1 Ā, i pahawa ake, nā, i te tīmatatanga o te tau rua ngahuru mā rima o te whakahaeretanga a ngā kaiwhakawā i runga i te iwi o Nīwhai, i te mea kua whakapūmauhia e rātou te rangimārie i waenganui i te iwi o Rīhai me te iwi o Moriatono e pā ana ki ngā whenua, ā, kua tīmata anō te tau rua ngahuru mā rima i runga i te rangimārie;

2 Hei aha koa, kāore i mau roa te rangimārie katoa i runga i te whenua, nā te mea i tīmata tētahi tautohetohenga i waenganui i te iwi e pā ana ki te kaiwhakawā matua a Pahorana; nana rā, i reira tētahi wāhanga o te iwi i hiahia ai kia whakarerekē i ētahi tikanga ruarua o te ture.

3 Engari nana, kīhai a Pahorana i pai kia whakarerekē, kia tuku rānei kia whakarerekēhia te ture; nō reira, kīhai ia i aro atu ki te hunga i tukuna ai ō rātou reo me ā rātou petihana e pā ana ki te whakarerekētanga o te ture.

4 Nō reira, i te riri te hunga i hiahia ai ki te whakarerekē i te ture ki a ia, ā, i hiahia rātou kia kore tonu ia e tū ai hei kaiwhakawā i runga i te whenua; nō reira ka ara ake tētahi tautohetohe nanakia e pā ana ki tēnei take, engari kāore i eke ki te whakahekenga toto.

5 Ā, i pahawa ake, nā, i karangatia te hunga i hiahia ai ki te tūraki iho i a Pahorana i te nohonga-whakawā he tangata-kīngi, nā te mea i te hiahia rātou kia whakarerekē ai i te ture i runga i tētahi āhuatanga kia turaki iho i te kāwana herekore, ā, kia whakatūria ai he kīngi i runga i te whenua.

6 Ā, ka tangohia atu e ngā tāngata i hiahia ai kia noho tonu a Pahorana hei kaiwhakawā matua i runga i te whenua te ingoa o ngā tāngata herekore; ā, pēnei te māwehetanga i waenganui i a rātou, nā te mea kua oati ngā tāngata herekore, kua kawenata rānei ki te tiaki i ō rātou ritenga me ō rātou tikanga o tō rātou hāhi mā te kāwanatanga herekore.

7 Ā, i pahawa ake, nā, i whakatauhia tēnei take tautohetohe e te reo o te iwi. Ā, i pahawa ake, nā, i tau mai te reo o te iwi hei tautoko i tā ngā tāngata herekore, ā, ka riro tonu i a Pahorana te nohonga-whakawā, nā konā ka nui te hari i waenganui i ngā teina o Pahorana me te tokomaha o te iwi herekore, nā rātou anō ngā tāngata-kīngi i wahangū ai, nā, kīhai rātou i māia ki te whakahē atu, engari i meinga rātou kia tiaki i te tikanga o te herekoretanga.

8 Nā, ko te hunga i heke iho i ngā kāwai rangatira te hunga i aro atu ai ki te tikanga kīngi, ā, i whai rātou hei kīngi; ā, i tautokona rātou e te hunga e whaiwhai nei i te mana me te kaha i runga i te iwi.

9 Engari nana, he wā whakahirahira tēnei mō ngā tautohetohenga i waenganui i te iwi o Nīwhai; nana rā, kua whakaohoohokia ake anō e Amarikaia ngā ngākau o ngā Rāmana ki te iwi o Nīwhai, ā, i whakahuihuia ngātahitia e ia ngā hōia mai i ngā tōpito katoa o te whenua, e whakamaua ana rātou ki te patu whawhai, ā, e whakarite kaha ana mō te pakanga; nā te mea i oati ai ia māna te toto o Moronai e inu.

10 Engari nana, ka kite nei tātou he mea hīkaka tāna i oati ai; hei aha koa, i whakarite ia i a ia anō me ana tauā ki te pakanga atu ki ngā Nīwhai.

11 Nā, kāore i pērā rawa te kaha o ana tauā i āna o mua, nā ngā mano tini i patua ai e te ringa o ngā Nīwhai; engari ahakoa tō rātou hinganga nui, i whakaminea mai e Amarikaia tētahi tauā tino nui whakaharahara, nā konā kāore ōna wehi kia heke iho ai ki te whenua o Harahemara.

12 Āe rā, ka heke iho mai a Amarikaia pū anō, i te upoko o ngā Rāmana. Ā, i te tau rua ngahuru mā rima o te whakahaeretanga a ngā kaiwhakawā; ā, i taua wā anō i te whakatau iho i ngā āhuatanga o ā rātou tautohetohenga e pā ana ki te kaiwhakawā matua, a Pahorana.

13 Ā, i pahawa ake, nā, i te rongonga ake o te hunga kua karangatia nei ko ngā tāngata-kīngi i te haere mai ngā Rāmana ki te whawhai ki a rātou, i hari rātou i roto i ō rātou ngākau; ā, kāore rātou i whakaae kia hāpai patu, nā te mea i te pukuriri rātou ki te kaiwhakawā matua, ki te iwi herekore anō hoki, nā, kua kore rātou e hāpai patu ki te tiaki i tō rātou whenua.

14 Ā, i pahawa ake, nā, i te kitenga a Moronai i tēnei, me tana kite atu i te haere mai ngā Rāmana ki roto i ngā rohe o te whenua, i tino pukuriri ia nā te taikaha o aua tāngata i kaha mahi ai ia hei tiaki i a rātou; āe rā, i kikī tōna ngākau i te riri ki a rātou.

15 Ā, i pahawa ake, nā, ka tonoa ngātahitia atu e ia tētahi petihana me te reo o te iwi, ki te kāwana o te whenua, e hiahia ana kia pānuitia ai e ia, ā, kia hoatu ki a ia (a Moronai) te mana ki te akiaki i aua kaitītore ki te tiaki i tō rātou whenua, ki te whakamate rānei i a rātou.

16 Nā te mea ko tana aronga tuatahi tēnā ki te whakamutu i ngā tautohetohenga me ngā tītorehanga i waenganui i te iwi; nana rā, koinei tētahi take i mua mō tō rātou whakangaromanga. Ā, i pahawa ake, nā, ka whakaaetia tēnā e rite ana ki te reo o te iwi.

17 Ā, i pahawa ake, nā, ka whakahau a Moronai i tana tauā kia haere atu ai ki aua tāngata-kīngi, ki te turaki iho i tō rātou whakapehapeha me tō rātou rangatiratanga kia rite anō tō rātou papatairite ki tō te whenua, ka hāpai patu rānei rātou ki te tautoko i te tikanga herekoretanga.

18 Ā, i pahawa ake, nā, ka hīkoi atu ngā tauā ki a rātou; ā, i turaki iho rātou i tō rātou whakapehapeha me tō rātou rangatiratanga, nā konā i a rātou e hāpai ake ana i ā rātou rākau whawhai ki te tatau atu ki ngā tāne a Moronai, nā, ka heua iho rātou, ā, ka rite tō rātou papatairite ki tō te whenua.

19 Ā, i pahawa ake, nā, kua whā mano o aua kaitītore i heua iho ai ki te hoari; ā, ka haria atu, ā, ka makaia atu aua kaiārahi ō rātou kīhai i mate i te pakanga ki roto i te whakareherehere, nā te mea kāore i whai wā ki te whakawā i a rātou i tēnei wā.

20 Ā, ko te toenga o aua tāngata tītore, mahue te patua iho ki te whenua ki te hoari, nā, ka tuohu iho ki te tikanga o te herekoretanga, ā, kua tonoa rātou ki te hāpai ake i te tikanga o te herekoretanga ki runga i ō rātou pourewa, ā, i roto i ō rātou pā, ā, ki te hāpai patu hei tiaki i tō rātou whenua.

21 Ā, pēnei tā Moronai whakamutu i aua tāngata-kīngi, nā konei kāore tētahi i mōhiotia nei ki taua karangatanga e kīa nei ko te tangata-kīngi; ā, pēnei tana whakamutu i te taikahatanga me te whakapehapehatanga o aua tāngata i kauhau atu ai i ō rātou toto rangatira; engari kua turakina iho rātou kia whakaiti rātou i a rātou anō pērā i ō rātou tuākana, me te whawhai toa anō rātou mō tō rātou whakawāteatanga atu i te hereheretanga.

22 Nana, i pahawa ake, nā, i a Moronai e pēnei ana te turaki iho i ngā pakanga me ngā tautohetohenga i waenganui i tōna ake iwi, me te whakauru anō i a rātou ki raro i te maungārongo me te whakahaeretanga tika, me te whakariterite i ngā tikanga mō te pakanga ki ngā Rāmana, nana, kua uru mai ngā Rāmana ki roto i te whenua o Moronai, kei roto i ngā rohe e tata ana ki te takutai moana.

23 Ā, i pahawa ake, nā, kāore i tino kaha ngā Nīwhai i te pā o Moronai; nō reira, i āia rātou e Amarikaia, e whakamatemate ana i ngā mea tokomaha. Ā, i pahawa ake, nā, ka riro i a Amarikaia te pā, āe rā, ka riro i a ia ō rātou tūwatawata katoa.

24 Ā, ka haere atu te hunga i tahuti atu i te pā o Moronai ki te pā o Nīwhaihā; ka whakahuihui ngātahi anō hoki te iwi o te pā o Rīhai, ā, ka whakariterite rātou, ā, i takatū rātou ki te whawhai ki ngā Rāmana.

25 Engari i pahawa ake, nā, kāore i whakaae a Amarikaia kia haere atu ngā Rāmana ki te pā o Nīwhaihā ki te pakanga, engari i pūmau tonu i a rātou ki te taha takutai, e mahue atu ana ngā tāngata ki roto i tēnā pā, i tēnā pā hei pupuri, ā, hei tiaki;

26 Ā, pēnei tonu tana whakahaere, e riro ana i a ia ngā pā maha, ko te pā o Nīwhaihā, me te pā o Rīhai, me te pā o Moriatono, me te pā o Omonere, me te pā o Kire, me te pā o Mureke, katoa ērā i te taha rāwhiti o ngā rohe e tata atu ana ki te takutai moana.

27 Ā, pēnei riro ai i ngā Rāmana ngā pā maha, nā te tinihanga o Amarikaia, e ō rātou tatauranga tē taea te tatau, he mea whakatūwatawatahia i runga i ngā āhuatanga whakatūwatawata a Moronai; ka meinga katoa ērā hei pā kaha mō ngā Rāmana.

28 Ā, i pahawa ake, nā, ka hīkoi atu rātou ki ngā rohe o te whenua Mōmona, e āia atu ana e rātou ngā Nīwhai me te whakamatemate i te tokomaha.

29 Engari i pahawa ake, nā, i tutakina rātou e Teanakuma, nāna nei a Moriatono i whakamate, ā, nāna tana iwi i haukoti i tana rerenga atu.

30 Ā, i pahawa ake, nā, ka haukotia anōtia a Amarikaia e ia, i a ia e hīkoi atu ana me tana tauā mano tini kia riro i a ia te whenua o Mōmona, me te whenua whakateraki anō hoki.

31 Engari nana, ka nanu ia nā te panatanga atu a Teanakuma me āna tāngata i a ia, nā te mea he tino toa hoki rātou; nā te mea he nui atu te kaha me ngā pūkenga whawhai o tēnā tangata, o tēnā tangata a Teanakuma i ngā Rāmana, nā konā ka taea e rātou ngā Rāmana.

32 Ā, i pahawa ake, nā, ka whakatīwheta rātou i a rātou, nā konā ka patupatua rātou e rātou tae atu ana ki te tōnga o te rā. Ā, i pahawa ake, nā, i whakatūria e Teanakuma me ana tāngata ō rātou tēneti i roto i ngā rohe o te whenua Mōmona; ā, i whakatūria e Amarikaia ōna tēneti i roto i ngā rohe i tātahi i te takutai moana, ā, ko te āhuatanga tēnei i āia atu ai rātou.

33 Ā, i pahawa ake, nā, i te taunga ihotanga o te pō, ka haere pō atu a Teanakuma rāua ko tana pononga, ā, ka tomo atu ki te puni o Amarikaia; ā nana, kua warea rātou e te moe nā te nui o tō rātou ngenge, i ahu mai i ngā mahinga me te wera o te rā.

34 Ā, i pahawa ake, nā, ka tomo huna atu a Teanakuma ki roto i te tēneti o te kīngi, ā, ka werohia tōna ngākau ki tētahi tao; ā, nāna te kīngi i whakamate wawe nā konā kīhai ia i whakaoho ake i ana pononga.

35 Ā, ka hoki huna atu anō ia ki tōna puni ake, ā nana, i te moe āna tāngata, ā, ka whakaoho ia i a rātou, ā, ka whāki atu ia ki a rātou i ngā mea katoa nāna nei i mahi.

36 Ā, ka meatia e ia kia takatū tahi āna tauā, kei oho ake ngā Rāmana, ā, ka haere mai ki runga i a rātou.

37 Ā, pēnei mutu ai te tau rua ngahuru mā rima o te whakahaeretanga a ngā kaiwhakawā ki runga i te iwi o Nīwhai; ā, pēnei mutu ai ngā rā o Amarikaia.