1 Nā, kei roto i te ture a Mōhia te tikanga mō ia tangata i tū ai hei kaiwhakawā i te ture, mō te hunga rānei kua whakataua hei kaiwhakawā, kia utua rātou ki te ritenga o te wā i mahia ai e rātou ki te whakawā i te hunga kua mauria ki mua i a rātou kia whakawākia ai.

2 Nā, mehemea he nama tā tētahi ki tētahi atu, kātahi ka kore ia e hiahia ki te utu i tana nama, ka hāmenetia ia ki te kaiwhakawā; ā, ka whakahaere mana te kaiwhakawā, kātahi ka tonoa atu ngā kātipa kia mauria atu ai te tangata ki tōna aroaro; ā, whakawākia ana e ia te tangata e ai ki te ture me ngā taunakitanga kua kawea atu hei whakahē mōna, ā, pēnei ka meinga taua tangata kia utua ai tana nama, kia murua katoatia rānei, kia peia atu rānei i waenganui i te iwi hei kaiwhānako, hei kaipāhua.

3 Ā, ka utua te kaiwhakawā ki te ritenga o ōna wā—he henine kōura mō te rā kotahi, he himumu hiriwā rānei, he mea taurite ki te henine kōura; ā, e rite ana tēnei ki te ture kua homai nei.

4 Nā, koinei ngā ingoa o ngā momo motunga o ā rātou kōura me ā rātou hiriwā, e rite ana ki ō ēnā wāriu. Ā, kua tukuna ngā ingoa e ngā Nīwhai, nā te mea, kāore i rite tā rātou mehua ki tā ngā Hūrae; engari i tīni tā rātou arotake me tā rātou mehua kia rite ai ki ngā whakaaro me ngā āhuatanga o te iwi, i ia whakatipuranga tae noa atu ki te whakahaeretanga a ngā kaiwhakawā i whakaritea nei e kīngi Mōhia.

5 Nā, ko te arotakenga tēnei—he henine kōura, he teona kōura, he huma kōura me te rimini kōura.

6 He henumu hiriwā, he amonoro hiriwā, he eteroma hiriwā me te oniti hiriwā.

7 He ōrite te hemumu hiriwā ki te henine kōura, ā, tētahi anō o ēnā mō te mehua pare, me te mehua anō hoki o ngā tū kākano katoa.

8 Nā, ko te whakaritenga utu mō te teona kōura, kia rua ngā henine.

9 Ā, ko te huma kōura he rite ki te wāriu o ngā teona e rua.

10 Ā, ko te wāriu o te rimini kōura he ōrite ki te katoa.

11 Ā, he ōrite te nui o te amonoro hiriwā ki ngā henumu e rua.

12 Ā, he ōrite te nui o te eteroma hiriwā ki ngā hemumu e whā.

13 Ā, he ōrite te nui o te oniti ki te katoa.

14 Nā, koinei te wāriu o ngā arotakenga tatau iti—

15 He haurua henumu te hipirona; nō reira, he hipirona mō tētahi mehua pare.

16 Ā, he haurua te hipirona o tētahi hipiroma.

17 Ā, he haurua te rea o tētahi hipiroma.

18 Nā, koinei tō ēnā tatauranga, e ai ki tō ēnā arotakenga.

19 Nā, he ōrite te ationo ki ngā hipirona e toru.

20 Nā, kotahi tonu tā rātou whai, arā, ko te mahi pūtea, nā te mea i utua rātou ki te ritenga o ā rātou mahi, nō reira, i whakaohooho rātou i te iwi kia mahi ai i ngā ngangaretanga me ngā tūmomo tautohetohenga me ngā whakarihariha katoa, kia nui kē atu ā rātou mahi, kia whiwhi moni rātou e rite ai ki ngā take i mauria mai ai ki mua i a rātou; nō reira rātou i whakaoho ake ai i te iwi ki a Arami rāua ko Amureke.

21 Ā, ka tīmata tēnei Tēroma ki te uiui i a Amureke, e mea ana: E pai ana rānei koe ki te whakautu i ētahi pātai ruarua e pātai ai au ki a koe? Nā, he tautōhito a Tēroma ki ngā mahi tinihanga a te rēwera, kia whakangaro ia i ngā mea e pai ana; nō reira, i kī atu ia ki a Amureke: E pai ana koe ki te whakautu i ngā pātai e pātai ai au ki a koe?

22 Ā, ka kī atu a Amureke ki a ia: Āe rā, mehemea e rite ana ki tā te Wairua o te Ariki, kei roto nei i ahau; nā te mea e kore au e kōrero i tētahi mea e tauaro ana ki te Wairua o te Ariki. Ā, ka kī atu a Tēroma ki a ia: Nana, e ono ngā oniti hiriwā, ā, māku katoa ēnei e hoatu ki a koe mēnā ka whakakore koe i te oranga o tētahi Mea Kaha Rawa.

23 Nā, ka kī ake a Amureke: E koe te tamaiti o te ao rēwera, he aha koe e whakawai ai i ahau? E mōhio ana rānei koe e kore te hunga tika e aro ki ērā momo whakawainga?

24 E whakapono ana rānei koe kāore he Atua? Ko taku kupu tēnei ki a koe, Kāo, e mōhio ana koe he Atua, engari he nui ake tō aroha ki ngā taonga i tō aroha mōna.

25 Ināianei ā, kua rūkahu koe ki ahau i te aroaro o te Atua. kua kī mai koe ki ahau—Tirohia ēnei onoti e ono, he mea utu nui, māku e tuku ki a koe—engari i roto i tō ngākau te whakaaro kia kaiponuhia aua mea i ahau; ā, ko tō hiahia anake kia whakakore au i te Atua pono e ora ana, kia whaitake koe ki te whakangaro i ahau. Ināianei ā nana, ka utua koe ki te taonga mō tēnei kino nui.

26 Ā, ka kī atu a Tēroma ki a ia: E kī ana koe he Atua e ora ana?

27 Ā, ka kī ake a Amureke: Āe rā, he Atua pono e ora ana.

28 Nā, ka kī a Tēroma: He nui ake i te Atua kotahi?

29 Ā, ka whakautu ia, Kāore.

30 Nā, ka kī ake anō a Tēroma ki a ia: E pēhea ana tō mōhio ki ēnei mea?

31 Ā, ka kī ake ia: Nā tētahi anahera ērā i whakamōhio mai ki ahau.

32 Kātahi ka kī ake anō a Tēroma: Ko wai ia e haere mai ai? Ko te Tama a te Atua?

33 Ā, ka kī ake ia ki a ia, Āe rā.

34 Kātahi ka kī ake anō a Tēroma ki a ia: Ka whakaora ia i tana iwi i roto i ō rātou hara? Ā, ka whakautu a Amureke ki a ia: Ko taku kupu tēnei ki a koe e kore ia e pēnā, nā te mea kua kore rawa e taea ana kia whakakore ia i tana kupu.

35 Nā, ka kī ake a Tēroma ki tana iwi: Tirohia kia mahara koutou i ēnei mea; nā te mea kua kī ake ia kotahi tonu te Atua; heoi kei te kī ia ka haere mai te Tama a te Atua, engari e kore ia e whakaora i tana iwi—me te mea nei he mana tōna kia whakahau ai i te Atua.

36 Nā, ka kī ake anō a Amureke ki a ia: Nana kua rūkahu koe, nā te mea e kī ana koe, nā, kei te kōrero au me te mea nei he mana tōku kia whakahau ai i te Atua nā taku kī ake e kore ia e whakaora i tana iwi i roto i ō rātou hara.

37 Ā, ko taku kupu anō tēnei ki a koe, nā, tē taea e ia te whakaora i a rātou i roto i ō rātou hara; nā te mea tē taea e au tana kupu te whakakore, ā, kua kī mai ia, nā, kāore tētahi mea poke e whiwhi ki te kīngitanga o te rangi; nō reira, me pēhea koutou e whakaorangia ai, ki te kore koutou e whiwhi i te kīngitanga o te rangi? Nō reira, kāore e taea ana koutou te whakaora i roto i ō koutou hara.

38 Nā, ka kī atu a Tēroma anō ki a ia: Ko te Tama a te Atua te tino Matua Ora Tonu?

39 Ā, ka kī atu a Amureke ki a ia: Āe rā, koia te tino Matua Ora Tonu o te rangi me te whenua, me ngā mea katoa kei roto rā; koia te tīmatanga me te whakamutunga, te tuatahi me te whakaotinga;

40 Ā, ka haere mai ia ki roto i te ao ki te hoko i tōna iwi; ā, māna katoa ngā hara o te hunga e whakapono ana ki runga i tōna ingoa e waha; ā, koinei te hunga e whiwhi ai i te oranga tonutanga, ā, kāore e puta mai te whakaoranga i tētahi huarahi kē atu.

41 Nō reira ka noho tonu te hunga whakarihariha me te mea nei kāore i mea ai i tētahi hokonga, hāunga ko te wetewetenga o ngā here o te mate; nana rā, ka tae mai te rā e ara katoa ai te katoa i te mate me te tū i te aroaro o te Atua, ā, kia whakawākia ai rātou e rite ana ki ā rātou mahinga.

42 Nā, he mate anō e kīa ana ko te matenga o te tīnana; ā, mā te matenga o te Karaiti ngā herehere o tēnei matenga o te tīnana e wetewete, kia whakaarahia ake te katoa i tēnei matenga o te tīnana.

43 Ka whakakotahitia anōtia te wairua me te tīnana ki tōna āhua tino tika; ka whakahokia ngā peke me ngā pona ki tōna wāhi tika, kia rite pū anō ki ō tātou i tēnei wā; ā, ka mauria atu tātou kia tū ai i te aroaro o te Atua, e mōhio ana pērā i tā tātou e mōhio nei ināianei, ā, ka mau i a tātou tētahi maharatanga nui rawa mō ō tātou kaniawhea katoa.

44 Nā, ka puta tēnei whakahokinga ki te katoa, pakeke mai, rangatahi mai, herehere mai, herekore mai, tāne mai, wahine mai, tangata kino mai, tangata tika mai; ā, kua kore pū anō e ngaro atu tētahi makawe o ō rātou māhunga; engari ka whakahokia ngā mea katoa ki tōna āhua tino tika, pērā i tōna āhua ināianei, i te tīnana rānei, ā, ka mauria mai, ā, ka whakatūria ki mua i te pae whakawā o te Karaiti te Tama, me te Atua te Matua, me te Wairua Tapu, koia he Atua Ora Tonu kotahi, kia whakawākia e rite ai ki ā rātou mahinga mehemea i pai, mehemea rānei i kino.

45 Nā, nana, kua kōrero atu au ki a koe e pā ana ki te matenga o te tīnana matemate, ā, e pā ana anō ki te aranga ake o te tīnana matemate. Ko taku kupu tēnei ki a koe, nā, ka whakaarahia ake tēnei tīnana matemate hei tīnana mate kore, arā, i te matenga, mai i te matenga tuatahi pū anō ki te oranga, e whakakotahi ana ō rātou wairua ki ō rātou tīnana, e kore rawa anō e weheruatia; nō konā te katoa e meinga ana hei mea wairua, ā, hei mea mate kore, kia kore anō e pā ai te pokenga.

46 Nā, ka oti i a Amureke ēnei kupu, ka mīharo haere anō te iwi, ā, ka wiriwiri haere anō hoki a Tēroma. Ā, ka mutu pēnei ngā kupu a Amureke, koinei noa rānei tāku i tuhi ai.