katoa o ngā Rāmana, nā konā he rōpū kotahi rātou katoa i te whenua o Moronai. Nā, i reira anō hoki a Amonoro, te kīngi o ngā Rāmana i te taha i a rātou.

34 Ā, i pahawa ake, nā, ka noho hōpuni a Moronai rātou ko Rīhai, ko Teanakumu me ō rātou tauā taiāwhio noa i ngā rohe o te whenua o Moronai, nā konā kua karapotia ngā Rāmana i roto i ngā rohe e tata ana ki te koraha i te tonga, ā, i ngā rohe e tata ana ki te koraha i te taha rāwhiti.

35 Ā pēnei, ka noho hōpuni rātou mō te pō. Nana rā, i te ngenge ngā Nīwhai me ngā Rāmana anō hoki nā te nui o te hīkoiranga; nō reira kīhai rātou i whakatau rautaki i te pō, hāunga ko Teanakumu; nā te mea i te tino riri ia ki a Amorono, me Amarikaia tana tuakana, koia te pūtake o tēnei pakanga nui, pakanga roa i waenganui i a rātou me ngā Rāmana, koia te pūtake o te pakanga nui me te whakaheke toto nui, āe rā, me te matekai nui.

36 Ā, i pahawa ake, nā, ka haere atu a Teanakumu i runga i tana riri ki roto i te hōpuni o ngā Rāmana, ā, ka tukuna iho e ia anō ki roto i ngā taiapa o te pā. Ā, ka haere atu ia me tētahi aho, mai i tētahi wāhi ki tētahi wāhi, nā konā kite mārika ia i te kīngi; ā, ka whiua atu tētahi tao ki a ia, ngoto rawa i a ia e pātata ana ki te ngākau. Engari nana, ka whakaoho te kīngi i āna pononga i mua i tana matenga, nā konā whaiwhai atu rātou i a Teanakumu, kātahi ka whakamatea ia.

37 Nā, i pahawa ake, nā, i te wā i mōhio ai a Rīhai rāua ko Moronai kua mate a Teanakumu ka tino pōuri rawa atu rāua; nana rā, he tangata ia kua māia tana whawhai mō tōna whenua, āe rā, he hoa pono ia nō te herekoretanga; ā, he maha ōna whakamamaetanga nanakia i pākia ai ia. Engari nana, kua mate ia, ā, kua haere i te huarahi o te ao katoa.

38 Nā, i pahawa ake, nā, ao ake te rā ka hīkoi atu a Moronai, ka huaki atu ki runga i ngā Rāmana, nā konā whakamatea ai ki tētahi parekura nunui; ā, i āia atu rātou e rātou ki waho i te whenua; ā, ka tahuti atu rātou, kāore rātou i hoki mai anō i tērā wā ki te whawhai ki ngā Nīwhai.

39 Ā pēnei whakamutua ai te tau toru ngahuru mā tahi o te whakaheretanga o ngā kaiwhakawā i runga i te iwi o Nīwhai; ā pēnei kua pakanga rātou i ngā pakanga, me ngā whakahekenga toto, me te matekai, me te whakamamaetanga, mō te takiwā o ngā tau maha.

40 Ā, kua heipū ngā kōhurutanga, me ngā tautohetohenga, me ngā tītorehanga, me ngā tūmomo kino katoa i waenganui i te iwi o Nīwhai; hei aha koa hei painga mō te hunga tika, āe rā, he mea nā ngā inoi o te hunga tika, kua tohua rātou.

41 Engari nana, kua pakeke ngā Nīwhai me ngā Rāmana nā te tino roa o te pakanga; ā, he tokomaha ngā mea i whakangāwaritia nā ō rātou whakamamaetanga, nā konā ka whakaiti rātou i a rātou anō i te aroaro o te Atua, i roto pū anō i te hōhonutanga o te whakaiti.

42 Ā, i pahawa ake, nā, whai muri iho i tā Moronai whakatūwatawata i aua wāhanga o te whenua e tino puare ana ki ngā Rāmana, tae noa ki te wā kua tino pakari ēnā, ka hoki ia ki te pā o Harahemara; ā, ka hoki anō a Heramana ki tōna kāinga tuku iho; ā, kua whakapūmauhia anōtia te rangimārie i waenganui i te iwi o Nīwhai.

43 Ā, ka tuku iho a Moronai i te mana whakahaere o āna tauā ki roto i ngā ringaringa o tana tama, ko Moronaihā tōna ingoa; kātahi ka hoki atu ia ki tōna ake whare kia whakapau ai i te toenga o ōna rā i runga i te rangimārie.

44 Ā, ka hoki atu a Pahorana ki tōna nohoanga-whakawā; ā, ka waha ake anō a Heramana ki runga ki a ia anō te tikanga ki te kauhau atu i te kupu a te Atua ki te iwi; i te mea nā ngā pakanga me ngā tautohetohenga maha kua tika haere kia whakaritea anōtia tētahi tikanga i te hāhi.

45 Nō reira, ka haere atu a Heramana rātou ko ana teina, ā, i whakapuaki atu i te kupu a te Atua i runga i te kaha ki te whakapakepake i ngā tāngata tokomaha e pā ana ki ō rātou whakarihariha, nā tēnei ka mea rātou kia rīpenetā i ō rātou hara, ā, kia rūmakina ki te Ariki tō rātou Atua.

46 Ā, i pahawa ake, nā, i whakapūmau anō rātou i te hāhi o te Atua, puta noa i te whenua katoa.

47 Āe rā, kua whakaritea he tikanga e pā ana ki te ture. Ā, ka kōwhiria ō rātou kaiwhakawā, me ō rātou kaiwhakawā matua.

48 Ā, ka whaioranga haere anō te iwi o Nīwhai i te whenua, ā, ka whakatokomaha haere, ā, ka tino pakari haere anō i te whenua. Ā, ka tino whairawa haere anō rātou.

49 Engari hei aha koa ō rātou taonga, tō rātou kaha rānei, tō rātou whaioranga rānei, kīhai rātou i neke ake i runga i te whakapehapeha o ō rātou karu; kāore rānei rātou i te pūhoi kia maumahara ki te Ariki tō rātou Atua; engari i tino whakaitia rawatia iho rātou e rātou anō i tōna aroaro.

50 Āe rā, i maumahara rātou ki ngā mea nui i mahia ai e te Ariki mō rātou, nāna tonu rātou i whakaputa i te mate, i ngā herenga hoki, i ngā whareherehere hoki, i ngā tūmomo whakamamaetanga hoki o ia āhua, o ia āhua, i whakaputaina rātou e ia i ngā ringaringa o ō rātou hoariri hoki.

51 Ā, ka hono tonu tā rātou inoi ki te Ariki tō rātou Atua, nā konā ka manaaki te Ariki i a rātou, e rite ana ki tana kupu, nā tērā ka pakari haere rātou, ā, ka whaioranga i te whenua.

52 Ā, i pahawa ake, nā, kua meatia ēnei mea katoa. Ā, ka mate a Heramana, i te tau toru ngahuru mā rima o te whakahaeretanga a ngā kaiwhakawā i runga i te iwi o Nīwhai.