1 Ināianei ā, i pahawa ake, i te wā pū anō i riro i a Amarikaia te kīngitanga ka tīmata ia ki te whakahihiko i ngā ngākau o ngā Rāmana ki te iwi o Nīwhai; āe rā, ka whakatau ia i ngā kaikōrero hei kōrero atu ki ngā Rāmana i ō rātou pourewa, ki ngā Nīwhai.

2 Ā, pēnei tana whakahihiko i ō rātou ngākau ki ngā Nīwhai, nā konā i te wāhanga whakamutunga o te tau tuangahuru o te whakahaeretanga a ngā kaiwhakawā, i te mea kua tutuki ia i āna mahere tae noa ki taua wā, āe rā, i te mea kua whakatūria ia hei kīngi i runga i ngā Rāmana, ka whai anō ia kia whakahaere tikanga i runga i te whenua katoa, āe rā, me ngā tāngata katoa i roto i te whenua, ko ngā Nīwhai me ngā Rāmana.

3 Nō reira kua tutuki i a ia tāna i whakamahere ai, nā te mea nāna ngā ngākau o ngā Rāmana i whakapakeke, ā, nāna ō rātou hinengaro whakamatapō, ā, i whakaoho anō i a rātou ki te riri, nā konā kua whakaminea mai e ia tētahi ope tino nunui ki te pakanga atu ki ngā Nīwhai.

4 Nā te mea i te ū tonu tana whakaaro, nā te nui o te tokomahatanga o tana iwi, kia taea ai ngā Nīwhai me te kukume iho i a rātou ki roto i te hereheretanga.

5 Ā, pēnei tana whakatū i ngā kaiwhakahau matua i roto i ngā Hōrama, ko rātou te hunga i tino matatau rawa ki te kaha o ngā Nīwhai, me o rātou wāhi haumaru, me ngā wāhi ngoikore rawa o ō rātou pā; nō reira ia i whakatū ai i a rātou hei kaiwhakahau matua i runga i ana tauā.

6 Ā, i pahawa ake, nā, ka haria tō rātou puni, ā, ka haere whakatata atu ki te whenua o Harahemara i roto i te koraha.

7 Nā, i pahawa ake, nā, i a Amarikaia e rapu mana ana i runga i āna mahi tinihanga me tāna mahi māminga, i tērā atu taha, i te whakariterite a Moronai i ngā hinengaro o te iwi kia ū rātou ki te Ariki tō rātou Atua.

8 Āe rā, i te whakakaha ia i ngā tauā a ngā Nīwhai, e whakatū pā tūwatawata iti ana, ngā wāhi haumaru rānei; e keri maioro ana taiāwhio noa ana i āna tauā, ā, e waihanga ana anō hoki i ngā taiapa kōhatu e karapotia nei rātou, huri noa i ō rātou pā me ngā rohenga o ō rātou whenua; āe rā, huri noa i te whenua.

9 Ā, ka whakanōhia e ia ngā tāngata tokomaha rawa ake i roto i ngā pā tūwatawata ngoikore ake; ā, pēnei tana whakatūwatawata me tana whakakaha i te whenua i nōhia ai e ngā Nīwhai.

10 Ā, pēnei tana whakariterite i ngā mea hei tiaki i tō rātou herekoretanga, ō rātou whenua, ā rātou hoawahine, me ā rātou tamariki, me tō rātou maungārongo, ā, kia taea te ora ki te Ariki tō rātou Atua, ā, kia tiaki anō rātou i ērā mea i kīa ai e ō rātou hoariri ko te tikanga Karaitiana.

11 Ā, he tangata kaha, ā, he tangata mārohirohi a Moronai; he tangata mātauranga tino tika rawa atu; āe rā, he tangata kāore i āhuareka ki te whakaheke toto; he tangata i hari ai tōna wairua i te herekoretanga o tōna whenua, me ōna teina i te hereheretanga me te whakataurekarekatanga;

12 Āe rā, he tangata i pupuhi ai tōna ngākau i runga i te whakawhetai ki tōna Atua, mō ngā tini tikanga me ngā tini manaakitanga kua whakataua iho ki runga i tōna iwi; he tangata i kaha mahi mō te oranga me te haumarutanga o tana iwi.

13 Āe rā, he tangata ia e toka tū moana ana i roto i tōna whakapono i te Karaiti, ā, kua oati ia ki tētahi oati ki te tiaki i tōna iwi, āna tikanga, me tōna whenua, me tōna whakapono, tae atu ana ki te whakahekenga o ōna toto.

14 Nā, kua whakaakona ngā Nīwhai ki te tiaki i a rātou anō i ō rātou hoariri, tae atu ana ki te whakahekenga toto mēnā rā e tika ana; āe rā, i whakaakona anō hoki rātou kia kaua e takahia te mana o tētahi atu, āe rā, kia kaua e hāpai hoari ki tētahi atu, ki te hoariri anake ki te tiaki anake i ō rātou oranga.

15 Ā, koinei tō rātou whakapono, mā reira hoki te Atua e whakakake ai i a rātou i runga i te whenua, me kī pēnei, mehemea e ū ana rātou ki te pupuri i ngā whakahaunga a te Atua, nā, ka whakakakea rātou e te Atua i runga i te whenua; āe rā, whakatūpatoria rātou kia tahuti atu ai, ki te whakarite rānei mō te pakanga, e rite ana ki tō rātou mōreareatanga.

16 Hei āpiti anō, ka whakamōhiotia rātou e te Atua ko hea haere ai rātou ki te tiaki i a rātou anō i ō rātou hoariri, mā reira, ka whakaputaina rātou e te Ariki; ā, koinei te whakapono a Moronai, ā, i whakakorōriatia tōna ngākau i reira; ehara i te whakahekenga toto engari i te mahi pai, i te tiakanga o tana iwi, āe rā, i te pupuritanga o ngā whakahaunga a te Atua, āe rā, me te whakahētanga atu i te kino.

17 Āe rā, he pono, he pono tāku e mea atu nei ki a koutou, mehemea i pērā ngā tāngata katoa i mua, ināianei, i ngā rā e takoto ake nei kia rite ki a Moronai, nana, kua whakangāueuetia ngā kaha o te ao rēwera pū anō mō āke tonu atu; āe rā, kua kore rawa te rēwera e whaimana ai i runga i ngā ngākau o ngā tamariki a te tangata.

18 Nana, he tangata ia pērā i a Amona, te tama a Mōhia, āe rā, me ērā atu anō o ngā tama a Mōhia, āe rā, me Arami anō hoki me āna tama, nā te mea he tangata katoa rātou nō te Atua.

19 Nana ināianei, kīhai i iti iho i tō Moronai kaha ki te mahi mō te iwi te kaha o Heramana rātou ko ana teina; nā te mea i kauhau rātou i te kupu a te Atua, ā, i rumakina ki te rīpenetātanga e rātou ngā tāngata katoa i whakaae ai ki te whakarongo ki ā rātou kupu.

20 Ā, pēnei tā rātou haeretanga atu, ā, i whakaiti te iwi i a rātou anō nā ā rātou kupu, nā konā i tino arohaina nuitia rātou e te Ariki, ā, pēnei tā rātou whakawāteatanga atu i ngā pakanga me ngā tautohetohenga i waenganui i a rātou anō, āe rā, mō ngā tau pū anō e whā.

21 Engari, pērā i tāku i kōrero ai, i te pito whakamutunga o te tau tuangahuru mā iwa, āe rā, hei aha koa te rangimārie i waenganui i a rātou, i tōpanaia rātou ahakoa kāore i hiahia ki te whawhai atu ki ō rātou tuākana, ngā Rāmana.

22 Āe rā, hei whakarāpopoto, kīhai ō rātou pakanga ki ngā Rāmana i mutu mō ngā tau maha, ahakoa tō rātou hiahia kore.

23 Nā, i te pōuri rātou ki te hāpai patu ki ngā Rāmana, nā te mea kīhai rātou i āhuareka ki te whakaheke toto; āe rā, ehara tēnei i te katoa—i te pōuri anō rātou i te mea ko rātou te take i puta atu te tokomaha o ō rātou tuākana i tēnei ao ki tētahi ao mau tonu, kāore e rite ana ki te tūtaki i tō rātou Atua.

24 Hei aha koa, kāore rātou i pai ki te tuku i ō rātou oranga, kia parekuratia ā rātou hoawāhine, me ā rātou tamariki e te riri nanakia o te hunga ko rātou nei he huānga ki a rātou i tōna wā, āe rā, kua tītorehia atu i te hāhi, ā, kua wehe atu i a rātou, ā, kua haere atu ki te whakangaro i a rātou mā te hono atu ki ngā Rāmana.

25 Āe rā, kāore rātou i āhei te tuku kia hari ai ō rātou tuākana i runga i ngā toto o ngā Nīwhai, mehemea i reira tētahi hunga hei pupuri i ngā whakahaunga a te Atua, nā te mea ko te whakaari tēnā a te Ariki, ki te pupuri rātou i āna whakahaunga ka whakakake rātou i runga i te whenua.