1 Ā, i pahawa ake i te tau tuangahuru mā tahi o te whakahaeretanga a ngā kaiwhakawā i runga i te iwi o Nīwhai, i te rā tuarima o te marama tuarua, i te mea kua roa e mau ana te rongo ki te whenuao Harahemara, kāore hoki he pakanga, he tautohetohenga rānei mō ētahi tau, tae atu ana ki te rā tuarima o te marama tuarua i te tau tuangahuru mā tahi, nā, kua rangona tētahi karanga ki te whawhai puta noa i te whenua.

2 Nana rā, kua whakaeke mai ngā ope tauā Rāmana i te taha koraha, ki roto i ngā rohe o te whenua, tae atu pū anō ki roto i te pā o Amonaihā, ā, ka tīmata tā rātou patupatu i te iwi me te whakangaro i te pā.

3 Ināianei ā, i pahawa ake, kāore anō ngā Nīwhai kia whakatū tauā nui kia āia atu rātou ki waho i te whenua, kua whakangaromia e rātou te iwi i roto i te pā o Amonaihā, me ētahi atu anō i ngā kaha o Noa, ā, kua mauhereheretia atu ētahi anō ki roto i te koraha.

4 Nā, i pahawa ake, nā, i te hiahia ngā Nīwhai ki te tiki i te hunga kua mauhereheretia atu nei ki roto i te koraha.

5 Nō reira, ko te tangata i whakaritea hei rangatira nui i runga i ngā ope tauā o ngā Nīwhai, (ā ko Hōrama tōna ingoa, ā, tokorua ana tama, arā, ko Rīhai rāua ko Aha)—nā, tokorua ngā tama a Horama, e mōhio ana ko Arami te pirihi teitei i runga i te hāhi, ā, kua rongo hoki ia i a ia te wairua o te poropititanga, nō reira ka haere atu rāua ki a ia i runga i te hiahia kia mōhio ai ki hea rātou haere ai e ai tā te Ariki hiahia ki roto i te koraha kia kimihia ai ā rātou teina, kua mauhereheretia atu e ngā Rāmana.

6 Ā, i pahawa ake, nā, ka ui atu a Arami ki te Ariki e pā ana ki ēnei mea. Ā, ka hoki atu a Arami ki a rāua me te kī: Nana, ka whakawhiti atu ngā Rāmana i te awa o Hairona i te taha tonga o te koraha, ki kō rawa atu i ngā rohe o te whenua o Manati. Ā nana, ka tūtaki koutou ki a rātou i reira, i te taha rāwhiti o te awa o Hairona, ā, i reira te Ariki e tuku ai ki a koutou ā koutou teinakua mauheeheretia atu nei e ngā Rāmana.

7 Ā, i pahawa ake, nā, ka whakawhiti atu a Hōrama me ana tama i te awa o Hairona, me ā rātou ope tauā, ā, ka haere atu ki tua atu i ngā rohe o Manati ki roto i te koraha i te tonga, i te taha rāwhiti o te awa o Hairona.

8 Ā, ka rokohanga atu rātou i ngā ope tauā a ngā Rāmana, ā, ka whakamararatia atu ngā Rāmana, ā, ka āia atu ki roto i te koraha; ā, ka tīkina e rātou ā rātou teina kua mauhereheretia atu e ngā Rāmana, ā, kāore i ngaro atu tētahi wairua kotahi o rātou te hunga i mauheretia atu ai. Ā, ka mauria atu rātou e ō rātou tuakana kia nōhia ai ō rātou ake whenua.

9 Ā, i pēnei te mutunga o te tau tuangahuru mā tahi o ngā kaiwhakawā, kua āia atu ngā Rāmana i te whenua, ā, kua whakangaromia nei te iwi o Amonaihā; āe rā, kua whakangaromia ia wairua ora o ngā Amonaihā, me tō rātou pā nui, kua mea ake rātou tē taea e te Atua te whakangaro, nā tōna nui.

10 Engari nana, kua ururuatia i te rā kotahi; ā, haehaetia ana ngā tūpāpaku e ngā kurī me ngā kararehe mohoao o te koraha.

11 Hei aha koa, nō muri iho i ngā rā maha ka pūrangatia ngā tūpāpaku i rungai te mata o te whenua, ā, kua ūhia rātou ki te uhinga pāpaku. Ināianei ā, anō te nui o tō reira haunga kīhai te iwi i haere atu ki reira kia nōhia ai te whenua o Amonaihā mō ngā tau maha. Ā, kua karangatia ko te Whakangaromanga a ngā Nīho; nā te mea nō te ritenga o Nīho rātou, te hunga i whakamatea ai; ā, waiho ana ō rātou whenua kia ururuatia tonutia.

12 Ā, kāore ngā Rāmana i whakaeke mai anō ki te pakanga ki ngā Nīwhai tae atu ana ki te tau tuangahuru mā whā o te whakahaeretanga a ngā kaiwhakawā i runga i te iwi o Nīwhai. Ā, i pēnei te āhua o te maungārongo i te iwi o Nīwhai mō ngā tau e toru i runga i te whenua.

13 Ā, ka haere atu a Arami rāua ko Amureke e kauhau ana ki te iwi i roto i ō rātou temepara, i roto anō i ō rātou āhuru mōwai, i roto anō i ō rātou whare karakia, kua hangaia nei i runga i te ritenga o ngā Hūrae.

14 Ā, ko te hunga katoa e whakarongo ai ki ā rāua kupu, ka tukuna e rāua te kupu a te Atua, kāore he whakapai kanohi i ngā wā katoa.

15 Ā, i pēnei tā Arami rāua ko Amureke haere atu, me ētahi atu mea tokomaha kua whiria nei mō te mahi, ki te kauhau atu i te kupu puta noa i te whenua. Ā, ka whakapūmautia whānuitia te hāhi puta noa i te whenua, i te rohe katoa huri noa, i waenganui i te iwi katoa o ngā Nīwhai.

16 Ā, kāore he rerekētanga i waenganui i a rātou; ka maringi iho te Ariki i tōna Wairua ki runga i te mata katoa o te whenua kia whakaritea ngā hinengaro o ngā tamariki a te tangata, kia whakaritea rānei ō rātou ngākau kia whiwhi ai i te kupu e whakaakona ai ki waenganui i a rātou mai i te wā o tana haerenga mai—

17 Kia kore ai rātou e whakapakekehia ki te kupu, kia kore ai rātou e whakapono kore, me te haere noa ki te whakangaromanga, engari kia whiwhi rātou i te kupu i runga i te hari, anō nei he manga e honoa ana ki te waina pono, kia tomo atu rātou ki roto i te okiokinga o te Ariki tō rātou Atua.

18 Nā, i kauhau atu aua pirihi i haere atu ai i waenganui i te iwi kia kaua e rūkahu, e mahi tinihanga, e pūhaehae, e totohe, e mauāhara, e taunu, e tāhae, e pāhua, e muru, e kōhuru, e mahi pūremu, e mahi rānei i ngā tūmomo karihika katoa, e karanga ana kāore e tika ana ēnei mea—

19 E kawe rongo atu ana i ngā mea meake nei ka puta; āe rā, e kawe rongo atu ana i te haerenga mai a te Tama a te Atua, ōna whakamamaetanga me tōna matenga, me te aranga anō hoki o te hunga mate.

20 Ā, he tokomaha anō ngā tāngata i ui atu ai e pā ana ki te wāhi e puta ai te Tama a te Atua; ā, i whakaakona rātou, nā, ka puta ia ki a rātou whai muri iho i tōna aranga; ā, ka rongo te iwi i tēnei i runga i te hari nui me te koa.

21 Ināianei ā, whai muri iho i te whakapūmautanga ake o te hāhi puta noa i te whenua katoa—kua riro i a rātou te wikitōria i rungai te rēwera, ā, e kauhau ana anō i te kupu a te Atua i tōna tūturutanga i whenua katoa, ā, ko te Atua e maringi iho ana i ana manaakitanga ki runga i te iwi—i pēnei te mutunga o te tau tuangahuru mā whā o te whakahaeretanga a ngā kaiwhakawā i runga i te iwi o Nīwhai.