1 Ā, i pahawa ake i muri iho i tana whakakapi i āna kōrero ki te iwi he tokomaha te hunga i whakapono ai ki ana kupu, ā, ka tīmata ki te rīpenetā, ā, ki te tirohia ngā karaipiture.

2 Engari i te hiahia te wāhi nui o rātou ki te whakangaro i a Arami rāua ko Amureke; nā te mea i riri rātou ki a Arami, nā te mārama o āna kupu ki a Tēroma; ā, i kī ake anō rātou, nā, kua rūkahu a Amureke ki a rātou, ā, kua taunu hoki i tō rātou ture, ki ō rātou rōia, ki ō rātou kaiwhakawā anō hoki.

3 Ā, i te riri anō rātou ki a Arami rāua ko Amureke; nā te mea hoki i whakaatu mārama atu rāua ki ō rātou whakariharihatanga, i whai rātou kia whakamatea munahia rāua.

4 Engari i pahawa ake, nā, kīhai rawa rātou; engari i mau rāua i a rātou, ā, ka hereheretia rāua ki ngā taura kaha, ā, ka mauria atu rāua ki te aroaro o te kaiwhakawā matua o te whenua.

5 Ā, ka haere atu te iwi me te whakahē i a rāua—e whakaaturia ana, nā, kua taunu rāua i te ture, me ō rātou rōia, ō rātou kaiwhakawā o te whenua, o te iwi katoa anō hoki e noho ana i te whenua; ā, i whakaaturia anō hoki kotahi tonu te Atua, ā, māna tana Tama e tono iho ki waenganui i te iwi, engari e kore ia e whakaora i a rātou; ā, he maha ngā mea i whakaaturia ai e te iwi mō Arami rāua ko Amureke. Nā, i pēneitia i te aroaro o te kaiwhakawā matua o te whenua.

6 Ā, i pahawa ake, nā, i mīharo a Tēroma i ngā kupu kua kōrerotia nei; ā, i mōhio anō ia e pā ana ki te kāpōtanga o ngā hinengaro, nāna hoki i mea i waenganui i te iwi i runga i āna kōrero rūkahu; ā, ka tīmata ake te rakanga o tōna wairua i raro i te mātau ki ana hē; āe rā, ka tīmata ake tana karapotitanga e te mamae o te ao rēwera.

7 Ā, i pahawa ake, nā, ka tīmata ia ki te karanga atu ki te iwi, e mea ana: Nana, ko au te mea hē, ā, he koha kore ēnei tangata i te aroaro o te Atua. Ā, ka tīmata tana tohe atu mō rāua i taua wā ake; engari i taunu rātou i a ia, e mea ana: Kua nohoia hoki koe e te rēwera? Ā, ka tuwha rātou ki a ia, ā, ka makaia atu ia i waenganui i a rātou, me te hunga anō i whakapono ai i ngā kupu i kōrerotia ai e Arami rāua ko Amureke; ā, ka makaia atu rātou, ā, ka tonoa he tangata hei āki i a rātou ki ngā kōhatu.

8 Ā, ka mauria atu ā rātou wāhine me ā rātou tamariki ki te wāhi kotahi, ā, ko ngā tangata i whakapono ai, i whakaakona ai rānei kia whakapono ai ki te kupu a te Atua, nā, i meatia e rātou kia makaia atu rātou ki roto i te ahi; ā, i mauria hoki e rātou ā rātou tuhinga i mau nei ngā karaipiture tapu, ā, ka makaia atu ērā anō ki roto i te ahi, kia tahuna ai, ā, kia whakangaromia ai e te ahi.

9 Ā, i pahawa ake, nā, i mauria atu a Arami rāua ko Amureke, ā, ka kawea atu rāua ki te wāhi kōhuru, kia kitea ai e rāua te whakangaromanga o te hunga i horomia ake ai e te ahi.

10 Ā, ka kite a Amureke i ngā mamae o ngā wāhine me ngā tamariki i a rātou e horomia ana i te ahi, ka mamae anō ia; ā, ka kī atu ia ki a Arami: Me pēhea tāua e mātakitaki ai i tēnei mea whakarihariha? Nō reira tukuna tāua kia torona atu ō tāua ringaringa, me te whakamahi anō i tā te Atua mana kei roto nei i a tāua, me te whakaora i a rātou i ngā muramura.

11 Engari, ka kī atu a Arami ki a ia: Ko tā te Wairua akiaki i ahau, kia kaua e torona atu tōku ringa; nana rā, e whakawhiwhia ake rātou e te Ariki anō, i te korōria; ā, e tukuna ana rātou e ia kia mahia ai tēnei mea, kia mahia rānei tēnei mea e te iwi ki a rātou, e ai ki te pakeke o ō rātou ngākau, kia tika ai ngā whakawākanga māna e karawhiu i runga i tōna riri ki a rātou; ā, ka ai ngā toto o te hunga harakore hei whakahē i a rātou, āe rā, ka nui rawa te karanga hei whakahē i a rātou a te rā whakamutunga.

12 Nā, ka kī atu a Amureke ki a Arami: Nana, tērā pea ka tahuna anōtia tāua e rātou.

13 Ā, ka kī atu a Arami: Kia waiho tēnā ki tā te Ariki e pai ai. Engari, nana, kāore anō kia oti ā tāua mahi; nō reira kāore rātou e tahu i a tāua.

14 Nā, i pahawa ake, nā, i te paunga ake o ngā tinana o te hunga i makaia i te ahi, me ngā tuhinga anō hoki i makaia tahitia ai me rātou, ka tū mai te kaiwhakawā matua o te whenua i te aroaro o Arami rāua ko Amureke, i a rāua e hereheretia ana; ā, ka pākia e ia ō rāua pāpāringa ki tana ringa, ā, ka kī atu ki a rāua: Nō muri i ngā mea kua kite nei kōrua, ka kauhau atu anō kōrua ki tēnei iwi, kia makaia atu rātou ki roto i tētahi roto ahi whānāriki?

15 Nana, e kite nei kōrua, nā, kāore ō kōrua mana ki te whakaora i te hunga i makaia ai ki roto i te ahi; kāore rānei i whakaorangia rātou e te Atua nā te mea nō te whakapono kotahi koutou. Ā, ka pākia anōtia ō rāua pāpāringa e te kaiwhakawā, ā, ka pātai: He aha rā tā kōrua kōrero mō kōrua ake anō?

16 Nā, nō te ritenga o te whakapono o Nīho tēnei kaiwhakawā, nāna a Kiriona i patu.

17 Ā, i pahawa ake, nā, kāore i whakahoki kupu a Arami rāua ko Amureke; ā, ka pākia anōtia rāua e ia, ā, ka tukuna atu rāua ki ngā kātipa kia makaia atu rāua ki roto i te whareherehere.

18 Ā, ka toru o rāua rā i roto i te whareherehere, he tokomaha ngā rōia i haere mai ai, me ngā kaiwhakawā, me ngā pirihi, me ngā kaiako, nō te ritenga o Nīho; ā, ka kuhu rātou ki roto i te whareherehere kia kite ai i a rāua, ā, ka uia rāua e rātou e pā ana ki ngā kupu maha; engari kīhai rāua i whakahoki kupu ki a rātou.

19 Ā, i pahawa ake, nā, ka tū atu te kaiwhakawā i tōna aroaro, ā, ka kī atu: He aha kōrua e kore ai e whakautu i ngā kupu o tēnei iwi? Kāore kōrua i te mōhio he mana tōku kia tukuna atu kōrua ki roto i ngā muramura? Ā, ka whakahau ia i a rāua kia kōrero ai; engari kīhai rāua i whakahoki kupu.

20 Ā, i pahawa ake, nā, ka wehe atu rātou i runga i ā rātou haere, engari i hoki mai anō i te aonga ake o te rā; ā, ka pākia anōtia ō rāua pāpāringa e te kaiwhakawā. Ā, he tokomaha anō ngā mea i haere mai ai, ā, ka pākia anō hoki rāua e rātou, e mea ana: Ka tū anō kōrua ki te whakawā i tēnei iwi, me te whakahē i tō mātou ture? Mehemea he mana nui tō kōrua he aha kōrua e kore ai e whakaora ai i a kōrua anō?

21 Ā, he maha ngā momo mea pērā i kōrerotia ai ki a rāua, e tetē ana i ō rātou niho ki a rāua, ā, e tuwha ana ki a rāua, e mea ana: Ka pēhea ō mātou āhua ina kangaia mātou?

22 Ā, he maha ngā mea pērā, āe rā, koinei momo mea katoa i kōrerotia ai ki a rāua; ā, pēnei tā rātou whakatoi i a rāua mō ngā rā maha. Ā, i kaiponuhia e rātou te kai i a rāua kia matekai ai rāua, me te wai, kia mateinu rāua; ā, i tangohia atu anō hoki ō rāua kākahu kia tahanga ai rāua; ā, pēnei tā rāua hereherenga ki ngā taura kaha, e raungaitia nei rāua i te whareherehere.

23 Ā, i pahawa ake i muri iho i tā rāua whakamamaetanga mō ngā rā maha, (ā, i runga i te rā tuangahuru mā rua, i te marama tuangahuru, i te tau tuangahuru o te whakahaeretanga a ngā kaiwhakawā i runga i te iwi o Nīwhai) nā, ka haere atu te kaiwhakawā matua i runga i te whenua o Amonaihā me ō rātou kaiako tokomaha, me ō rātou rōia tokomaha ki roto i te whareherehere i reira a Arami rāua ko Amureke e hereherea ana ki ngā taura.

24 Ā, ka tū atu te kaiwhakawā matua ki mua i a rāua, ā, ka pākia anōtia rāua, ā, ka kī atu ki a rāua: Mehemea kei a kōrua te mana o te Atua, tēnā, whakaputaina kōrua i ēnei taura, kātahi mātou ka whakapono tērā te Ariki e whakangaro i tēnei iwi e rite ana ki ā kōrua kupu.

25 Ā, i pahawa ake, nā, ka haere whakamua atu rātou katoa me te papaki i a rāua, me te whakahua anō i aua kupu anō, tae atu ana ki te mea whakamutunga; ā, i te wā i kōrerotia ai e te mea whakamutunga kua tau iho te mana o te Atua ki runga i a Arami rāua ko Amureke, ā, ka tū ake rāua i runga i ō rāua waewae.

26 Ā, ka karanga atu a Arami, e mea ana: E te Ariki, me pēhea te roa e mamae ai māua i ēnei mamaetanga nui? E te Ariki? E te Ariki, homai ki a māua te kaha e rite ana ki tō māua whakapono kei roto nei i te Karaiti, tae atu ki te whakaoranga. Ā, ka motuhia e rāua ngā taura i herea nei rāua; ā, i te wā i kite ai te iwi i tēnei, ka tahuti haere rātou, nā te mea kua tau iho te wehi o te whakangaromanga ki runga i a rātou.

27 Ā, i pahawa ake, nā, ka hinga iho rātou ki te whenua nā te nui o tō rātou wehi, ā, kīhai i tae atu ki te tatau o waho rawa o te whareherehere; ā, ka tūoioi nui te whenua, ā, ka pākarukaru iho ngā pakitara ki waenganui, nā, ka hinga iho ki te whenua; ā, i mate te kaiwhakawā matua, me ngā rōia, me ngā pirihi, me ngā kaiako, nā rātou a Arami rāua ko Amureke i pāpaki i tō reira hinganga.

28 Ā, ka puta atu a Arami rāua ko Amureke ki waho i te whareherehere, ā, kāore i ahatia rāua; nā te mea i tukuna iho e te Ariki he mana ki a rāua, e rite ana ki tō rāua whakapono i te Karaiti. Ā, ka puta tōtika atu i te whareherehere; ā, i wetekina rāua i ō rāua taura; ā, kua hinga iho te whereherehere ki te whenua, ā, i patua ngā wairua katoa i roto i ngā pakitara o reira, hāunga rā a Arami rāua ko Amureke; ā, ka haere tōtika atu rāua ki roto i te pā.

29 Nā, i rongo te iwi i tētahi haruru nui, nā konā oma tahi ai rātou i ngā rōpū nunui kia mōhio ai he aha tōna pūtake; ā, i tō rātou kite atu i a Arami rāua ko Amureke e puta mai ana i te whareherehere, me te hinganga iho o ngā pakitara o reira ki te whenua, kua pākia rātou e te wehi nui, ā, ka tahuti atu rātou i te aroaro o Arami rāua ko Amureke anō nei he koati e tahuti atu ana me ana kuao i te aroaro o ngā raiona e rua; ā, pēnei tā rātou tahuti atu i te aroaro o Arami rāua ko Amureke.