1 Nā, e taku tama, anei anō tētahi kōrero āku e mea atu nei ki a koe; nā te mea e kite ana au kei te āwangawanga nei tō hinengaro e pā ana ki te aranga ake o te hunga mate.

2 Nana, ko taku kupu tēnei ki a koe, kāore he aranga mai—ko taku kupu tēnei rānei, arā, kāore tēnei tīnana matemate e mau nei te matekore, kāore tēnei hanga poke e mau nei te poke kore—tae atu ki te haerenga mai a te Karaiti.

3 Nana, e pahawa ake ana i a ia te aranga ake o te hunga mate. Engari nana, e taku tama, kāore anō te aranga kia tae mai. Nā, ka hurahia atu ki a koe tētahi mea ngaro; hei aha koa, he maha ngā mea ngaro e puritia tonutia ana, kia kore ai tētahi e mōhio ai hāunga ko te Atua anō. Engari ka whakakite atu au ki a koe i te mea kotahi kua āta inoia māriretia atu ki te Atua kia mōhio ai au—koia e pā ana ki te aranga.

4 Nana, kua whakataua tētahi wā e haere mai ai ngā tāngata katoa i te mate. Nā, kāore e mōhio ana tētahi hei āhea tae mai ai tēnei wā; engari e mōhio ana te Atua ki te wā kua whakataua nei.

5 Nā, ahakoa ka kotahi tonu te wā, he wā tuarua rānei, he wā tuatoru rānei, e puta mai ai te tangata i te mate, kāore e whaitake ana; nā te mea e mōhio ana te Atua i ēnei mea katoa; ā, kāti noa māku kia mōhio ai koinei te āhua—he wā anō kua whakataua e maranga mai ai ngā tāngata katoa i te mate.

6 Nā, me tika pū he takiwā i waenganui i te wā o te matenga me te wā o te aranga.

7 Ināianei ā e hiahia ana au kia inoi atu ka ahatia ngā wairua o te tangata mai i tēnei wā o te mate ki te wā kua whakataua hei wā mō te aranga?

8 Nā, ahakoa mēnā kotahi te wā he nui atu rānei kua whakaritea kia maranga ake ai te tangata, kāore e whaitake ana; nā te mea kāore e mate te katoa i te wā kotahi, ā, kāore e whaitake ana tēnei mea; he rite katoa ki te rā kotahi ki te Atua, ā, e mehuatia ana te wā e te tangata anake.

9 Nō reira, he wā anō kua whakataua ki te tangata kia maranga ake rātou i te mate; ā, he wā anō kei waenganui i te wā o te mate me te aranga. Ināianei ā, e pā ana ki tēnei takiwā o te taima, i āta inoia māriretia atu e au ki te Ariki e pā ana ki tēnei mea, arā, e ahatia ana ngā wairua o te tangata; ā, koinei te mea e mōhio nei au.

10 Ā, ina tae mai te wā e maranga ake ai te katoa, kātahi rātou ka mōhio, nā, e mōhio ana te Atua ki ngā wā katoa kua whakataua ki te tangata.

11 Nā, ko te āhua o te wairua i waenganui i te mate me te aranga—Nana, kua whakamōhiotia mai ki ahau e tētahi anahera, nā, ko ngā wairua o ngā tāngata katoa, hei taua wā tonu e wehe atu ai i te tīnana matemate, āe rā, ko ngā wairua o ngā tāngata katoa, ahakoa pai, ahakoa kino rānei, ka kahakina atu ki te kāinga ki taua Atua nāna nei te ora i hoatu ki a rātou.

12 Kātahi ka pahawa ake, nā, ka whakawhiwhia ngā wairua o te hunga tika ki roto i tētahi āhuatanga o te harikoa, kua karangatia nei ko te pararaiha, he āhuatanga okioki, he āhuatanga rangimārie, i reira rātou whakatā ai i ā rātou pōraruraru katoa me ā rātou mānukanuka katoa, me te pōuritanga.

13 Kātahi ka pahawa ake, nā, ko ngā wairua o te hunga kino, āe rā, ko ngā mea e kino ana—nana rā, kāore ō rātou wāhi, ō rātou tāuteute rānei o te Wairua o te Ariki; nana rā, kua whiriwhiri rātou i ngā mahinga kino, ā, mahue atu ngā mahinga pai; nō reira uru atu ai te wairua o te rēwera ki roto i a rātou, ā, ka nohoia tō rātou whare—ā, ka makaia atu ēnei ki te pōuritanga ki tua; ka ai te tangihanga, me te auētanga, me te tetētanga o ngā niho, ā pēnei nā tō rātou ake hē, kua ārahina atu e tā te rēwera i pai ai.

14 Nā, koinei te āhuatanga o ngā wairua o te hunga kino, āe rā, i te pōuritanga, me tētahi āhuatanga weriweri, e titiro mataku atu ana mō te whakatakariri pūkākā o te Atua ki runga i a rātou; ka noho pēnei tonu rātou i tēnei āhuatanga, ka pērā anō te hunga tika i pararaiha, tae atu ana ki te wā o tō rātou aranga.

15 Nā, kei te whakaaro ētahi ko tēnei āhuatanga o te harikoa me tēnei āhuatanga o te pōuritanga o te wairua, i mua i te aranga, koia ko te aranga tuatahi. Āe rā, e whakaae ana ahau e taea ana tēnei kia karangatia ai he aranga, ko te marangatanga ake o te wairua, ko te tukunga atu rānei o te wairua ki te harikoa, ki te pōuritanga rānei, e ai ki ngā kupu kua kōrerotia ake nei.

16 Ā nana, kua kōrerotia anōtia, nā, he aranga tuatahi, he aranga ake o te hunga katoa o mua, o nāianei, o muri atu anō hoki, tae noa iho ki te aranga ake o te Karaiti i te mate.

17 Nā, kāore nei tātou e whakaaro ana ko tēnei aranga kua kōrerotia pēneitia ake nei, koia ko te aranga ake o ngā wairua me tō rātou tukunga ki te harikoa, ki te pōuritanga rānei. Kāore e taea ana e koe te whakaaro koinei tōna tikanga.

18 Nana, ko taku kupu tēnei ki a koe, Kāo; engari ko tōna tikanga kē ko te whakakotahitanga anō o te wairua ki te tīnana, o te hunga i ngā rā o Arama tae noa iho ki te aranga ake o te Karaiti.

19 Nā, kāore au e mea ana, ka whakakotahitia ngā wairua me ngā tīnana o te hunga kua kōrerotia ake nei i te wā kotahi, ko te hunga kino me te hunga tika; kāti noa i tāku e mea atu nei, nā, ka haere mai rātou katoa; arā rānei, ka pahawa ake tō rātou aranga i mua i te aranga o te hunga e mate ai i muri i te aranga ake o te Karaiti.

20 Nā, e taku tama, kāore au e mea ana, nā, ka puta mai tō rātou aranga hei te aranga o te Karaiti; engari nana, he whakaaro noa iho nōku tāku e kōrero nei, nā, ka whakakotahitia ngā wairua me ngā tīnana, o te hunga tika, hei te aranga o te Karaiti, me tōna kakenga ki te rangi.

21 Engari ahakoa mēnā ka ai hei tōna aranga, hei muri rānei, kāore au i te kī atu; engari ko tēnei tāku e kōrero ai, nā, kei konā tētahi wāhi i waenganui i te mate me te aranga o te tīnana, ā, he āhuatanga o te wairua i te harikoa, i te pōuritanga rānei tae noa atu ki te wā kua whakataua e te Atua ka haere mai te hunga mate, ā, kia whakakotahitia anōtia, ko te wairua rāua ko te tīnana, ā, ka mauria mai kia tū ai i te aroaro o te Atua, ā, kia whakawākia e rite ana ki ā rātou mahinga.

22 Āe rā, mā konei whakahokia mai ai ērā mea kua kōrerotia ake nei e ngā māngai o ngā poropiti.

23 Ka whakahokia te wairua ki te tīnana, ā, ko te tīnana ki te wairua; āe rā, ka whakahokia ngā peke katoa ki tōna tīnana; āe rā, kāore noa iho tētahi makawe o te māhunga e ngaro; engari ka whakahokia ngā mea katoa ki tōna āhuatanga tino tika rawa atu.

24 Ināianei ā, e taku tama, ko tēnei te whakahokinga kua kōrerotia nei e ngā māngai o ngā poropiti—

25 Kātahi ka tīaho atu te hunga tika i te kīngitanga o te Atua.

26 Engari nana, ka tau iho tētahi matenga weriweri ki runga i te hunga kino; nā te mea ka mate rātou ki ngā mea e pā ana ki ngā mea o te tika; nā te mea he poke rātou, ā, kāore e taea ana e tētahi mea poke kia whiwhi ai i te kīngitanga o te Atua; engari ka makaia atu rātou ki waho, ā, ka tukuna kia kai ai i ngā hua o ā rātou mahinga, kua kino nei; ā, e inu ana rātou i ngā para o te kapu kawa.