1 Ināianei ā, i pahawa ake, nā, i muri iho i te whakapūmautanga ake o te iwi o Amona i te whenua o Herehona, ā, i whakapūmauhia anō hoki tētahi hāhi i te whenua o Herehona, ā, i whakatūhia ake ngā tauā o ngā Nīwhai huri noa i te whenua o Herehona, āe rā, i roto i ngā rohe huri noa i te whenua o Harahemara; nana, i arumia ngā tauā o ngā Rāmana i ā rātou teina ki roto i te koraha.

2 Ā, pēnei i tū ai tētahi pakanga nui whakaharahara; āe rā, kāore i mōhiotia tētahi e pēnei ana te āhua i waenganui i te iwi katoa i te whenua mai i te wā i wehe ai a Rīhai i Hiruharama; āe rā, i patupatua, ā, i whakamararatia whānuitia atu ngā Rāmana manomano.

3 Āe rā, he parekura tino nanakia anō hoki kei waenganui i te iwi o Niwhai; hei aha koa, ka āia atu, ā, ka whakamararatia atu ngā Rāmana, ā, ka hoki anō te iwi o Nīwhai ki tō rātou whenua.

4 Ināianei ā, koinei tētahi wā i rangona ai tētahi tangihanga nui me tētahi uhunga nui puta noa i te whenua katoa, i waenganui i te iwi katoa o Nīwhai—

5 Āe rā, ko te tangihanga o ngā pouaru e tangi ana ki ā rātou hoatāne, ko ngā matua hoki e tangi ana ki ā rātou tama, ko ngā tamāhine anō ki ō rātou tungāne, āe rā, ko te tama ki te matua; ā, i pēnei te rongonga o te reo tangihanga ki waenganui i a rātou katoa, e uhungatia ana ā rātou huānga kua whakamatea nei.

6 Ināianei ā, he rangi pāpōuri rawa atu tēnei; āe rā, he wā whai tikanga nui, ā, he wā anō mō te kaha nohopuku me te inoi.

7 Ā, i pēnei te whakamutunga o te tau tuangahuru mā rima o te whakahaeretanga a ngā kaiwhakawā i runga i te iwi o Niwhai;

8 Ā, koinei te tuhinga a Amona rātou o ana teina, ā rātou haerenga i te whenua o Nīwhai, ā rātou pāmamaetanga i te whenua, ā rātou pōuritanga, me ā ratou whakamamaetanga, me ā rātou haringa tē taea te mārama, me te whakawhiwhinga, te haumarutanga o ō rātou tuākana i te whenua o Herehona. Ināianei ā, kia manaakitia e te Ariki, te Kaihoko o ngā tāngata katoa i ō rātou wairua mō āke tonu atu.

9 Ā, koinei te tuhinga mō ngā pakanga me ngā tautohetohenga i waenganui i ngā Nīwhai, me ngā pakanga anō hoki i waenganui i ngā Nīwhai me ngā Rāmana; ā, ka mutu te tau tuangahuru mā rima o te whakahaeretanga a ngā kaiwhakawā.

10 Ā, kua pahawa ake mai i te tau tuatahi tae noa ki te tuangahuru mā rima te whakangaromanga o ngā tāngata manomano; āe rā, kua pahawa ake tētahi āhuatanga whakarihariha o te whakahekenga toto.

11 Ā, i whakatakotohia iho ngā tūpāpaku manomano ki roto i te whenua, i ngā tūpāpaku manomano e horokiwa ana i ngā pūranga i runga i te mata o te whenua; āe rā, e tangihia ana ngā tāngata manomano i te ngaronga o ō rātou huānga, nā te mea e whaitake ana tō rātou wehi, e ai ki ngā whakaari a te Ariki, nā, kua whakatauhia rātou ki tētahi āhuatanga auē mutunga kore.

12 I ētahi atu manomano e tangi pono ana ki te ngaronga o ō rātou huānga, heoi kei te hari rātou, ā, kei te whakatiketike rātou i runga i te tūmanako, ā, ināianei pū anō, e ai ki ngā whakaari a te Ariki, kua whakaarahia rātou kia noho ai i te ringa matau o te Atua, i tētahi āhuatanga o te haringa mutunga-kore.

13 Ā, pēnei tātou kite ai anō te rerekētanga o te tangata nā te hara me te hē, me te kaha o te rēwera, e haere mai ai nā ngā mahere tinihanga kua whakaritea nei e ia ki te whakamau i ngā ngākau o te tangata.

14 Ā, pēnei tātou kite ai i te nui o te karangatanga kia tākare tonu te tangata i ngā māra waina o te Ariki; ā pēnei tātou kite ai i te take nui kia pōuri ai, kia hari ai anō hoki—ko te pōuritanga nā te matenga me te whakangaromanga o te tangata, ā, ko te haringa nā te māramatanga o te Karaiti ki te oranga.