1 Nā, i pahawa ake, nā, ka riri ake a Moronai i tana whiwhinga i tēnei pukapuka, nā te mea i mōhio ia he tino mātau rawa atu a Amonoro ki āna tinihanga; āe rā, i mōhio ia e mātau ana a Amonoro ehara i te take tika i meinga ai ia kia whawhai ai ki te iwi o Nīwhai.

2 Ā, ka kī ia: Nana, kāore au e whakawhitiwhiti mauhere ki a Amonoro ki te kore ia e whakahoki i āna tikanga, pērā i tāku i kī nei i taku pukapuka; engari au mō te tuku atu ki a ia kia whaikaha ake anō ia i tāna ināianei.

3 Nana, e mōhio ana au ki te wāhi e tiakina ai ngā Rāmana i ōku uri kua kahakina atu ai e rātou; ā, i te mea kāore a Amonoro i whakaae ki taku pukapuka, nana, ka hoatu e au ki a ia e rite nei ki āku kupu; āe rā, ka rapu mate au i waenganui i a rātou tae noa ki te wā e tonoa mai ai e rātou kia houhia te rongo.

4 Ināianei ā i pahawa ake, nā, i te kōrerotanga a Moronai i ēnei kupu, ka mea ia i tētahi kimihanga i waenganui i āna tāngata, me kore pea ia e rapu ai i tētahi uri nō Rāmana i waenganui i a rātou.

5 Ā, i pahawa ake, nā, i kimi rātou i tētahi, ko Rāmana tōna ingoa; ā, ko ia tētahi o ngā pononga a te kīngi i kōhurutia ai e Amarikaia.

6 Nā, ka mea a Moronai kia haere atu ai a Rāmana me tētahi ope iti o āna tāngata ki ngā kaitiaki i runga nei i ngā Nīwhai.

7 Nā, i tiakina ngā Nīwhai i roto i te pā o Kire; nō reira ka whakatau a Moronai i a Rāmana, ā, ka meatia e ia kia haere tētahi ope iti i tana taha.

8 Ā, i te ahiahi rā anō ka haere a Rāmana ki ngā kaitiaki i runga rā i ngā Nīwhai, ā nana, i kite rātou i a ia e haere mai ana kātahi rātou ka karanga atu ki a ia; engari ko tāna ki a rātou: Kei wehi; nana, he Rāmana ahau. Nana, kua mawhiti atu mātou i ngā Nīwhai, ā, e moe ana rātou; ā nana kua mau i a mātou ki tētahi wāhi o ā rātou waina, ā, mauria mai ana e mātou.

9 Nā, i te rongonga o ngā Rāmana i ēnei kupu ka pōhiritia ia i runga i te koa; ā, ka kī atu rātou ki a ia: Homai ki a mātou tētahi wāhi o tō waina, kia inu ai mātou; e koa ana mātou mōu i mau waina mai nā te mea kei te ngenge mātou.

10 Engari ka kī atu a Rāmana ki a rātou: Tukua kia pupuri mātou i ō mātou waina tae noa ki te wā e whawhai atu ai tātou ki ngā Nīwhai. Engari nā tēnei kōrero i nui ake ai tō rātou hiahia ki te inu i te waina;

11 Nā, ko tā rātou: Kei te ngenge mātou, nō reira tukua kia inu mātou i te waina, ā taihoa ake nei ka whiwhi waina anō mātou, e whakakaha ai i a tātou ki te whawhai atu ki ngā Nīwhai.

12 Ā, ka kī atu a Rāmana ki a rātou: Ka tukua koutou kia mea ai e rite ana ki ō koutou hiahia.

13 Ā, i pahawa ake, nā, ka inu nui rātou i te waina; ā, i reka ki te waha, nō reira ka nui ake tā rātou inu; ā, he mea kaha rawa, kua whakaritea hei mea kaha rawa.

14 Ā, i pahawa ake, nā, ka inu rātou, ā, ka hari, ā, nā wai rā ka haurangi katoa rātou.

15 Ināianei ā, i te kitenga ake o Rāmana mā i te haurangi katoa rātou, ā, i te moeau anō rātou, ka hoki atu rātou ki a Moronai me te whāki atu ki a ia i ngā mea katoa i pā ai ki a rātou.

16 Ināianei ā e rite ana tēnei ki te rautaki o Moronai. Ā, kua whakaritea e Moronai āna tāngata ki ngā rākau whawhai; ā, ka haere atu ia ki te pā o Kire, i ngā Rāmana e moeau ana, ā, e haurangi ana, ā, ka whiua atu ngā rākau whawhai ki ngā mauhere, nā konā kua mau patu katoa rātou;

17 Āe rā, ki ā rātou wāhine anō hoki, me ā rātou tamariki katoa, ko ngā mea katoa e āhei ana te hiki rākau whawhai, i te wā i whakamaua e Moronai aua mauhere katoa ki te patu; ā, i te wā i whakamahia ai ērā mea katoa i runga i te tino ngū.

18 Engari kua whakaohongia ngā Rāmana, nana, i te haurangi rātou, ā, kua taea rātou te patu e ngā Nīwhai.

19 Engari nana, ehara tēnei i te hiahia o Moronai; kāore ōna āhuareka atu ki te kōhuru me te whakaheke toto, engari i āhuareka ia ki te whakaora i tana iwi i te whakangaromanga; ā, nā konei e kore ia e tō mai i te hē ki runga i a ia anō, kua kore ia e taka iho ai ki runga i ngā Rāmana me te whakangaro i a rātou i tō rātou haurangitanga.

20 Engari kua tutuki ia i āna hiahia; nā te mea kua whakamaua ērā mauhere Nīwhai e ia ki te patu ko rātou e noho ana i roto i ngā taiapa o te pā, ā, kua riro i a rātou te kaha hei whakamau i aua wāhanga i roto nei i ngā taiapa.

21 Kātahi ka mea ia i ngā tangata i a ia kia neke pakupaku noa i a rātou, me te karapoti i ngā tauā o ngā Rāmana.

22 Ā nana, i meatia tēnei i te pō, nā konā i te ohonga ake a ngā Rāmana i te ata ka kite rātou i ngā Nīwhai e karapoti ana i waho me ngā mauhere e mau patu ana i roto.

23 Ā, pēnei ka kite rātou kua taea rātou e ngā Nīwhai; ā, ka kite rātou i ēnei āhuatanga ka whakaaro ehara i te mea tika kia whawhai atu ai ki ngā Nīwhai; nō reira ka tonoa e ō rātou kaiwhakahau matua ā rātou rākau whawhai, ā, ka mauria atu e rātou, ā, ka whiua ki ngā waewae o ngā Nīwhai, e inoi atu ana kia tohungia.

24 Nana ināianei, koinei te hiahia o Moronai. Ka whakamaua rātou hei mauhere pakanga, ā, ka whakamaua te mana whakahaere o te pā, ā, ka meatia kia whakawāteahia ai ngā mauhere, ko te hunga Nīwhai; ā, ka uru atu ki roto i te tauā a Moronai, ā, he mea kaha anō rātou ki tana tauā.

25 Ā, i pahawa ake, nā, i mea ia i ngā Rāmana, ko te hunga i kahakina ai e ia hei mauhere, kia tīmata atu anō rātou i tētahi mahi whakakaha i ngā maiorotanga huri noa i te pā o Kire.

26 Ā, i pahawa ake, nā, nāna te pā i whakatūwatawata, e rite ana ki ōna hiahia, ka meatia e ia kia haria atu ai ngā mauhere ki te pā o Mōmona; ā, i tiakina anōtia e ia taua pā ki tētahi ope tino kaha rawa atu.

27 Ā, i pahawa ake, nā, i pērā tā rātou, hei aha koa ngā rautaki nukarau katoa a ngā Rāmana, pupuri, tiaki i ngā mauhere katoa kua kahakina atu e rātou, ā, i whakamaua anōtia e rātou te whenua katoa me te kaha katoa i whakahokia mai e rātou.

28 Ā, i pahawa ake, nā, ka wikitōria haere anō ngā Nīwhai, me te whakahoki mai i ō rātou tikanga me ō rātou ritenga.

29 He maha ngā wā i ngana ai ngā Rāmana ki te karapoti i a rātou i te pō, engari ka hingahinga ngā mauhere tokomaha i ēnei whanaketanga.

30 Ā, he maha anō ngā wā i ngana ai rātou ki te whāngai atu i ā rātou waina ki ngā Nīwhai, kia whakangaromia ai rātou ki te paitini, ki te haurangitanga rānei.

31 Engari nana, kāore i pūhoi ngā Nīwhai ki te mahara ki te Ariki tō rātou Atua i tēnei tō rātou wā o te whakamamaetanga. Tē taea rātou e ā rātou māhanga; āe rā, kīhai rātou i pai kia inumia ā rātou waina, hāunga tā rātou whāngai tuatahi atu ki ngā mauhere Rāmana.

32 Ā, pēnei tā rātou tūpato kei whāngaia atu tētahi paitini ki waenganui i a rātou; nā te mea mehemea ka mate tētahi Rāmana i tā rātou waina ka mate anō tētahi Nīwhai; ā, pēnei tā rātou whakamātau i ā rātou waipiro katoa.

33 Ināianei ā i pahawa ake, nā, e tika pū ana kia whakarite a Moronai i ngā whakaritenga ki te whakaeke atu i te pā o Moriatono; nana rā, kua mea ngā Rāmana, i runga i ā rātou mahinga, kua whakatūwatawatahia te pā o Moriatono tae noa ki te wā kua meinga hei pā tino kaha rawa.

34 Ā, hono tonu ana anō hoki tā rātou kawe ope hou ki roto i te pā, me te mau anō i ngā ō hou.

35 Ā, pēnei te whakamutunga o te tau rua ngahuru mā iwa o te whakahaeretanga a ngā kaiwhakawā i runga i te iwi o Nīwhai.