1 Nā, i te kitenga ake o Arami kua ngū a Tēroma i ngā kupu a Amureke, nā te mea i kite ia kua mau ia i a Amureke i roto i āna rūkahu me āna nukarau hei whakangaro i a ia, ā, i tana kitenga atu kua tīmata tana wiri i te mōhiotanga ki tōna kaniawhea, ka puaki ia i tōna māngai kātahi ka tīmata ki te kōrero atu ki a ia, me te whakapūmau i ngā kupu a Amureke, me te whakamārama atu i ngā mea i tua atu i tā Amureke i mea ai.

2 Nā, i rangona ngā kupu i kōrerotia ai e Arami ki a Tēroma e te iwi e tūtata ana; nā, he nui te whakaminenga, ā, koinei te āhua o tana kōrero:

3 Nā, e Tēroma, i te mea kua mau koe i roto i āu rūkahu me āu nukarau, nā, kīhai noa koe i rūkahu ki ngā tāngata anake engari kua rūkahu koe ki te Atua; nana rā, e mōhio ana ia ki ōu whakaaro katoa, ā, e kite ana koe kua whakamōhiotia ōu whakaaro ki a māua e te Wairua;

4 Ā, e kite ana anō koe e mōhio ana māua ki tāu mahere tinihanga, e rite ki tā te rēwera tinihanga, kia rūkahu, ā, kia nukarau koe ki tēnei iwi kia huri ai koe i a rātou ki a māua, kia tāwai i a māua, ā, kia makaia atu māua ki waho—

5 Nā, he mahere tēnei nā tō hoariri, ā, nāna tōna mana i whakamahi ki runga i a koe. Nā, e hiahia ana au kia mahara koe, nā, ko tāku e kī atu nei ki a koe, ka kī atu au ki te katoa.

6 Ā, nana, ko taku kupu tēnei ki a koutou katoa koinei te tāhere a te hoariri, nāna nei i whakatakoto kia hopu ai i tēnei iwi, kia kūmea iho koutou ki raro i tōna mana, kia karapotia iho koutou e āna mekameka, kia mekamekatia iho koutou ki te whakangaromanga mutunga kore, e rite ana ki te kaha o tana hereheretanga.

7 Nā, i te kōrerotanga ake a Arami i ēnei kupu, ka tino nui ake te wiriwiri o Tēroma, nā te mea i kaha haere te whakapakepake i a ia e pā ana ki te mana o te Atua; ā, i whakapakepakehia anōtia ia kua matatau a Arami rāua ko Amureke e pā ana ki a ia, nā te mea i whakapakepakehia ia kua matatau nei rāua ki ana whakaaro me ngā hiahia o tōna ngākau; nā te mea kua tukuna iho tētahi kaha ki a rāua e mōhio ai rāua ki ēnei mea e ai ki te wairua o te poropititanga.

8 Ā, ka tīmata a Tēroma ki te āta uiui mārire atu ki a rāua, kia nui ake ai tana mātau e pā ana ki te kīngitanga o te Atua. Ā, ka kī atu ia ki a Arami: He aha te tikanga o tēnei mea kua kōrerotia nei e Amureke e pā ana ki te aranga ake o te hunga mate, nā, ka ara ake te katoa i te mate, ko te hunga tika me te hunga kino, ā, ka mauria atu ki te aroaro o te Atua kia whakawākia ai e rite ana ki ā rātou mahinga?

9 Ināianei ā, ka tīmata a Arami ki te whakamārama atu i ēnei mea ki a ia, e mea ana: Kua tukuna ki ngā tāngata tokomaha kia mōhio ai ki ngā mea ngaro a te Atua; hei aha koa kua whakataua iho tētahi whakahau uaua ki runga i a rātou kia kaua rātou e whakamōhiotia atu hāunga e rite ana ki te wāhi o tana kupu e tukuna ana e ia ki ngā tamariki a te tangata, e rite ana ki tā rātou āta aro me tā rātou āta ū ki te mahi ki a ia.

10 Nō reira, ko te tangata e whakapakekehia ai tōna ngākau, koia anō te tangata e whiwhi nei i te wāhi iti o te kupu; ā, ko te tangata e kore nei e whakapakeke i tōna ngākau, ka tukuna atu ki a ia te wāhi nui o te kupu, tae atu ki te wā kua tukuna ki a ia kia mātau ai ia ki ngā mea ngaro a te Atua tae atu ki te wā e mātau ana ia ki ērā mea katoa.

11 Ā, ko te hunga e whakapakeke ai i ō rātou ngākau, ka tukuna ki a rātou te wāhi iti o te kupu tae atu ki te wā kāore tō rātou paku mōhio e pā ana ki āna mea ngaro; kātahi ka mauheretia atu rātou e te rēwera, ā, ka ārahina iho rātou e tōna hiahia ki te whakangaromanga. Nā koinei te tikanga o ngā mekameka o te ao rēwera.

12 Ā, kua mārama tā Amureke kōrero e pā ana ki te mate me te aranga o tēnei āhuatanga matemate ki tētahi āhuatanga mate kore, me te kawenga atu ki te aroaro o te pae whakawā o te Atua, kia whakawākia ai tātou e rite ai ki ā tātou mahinga.

13 Kātahi, mēnā kua whakapakekehia ō tātou ngākau, āe rā, mēnā kua whakapakekehia ō tātou ngākau ki te kupu, nā konā kāore e kitea ana i roto i a tātou, kātahi ka kino nanakia tō tātou āhuatanga, nā te mea ko reira hoki tātou whakahēngia ai.

14 Nā te mea mā ā tātou kupu tātou e whakahē, āe rā, mā ā tātou mahinga katoa tātou e whakahē; kāore tātou e kitea kohakoretia; ā, mā ō tātou whakaaro tātou e whakahē; ā, kua kore e māia tātou ki te titiro ake ki tō tātou Atua; ā, ka hari tonu tātou mehemea he kaha tō tātou ki te whakahau i ngā toka me ngā maunga kia hinga iho ki runga i a tātou kia hunaia tātou i tōna aroaro.

15 Engari e kore tēnei e taea; me haere mai tātou me te tū i tōna aroaro i roto i tōna korōria, i roto anō i tōna mana, i roto anō i tōna kaha, i tōna nui, i tōna mana kīngi, me te whakaae ki tō tātou whakamā mau tonu he tika katoa ana whakawākanga; nā, he tika ia i roto i ana whakawākanga katoa, ā, he nui tana whakaaroha ki ngā tamariki a te tangata, ā, kei a ia ngā mana katoa kia whakaorangia ia tangata, ia tangata e whakapono ana ki runga i tōna ingoa me te kawe mai i ngā hua pai e pai ana mō te rīpenetātanga.

16 Ināianei ā nana, ko taku kupu tēnei ki a koutou ko reira puta mai ai te mate, he matenga tuarua pū anō, koia te matenga o te wairua; ko reira tētahi wā ko te tangata e mate nei i ōna hara, e rite ana ki te matenga o te tinana, ka mate anō hoki i te matenga o te wairua; āe rā, ka mate ia ki ngā mea e pā ana ki te tika.

17 Ko reira te wā ka rite ō rātou whakamamaetanga ki tētahi roto ahi whānāriki, ko tōna mura e kake tonu ana mō āke tonu atu; ā, ko reira te wā e mekamekatia iho rātou ki tētahi whakangaromanga mutunga kore, e rite ana ki te kaha me te hereherenga o Hātana, nāna hoki rātou i whakaheke iho ki raro i tāna i pai ai.

18 Kāti, ko taku kupu tēnei ki a koutou, ka rite rātou me te mea nei kāore i meatia tētahi whakaoranga; nā te mea kāore rātou e taea ana te whakaora i runga i tā te Atua tika; ā, tē taea rātou e te mate, nā te mea kāore atu he pokenga.

19 Nā, i pahawa ake, nā, i te whakakapinga a Arami i ēnei kupu, ka tino mīharo haere te iwi;

20 Engari tērā anō tētahi tangata ko Anationa te ingoa, koia te kaiwhakahaere matua i waenganui i a rātou, ka haere mai ia ki mua me te kī atu ki a ia: He aha tēnei kua kōrerotia nei e koe, ka ara ake te tangata i te mate kātahi ka panonitia mai i tēnei āhuatanga matemate ki tētahi āhuatanga mate kore, nā, e kore te wairua e mate atu?

21 He aha te tikanga o te karaipiture, e mea ana i whakanohohia e te Atua te kerupima me te hoari mura i te taha rāwhiti o te kāri o Erene, kei uru atu ō tātou mātua tuatahi me te kai i ngā hua o te rākau o te ora, ā, ka ora tonu mō āke tonu atu? Ā, pēnei tātou kite ai kāore rawa he huarahi noa e ora ai rāua mō āke tonu atu.

22 Nā, ka kī atu a Arami ki a ia: Koinei te mea whano ka whakamāramahia e au. Nā, ka kite tātou i taka ai a Arama i runga i te kainga i te hua i rāhuitia ai, e ai ki te kupu a te Atua; ā, ka kite pēnei tātou, nā tēnei takanga, kua meinga ngā tāngata katoa hei iwi ngaro, ā, hei iwi taka.

23 Ināianei ā nana, ko taku kupu tēnei ki a koutou, nā, mehemea i āhei i a Arama te kai i te hua o te rākau o te ora i taua wā, kua kore he matenga, ā, kua koretake te kupu, e meinga ana te Atua hei kairūkahu, nā te mea i kī ai ia: Ki te kai koe, ka mate rawa koe.

24 Ā, e kite ana tātou e tau mai ana te mate ki runga i te tangata, āe rā, ko te matenga kua kōrerotia nei e Amureke, koia nei te matenga o te tinana; hei aha koa kua tukuna he wā ki te tangata kia rīpenetā; nō reira i meinga tēnei oranga hei āhuatanga whakamātau; he wā e whakarite ai te tangata kia tūtaki ai ki te Atua; he wā e whakarite ai mō taua āhuatanga mutunga kore kua kōrerotia nei e māua, koia hei muri atu i te aranga o te hunga mate.

25 Nā, me i kore te mahere o te hokonga, kua whakatakotoria mai i te orokohanganga o te ao, kua kore i taea tētahi aranga o te hunga mate; engari i whakatakotoria tētahi mahere o te hokonga, mā tēnei e pahawa ake te aranga o te hunga mate, kua kōrerotia nei.

26 Ināianei ā nana, mehemea i taea e ō tātou mātua tuatahi te haere atu ki te tango i tō te rākau o te ora kua pōuri rawa rāua mō āke tonu atu, kāore kau tētahi āhuatanga whakamātautau; ā, pēnei kua āraia atu te mahere o te hokonga, ā, kua koretake noa te kupu a te Atua, hei mea mana kore.

27 Engari nana, kāore i pērā; engari kua whakataua te tikanga ki te tangata kia mate rawa rātou; ā, hei tua i te mate, me haere ake rātou ki te whakawākanga, ko taua whakawākanga pū anō kua kōrerotia nei, koia te mutunga.

28 Ā, i muri iho i tā te Atua whakatau kia puta mai ai ēnei mea ki te tangata, nana, kātahi ia ka kite atu e tika pū ana kia mōhio ai te tangata e pā ana ki ngā mea i whakarite ai ia mō rātou;

29 Nō reira i tonoa ai e ia he anahera ki te kōrerorero ki a rātou, nāna te tangata i mea kia tirohia tōna korōria.

30 Ā, i tīmata rātou mai i taua wā haere ake nei ki te karanga i tōna ingoa; nō reira kōrero tahi ai te Atua ki te tangata, ā, i whakamōhiotia atu ki a rātou te mahere o te hokonga, i whakaritea i te orokohanganga o te ao; ā, nāna tēnei i whakamōhio atu ki a rātou e rite ana ki tō rātou whakapono, me tā rātou rīpenetātanga, me ā rātou mahinga tapu.

31 Nā reira, i tukuna e ia he whakahaunga ki te tangata, i te mea kua takahia wawetia e rātou ngā whakahaunga tuatahi mō te taha ki ngā mea o nāianei, ā, e meinga ana kia rite ki ngā atua, e mōhio ana te pai i te kino, e whakatauhia ana rātou anō i tētahi āhuatanga ki te mahi, kua whakatauhia rānei i tētahi āhuatanga kia mahi ki tā rātou e pai ai, e āhuareka ai, ki te mahi kino, ki te mahi pai rānei—

32 Nō reira i hoatu e te Atua ki a rātou he whakahaunga, whai muri iho i te whakamōhiotanga atu ki a rātou te mahere o te hokonga, kia kaua rātou e mahi kino, ko te matenga tuarua te utu mō reira, koia tētahi matenga mau tonu mō te taha ki ngā mea o te tika; nā te mea kāore e whaimana ana te mahere o te hokonga ki runga i ngā mea pērā, nā te mea tē taea ngā mahi a te tika te whakangaro, e rite ana ki te painga nui o te Atua.

33 Engari i karanga te Atua ki ngā tāngata, i runga i te ingoa o tana Tama, (koia ko te mahere o te hokonga kua whakatakotoria nei) e mea ana: Ki te rīpenetā koutou, ki te kore hoki e whakapakeke i ō koutou ngākau, kātahi au ka aroha ki a koutou, mā roto i taku Tama Kotahi Anake;

34 Nō reira, ko te tangata e rīpenetā ai, e kore ai rānei e whakapakeke i tōna ngākau, ka whai kerēme ia ki te whakaaroha mā roto i tāku Tama Kotahi Anake, ki tētahi murunga i ō rātou hara; koinei ngā mea e tomo mai ai ki taku okiokinga.

35 Ā, ko te tangata e whakapakeke i tōna ngākau me te mahi i te kino, nana, ko taku oati tēnei i runga i tōku riri, e kore ia e tomo mai ki taku okiokinga.

36 Ināianei ā, e aku teina, nana ko taku kupu tēnei ki a koutou, ki te whakapakeke koutou i ō koutou ngākau e kore koutou e tomo atu ki te okiokinga o te Ariki; nō reira e whakapātaritari ana ō koutou hara i a ia, nā konā, tukuna iho ia i tōna riri ki runga i a koutou e rite ana ki te whakapātaritari tuatahi, āe rā, e ai ki tana kupu i te whakapātaritari whakamutunga me te tuatahi anō hoki, ki te whakangaromanga mau tonu o ō koutou wairua; nō reira, e ai ki tana kupu, ehara i te mea mō te matenga tuatahi anake, engari mō te matenga whakamutunga anō hoki.

37 Ināianei ā, e aku teina, i te mea e mātau ana tātou ki ēnei mea, ā, e pono ana, kia rīpenetā tātou, ā, kia kaua tātou e whakapakeke i ō tātou ngākau, kia kore ai e whakapātaritari i te Ariki tō tātou Atua kia tōia iho mai tōna riri ki runga i a tātou i ēnei āna whakahaunga tuarua kua homai nei e ia ki a tātou; engari kia tomo atu rā tātou ki roto i te okiokinga o te Atua, kua whakaritea nei i runga i tana kupu.