1 Ā, i pahawa ake, nā, whai muri iho i ngā rā e rua me ngā pō e rua, whano ka mauria atu e rātou tōna tīnana kia whakatakotohia atu ki roto i tētahi ana tūpāpaku, i hangaia ai e rātou hei tanu i ō rātou tūpāpaku.

2 Nā, i te mea kua rongo te kuini i te rongonuitanga o Amona, nō reira ia tonoa atu ai, ā, hiahia ai kia haere ai ia ki a ia.

3 Ā, i pahawa ake, nā, i mahi a Amona i tāna i whakahaua ai, ā, ka haere atu ia ki te kuini, ā, i te hiahia ia kia mōhio ai he aha tāna hei mahinga māna.

4 Ā, ka kī atu ia ki a ia: Kua whakamōhiotia ahau e ngā pononga a tāku hoatāne, nā, he poropiti koe nā tētahi Atua tapu, ā, he mana tōu anō hoki ki te mahi i ngā mahinga nunui i runga i tōna ingoa;

5 Nō reira, mehemea kei te tika tēnei, kei te hiahia au kia tomo atu koe ki roto ki tāku hoatāne, nā te mea kua rua ngā rā, ā, kua rua ngā pō ia e takoto ana i tōna moenga; ā, e kī ana ētahi kāore ia i mate, engari e kī ana ētahi atu kua mate ia, ā, e haunga ana ia, ā, e tiak ana kia whakatakotoria ia ki roto i tētahi ana tūpāpaku; engari ki ahau ake, kāore ia i te pirau ki ahau.

6 Nā, koinei tā Amona i hiahia ai, n āte mea i mōhio ia kei raro a kīngi Ramoni i te mana o te Atua; i mōhio ia kua makaia atu te ārai pōuri i tōna hinengaro, ā, ko te māramatanga i whakamāramatia ake ai tōna hinengaro, koia ko te māramatanga o te korōria o te Atua, koia tētahi māramatanga mīharo o tōna pai—āe rā, kua tuia atu e tēnei māramatanga i tētahi hari nui i tōna wairua, ā, i te mea kua whakakorea atu te kapua pōuri, ā, kua whakakāngia ake te māramatanga o te oranga mutunga kore i tōna wairua, āe rā, i mōhio ia kua warea tōna tīnana māori e tēnei mea, ā, kua kahakina atu ia i roto i te Atua—

7 Nō reira, ko te hiahia a te kuini ki a ia tōna hiahia anake. Nō reira, ka haere atu ia kia kite ai i te kīngi e rite nei ki tā te kuini i hiahia ai; ā, ka kite ia i te kīngi, ā, i mōhio ia kāore ia i te mate.

8 Kātahi ia ka kī atu ki te kuini: Kāore ia i te mate, engari e moe ana ia i roto i te Atua, ā, hei te aonga ake o te rā ka oho anō ia; nō reira kaua e tanumia ia.

9 Ā, ka kī atu a Amona ki a ia: E whakapono ana rānei koe ki tēnei? Ā, ka kī atu ia ki a ia: Kāore kē atu tētahi whakaaturanga hāunga ia ko tō kupu, me ngā kupu a ā māua pononga; hei aha koa e whakapono ana ahau ka rite ki tāu i kī ake nā.

10 Ā, ka kī atu a Amona ki a ia: Kua manaakitia koe nā tō whakapono nui; ko taku kupu tēnei ki a koe, e whae, kāore i pēnei te nui o te whakapono ki waenganui i te iwi katoa o ngā Nīwhai.

11 Ā, i pahawa ake, nā, ka toro atu ia i te moenga ki tāna hoatāne, nō taua wā tae noa atu ki taua wā o te aonga ake o te rā kua whakataua e Amona hei ohonga ake mōna.

12 Ā, i pahawa ake, nā, i oho ia, e rite nei ki ngā kupu a Amona; ā, i a ia e oho ake ana, ka toro atu ia i tōna ringa ki te wahine, ā, ka kī: Kia whakapaingia te ingoa o te Atua, ā, kua manaakitia koe.

13 Nā te mea e ora ana koe, nana, kua kite au i tōku kaihoko; ā, ka haere mai ia, ā, ka whānau mai i tētahi wahine, ā, māna e hoko ngā tāngata katoa e whakapono nei ki tōna ingoa. Nā, i tana kōrerotanga i ēnei kupu, kua pupuhi tōna ngākau i roto i a ia, ā, ka totohu iho anō ia i te koa; ā, ka totohu iho anō te kuini, kua warea nei e te Wairua.

14 Nā, i te kitenga ake a Amona i te Wairua o te Ariki e ririrngi iho ana e rite nei ki ana inoi ki ngā Rāmana, ki ōna tuākana, ko rātou nei te pūtake o ngā tangihanga nui i waenganui i ngā Nīwhai, i waenganui rānei i te iwi o te Atua nā ō rātou hara me ā rātou whakarerenga iho, ka hinga iho ia ki ōna turi, ā, ka tīmata tana riringi iho i tōna wairua i runga i te inoi me te whakawhetai ki te Atua mō tāna i mea ai ki ōna tuākana; ā, kua warea anōtia ia ki te hari; ā, i pēnei tā rātou tokotoru totohu iho ki te papa.

15 Nā, i te kitenga o ngā pononga a te kīngi kua hinga iho rātou, ka tīmata anō hoki rātou ki te karanga ake ki te Atua, nā te mea kua tau iho te wehi o te Ariki ki runga i a rātou anō hoki, nā te mea ko rātou ngā mea i tū ai i mua i te kīngi ki te whakaatu atu ki a ia e pā ana ki te kaha nui o Amona.

16 Ā, i pahawa ake, nā, i karanga ake rātou i runga i te ingoa o te Ariki, i tō rātou kaha, tae atu ana ki tā rātou hinganga iho ki te whenua, hāunga ia ko tētahi o ngā wahine Rāmana, ko Apihi tōna ingoa, he maha ngā tau kua whakatahuritia mai ia ki te Atua, he mea nā tētahi kitenga mīharo a tōna matua—

17 Pēnei, kua whakatahuritia mai ki te Ariki, ā, kīhai rawa i whakamōhiotia atu, nō reira, i tana kitenga ake kua hinga katoa ngā pononga a Ramoni ki te whenua, me tōna ariki wahine, arā, te kuini, me te kīngi, me Amona e takoto whārōrō ana i runga i te whenua, kua mōhio ia ko te kaha o te Atua; kātahi ka whakaaro ia he wā pai tēnei, mā te whakaatuhia atu ki te iwi i ahatia i waenganui i a rātou, nā, mā te kitenga atu i tēnei āhuatanga ka whakapono rātou i te mana o te Atua, nō reira ia oma atu ai ki tēnā whare, ki tēnā whare, e whakamōhiotia atu ana ki te iwi.

18 Ā, ka tīmata tā rātou huihui i a rātou anō ki te whare o te kīngi. Ā, he tini rātou i haere mai ai, ā, i whakamīharotia rātou i runga i te kitenga atu i te kīngi, me te kuini, me ā rātou pononga e takoto whārōrō ana i runga i te whenua, i te takoto katoa rātou anō nei kua mate rātou; ā, i kite anō rātou i a Amona, ā nana, he Nīwhai ia.

19 Ināianei ā, ka tīmata te iwi ki te amuamu i waenganui i a rātou; e mea ana ētahi, nā, he kino nui kua tau iho ki runga i a rātou, i runga rānei i te kīngi me tōna whare, nā te mea kua tukuna e ia tētahi Nīwhai kia noho tonu ai i te whenua.

20 Engari i kohete ētahi atu i a rātou, e mea ana: Nā te kīngi tēnei kino i tau mai ai ki runga i tōna whare, nā te mea i whakamate ia i āna pononga mō rātou ā rātou kāhui i whakamararatia atu i ngā wai o Hepuha.

21 Ā, i kohetetia anōtia rātou e aua tāngata i tū ai i ngā wai o Hepuha, ā, i whakamararatia ai ngā kāhui a te kīngi, nā te mea i te riri rātou ki a Amona nā te tokomaha o ō rātou teina i patua ai e ia i ngā wai o Hepuha, i a ia e tiaki ana i ngā kāhui a te kīngi.

22 Nā, ko tētahi o rātou, kua whakamatea tana teina ki te hoari o Amona, nā konā i te tino riri rawa ia ki a Amona, i unu atu tana hoari kātahi ka haere atu kia whakatakahia iho ai ki runga i a Amona, kia patua ia; ā, i a ia e hāpai ake ana i tana hoari kia patua ai ia, nana, ka mate ia.

23 Nā, e kite nei tātou kīhai i taea a Amona te patu, nā te mea i kī atu te Ariki ki a Mōhia, tōna matua: Māku ia e tohu, ā, ka rite ki tō whakapono te meatanga ki a ia—nō reira, i tukuna atu ia e Mōhia ki te Ariki.

24 Ā, i pahawa ake, nā, i te kitenga ake o te minenga kua mate te tangata nāna te hoari i hāpai ake kia whakamate i a Amona, ka tau iho te wehi ki runga i a rātou katoa, ā, kīhai i māia ki te toro atu i ō rātou ringa kia pā ai ki a ia, ki tētahi o te hunga rānei kua hinga iho; ā, ka tīmata tō rātou mīharo i waenganui i a rātou anō he aha rā te pūtake o tēnei kaha nui, he aha rānei te tikanga o ēnei mea katoa.

25 Ā, i pahawa ake, nā, he tokomaha i waenganui i a rātou i kī ai ko Amona te Wairua Nui, ā, ko ētahi atu i kī ai kua tonoa ia e te Wairua Tapu;

26 Engari i kohetehia atu rātou katoa e ētahi atu, e mea ana he taniwhā ia kua tonoa mai i ngā Nīwhai ki te whakatīwheta i a rātou.

27 Ā, i reira ētahi i kī ai kua tonoa mai a Amona e te Wairua Nui ki te whakamamae i a rātou nā ō rātou hara; ā, ko te Wairua Nui tērā i tiaki ai i ngā Nīwhai i ngā wā katoa, kua whakaputaina rātou i ō rātou ringaringa i ngā wā katoa; ā, i kī ake anō rātou ko tēnei Wairua Nui nāna nei i whakangaro te tokomaha o ā rātou teina, arā, ko ngā Rāmana.

28 Ā, ka tīmata pēnei te tautohetohenga nui i roto i a rātou. Ā, i a rātou e tautohetohe pēnei ana, ka tae mai te pononga wahine nāna nei rātou i mea kia huitahi ai te minenga, ā, ka pōuri ia i tana kitenga atu i te tautohetohenga nui i waenganui i te minenga, ā, heke ana ngā roimata.

29 Ā, i pahawa ake, nā, ka haere atu ia ka mau ki te ringa o te kuini, me kore pea e ara ake ia i te whenua; ā, pā kau ki tōna ringa ka oho ake ia, ā, ka tū ake ki runga i ōna waewae, ā, ka karanga ake i te reo kaha, e mea ana: Korōria ki a Ihu, kua whakaorangia mai au i te ao rēwera whakarihariha! Korōria ki te Atua, kia aroha mai rā ki tēnei iwi!

30 Ā, i tana kōrerotanga iho i tēnei, ka pupuru ia i ana ringaringa, e kī ana i te hari, e kōrero ana i ngā kupu maha kīhai i māramatia; ā, i tana mahinga i tēnei, ka mauria e ia te kīgi, a Ramoni, ki tana ringa, ā, nana, ka oho ake ia, ā, ka tū i runga i ōna waewae.

31 Kātahi ia, i taua wā tonu, i tana kitenga atu i te tautohetohenga i waenganui i tana iwi, ka haere atu, ā, ka tīmata ki te kohete i a rātou me te whakaako i a rātou i ngā kupu i rangona ai i te kupu o Amona; ā, ka whakapono ngā tāngata katoa i rongo ai i ana kupu, ā, ka tahuri ki te Ariki.

32 Engari he tokomaha i waenganui i a rātou kīhai i pai ki te whakarongo ki ana kupu; nō reira rātou haere atu ai i ā rātou ake huarahi.

33 Ā, i pahawa ake, nā, i te ohonga ake a Amona ka minita anō ia ki a rātou, ā, ka pērā anō ngā pononga a Ramoni; ā, i whakapuaki tahi rātou katoa i te mea kotahi—nā, kua panonitia ō rātou ngākau; nā, kāore ō rātou hiahia ki te mahi kino.

34 Ā, nana, he tokomaha i whakapuaki atu ki te iwi, nā, kua kite rātou i ngā anahera, ā, i kōrero anō ki a rātou; ā, pēnei kua kōrero atu rātou ki rātou i ngā mea o te Atua me tōna tika.

35 Ā, i pahawa ake, nā, he tokomaha ngā mea i whakapono ai ki ā rātou kupu; ā, i rumakina ngā mea katoa i whakapono ai; ā, ka meinga rātou hei iwi tika, ā, i whakapūmau rātou i tētahi hāhi i waenganui i a rātou.

36 Ā, i pēnei te tīmatanga o ngā mahi a te Ariki i waenganui i ngā Rāmana; i pēnei te tīmatanga o tā te Ariki maringitanga iho i tōna Wairua i runga i a rātou; ā, e kite ana tātou kua torona atu tōna ringa ki ngā tāngata katoa e rīpenetā ai, ā, e whakapono ai i tōna ingoa.