1 Auē me he anahera au, ā, kua taea te tūmananko o tōku ngākau, kia haere atu ahau me te kōrero ki te pūkaea o te Atua, ki tētahi reo kia haruru ai i te whenua, me te karanga atu i te rīpenetātanga ki ia iwi, ki ia iwi!

2 Āe rā, ka whakapuaki au ki ia wairua, anō nei ko te reo whatitiri, te rīpenetātanga me te mahere o te hokonga, kia rīpenetā ai rātou me te haere mai ki tō tātou Atua, kia kore ai he pōuritanga anō i runga i te mata o te whenua.

3 Engari nana, he tangata ahau, ā, e hē ana au i tēnei tūmanako āku; nā te mea me tau taku ngākau ki ngā mea kua homai nei e te Ariki ki ahau.

4 Me kaua au e huhuti ake i runga i ōku hiahia i te tikanga pūmau i tētahi Atua tika, nā te mea e mōhio ana au e tukuna ana e ia ki te tangata e rite ana ki ō rātou hiahia, ahakoa ko te mate, ki te ora rānei; āe rā, e mōhio ana au e hoatu ana ia ki te tangata, āe rā, e whakapuakina atu ana ki a ratou he whakapuakitanga tē taea te tīni, e rite ana ki ō rātou hiahia, ahakoa ki te whakaoranga, ki te whakangaromanga rānei.

5 Āe rā, e mōhio ana ahau kua tau mai te pai me te kino ki mua i ngā tāngata katoa; he hē kore te tangata kāore e mōhio ana te pai i te kino; engari ko te tangata e mōhio ana te pai i te kino, e hoatu ana ki a ia ngā mea e rite ana ki ōna hiahia, ahakoa mēnā e hiahia ana i te pai, i te kino rānei, i te oranga, i te matenga rānei, i te hari, i te hinengaro pōuri rānei.

6 Nā, e kite ana kua mōhio au ki ēnei mea, me aha au e hiahia ai ki te mahi i tua atu i te mahi kua karangatia nei tātou?

7 Me aha au e hiahia ai kia whakaanaheratia au, kia taea ai te kōrero ki ngā tōpito katoa o te ao?

8 Nana rā, ka tuku atu te Ariki ki ngā iwi katoa, o tō rātou ake iwi me tō rātou ake reo, ki te whakaako i tana kupu, āe rā, i te mātauranga, ko ngā mea katoa e tika ana ki a ia hei whiwhinga mō rātou; nō reira kite ai tātou ka rūnanga te Ariki i runga i te mātauranga, e ai ki ērā e tika ana, ā, e pono ana.

9 E mōhio ana au ki ērā kua whakahaua au e te Ariki, ā, e whakakorōria au i ērā mea. Kāore au e whakakorōria i au anō, engari e whakakorōria au i ērā mea kua whakahaua au e te Ariki; āe rā, koinei tōku korōria, me kore pea au e meinga ai hei taputapu i ngā ringaringa o te Atua kia kumea ai tētahi wairua ki te rīpenetātanga; ā, koinei taku haringa.

10 Ā nana, i taku kitenga atu i aku huānga e rīpenetā pono ana, e haere mai ana ki te Ariki tō rātou Atua, kātahi taku wairua ka kī i te hari; kātahi au ka maumahara ki tā te Ariki i mea ai mōku, āe rā, kua rangona pū anō e ia tōku inoi; āe rā, kātahi au ka maumahara ki tōna ringa atawhai e torona mai ana ki ahau.

11 Āe rā, ka maumahara anō au i te hereheretanga o ōku tūpuna; nā te mea e mōhio mārire ana au nā te Ariki rātou i whakaputa mai ai i te hereheretanga, ā, nā konei ia whakapūmau ai i tōna hāhi; āe rā, i whakaputa te Ariki te Atua, te Atua o Aperahama, te Atua o Īhaka, me te Atua o Hākopa i a rātou i te hereheretanga.

12 Āe rā, kua maumahara katoa au ki te hereheretanga o ōku tūpuna; ā, ki taua Atua pū anō nāna nei rātou i whakaputa i ngā ringaringa o ngā Ihipiana kia whakputaina ai rātou i te hereheretanga.

13 Āe rā, i whakapūmau taua Atua pū anō i tōna hāhi ki waenganui i a rātou; āe rā, kua karangatia au e taua Atua pū anō ki tētahi karangatanga tapu, ki te kauhau i te kupu ki tēnei iwi, ā, kua tukua mai ngā waimārietanga nui, nā konā rā kī ai tōku hari.

14 Engari kāore au e hari i runga i ōku ake waimārietanga anake, engari kua kī ake tōku hari nā te waimārietanga o aku teina, kua haere ake nei ki te whenua o Nīwhai.

15 Nana, kua kaha rawa atu tā rātou mahi, ā, kua whakaputaina mai nga hua maha; ā, anō te nui o tō rātou utu!

16 Nā, ka kahakina atu tōku wairua i taku whakaaro atu ki te waimārietanga o ēnei aku teina, tae atu ana, me te mea nei, ki te wehenga ruatanga i te tīnana, i pērā rawa tōku hari.

17 Ināianei ā kia tukuna e te Atua ki ēnei, e aku teina, kia noho iho ai rātou i te kīngitanga o te Atua; āe rā, ko te hunga katoa ko rātou nei ngā hua o ā rātou mahi kia kaua rātou e haere tonu atu, engari kia whakawhetai tonu atu rātou ki a ia mō āke tonu atu. Ā, mā te Atua anō e tuku kia meatia ai e rite ana ki aku kupu, pērā me tāku i kōrerotia ai. Āmine.