1 Nana, i pahawa ianei ake, nā, i muri iho i te whakapūmautanga o te iwi o Amona i te whenua o Herehona, āe rā, i muri iho anō hoki i te ānga atu i ngā Rāmana ki waho atu i te whenua, ā, ka tanumia anōtia ō rātou mate e te iwi o te whenua—

2 Nā, kīhai i tatauria ō rātou mate nā te nui o ō rātou tokomahatanga; kīhai rānei i tatauria ngā mate o ngā Nīwhai—engari i pahawa ake i muri iho i tā rātou tanu i ō rātou mate, ā, i muri iho hoki i ngā rangi nohopuku, me te tangi, me te inoi, (ā, i te tau tuangahuru mā ono o te whakahaeretanga a ngā kaiwhakawā i runga i te iwi o Nīwhai) ka hua ake te rangimārie tonutanga puta noa i te whenua katoa.

3 Āe rā, ka ū te iwi ki te pupuri i ngā whakahaunga a te Ariki; ā, i kaha tā rātou ū ki ngā tikanga a te Atua, e ai ki te ture a Mohi; nā te mea i whakaakona rātou kia pupuri ai i te ture a Mohi tae atu ki tōna whakatutukitanga.

4 Ā, pēnei kīhai tētahi raruraru i te iwi i te tau tuangahuru mā ono katoa o te whakahaeretanga a ngā kaiwhakawā i runga i te iwi o Nīwhai.

5 Ā, i pahawa ake, nā, i te tīmatanga o te tau tuangahuru mā whitu o te whakahaeretanga a ngā kaiwhakawā, ka hua tonu te rangimārie.

6 Engari i pahawa ake i te pito whakamutunga o te tau tuangahuru mā whitu, i haere mai tētahi tangata ki roto i te whenua o Harahemara, ā, ko te ātete-Karaiti ia, nā te mea i tīmata ia ki te kauhau ki te iwi e whakahē ana i ngā poropititanga kua kōrerotia e ngā poropiti, e pā ana ki te haerenga mai a te Karaiti.

7 Nā, kāore tētahi ture e whakahē ana i te whakapono o te tangata; nā te mea i tino tauaro tērā ki ngā whakahau a te Atua kia whakaritea ai tētahi ture e kūmea mai ai te tangata ki runga i ngā whenua rerekē.

8 Nā, e ai tā te karaipiture: Kōwhiria e koutou i tēnei rā, me mahi koutou ki a wai.

9 Nā, mehemea i te hiahia tētahi tangata ki te mahi ki te Atua, nōna te maringa; nōna rānei te maringa ki te mahi ki a ia mehemea i whakapono ai ia i te Atua; engari mehemea kāore ia i whakapono i a ia kāore i reira tētahi ture kia whakawhiu atu i a ia.

10 Engari mehemea i kōhuru ia kua whakawhiua kia mate; ā, mehemea i pāhua ia kua whakawhiua anōtia ia; ā, mehemea i whānako ia kua whakawhiua anōtia ia; ā, mehemea i mahi pūremu ia kua whakawhiua anōtia ia; āe rā, kua whakawhiua rātou mō ēnei whakarihariha katoa.

11 Nā te mea i reira tētahi ture kia whakawākia ai te tangata e rite ana ki ō rātou hara. Hei aha koa, kāore i reira tētahi ture e whakahē ana i te whakapono o te tangata; nō reira, kua whakawhiua te tangata anake mō ana hara kua mahia e ia; nō reira i te taurite te tikanga mō ngā tāngata katoa.

12 Ā, ko tēnei ātete-Karaiti, ko Koriho tōna ingoa, (ā, kāore e whai kaha ana te ture ki runga ki a ia) ka tīmata tana kauhau atu ki te iwi kāore e puta mai he Karaiti. Ā, ko te āhua tēnei o tana kauhautanga, e mea ana:

13 E koutou kua herea iho i raro i tētahi tūmanako kuare me tētahi tūmanako teka, he aha koutou e ioka ai i a koutou anō ki ngā mea kuare pērā? He aha koutou e titiro atu ai ki tētahi Karaiti? Nā te mea kāore e taea ana e tētahi tangata te mōhio ki tētahi mea e puta mai ai.

14 Nana, koinei mea e kīa nei e koutou he poropititanga, e kīa ana e koutou he mea tuku iho e ngā poropiti tapu, nana, he whakarerenga iho kuare a ō koutou tūpuna.

15 Me pēhea koutou e mōhio tūturu ai ki te tika o aua mea? Nana, kāore e taea ana e koutou te mōhio ki ngā mea kāore koutou e kite; nō reira kāore e taea e koutou te mōhio ka puta mai tētahi Karaiti.

16 E titiro whakamua atu ana koutou me te kī ake e kite ana koutou i tētahi murunga i ō koutou hara. Engari nana, koia te hua o tētahi hinengaro wairangi; ā, ka puta ake tēnei āhuatanga rerekē o te hinengaro nā ngā whakarerenga iho a ō koutou tūpuna, e ārahina atu ana koutou i tētahi whakapono ki ngā mea kāore i te pono.

17 Ā, he maha rawa atu anō ngā mea i kōrero ai ia ki a rātou, e kōrero atu ana ki a rātou e kore e taea tētahi whakamārietanga mō ngā hara o te tangata, engari ka rite te āhua o te tangata i tēnei oranga e rite ana ki te whakahaeretanga o te mea; nō reira i kake ai ia tangata e rite ana ki tōna atamai, ā, toa ia tangata e rite ana ki tōna kaha; ā, aha koa he aha tā te tangata i mea ai ehara i te hara.

18 Ā, i pēnei tana kauhau atu ki a rātou, e ārahina atu ana i ngā ngākau o te hunga tokomaha, e mea ana i a rātou kia hīkina ake ō rātou māhunga i tō rātou whakarihariha, āe rā, e ārahina atu ana ngā wāhine tokomaha, me ngā tāne anō hoki, ki te mahi pūremu—e kī atu ana ki a rātou ina mate te tangata, koinā tōna mutunga.

19 Nā, i haere atu tēnei tangata ki te whenua o Herehona anō hoki, ki te kauhau atu i ēnei mea ki waenganui i te iwi o Amona, ko rātou nei te iwi o ngā Rāmana i tōna wā.

20 Engari nana, he whai whakaaro ake rātou i ngā Nīwhai tokomaha; nā te mea i mauria atu ia e rātou, ā, ka herea ia, ā, ka mauria atu ia ki te aroaro o Amona, ko ia tētahi pirihi teitei i runga i taua iwi.

21 Ā, i pahawa ake, nā, i meatia e ia kia mauria atu ia ki waho atu i te whenua. Ā, i haere mai ia ki roto i te whenua o Kiriona, ā, ka tīmata ki te kauhau ki a rātou anō hoki; ā, kāore i nui ōna waimārietanga i konei, nā te mea i hopukina atu ia, ā, ka herea ia, ā, ka mauria atu ki mua i te aroaro o te pirihi teitei me te kaiwhakawā matua anō hoki.

22 Ā, i pahawa ake, nā, ka kī atu te pirihi teitei ki a ia: He aha koe e hāereere ana ki te whakapeau i ngā huarahi o te Ariki? He aha koe e whakaako ai i tēnei iwi e kore e puta mai te Karaiti, ki te whakararu i ā rātou haringa? He aha koe e whakahē ai i ngā poropititanga katoa a ngā poropiti tapu?

23 Nā, ko Kirona te ingoa o te pirihi teitei. Ā, ka kī atu a Koriho ki a ia: Nā te mea kāore au e whakaako i ngā whakarerenga iho kuare a ō koutou tūpuna, ā, nā te mea kāore au e whakaako i tēnei iwi kia herea iho rātou e rātou anō ki raro i ngā tikanga me ngā meatanga kuare kua whakatakotoria iho e ngā pirihi onamata, kia whaikaha ai, ā, kia whaimana ai ki runga i a rātou, hei pupuri tonu ai i a rātou ki roto i te kuaretanga, kia kore ai e taea e rātou te hiki ake i ō rātou māhunga, engari kia whakaitia iho rātou e rite ai ki āu kupu.

24 E kī ana koutou he iwi herekore tēnei iwi. Nana, ko tāku e kī nei kei te hereheretanga tonu rātou. E kī ana koutou he pono ērā poropititanga onamata. Nana, ko tāku e kī nei kāore koutou e mōhio ana mēnā kei te pono ērā mea.

25 E kī ana koutou he iwi hara, ā, he iwi taka tēnei iwi, nā ngā hara o tētahi matua. Nana, ko tāku e kī nei kāore te tamaiti e hē ana i ōna mātua.

26 Ā, e kī ana anō hoki koutou ka haere mai te Karaiti. Engari nana, ko tāku e kī nei kāore koutou e mōhio ana mehemea ka puta mai tētahi Karaiti. Ā, e kī ana anō koutou ka mate ia mō ngā hara o te ao—

27 Ā, pēnei tā koutou ārahi atu i tēnei iwi i runga i ngā whakarerenga iho kuare a ō koutou tūpuna, ā, e rite ana ki ō koutou hiahia; ā, e whakapēhi tonu koutou i a rātou, e pērā ana me te mea nei i te hereheretanga, kia apoapo koutou i ngā mahinga o ō rātou ake ringaringa, kia kore ai rātou e māia ki te titiro ake, ā, kia kore ai rātou e māia kia hari ai rātou i ō rātou tikanga me ō rātou ritenga.

28 Āe rā, kua kore rātou e māia ki te whakamahi i ērā mea nō rātou kei whakatakariri rātou i ō rātou pirihi, ko rātou nāna nei rātou i ioka kia rite ai ki ō rātou hiahia, ā, kua kūmea ai rātou kia whakapono ai, mā ō rātou whakarerenga iho me ā rātou moemoeā me ā rātou whakaaro hihiko me ā rātou kitenga me ā rātou mea ngaro whakataruna, ka tika pū anō, ki te kore rātou e mahi kia rite ai ki ā rātou kupu, ka whakatakariri rātou i tētahi mea kāore nei e mōhiotia ana, e kīa nei e rātou ko te Atua—ko tētahi mea kāore anō kia kitea, ā, kāore anō rānei kia mōhiotia, kīhai rawa i mua, ā, kāore rānei i ngā rā e takoto ake nei.

29 Nā, i te kitenga o te pirihi teitei me te kaiwhakawā matua i te pakeketanga o tōna ngākau, āe rā, i tā rāua kitenga atu i tana taunu pū anō i te Atua, kāore rāua i whakahoki kōrero ki āna kupu; engari i mea ai rāua kia herea ia; ā, ka tukuna atu ia ki roto i ngā ringaringa o ngā kātipa, ā, ka tonoa atu ia ki te whenua o Harahemara, me kore pea ia e mauria atu ki te aroaro o Arami me te kaiwhakawā matua i runga i te whenua katoa.

30 Ā, i pahawa ake, nā, i te kawenga atu i a ia ki te aroaro o Arami me te kaiwhakawā matua, ka rite tonu te āhuatanga o tāna ki tāna i mea ai i te whenua o Kiriona; āe rā, ka haere tonu tana kohukohu.

31 Ā, ka neke ake ia i runga i ngā kupu pupuhi nui i te aroaro o Arami, ā, ka taunu i ngā pirihi me ngā kaiako, e whakahē ana i a rātou mō te ārahitanga atu i te iwi ki ngā whakarerenga iho kuare a ō rātou tūpuna, mō runga i te whakaaro ki te apuapu i ngā mahinga a te iwi.

32 Nā, ka kī atu a Arami ki a ia: E mōhio ana koe kāore mātou i te apuapu i ngā mahinga o tēnei iwi; nana rā kua mahi au mai i te tīmatanga pū anō o te whakahaeretanga a ngā kaiwhakawā tae noa ki tēnei wā, ki ōku ake ringaringa hei oranga mōku, hei aha koa aku hāereere maha huri noa i te whenua ki te whakapuaki i te kupu a te Atua ki tōku iwi.

33 Ā, hei aha koa ngā mahinga maha kua mea ai ahau i te hāhi, kāore au i whiwhi i te henine kotahi noa iho mō aku mahi; kāore anō rānei aku teina, hāunga i runga i te nohoanga whakawā; ā, i riro i a mātou mō te ritenga anake o te ture mō ō mātou taima.

34 Ināianei ā, ki te kore mātou e whiwhi i tētahi aha mō ā mātou mahinga i te hāhi, he aha te hua ki a mātou ki te mahi i te hāhi hāunga ko te whakapuaki i te pono, kia whai haringa mātou i runga i te haringa o ō mātou tuākana?

35 Kāti he aha koe e kī ai e kauhau atu ana mātou ki tēnei iwi mō te utu, i te mea ko koe tonu e mōhio ana kāore e riro mai ana i a mātou he utu? Ināianei ā, e whakapono ana rānei koe e tinihanga ana mātou i tēnei iwi, e mea ana i te hari nui i roto i ō rātou ngākau?

36 Kātahi ka whakahoki a Koriho, Āe rā.

37 Kātahi ka kī atu a Arami ki a ia: E whakapono ana rānei koe he Atua anō?

38 Kātahi ia ka whakahoki, Kāo.

39 Nā, ka kī atu a Arami ki a ia: Ka whakakore anō koe tērā he Atua anō, me te whakakore anō i te Karaiti? Nana rā, ko taku kupu tēnei ki a koe, e mōhio ana au he Atua anō, ā, ka haere mai anō hoki te Karaiti.

40 Ināianei ā he aha tāu hei whakaatu mai nei kāore he Atua anō, kāore rānei te Karaiti e haere mai ai? Ko taku kupu tēnei ki a koe kārekau āu, hāunga ko tō kupu anake.

41 Engari, nana, kei ahau ngā mea katoa hei whakaatu kei te pono ēnei mea; ā, kei a koe anō hoki ngā mea katoa hei whakaaturanga ki a koutou kei te pono ērā; kātahi koe ka whakakore i ērā? E whakapono ana rānei koe kei te pono ēnei mea?

42 Nana, e mōhio ana ahau kei te whakapono koe, engari kua nohoia koe e tētahi wairua rūkahu, ā, kua āraia atu e koe te Wairua o te Atua kia kore ai e whaiwāhi ki roto i a koe; engari kua whaimana te rēwera i runga i a koe, ā, kei te whakahaere ia i a koe, e mahi mahere ana kia whakangaro ai i ngā tamariki a te Atua.

43 Ināianei ā, ka kī atu a Arami ki a Koriho: Mēnā ka whakakitea mai e koe tētahi tohu ki ahau, kia whakapakepake ai i ahau he Atua anō, āe rā, whakakitea mai ki ahau he mana tōna, kātahi ka whakapakepakehia au mō te pono o āu kupu.

44 Engari ka kī atu a Arami ki a ia: Ka nui ōu tohu; ka whakawai koe i te Atua? Ka kī ake koe, Whakakitea mai ki ahau tētahi tohu, ahakoa kei a koe te whakaaturanga o ēnei ō teina, me ngā poropiti tapu anō hoki? Kua whakatakotoria iho ngā karaipiture ki mua i a koe, āe rā, ā, e whakaatu mai ana ngā mea katoa he Atua anō; āe rā, ko te ao pū anō me ngā mea katoa kei runga i tōna mata, āe rā, ko tōna huringa anō, āe rā, ko ngā aorangi katoa e rērere haere ana i ō reira huarahi tūturu e whakaatu mai ana he Kaihanga Nui Rawa.

45 Heoi, kei te huri haere koe, e ārahina atu ana ngā ngākau o tēnei iwi, e whakaatu ana ki a rātou kāore he Atua anō? Ā, ka whakakore tonu koe i ēnei whakaaturanga katoa? Kātahi ia ka kī: Āe rā, ka whakakore au, ki te kore koe e whakakitea mai ki ahau tētahi tohu.

46 Ināianei ā, i pahawa ake, nā, ka kī atu a Arami ki a ia: Nana, kei te pōuri ahau nā te pakeketanga o tō ngākau, āe rā, ka karo tonu atu koe i te wairua o te pono, kia whakangaromia ai tō wairua.

47 Engari nana, he pai ake kia ngaro atu tō wairua i tō kukume iho i ngā wairua maha ki te whakangaromanga, mā tō rūkahutanga me āu kupu whakapatipati; nō reira ki te whakakore anō koe, ka pākia koe e te Atua, kia wahangū ai koe, kia kore ai koe e puaki tonu anō i te waha, kia kore ai koe e tinihanga tonu anō i tēnei iwi.

48 Nā, ka kī atu a Koriho ki a ia: Kāore au i te whakakore i te oranga o tētahi Atua, engari kāore au i te whakapono he Atua anō; ā, ko tāku anō hoki, nā, kāore koe i te mōhio he Atua anō; ā, ki te kore koe e whakakitea mai ki ahau tētahi tohu, kāore au e whakapono.

49 Nā, ka kī atu a Arami ki a ia: Ka tukuna atu e au tēnei hei tohu māu, nā, ka pākia koe kia wahangū, e rite ana ki aku kupu; ā, ko taku kupu tēnei, i runga i te ingoa o te Atua, ka pākia koe kia wahangū, kia kore ai tō māngai e puaki anō ai.

50 Nā, i te kōrerotanga a Arami i ēnei kupu, kua pākia a Koriho kia wahangū, tē taea e tōna māngai te puaki, e rite ana ki ngā kupu a Arami.

51 Ināianei ā, i te kitenga o te kaiwhakawā matua i tēnei, ka torona atu tōna ringa, ā, ka tuhituhi atu ki a Koriho, e mea ana: Kua whakapakepakehia koe ināianei ki te mana o te Atua? Me whakakite atu e Arami te tohu nāu i tono ai ki a wai ake? I te hiahia koe kia whakamamae i ētahi atu, kia whakakitea atu ki a koe tētahi tohu? Nana, nāna tētahi tohu i whakakite ai ki a koe; ināianei ā, ka tohetohe tonu anō koe?

52 Ā, ka toro atu a Koriho i tana ringa, ā, ka tuhituhi, e mea ana: E mōhio ana au he wahangū au, nā te mea tē taea e au te kōrero; ā, e mōhio ana au kāore kē atu tētahi mana hāunga ko te mana o te Atua e tō iho mai ai i tēnei mea ki runga i a au; āe rā, i mōhio katoa au he Atua anō.

53 Engari nana, kua nukarau te rēwera i ahau; nā te mea i puta mai ia ki ahau i runga i te āhuatanga o tētahi anahera, ā, ka kī mai ki ahau: E haere koe me te whakahoki mai i tēnei iwi, nā te mea kua kōtiti katoa atu rātou mō tētahi Atua kāore i te mōhiotia. Ā, ka kī mai ia ki ahau; āe rā, nāna au i whakaako he aha ngā mea hei kōrerotanga atu māku. Ā, nāku āna kupu i whakaako; ā, nāku ēnā i whakaako nā te mea he āhuareka ērā ki te hinengaro ira tangata; ā, ka whakaako au i ērā, tae atu ki taku waimārietanga nunui, nā konā au tino whakapono ai he pono ērā mea; ā, nā tēnei take au i karo atu ai i te pono, tae atu ana ki taku tōnga ihotanga i tēnei kanga nui ki runga i ahau.

54 Nā, i tana kōrerotanga atu i tēnei, ka totohe atu ia kia inoi ake a Arami ki te Atua, kua murua atu te kanga i a ia.

55 Engari ka kī atu a Arami ki a ia: Mēnā ka murua atu tēnei kanga i a koe ka ārahi anō koe i ngā ngākau o tēnei iwi; nō reira, ka rite te meatanga ki a koe ki tā te Ariki e pai ai.

56 Ā, i pahawa ake, nā, kīhai te kanga i murua atu i a Koriho; engari i makaia atu ia ki waho, ā, ka haere atu ia i tēnā whare ki tēnā whare e pīnono kai ana māna.

57 Nā, i pānuitia wawetia atu te rongo o te mea i pā ai ki a Koriho puta noa i te whenua katoa; āe rā, kua tukuna atu te whakapuakitanga e te kaiwhakawā matua ki te iwi katoa i te whenua, e whakapuaki ana ki te hunga i whakapono ai ki ngā kupu a Koriho kia rīpenetā wawe ai rātou, kei tau iho ai aua whakawākanga anō ki runga i a rātou.

58 Ā, i pahawa ake, nā, i whakapakepakehia katoatia rātou mō te whakarihariha o Koriho; nō reira ka whakatahuritia katoatia rātou anō ki te Ariki; ā, nā tēnei i mutu ai te hara i runga i te ritenga o Koriho. Ā, ka haere atu a Koriho i tēnā whare ki tērā whare, e pīnono kai ana hei oranga mōna.

59 Ā, i pahawa ake, nā, i a ia e haere atu ana ki waenganui i te iwi, āe rā, ki waenganui i tētahi iwi kua whakawehea atu e rātou anō i ngā Niwhai, ā, i karangatia rātou ko ngā Hōrama, kua ārahina rātou e tētahi tangata ko Hōrama tōna ingoa—ā, i a ia e haere atu ana ki waenganui i a rātou, nana, kua omahia ia, ā, kua takatakahia iho ia tae atu ana kia mate rawa.

60 Ā, pēnei ka kite tātou i te whakamutunga o te tangata e whakapeau i ngā huarahi o te Ariki; ā, pēnei ka kite tātou kāore te rēwera e tautoko i āna tamariki hei te rā whakamutunga, engari ka kukume wawe iho ia i a rātou ki te ao rēwera.