1 Ināianei ā, e taku tama, kei te kite au kei konā anō tētahi mea e raruraru nei i tō hinengaro, kāore nei e taea ana e koe te mārama—koia ko te tika o te Atua i te whakawhiunga o te kaihara; nā te mea e tohe ana ōu whakaaro, e mea ana, he mea hē te tukunga i te tangata ki tētahi nohonga pōuri.

2 Nana ināianei, e taku tama, māku tēnei mea e whakamārama atu ki a koe. Nana rā, whai muri iho i tā te Ariki te Atua tuku atu i ō tātou mātua tuatahi i te kāri o Erene, ki te ngaki i te whenua, i te wāhi i tangohia mai ai rāua- āe rā, nāna te tāne i kukume ai ki waho, ā, ka whakanohoia e ia i te pito ki te rāwhiti o te kāri o Erene tētahi Kerupima me tētahi hoari mura i piua reretia atu ki ngā tahataha katoa, hei tiaki i te rākau o te ora—

3 Nā, ka kite tātou kua meinga te tangata kia rite ki te Atua, e mōhio ana ki te pai me te kino; ā, kei totoro atu tōna ringa me te tango anō hoki i tō te rākau o te ora, kei kai, ā, kei ora tonu mō āke tonu atu, ka whakanohoia e te Ariki te Atua te Kerupima me te hoari mura, kia kore ai ia e kai i ngā hua—

4 Ā, pēnei tātou kite ai, he wā anō kua tukuna ki te tangata ki te rīpenetā, āe rā, he wā whakamātautauranga, he wā kia rīpenetā, ā, ki te mahi ki te Atua.

5 Nana rā, mehemea kua totoro wawe atu a Arama i tana ringa me te kai i tō te rākau o te ora, kua ora ia mō āke tonu atu, e rite ai ki te kupu a te Atua, kua kore he wā anō mō te rīpenetātanga; āe rā, kua mana kore anō hoki te kupu a te Atua, ā, kua raru anō te mahere nui o te whakaoranga.

6 Engari nana, kua whakataua ki te tangata kia mate—nō reira, i te mea kua hātepea atu rātou i te rākau o te ora ka hātepea atu rātou i te mata o te whenua—ā, ka ngaro te tangata āke tonu atu, āe rā, ka meinga rātou hei tāngata taka.

7 Ināianei ā, e kite ana koutou nā konei ō tātou mātua tuatahi i hātepea atu mō tō te tīnana, ā, mō tō te wairua i te aroaro o te Atua; ā, pēnei tātou kite ai i meinga rātou hei mea kia whai i tā rāua ake i pai ai.

8 Nana ināianei, kāore i tika pū anō kia whakaorangia ai te tangata mai i tēnei matenga o te tīnana, nā te mea ka whakangaro tēnā i te mahere nui o te harikoa.

9 Nō reira, i te mea kīhai rawa i taea te wairua e te mate, ā, kua whakaputa mai i te takanga te matenga o te wairua me te matenga o te tīnana anō hoki, koia, kua hātepea atu rātou i te Aroaro o te Ariki, i tika pū anō kia whakaorangia ai te tangata i tēnei matenga o te wairua.

10 Nō reira, i te mea kua meinga rātou hei mea kikokiko, hei mea tūkari, ā, hei mea rēwera, he mea nā ngā āhuatanga o te kikokiko, ka meinga tēnei āhuatanga whakamātautauranga hei āhuatanga e whakarite ai rātou; i meinga hei āhuatanga whakariterite.

11 Ināianei ā kia mahara, e taku tama, me i kore te mahere o te hokonga, (e whakatahangia ana tēnā) kia mate rawa rātou kua pōuri ō rātou wairua, i te mea kua hātepea atu i te aroaro o te Ariki.

12 Ināianei ā, kāore he huarahi hei whakaorangia ai te tangata mai i tēnei āhuatanga taka, kua tōia mai nei e te tangata ki a ia anō nā tāna ake haututūtanga;

13 Nō reira, ki tā tika, kāore i taea te whakaputa mai i te mahere o te hokonga, i runga anake i ngā tikanga o tā te tangata rīpenetātanga i tēnei āhuatanga whakamātautau, āe rā, tēnei āhuatanga whakariterite; nā te mea me i kore ēnei āhuatanga, kua kore e āhei i te whakaaroha hāunga ko te whakangaro i ngā mahinga o te tika. Nā, kāore e taea te mahi a te tika te whakangaro; mēnā ka pērātia, ka oti te Atua hei Atua.

14 Ā, pēnei kite ai tātou kua taka katoa ngā tāngata katoa, ā, i te pāoro rātou o te tika; āe rā, te tika a te Atua, kua whakatauhia nei rātou kia hātepea atu mō āke tonu atu.

15 Ināianei ā, kāore i taea te mahere o te whakaaroha te whakaputa mai ki te kore i meatia tētahi whakamārietanga; nō reira e whakamārietia ana e te Atua ake ngā hara o te ao, kia whakaputa mai i te mahere o te whakaaroha, kia ea ai ngā tono a te tika, kia tū ai te Atua hei Atua tino tika katoa, hei Atua pono, ā, hei Atua whakaaroha anō hoki.

16 Nā, kua kore e taea te whakaputa mai i te rīpenetātanga ki te tangata ki te kore he whakawhiunga, he mea mau tonu anō hoki kia rite ki te oranga o te wairua, e whakatakotoria tauarotia ana ki te mahere o te harikoa, he mea mau tonu anō hoki pērā i te oranga o te wairua.

17 Nā, me pēhea te tangata e rīpenetā ki te kore ia e hara? Me pēhea ia e hara ki te kore he ture? Me pēhea he ture ki te kore he whakawhiunga?

18 Nā, kua whakatakotoria iho tētahi whakawhiunga, ā, i homai tētahi ture tika, nā konei kawe mai ai te pōuri mō te hara ki te ngākau o te tangata.

19 Nā, mehemea kīhai i homai tētahi ture—ki te kōhuru tētahi tangata ka mate ia—ka wehi ia kei mate ia mōna i kōhuru?

20 Hei āpiti anō, mehemea kāore he ture i homai nei hei whakahē i te hara kua kore te tangata e wehi ki te hara.

21 Ā, mehemea kāore he ture i homai nei, ki te hara te tangata ka ahatia e te tika, e te whakaaroha rānei, nā te mea kāore o rāua tikanga ki runga i te tangata?

22 Engari kua homai tētahi ture, ā, kua whakataua hoki tētahi whakawhiunga, ā, kua tukuna tētahi rīpenetātanga; ko taua rīpenetātanga, ka tonoa nei e te whakaaroha; me i kore, kua mau te tangata i te tika, ā, ka whakahaerehia te ture, ā, ka whakapākia iho e te ture te whakawhiunga; ki te kore e pērā, ka whakangaromia ngā mahinga a te tika, ā, ka oti te Atua hei Atua.

23 Engari kāore e oti te Atua hei Atua, ā, ka mau te hunga rīpenetā i te whakaaroha, ā, ka puta mai te whakaaroha nā te whakamārietanga; ā, ka puta mai te aranga o te hunga mate i te whakamārietanga; ā, ka whakahokia mai e te aranga o te hunga mate ngā tāngata ki te aroaro o te Atua; ā, ka whakahokia pēneitia rātou ki tōna aroaro, kia whakawākia ai e rite ana ki ā rātou mahinga, e ai ki te ture me te tika.

24 Nana rā, ka whakamahia e te tika āna tono katoa, hei āpiti anō, ka mau katoa i te whakaaroha tāna ake anō; ā pēnei, kāore he mea i tua atu i te hunga rīpenetā e whakaorangia ai.

25 Hā, e whakaaro ana koe ka whānako te whakaaroha i tā te tika? Ko taku kupu tēnei ki a koe, Kāo; kāore te tongi kotahi. Ki te pērā, ka oti te Atua hei Atua.

26 Ā pēnei tā te Atua whakaputa i āna tikanga nui mau tonu, kua whakaritea nei i te tūāpapa o te ao. Ā pēnei ka whakaputaina mai te whakaoranga me te hokonga o te tangata me tō rātou whakangaromanga, me tō rātou pōuritanga.

27 Nō reira, E taku tama, ko te tangata e hiahia ana ki te haere mai, māna e haere mai ki te inu noa i ngā wai o te oranga; ā, ko te tangata kāore e hiahia ana ki te haere mai, kāore taua tangata e meinga kia haere mai ai; engari hei te rā whakamutunga ka whakahokia ki a ia ērā mea e rite ana ki āna mahinga.

28 Mehemea kua hiahia ia ki te mahi kino, ā, kīhai ia i rīpenetā i ōna rā, nana, ka meatia te kino ki a ia, e rite ana ki tā te Atua whakahokinga.

29 Ināianei ā, e taku tama, e hiahia ana au kia kaua ēnei mea e whakararu tonu nei i a koe, ā, tukuna anake ō hara kia whakararu i a koe, mā runga i taua whakararunga koe e heke iho ki te rīpenetātanga.

30 E taku tama, e hiahia ana ahau kia kaua koe e whakakāhore tonu i te tika o te Atua. Kei tohe koe ki te whakawātea kau noa i a koe anō nā ōu hara, mā te whakakāhore i te tika o te Atua; engari tukuna te tika o te Atua, me tōna whakaaroha, me tōna manawaroa kia whaiwāhi nui atu i tō ngākau; ā, tukuna ia kia kūmea iho koe ki raro ki te puehu i runga i te whakaiti.

31 Ināianei ā, E taku tama, kua karangatia koe e te Atua kia kauhautia atu te kupu ki tēnei iwi. Ināianei ā, e taku tama, haere koe i runga i tō huarahi, whakapuakina atu te kupu o te pono i runga i te pono me te whaiwhakaaro, kia kūmea ai e koe ngā wairua ki te rīpenetātanga, kia whai tikanga nui te mahere nui o te whakaaroha ki runga i a rātou. Ā, mā te Atua e tuku atu ki a koe e rite pū ana ki āku kupu. Āmine.