1 Hei āpiti anō, ko au, a Arami, kua whakahaua e te Atua kia haria a Amureke me te haere atu ki te kauhau anō ki tēnei iwi, ki te iwi rānei i roto i te pā o Amonaiha, i pahawa ake i ahau e tīmata ana ki te kauhau ki a rātou, ka tīmata rātou ki te totohe ki ahau, e mea ana:

2 Ko wai koe? E whakaaro ana rānei koe ka whakapono mātou ki te whakaaturanga o te tangata kotahi, ahakoa ka kauhau ia ki a mātou i te pahemotanga atu o te ao?

3 Nā, kīhai rātou i mārama ki ngā kupu i kōrerotia e rātou; nā te mea kīhai rātou I mōhio ka pahemo atu te ao.

4 Ā, i kī anō rātou: E kore mātou e whakapono ki āu kupu mēnā ka poropiti koe mō tēnei pā nui me tōna whakangaromanga i te rā kotahi.

5 Nā, kīhai rātou i mōhio e taea ana e te Atua te mahi i ngā mahinga whakamīharo, nā te mea he iwi ngākau pakeke, ā, he iwi kakī mārō rātou.

6 Ā, i kī ake rātou: Ko wai te Atua, ko tāna noa he tono i te tangata kotahi noa iho ki waenganui i te iwi, ki te whakapuaki atu ki a rātou mō te pono o ēnei mea whakamīharo nunui?

7 Ā, ka tū mai rātou ki te whakapā mai i ō rātou ringaringa ki runga i ahau; engari nana, kīhai rawa rātou. Ā, i tū māia atu ahau ki te whakapuaki māia atu ki a rātou, āe rā, nāku i whakaatu māia atu ki a rātou, e mea ana:

8 Nana, E koutou te whakatipuranga kino, ā, te whakatipuranga parori kē, kua pēhea koutou i wareware nei ki ngā whakarerenga iho a ō koutou tūpuna; āe rā, anō tā koutou hohoro ki te wareware ki ngā whakahaunga a te Atua.

9 Kāore rānei koutou e mahara ana ki tō tātou matua, ki a Rīhai, i kawea atu i Hiruharama e te ringa o te Atua? Kāore rānei koutou e mahara ana i ārahina atu rātou katoa e ia mā roto i te koraha?

10 Ā, kua tere wareware koutou ināianei e hia ngā wā nāna ō tātou tūpuna i whakaputa i ngā ringaringa o ō rātou hoariri, ā, i tiakina rātou mai i te whakangaromanga, e ngā ringaringa pū anō o ō rātou ake tuakana?

11 Āe rā, me i kore tōna kaha kāore nei ōna rite, me tōna aroha, me tōna manawaroa ki a tātou, kāore e kore kua hatepea atu tātou i te mata o te whenua i mua noa atu i tēnei wā, ā, kua whakataua pea ki tētahi āhuatanga mutunga kore o te pōuri me te auē.

12 Nana, ko taku kupu tēnei ki a koutou ināianei, nā, e whakahaua ana koutou e ia kia rīpenetā; ā, ki te kore koutou e rīpenetā, kua kore rawa e taea e koutou te whiwhi i te kīngitanga a te Atua. Engari nana, ehara tēnei i te katoa—nāna koutou i whakahau kia rīpenetā, ki te kore māna rawa koutou e whakangaro atu i te mata o te whenua; āe rā, ka toro iho ki a koutou i runga i tōna riri, ā, i runga i tōna riri nanakia e kore ia e tahuri atu.

13 Nana, kāore rānei koutou e mahara ana ki ngā kupu i kōrerotia ai e ia ki a Rīhai, e mea ana: Ki te pupuri koutou i aku whakahaunga, ka whaioranga koutou i runga i te whenua? Hei āpiti anō e kīa ana: Ki te kore koutou e pupuri i aku whakahaunga ka hatepea atu koutou i te aroaro o te Ariki.

14 Nā, e hiahia ana ahau kia mahara koutou, nā, i te mea kīhai ngā Rāmana i pupuri i ngā whakahaunga a te Atua, kua hatepea atu rātou i te aroaro o te Ariki. Nā, e kite ana tātou kua whakamanaia te kupu a te Ariki i roto i tēnei mea, ā, kua hatepea atu ngā Rāmana i tōna aroaro, mai i te tīmatanga o ō rātou hē i tēnei whenua.

15 Hei aha koa ko taku kupu tēnei ki a koutou, nā, ka ngāwari ake tō rātou i te rā whakawā i tō koutou, mehemea ka noho tonu koutou i ō koutou hara, āe rā, ka ngāwari ake anō tō rātou i tēnei oranga i tō koutou, ki te kore koutou e rīpenetā.

16 Nā te mea he maha ngā kupu whakaari kua torona atu nei ki ngā Rāmana; nā te mea nā ngā whakarerenga iho a ō rātou tūpuna i meinga ai rātou kia noho tonu i te tō rātou āhuatanga kuare; nō reira ka whakaaroha te Ariki ki a rātou, ā, māna tō rātou noho i te whenua e whakaroa.

17 Ā, hei tōna ake anō wā ka meinga rātou kia whakapono ki tana kupu, ā, kia mōhio ai rātou ki te hē o ngā whakarerenga iho a ō rātou tūpuna; ā, ka whakaorangia ngā mea tokomaha o rātou, nā te mea ka aroha te Ariki ki te hunga katoa e karanga ake ai i tōna ingoa.

18 Engari nana, ko taku kupu tēnei ki a koutou, nā, ki te ū tonu atu koutou i ō koutou whakarihariha e kore ō koutou rā e whakaroahia i runga i te whenua, nā te mea ka tukuna ngā Rāmana ki runga i a koutou; ā, ki te kore koutou e rīpenetā ka haere mai rātou hei tētahi wā kāore e mōhiotia ana e koutou, ā, ka torona iho koutou i runga i te whakangaromanga katoatanga; ā, ka rite ki te riri nanakia o te Ariki.

19 Nā te mea e kore ia e tuku i a koutou kia ora ai koutou i roto i ō koutou hara, kia whakangaromia ai tōna iwi. Ko taku kupu tēnei ki a koutou, Kāo; he nui atu tōna pai ki te tuku i ngā Rāmana kia whakangaromia katoatia ai tōna iwi e karangatia ana ko te iwi o Nīwhai, mehemea e taea ana tō rātou takanga ki roto i te hara me te hē, nō muri iho i te hoatutanga nuitanga o te māramatanga me te mātauranga ki a rātou e te Ariki te Atua;

20 Āe rā, nō muri iho i te mea kua whakamakautia rawatia tēnei iwi e te Ariki; āe rā, nō muri i te whakamakautanga i runga ake i ērā atu iwi, hapū, reo, huihuinga tāngata rānei; nō muri iho i te whakamōhiotanga atu i ngā mea katoa ki a rātou, e rite ana ki ō rātou hiahia, me tō rātou whakapono, me ngā inoi mō ngā mea o mua, o nāianei, me ngā mea anō ka puta mai;

21 I te mea kua torona e te Wairua o te Atua; kua kōrerorero tahi ki ngā anahera, ā, kua kōrerotia e te reo o te Ariki; ā, i a rātou te wairua o te poropititanga, me te wairua o te whakakitenga, me ngā takoha maha anō hoki, ko te takoha o te kōrero i ngā reo, ko te takoha o te kauhautanga, me te takoha o te Wairua Tapu, me te takoha o te whakamāoritanga;

22 Āe rā, nō muri hoki i tā te Atua whakaputanga i a rātou i te whenua o Hiruharama, e te ringa o te Ariki; kua whakaorangia i te matekai, i te māuiui, me ngā tūmomo mate urutā katoa o ia āhua, o ia āhua; ā, kua whakapakari rātou i te taha ki te whawhai, kia kore ai rātou e whakangaromia; kua whakaputaina atu rātou i te hereheretanga i tēnei wā, i tēnei wā, ā, kua puritia, kua tiakina anō hoki tae noa mai ki tēnei wā; ā, kua whakakakea rātou tae atu ana ki te wā e whairawa ana rātou i roto i ngā mea katoa—

23 Ināianei ā nana ko taku kupu tēnei ki a koutou, mehemea tēnei iwi, kua whakawhiwhia nei ki ngā manaakitanga maha mai i te ringa o te Ariki, ka hara tauaro ki te māramatanga me te mātauranga kei a rātou, ko taku kupu tēnei ki a koutou, nā, mehemea koinei te āhua, nā, mehemea ka taka iho rātou ki roto i te hē, ka ngāwari rawa ake tō ngā Rāmana i tō rātou.

24 Nana rā, kua whātorongia atu ngā kupu whakaari a te Ariki ki ngā Rāmana, engari kāore ki a koutou mehemea ka hē koutou; nā te mea kāore rānei te Ariki i tino whakaari, ā, i tino whakapuaki, nā, mehemea ka haututū koutou ki a ia, māna katoa koutou e whakangaro atu i te mata o te whenua?

25 Ināianei ā, mō tēnei take, kia kore ai koutou e whakangaromia, kua tonoa e te Ariki tana anahera kia torotoro iho ki ana iwi tokomaha, e whakapuaki ana ki a rātou kia haere atu rātou me te karanga kaha atu ki tōna iwi, e mea ana: E rīpenetā koutou, nā te mea kua tata mai te kīngitanga o te rangi;

26 Ā, kāore e maha ngā rā ka haere mai te Tama a te Atua i runga i tōna korōria; ā, ko tana korōria te korōria o te Kotahi Anake a te Matua, e kikī ana i te aroha, te mana taurite, me te pono, e kikī ana i te manawanui, i te aroha, i te manawaroa, e hohoro ana ki te whakarongo atu ki ngā karanga o tana iwi me te whakautu i ā rātou inoi.

27 Ā, nana, e haere mai ana ia ki te hoko i te hunga e rumakina ai ki te rīpenetātanga, mā roto i te whakapono i runga i tōna ingoa.

28 Nō reira, whakaritea e koutou te huarahi a te Ariki, nā te mea kua tata te wā e kokoti ai ngā tāngata katoa i te utu mō ā rātou mahi, e rite ana ki tā rātou i mahi ai—mehemea i tika ka kokoti rātou i te whakaoranga o ō rātou wairua, e ai ki te mana me te whakaputanga a Ihu Karaiti; ā, mehemea kua kino ka kokoti rātou i te whakapōuritanga o ō rātou wairua, e ai ki te mana me te hereherenga a te rēwera.

29 Nana ināianei, koinei te reo o te anahera, e karanga ana ki te iwi.

30 Ināianei ā, e aku teina aroha, nā te mea ko koutou aku teina, ā, e tika ana kia arohaina koutou, ā, e tika ana kia whakaputa koutou i ngā mahinga e rite ana mō te rīpenetātanga, e kitea ana kua tino whakapakekehia ō koutou ngākau ki te kupu a te Atua, ā, e kitea ana he iwi ngaro, he iwi taka koutou.

31 Nā, i pahawa ake i tāku, i tā Arami, kōrerotanga atu i ēnei kupu, nana, ka pukuriri te iwi ki ahau nā taku kōrero atu ki a rātou he iwi ngākau-pakeke, ā, he iwi kakī mārō rātou.

32 Nā taku kī atu anō ki a rātou he iwi ngaro, ā, he iwi taka rātou i pukuriri ai rātou ki ahau, ā, ka whai rātou ki te whakapā i ō rātou ringaringa ki runga i ahau, kia makaia atu au ki roto i te whareherehere.

33 Engari i pahawa ake, nā, kāore te Ariki i tuku i a rātou kia mauria atu au i tērā wā kia makaia atu ai au ki roto i te whareherehere.

34 Ā, i pahawa ake, nā, ka haere atu a Amureke, ā, ka tū atu ia, ā, ka tīmata ia ki te kauhau atu ki a rātou anō hoki. Ināianei ā, kāore i tuhia ngā kupu katoa i kōrerotia ai e Amureke, hei aha koa kua tuhia tētahi wāhi o ana kōrero i roto i tēnei pukapuka.