1 E taku tama, kia whai taringa mai koe ki aku kupu; nā te mea kei te oati au ki a koe, nā konā ki te pupuri koe i ngā whakahaunga a te Atua ka whaioranga koe i te whenua.

2 Kei te hiahia ahau kia pērā tāu me tāku i mahi ai, hei maharatanga ake ki te hereherenga o ō tāua tūpuna; nā te mea i te hereheretanga rātou, ā, kāore i taea e tētahi te whakaora hāunga ko te Atua o Aperahama, me te Atua o Īhaka, me te Atua o Hākopa; ā, nāna rawa rātou i whakaputa i roto i ō rātou whakamamaetanga.

3 Ināianei ā, E taku tama a Heramana, nana, kei tō taiohitanga koe, ā, nō reira, kei te tohe atu au ki a koe kia whakarongo mai koe ki aku kupu me te ako i ahau; nā te mea e mōhio ana anō au ka tautokona te tangata e whakawhirinaki ai ki te Atua i roto i ō rātou whakapātaritari, me ō rātou raruraru, me ō rātou whakamamaetanga, ā, ka hāpaingia ake hei te rā whakamutunga.

4 Ā, kāore au i te hiahia kia whakaaro koe kei te mōhio au i ahau anō—ehara i te mea matemate engari i te mea wairua, ehara i te hinengaro tangata engari i te Atua.

5 Ināianei, nana, ko taku kupu tēnei ki a koe, me i kore au i whānau mai i te Atua kua kore au i mōhio ki ēnei mea; engari nā te Atua, nā te māngai o tana anahera tapu, i whakamōhiotia mai ēnei mea ki ahau, ehara i te mea nā tētahi momo tika ōku;

6 Nā te mea i hāereere ahau me ngā tama a Mōhia, e whai ana ki te whakangaro i te hāhi o te Atua; engari nana, i tono mai te Atua i tana anahera tapu hei aukati i a mātou i te huarahi.

7 Ā nana, i kōrero mai ia ki a mātou, anō nei ko te reo whatitiri, ā, ka ngāueue te whenua katoa i raro iho i ō mātou waewae; ā, ka hinga iho mātou katoa ki te whenua, nā te mea i tau mai te wehi o te Ariki ki runga i a mātou.

8 Engari nana, ka kī mai te reo ki ahau: E maranga. Ā, ka maranga ake, ā, ka tū ake au, ā, ka kitea te anahera.

9 Ā, i kī mai ia ki ahau: Mehemea kei te hiahia i a koe anō kia whakangaromia ai, kaua e whai tonu atu ki te whakangaro i te hāhi o te Atua.

10 Ā, i pahawa ake, nā, ka hinga iho au ki te whenua; kīhai i taea e au te puaki i tōku māngai mō te takiwā o ngā rā e toru me ngā pō e toru, kīhai rānei i taea e au ōku peke te whakamahi.

11 Ā, ka kōrero mai te anahera i ētahi atu mea ki ahau, i rangona ai e aku teina, engari kāore au i rongo i ērā; nā te mea i taku rongonga i ēnei kupu—Ki te hiahia kia whakangaromia koe e koe anō, kaua e whai tonu atu ki te whakangaro i te hāhi o te Atua—I pākia au ki te wehi nui me te mīharo nui kei whakangaromia pea ahau, nā konā hinga iho au ki te whenua, ā, kāore au i rongo atu anō i tētahi mea anō.

12 Engari i whakangaua ahau ki te mamae mau tonu, nā te mea i rakarakahia ake tōku wairua, he mea tino nui rawa atu, ā, i whakangaua ki ōku hara katoa.

13 Āe rā, i mahara au ki ōku hara katoa me ōku hē, nā ēnei i whakamamaetia ai ahau ki ngā mamaetanga o te ao rēwera; āe rā, i kite au kua haututū au ki tōku Atua, ā, kīhai au i pupuri i āna whakahaunga tapu.

14 Āe rā, i kōhuru anō au i ana tamariki tokomaha, kua ārahina atu rānei rātou ki te whakangaromanga; āe rā, hei whakarāpopoto ake, i nui rawa atu ōku hara, nā konei whakangaua ai tōku wairua e te mataku weriweri nā te tino whakaaro ka tae atu au ki te aroaro o tōku Atua.

15 Auē, tāku i whakaaro ai, me i taea ahau te pei atu kia mate moa tōku wairua rāua ko tōku tīnana, kia kore ai au e kawea atu kia tū ai i te aroaro o tōku Atua, kia whakawākia mō aku mahi.

16 Ināianei ā, i whakangaua au mō ngā rā e toru me ngā pō e toru, ki ngā mamaetanga pū anō o tētahi wairua kua whakataungia ki te ao rēwera.

17 Ā, i pahawa ake, nā, i ahau e whakangaua pēneitia ana ki te mamaetanga, i ahau e rakarakahia ake ana e te maharatanga ki ōku hara maha, nana, i mahara ahau ki tāku i rongo ai i tā tōku matua poropititanga ki te iwi e pā ana ki te haerenga mai o tētahi Ihu Karaiti, tētahi tama a te Atua, ki te whakamārie i ngā hara o te ao.

18 Nā, i tōku hinengaro e hopu ana i tēnei whakaaro, ka karanga ake au i roto i tōku ngākau: E Ihu, e koe te Tama a te Atua, kia aroha mai ki ahau, kei roto nei i te au o te kawa, ā, kua karapotia nei e ngā mekameka mau tonu o te mate.

19 Ināianei ā, nana, i taku whakaaro i tēnei, kāore au i mahara tonu ki aku mamae anō; āe rā, kāore au i rakarakahia tonutia ake e te maharatanga ki ōku hara anō.

20 Ai auē, anō te hari, anō te māramatanga whakamīharo i kite nei ahau; āe rā, i kī tōku wairua ki te hari he mea tino rite rawa ki tōku mamae!

21 Āe rā, ko taku kupu tēnei ki a koe, e taku tama, kāore tahi he mea e rite ana ki te koi me te kawa pērā i ōku mamaetanga. Āe rā, hei āpiti anō ko taku kupu tēnei ki a koe, e taku tama, i tērā atu ringa, kāore tahi he mea e rite ana ki te koi me te reka pērā i tōku hari.

22 Āe rā, i whakaaro ahau i pērā taku kitenga, e rite pū ana ki tā tō tāua matua a Rīhai kite atu, i te Atua e noho ana i runga i tōna torona, e karapotia ana e ngā huihuinga anahera tē taea te tatau, i runga i te āhuatanga o te waiata me te whakawhetai i tō rātou Atua; āe rā, i minamina tōku wairua kia noho ai ki reira.

23 Engari nana, i whiwhi anō ōku peke ki ōna kaha anō, ā, ka tū ake au i runga i ōku waewae, ā, i whakakite atu au ki te iwi, nā, kua whānau mai au i te Atua.

24 Āe rā, mai i tērā wā tae noa mai ki tēnei wā pū anō, kāore i mutu taku mahi, kia kūmea mai e au ngā wairua ki te rīpenetātanga; kia kūmea rātou e ahau kia rongo ai i te hari nui i rongo ai ahau; kia whānau mai anō hoki rātou i te Atua, ā, kia whakakīa ki te Wairua Tapu.

25 Āe rā, ināianei ā nana, E taku tama, e homai ana e te Ariki ki ahau te tino hari nui i ngā hua o āku mahi;

26 Nā te mea, nā te kupu kua wāwāhia mai e ia ki ahau, nana, kua whānau mai ngā mea tokomaha i te Atua, ā, kua kai pērā i tāku i kai ai, ā, kua kite kanohi ki te kanohi pērā i tāku i kite ai; nō reira e mōhio ana rātou ki ēnei mea kua kōrerotia e au, pērā i tāku e mōhio ai; ā, nō te Atua te mātauranga kei ahau.

27 Ā, kua tautokona au i roto i ngā whakamātautauranga me ngā pōraruraru o ia āhua, o ia āhua katoa, āe rā, i roto i ngā whakamamaetanga o ia āhua, o ia āhua katoa; āe rā, kua whakaputa te Atua i ahau mai i te whareherehere, ā, i ngā herenga, ā, i te mate; āe rā, e whakawhirinaki au ki a ia, ā, māna tonu au e whakaputa.

28 Ā, e mōhio ana ahau māna anō au e hāpai ake hei te rā whakamutunga, kia noho tahi me ia i runga i te korōria; āe rā, kia whakawhetai atu ki a ia mō āke tonu atu, nā te mea nāna nei ō tāua tūpuna i kawe mai i Ihipa, ā, kua horomia ake e ia ngā Ihipiana i te Moana Whero; ā, nāna rātou i ārahi i runga i tōna mana ki roto i te whenua o te kupu whakaari; āe rā, kua whakaputaina rātou e ia i te whakaponongatanga me te hereheretanga mai i tētahi wā ki tētahi wā.

29 Āe rā, kua mauria mai anō hoki e ia ō tāua tūpuna i te whenua o Hiruharama; ā, nāna anō hoki, nā te mana mau tonu, rātou i whakaputa i te whakaponongatanga me te hereheretanga, mai i tētahi wā ki tētahi wā tae noa iho mai ki tēnei rā; ā, kua mau tonu i ahau i ngā wā katoa tētahi maharatanga o tō rātou hereheretanga; āe rā, me mau anō i a koutou i roto i ō koutou maharatanga, pērā i tāku i mea ai, tō rātou hereheretanga.

30 Engari nana, e taku tama, ehara tēnei i te katoa; nā te mea me mōhio koutou pērā i ahau, i te mea ki te pupuri koe i ngā whakahaunga a te Atua ka whaioranga koe i te whenua; ā, me mōhio anō hoki koe, nā, i te mea ki te kore koe e pupuri i ngā whakahaunga a te Atua ka hātepea atu koe i tōna aroaro. Nā, e rite ana tēnei ki tana kupu.