1 Ā, nana, i pahawa ianei ake, nā, ka riri ake ngā Rāmana nā tā rātou patu i ā rātou teina; nō reira oati ai rātou kia ngaki mate ai ki runga i ngā Nīwhai; ā, kāore rātou i ngana anō ki te patu i te iwi o Anati-Nīwhai-Rīhai i taua wā.

2 Engari ka hāpai ake rātou i ō rātou tauā, ā, ka haere atu ki roto i ngā rohe o te whenua o Harahemara, ā, ka taka iho ki runga i te iwi e noho ana i te whenua o Amonaihā, ā, ka whakangaromia rātou.

3 Ā, i muri iho i tēnā, he nui ā rātou pakanga ki ngā Nīwhai, nā konā ka āia atu, ā, ka whakamatea rātou.

4 Ā, i waenganui i ngā Rāmana i patua iho ai, arā, ko te nuinga o ngā uri o Amurono me ana teina, ko rātou nei ngā pirihi a Noa, ā, i patua rātou e ngā ringaringa o ngā Nīwhai;

5 Ā, ko te toenga, kua tahuti atu nei ki roto i te koraha ki te rāwhiti, ā, whai muri i tā rātou mau ki te kaha me te mana i runga i ngā Rāmana, koia rātou i mea ai kia mate ai ngā Rāmana tokomaha i te ahi mō tō rātou whakapono te take—

6 Mō te nuinga o rātou, nō muri i te parekura nui me ā rātou whakamamaetanga maha, ka tīmata kia whakaohokia ake ki tētahi maumaharatanga ki ngā kupu i kauhautia ai e Arona rātou ko ana teina ki a rātou i tō rātou whenua; nō reira ka tīmata tā rātou whakapono kore i ngā whakarerenga iho a ō rātou tūpuna, me te whakapono ki te Ariki, me tana tuku mana nui atu ki ngā Nīwhai; ā, pēnei he tokomaha o rātou i whakatahuritia ai i roto i te koraha.

7 Ā, i pahawa ake, nā, i mea ai te hunga whakahaere ko rātou nei ngā mōrehu o ngā tamariki a Amurono kia whakamatea rātou, āe rā, ko te hunga katoa i whakapono ai i ēnei mea.

8 Nā, i whakaohokia ake ō rātou tuākana tokomaha ki te riri e tēnei kōhurutanga; ā, ka tīmata tētahi tautohetohenga nui i te koraha; ā, ka tīmata ngā Rāmana ki te aruaru i ngā uri o Amurono me ana teina, ā, ka tīmata tā rātou patupatu i a rātou; ā, ka tahuti atu rātou ki roto i te koraha ki te taha rāwhiti.

9 Ā nana, e arumia tonutia ana rātou i tēnei rā tonu e ngā Rāmana. Pēnei kua pahawa ake ngā kupu a Apinati i kōrerotia ai e ia e pā ana ki ngā uri o ngā pirihi nā rātou ia i mea kia mate ai i te ahi.

10 Nā te mea i kī atu ia ki a rātou: Ko tā koutou e mea ai ki ahau, nā, he ritenga tērā mō ngā mea e puta mai ai.

11 Ināianei ā, ko Apinati te tuatahi i mate ai i te ahi mō tōna whakapono; nā, koinei te tikanga o tāna i mea ai, arā, he tokomaha ngā mea e mate ai i te ahi, e rite ana ki tōna whakamamaetanga.

12 Ā, i kī atu ia ki ngā pirihi a Noa, nā, ka meatia e ō rātou uri kia whakamatea ngā mea tokomaha, i runga i te ritenga i pērātia ai ia, ā, ka whakamararatia whānuitia atu, ā, ka patua, e rite pū ana ki tētahi hipi hēpara kore e āia ana, ā, e patua ana e ngā kararehe mohoao; ināianei ā nana, i whakamanaia ēnei kupu, nā te mea i āia atu rātou e ngā Rāmana, ā, i arumia rātou, ā, i pakipakia rātou.

13 Ā, i pahawa ake, nā, i te kitenga o ngā Rāmana tē taea ngā Nīwhai e rātou ka hoki rātou ki tō rātou ake whenua; ā, he tokomaha o rātou i whakawhiti mai ai kia noho ai i te whenua o Ihimaera me te whenua o Nīwhai, ā, i whakahono atu rātou i a rātou anō ki te iwi o te Atua, ko rātou nei te iwi o Anati-Nīwhai-Rīhai.

14 Ā, i tanu anō rātou i ā rātou rākau whawhai o te pakanga, e rite ana ki tā ā rātou teina, ā, ka meinga rātou hei iwi tika; ā, i hīkoi rātou i ngā huarahi o te Ariki, ā, i ū rātou ki te pupuri i āna whakahaunga me āna ture.

15 Āe rā, i puritia e rātou te ture a Mohi; nā te mea i tika pū me pupuri rātou i te ture a Mohi i tēnei wā, nā te mea kīhai i whakatutukihia. Engari ahakoa te ture a Mohi, i titiro whakamua atu rātou ki te haerenga mai a te Karaiti, e whakapono ana rātou ko te ture a Mohi tētahi ritenga o tana haerenga mai, ā, e whakapono ana me pupuri rātou i ērā meatanga o waho tae atu ana ki te wā e whakaputaina mai ia ki a rātou.

16 Nā, kāore rātou i whakapono e puta mai ai te whakaoranga i te ture a Mohi; engari ko tā te ture a Mohi he whakakaha i tō rātou whakapono i te Karaiti; ā, i pēnei tā rātou pūmau ki tētahi tūmanako mā roto i te whakapono, tae atu ana ki te whakaoranga tonutanga, e whakawhirinaki ana ki te wairua o te poropititanga, i kōrero ai mō aua mea e puta mai ai.

17 Ināianei ā nana, ka tino hari a Amona, me Arona, me Omonere, me Himini, me ā rātou teina, nā tō rātou waimārie i whiwhi ai rātou i waenganui i ngā Rāmana, e kite ana kua tukuna e te Ariki ki a rātou e rite ana ki ā rātou inoi, ā, kua whakatūturuhia anō hoki e ia tana kupu ki a rātou i roto i ngā mea katoa.