1 Ināianei ā i pahawa ake, nā, kāore i mutu i a Moronai te whakariterite mō te whawhai, ki te tiaki rānei i tana iwi i ngā Rāmana; nā te mea i mea ia kia tīmata atu ana tauā i te tīmatanga o te tau rua ngahuru o te whakahaeretanga a ngā kaiwhakawā, kia tīmata tā rātou kēri i ngā parepare tāwhio noa, tāwhio noa i ngā pā katoa, puta noa i ngā whenua katoa i nōhia ai e ngā Nīwhai.

2 Ā, i mea ia kia whakanohohia ai he rākau ki runga ake i ngā parepare, āe rā, kia hangaia ake ai ngā mahinga rākau e rite nei ki tō te tangata teitei, huri noa i te whenua.

3 Ā, i mea ia kia hangaia ake i runga i aua mahinga rākau he taiapa tīwatawata tāwhio noa, tāwhio noa i runga i aua rākau; ā, he mea kaha ērā, ā, he mea teitei ērā.

4 Ā, i mea ia kia whakatūria ai ngā pourewa hei tirohanga atu mō rātou i runga i ngā mahinga tīwatawata, ā, i mea ia kia hangaia ai he wāhi haumaru i runga i aua pourewa, kia kore ai rātou e whara i ngā kōhatu me ngā pere a ngā Rāmana.

5 Ā, i whakaritea rātou kia taea ai te whiu kōhatu i runga rā, e rite ana ki tō rātou e āhuareka ai, ā, ki tō rātou kaha, ā, kia whakamate i te tangata e ngana ai ki te whakatata atu ki ngā taiapa o te pā.

6 Pēnei ka whakarite a Moronai i ngā pā kaha tāwhio noa, tāwhio noa i ngā pā katoa o te whenua katoa mō te haerenga mai a ō rātou hoariri.

7 Ā, i pahawa ake, nā, ka mea a Moronai kia haere atu ai ana tauā ki roto i te koraha ki te taha rāwhiti; āe rā, ka haere atu rātou, ā, ka āia atu e rātou ngā Rāmana katoa i te koraha ki te taha rāwhiti ki roto i ō rātou ake whenua, kei te taha tonga o te whenua o Harahemara.

8 Ā, tika tonu atu te rohe o te whenua o ngā Nīwhai i te moana ki te rāwhiti tae noa atu ki te hauāuru.

9 Ā, i pahawa ake, nā, i te otinga i a Moronai te ā atu i ngā Rāmana katoa i te koraha ki te taha rāwhiti, i te raki o ngā whenua i nōhia ai e rātou anō, ka mea ia kia haere atu ai ngā tangata i te whenua o Harahemara me ngā whenua huri noa ki roto i te koraha ki te taha rāwhiti, tae atu pū anō ki ngā rohe e pātata atu ana ki te takutai, ā, kia nōhia ai te whenua.

10 Ā, i whakanoho anō ia i ngā tauā ki te tonga, i ngā rohe o ō rātou ake whenua, ā, ka meatia rātou kia hangaia ake ai he pā tūwatawata hei tiaki i ō rātou tauā me tō rātou iwi i ngā ringaringa o ō rātou hoariri.

11 Ā, pēnei tana hātepe atu i ngā pā kaha o ngā Rāmana i te koraha ki te taha rāwhiti, āe rā, i te taha uru anō hoki, e whakatūwatawatahia ana te rohe i waenganui i ngā Nīwhai me ngā Rāmana, i waenganui i te whenua o Harahemara me te whenua o Nīwhai, mai i te moana uru, e takoto haere ana rā i te taha o te mātāpuna o te awa o Hairona—e nōhia ana e ngā Nīwhai te whenua whakateraki katoa, āe rā, ko ngā whenua katoa kei te taha raki o te whenua o Mōmona, e rite ana ki tā rātou i āhuareka ai.

12 Pēnei a Moronai, me ana tauā, i kaha tupu haere nā te whakatūturutanga o āna mahi hei oranga mō rātou, ka whai rātou ki te hātepe atu i te kaha me te mana o ngā Rāmana mai i ngā whenua i nōhia ai e rātou, kia kore ai rātou e whaimana ai i runga i ngā whenua e nōhia ana e rātou.

13 Ā, i pahawa ake, nā, ka tīmata ngā Nīwhai i te tūāpapa o tētahi pā, ā, ka karangatia te ingoa o taua pā ko Moronai; ā, i te taha o te moana rāwhiti; ā, i te taha tonga e tata ana ki te rohe o ngā kāinga o ngā Rāmana.

14 Ā, i tīmata anō rātou i tētahi tūāpapa mō tētahi pā i waenganui i te pā o Moronai me te pā o Arona, e hono ana i ngā rohe o Arona me Moronai; ā, i karangatia e rātou te ingoa o te pā, o te whenua rānei, ko Nīwhaihā.

15 Ā, i tīmata anō rātou i taua tau anō ki te hanga i ngā pā maha i te raki, ko tētahi i āhua rerekē tōna hanga i karangatia ai e rātou ko Rīhai, i te raki e pātata ana ki ngā rohe o te takutai moana.

16 Ā pēnei whakamutua ai te tau rua ngahuru.

17 Ā, i ēnei āhuatanga tonu te iwi o Nīwhai i te tīmatanga o te tau rua ngahuru mā tahi o te whakahaeretanga a ngā kaiwhakawā i runga i te iwi o Nīwhai.

18 Ā, i kake nui rātou, ā, ka tino whairawa haere anō rātou; āe rā, i whakatokomahatia rātou, ā, i pakari haere rātou i runga i te whenua.

19 Ā, pēnei tātou kite ai anō te aroha nui me te tika o ngā whakahaeretanga katoa a te Ariki, i tana whakatutuki i āna kupu katoa ki ngā tamariki a te tangata; āe rā, e kite ana tātou kua mana āna kupu, i tēnei wā pū anō, i kōrerotia ai ki a Rīhai, e mea ana:

20 Kua manaakitia koutou ko āu tamariki; ā, ka manaakitia rātou, ki te pupuri rātou i āku whakahaunga ka whai oranga rātou i runga i te whenua. Engari kia mahara, ki te kore rātou e pupuri i āku whakahaunga ka hātepea atu rātou i te aroaro o te Ariki.

21 Ā, e kite ana tātou kua mana ēnei whakaari ki te iwi o Nīwhai; nā te mea nā rātou ēnei ngangaretanga me ā rātou tautohetohenga, āe rā, ā rātou kōhurutanga, me ā rātou pāhuatanga, me tā rātou karakia ki ngā whakapakoko, me ā rātou pūremutanga, me ā rātou mōrikarika, kei waenganui i a rātou anō, i kukume iho ai ki runga i a rātou ā rātou pakanga me ā rātou whakangaromanga.

22 Ā, i whakaputaina katoatia te hunga katoa i ū ai ki te pupuri i ngā whakahaunga a te Ariki i ngā wā katoa, i ngā mano tini o ō rātou tuākana kino e tukuna ana ki te hereheretanga, ki te mate rānei i te hoari, ki te memehā atu rānei i te whakapono kore, me te whakahoahoa atu ki ngā Rāmana.

23 Engari nana, kāore kē atu he wā anō i nui ake ai te harikoa i waenganui i te iwi o Nīwhai, mai i ngā rā o Nīwhai, i ō ngā rā o Moronai, āe rā, i tēnei wā pū anō, i te tau rua ngahuru mā tahi o te whakahaeretanga a ngā kaiwhakawā.

24 Ā, i pahawa ake, nā, ka mutu te tau rua ngahuru mā rua i runga i te rangimārie; āe rā, me te tau rua ngahuru mā toru anō hoki.

25 Ā, i pahawa ake, nā, i te tīmatanga o te tau rua ngahuru mā whā o te whakahaeretanga a ngā kaiwhakawā, kua mau tonu te rongo i waenganui i te iwi o Nīwhai me i kore tētahi tautohetohenga i heipū ai i waenganui i a rātou e pā ana ki te whenua o Rīhai; ko ngā whenua e rua ēnei e tata atu ana ki ngā rohe i te taha o te takutai.

26 Nana rā, i nōhia e te iwi nōna nei te whenua o Moriatono tētahi wāhi o te whenua o Rīhai; nō reira tīmata ai tētahi tautohetohenga nanakia i waenganui i a rātou, nā konā hāpai patu te iwi o Moriatono ki ō rātou teina, ā, i te hiahia rātou ki te patu i a rātou ki te hoari.

27 Engari nana, i tahuti atu te iwi i nōhia ai te whenua o Rīhai ki te hōpuni o Moronai, ā, ka inoi atu rātou ki a ia hei āwhina i a rātou; nā te mea ehara nō rātou te hē.

28 Ā, i pahawa ake, nā, i te kitenga o te iwi o Moriatono, ko rātou i ārahina atu ai e tētahi tangata ko Moriatono tōna ingoa, kua tahuti atu te iwi o Rīhai ki te hōpuni o Moronai, i tino wehi rawa rātou kei haere atu te tauā a Moronai ki runga ki a rātou me te whakangaro i a rātou.

29 Nō reira, ka whakatō iho a Moriatono ki roto i ō rātou ngākau kia tahuti atu rātou ki te whenua raki, kua kapi nei i ngā kōpua wai nui, ā, kia nōhia ai e rātou te whenua whakateraki.

30 Ā nana, kua tika tā rātou mahi i tēnei mahere, (kua meinga hei take mōteatea) engari nana, i te mea he tangata ngākau wera a Moriatono, nō reira i te riri ia ki tētahi o āna pononga wahine, ā, ka taka iho ki runga ki a ia, ā, ka nui tana patupatu i a ia.

31 Ā, i pahawa ake, nā, i tahuti atu ia, ā, ka haere atu ki te hōpuni o Moronai, ā, ka kī atu ia ki a Moronai i ngā mea katoa e pā ana ki taua take, ā, e pā ana anō ki ō rātou hiahia kia tahuti atu ki roto i te whenua whakateraki.

32 Nana ināianei, ko te iwi i te whenua o Mōmona, ko Moronai rānei, i wehi ia kei whakarongo rātou ki ngā kupu a Moriatono me te hono atu ki tōna iwi, ā, pēnei ka riro i a ia ērā wāhi o te whenua, mā konā whakatakotoria iho te tūāpapa mō ngā utu kikino i waenganui i te iwi o Nīwhai, āe rā, mā aua utu e ārahina atu ai te turakitanga iho o tō rātou herekoretanga.

33 Nō reira ka tonoa e Moronai tētahi ope tauā, kia haukoti i te iwi o Moriatono, kia whakamutu i tā rātou tahutitanga atu ki roto i te whenua whakateraki.

34 Ā, i pahawa ake, nā, kīhai rātou i haukoti atu i a rātou tae noa atu ki tā rātou taenga atu ki ngā rohe o te whenua Whakangaromanga; ā, i reira haukoti atu ai rātou i a rātou, i te ara kūiti e takoto ana i te taha o te moana ki roto i te whenua whakateraki, āe rā, i te taha o te moana, i te uru me te rāwhiti.

35 Ā, i pahawa ake, nā, ko te tauā i tonoa atu ai e Moronai, kua ārahina e tētahi tangata ko Teanakuma tōna ingoa, i tūtaki atu ki te iwi o Moriatono; ā, anō te taikaha o te iwi o Moriatono, (he mea nā te whakahihikotanga o āna kupu kino me āna kupu whakapatipati) nā, ka tīmata tētahi whawhai i waenganui i a rātou, i reira whakamate a Teanakuma i a Moriatono, ā, ka hinga tōna tauā i a ia, ā, ka mauhereheretia rātou, ā, ka hoki atu ki te hōpuni o Moronai. Ā, pēnei whakamutua ai te tau rua ngahuru mā whā o te whakahaeretanga a ngā kaiwhakawā i runga i te iwi o Nīwhai.

36 Ā, pēnei whakahokia ai te iwi o Moriatono. Ā, ki te kawenata rātou kia mau ai te rongo ka whakahokia rātou ki te whenua o Moriatono, ā, ka whakaritea ai tētahi tatau pounamu i waenganui i a rātou me te iwi o Rīhai; ā, i whakahokia anōtia rātou ki ō rātou whenua.

37 Ā, i pahawa ake, nā, i taua tau pū anō i whakahokia te rangimārie ki te iwi o Nīwhai, i mate atu, taua Nīwhaihā, te kaiwhakawā tuarua, kua whakakīngia e ia te nohonga-whakawā i runga i te tōtika i te aroaro o te Atua.

38 Hei aha koa, i whakakorehia e ia tā Arami kia mau i a ia ngā tuhinga me ērā atu mea i whakaarohia nuitia e Arami rātou ko ōna tūpuna hei mea tapu; nō reira ka whakataua iho ēnā ki runga i tana tama, a Heramana.

39 Nana, i pahawa ake, nā, ka whakataua te tama a Nīwhaihā hei whakakī i te nohonga-whakawā, hei whakakapi mō tōna matua; āe rā, i whakataua ia hei kaiwhakawā nui, ā, hei kāwana i runga i te iwi, i runga i te oati me tētahi tikanga tapu ki te whakawā i runga i te tika, me te pūmau i te rangimārie me te herekoretanga o te iwi, me te tuku i a rātou ō rātou tikanga kōwhiringa tapu ki te koropiko ki te Ariki tō rātou Atua, āe rā, ki te tautoko me te pūmau i te tikanga a te Atua i ōna rā katoa, ā, kia whakataua te mea tika ki runga i te hunga kino e rite ana ki ō rātou hara.

40 Nana ināianei, ko Pahorana tōna ingoa. Ā, i whakakī a Pahorana i te nohonga o tōna matua, ā, i tīmata tana whakahaeretanga i te pito whakamutunga o te tau rua ngahuru mā whā, i runga i te iwi o Nīwhai.