1 Ināianei ā, i pahawa ake, nā, i a Arami e haere ana mai i te whenua o Kiriona ki te taha whakatetonga, ki te whenua o Manati, nana, ki tōna whakamīharo, ka tūtaki ia ki ngā tama a Mōhia e haere atu ana whakatewhenua o Harahemara.

2 Nā, i a Arami anō ēnei tama a Mōhia i te wā i puta tuatahi mai te anahera ki a ia; nō reira i tino hari ai a Arami kia kite ake i ana teina; ā, ko te mea anō i tino hari ai ia, he teina tonu rātou ki a ia i roto i te Ariki; āe rā, kua pakari anō rātou i roto i te mātauranga o te pono; nā te mea he tāne mārama nui rātou, ā, kua āta whakataki rātou i ngā karaipiture, kia mōhio ai rātou ki te kupu a te Atua.

3 Engari ehara tēnei i te katoa; kua nui tā rātou inoi me te nohopuku; nō reira i a rātou te wairua o te poropititanga, me te wairua o te whakakitenga, ā, i a rātou e whakaako ana, ka whakaako rātou i runga i te kaha me te mana o te Atua.

4 Ā, i te whakaako rātou i te kupu a te Atua mō te takiwā o ngā tau tekau mā whā i waenganui i ngā Rāmana, he nui hoki tō rātou waimārie i tā rātou kukume i ngā mea tokomaha ki te mātauranga o te pono; āe rā, he tokomaha ngā mea i kukume ai ki te aroaro o te ahurewa o te Atua nā te kaha o ā rātou kupu, ki te karanga ake i runga i tōna ingoa me te whāki atu i ō rātou hara i tōna aroaro.

5 Nā, koinei ngā āhuatanga i ā ai ki a rātou i runga i ō rātou haerenga, nā, he maha ō rātou mamaetanga; i nui anō te mamaetanga ā-tīnana, ā-hinengaro, i te hiakai, te hiainu me te ngenge, ā, he nui anō tā rātou mahi i roto i te wairua.

6 Nā, koinei ā rātou haerenga: I poroporoaki rātou ki tō rātou matua, ki a Mōhia, i te tau tuatahi o te whakahaerenga a ngā kaiwhakawā; kua whakakorehia te kīngitanga i hiahia ai tō rātou matua kia whakatau iho ai ki runga i a rātou, ā, i pērā anō tā te iwi whakaaro;

7 Hei aha koa rā i haere atu rātou ki waho i te whenua o Harahemara, ā, ka mauria atu ā rātou hoari, me ā rātou mātia, me ā rātou kōpere, me ā rātou pere, me ā rātou kōtaha; ā, i pēnei rātou kia hopu kai ai rātou mō rātou anō i a rātou i te koraha.

8 Ā, i pēnei tā rātou wehenga atu ki roto i te koraha me ā rātou tatauranga i whiriwhiria ai e rātou, kia haere ake ki te whenua o Nīwhai, ki te kauhau i te kupu a te Atua ki ngā Rāmana.

9 Ā, i pahawa ake, nā, he maha ngā rā i haere ai rātou i te koraha, ā, i nui tā rātou nohopuku me tā rātou inoi kia tukuna iho e te Ariki tētahi wāhi o tōna Wairua kia haere tahi ai me rātou, ā, kia nohotahi ai me rātou, kia meinga ai rātou hei taputapu i ngā ringaringa o te Atua ki te kukume, mēnā e taea ana, ā rātou tuakana, ngā Rāmana, ki te mātauranga o te pono, ki te mātauranga o te hē o ngā whakarerenga iho a ō rātou tūpuna, kīhai nei i tika.

10 Ā, i pahawa ake, nā, i toro iho ai te Ariki ki a rātou ki tōna Wairua, ā, ka kī atu ki a rātou: Kia tau te mauri. Ā, ka tau ō rātou mauri.

11 Ā, ka kī atu anō te Ariki ki a rātou: Haere atu ki ngā Rāmana, ō koutou tuākana, whakapūmauhia taku kupu; heoi ka manawaroa koutou i roto i ō koutou whakamamaetanga, kia whakaatu atu koutou he tauira pai ki a rātou i roto i ahau, kātahi au ka mea i a koutou hei taputapu i ōku ringaringa ki te whakaoranga o ngā wairua maha.

12 Ā, i pahawa ake, nā, ka māia ngā ngākau o ngā tama a Mōhia me te hunga anō i a rātou, kia haere atu ai ki ngā Rāmana ki te whakapuaki ki a rātou te kupu a te Atua.

13 Ā, i pahawa ake i tā rātou taenga atu ki ngā rohe o te whenua o ngā Rāmana, ka wehewehe rātou, ā, ka wehe atu tētahi i tētahi, e whakawhirinaki ana ki te Ariki ka tūtaki anō rātou ki a rātou hei te mutunga ake o tā rātou hauhakenga; nā, i whakaaro rātou he nui te mahi i tīmata ai rātou te mahi.

14 Ā, e tika ana anō he nui ia, nā te mea kua tīmata rātou ki te kauhau atu i te kupu a te Atua ki tētahi iwi mohoao, me tētahi iwi pakeke me tētahi iwi horetītī; ā, he iwi i āhuareka ana ki te kōhuru i ngā Nīwhai, ā, ki te whānako, ki te pāhua i a rātou; ā, kua tau ō rātou ngākau ki runga i ngā taonga, i runga rānei i te kōura me te hiriwā, me ngā kohatu utu nui; heoi i whai rātou ki te hopu i ēnei mea i runga i te kōhurutanga me te pāhuatanga, kia kore ai rātou e mahi ki ō rātou ake ringa mō ēnei mea.

15 Pēnei rātou he iwi tino māngere, he tokomaha o rātou i karakia ai ki ngā whakapakoko, ā, kua taka iho te kanga o te Atua ki runga i a rātou nā ngā whakarerenga iho a ō rātou tūpuna; hei aha koa kua torona atu ngā whakaari a te Ariki ki a rātou i runga i ngā tikanga o te rīpenetātanga.

16 Nō reira, koinei te pūtake i tīmata ai ngā tama a Mōhia i te mahi, kia kukume ai rātou i a rātou ki te rīpenetātanga; kia kukume ai rātou i a rātou ki te mātauranga o te mahere o te hokonga.

17 Nō reira i wehewehe atu rātou i a rātou tētahi i tētahi, ā, ka haere whakamua atu ki waenganui i a rātou, tēnā tangata me tōna kotahi, e rite ana ki te kupu me te mana o te Atua kua homai nei ki a ia.

18 Nā, ko Amona te rangatira i roto i a rātou, nāna kē rānei i minita atu ki a rātou, ā, ka wehe atu ia i a rātou, i te mea kua oti rātou te manaaki i a ia e rite ana ki ō rātou momo tūranga, kua wāwāhia atu anō te kupu a te Atua ki a rātou, kua āwhinatia rātou e ia i mua i tana wehenga atu; ā, i pēnei ā rātou haerenga i ō rātou ake huarahi puta noa i te whenua.

19 Ā, ka haere a Amona ki te whenua o Ihimaera, kua huaina te whenua mō ngā tama a Ihimaera, i meinga anō hoki rātou hei Rāmana.

20 Ā, i a Amona e tomo atu ana i te whenua o Ihimaera, ka mauheretia atu ia e ngā Rāmana, e rite ana ki ō rātou tikanga kia hereherea ai ngā Nīwhai i taka iho ai ki ō rātou ringaringa me te kawe atu i a rātou ki te aroaro o te kīngi; ā, kātahi ka waiho mā tō te kīngi i āhuareka ai ki te whakamate i a rātou, ki te mauheretia tonutia rānei rātou, ki te makaia rānei i te whareherehere, ki te makaia atu rātou rānei ki waho atu i te whenua, kia rite ai ki tōna hiahia me tāna i āhuareka ai.

21 Ā, i kahakina pēneitia atu a Amona ki mua i te aroaro o te kīngi i runga i te whenua o Ihimaera; ā, ko Ramoni tōna ingoa; ā, he uri anō ia nō Ihimaera.

22 Ā, ka ui mai te kīngi ki a Amona mehemea i te hiahia ia kia noho tonu i te whenua o ngā Rāmana, i waenganui rānei i tōna iwi.

23 Ā, ka kī atu a Amona ki a ia: Āe rā, e hiahia ana ahau kia noho ai i waenganui i tēnei iwi mō tētahi wā; āe rā, tae noa atu pea ki te rā e mate ai au.

24 Ā, i pahawa ake, nā, i nui te āhuareka o kīngi Ramoni i a Amona, ā, ka meatia e ia kia wetekina ōna here; ā, i te hiahia kia mārenatia e Amona tētahi o āna tamāhine.

25 Engari ka kī atu a Amona ki a ia: Kāo, engari māku hei pononga māu. Nō reira a Amona i meinga ai hei pononga nā kīngi Ramoni. Ā, i pahawa ake, nā, ka whakaurua atu ia ki waenganui i ērā atu ponongahei tiaki i ngā kāhui a Ramoni, e rite ana ki ngā tikanga o ngā Rāmana.

26 Ā, whai muri iho i ngā rā e toru i a ia e mahi ana ki te kīngi, i a rātou ko ngā pononga Rāmana e haere ana me ā rātou kāhui ki te wāhi o ngā wai, kua karangatia nei ko te wai o Hepuha, ā, e āia ana e ngā Rāmana katoa ā rātou kāhui ki reira, kia inu ai—

27 Nō reira, i a Amona rātou ko ngā pononga a te kīngi e ā ana i ā rātou kāhui ki tēnei wāhi o ngā wai, nana, ko ētahi atu Rāmana, i reira kē me ā rātou kāhui ki te inu wai, ka tū atu me te whakamarara haere i ngā kāhui a Amona rātou ko ngā pononga a te kīngi, ā, ka whakamararatia ngā kāhui, nō, ka oma atu i ngā huarahi maha.

28 Nā, ka tīmata ngā pononga a te kīngi ki te amuamu, e mea ana: Ka whakamate te kīngi i a tātou ināianei, pērā i tāna ki ō tātou tuākana nā te mea i whakamararatia atu ā rātou kāhui e te whakarihariha o ēnei tāngata. Ā, ka tīmata tā rātou tangi nui, e mea ana: Nana, kua whakamararatia kētia atu ā tātou kāhui.

29 Nā, i tangi rātou nā tō rātou wehi kei patua. Nā, i te kitenga atu i tēnei ka pupuhi te ngākau o Amona i runga i te hari; nā, ka kī ia, ka whakaatu atu au i tōku kaha ki ēnei ōku hoa pononga, i te kaha rānei kei roto i ahau, i te whakahokinga atu i ēnei kāhui ki te kīngi, kia riro i ahau ngā ngākau o ēnei ōku hoa-pononga, kia ārahina rātou e au ki te whakapono mai ki aku kupu.

30 Ināianei ā, koinei ngā whakaaro o Amona, i tana kitenga atu i ngā whakamamaetanga o te hunga i kī ai ia ko ōna teina.

31 Ā, i pahawa ake, nā, ka whakapatipati ia i a rātou i runga i ana kupu, e mea ana: E aku teina, kia hari koutou, ā, kia haere ake tātou ki te rapu i ngā kāhui, ā, ka whakahuihui anō tātou i ēnā me te whakahoki mai ki te wāhi o ngā wai; ā, ka pēnei tā tātou tiaki i ngā kāhui a te kīngi, ā, e kore ia e whakamate i a tātou.

32 Ā, ka pahawa ake, nā, ka haere atu rātou ki te rapu i ngā kāhui, ā, i whai atu rātou i a Amona, ā, ka tere tā rātou huaki, ā, ka haukotia ngā kāhui a te kīngi, ā, ka whakahuihui tahi anō i ērā ki te wāhi o ngā wai.

33 Ā, ka tū mai anō aua tāngata ki te whkaamarara i ā rātou kāhui; engari ka kī atu a Amona ki ana teina: Karapotia ngā kāhui kia kore ai ērā e oma atu; ā, ka haere atu au ki te tatau atu ki ērā tāngata e whakamararatia ana ā tātou kāhui.

34 Nō reira, i pērā rātou kia rite ki tā Amona i whakahaua ai rātou, ā, ka haere atu ia, ā, ka tatau atu ki te hunga i tū ai i te taha o ngā wai o Hepuha; ā, ehara tō rātou tokomaha i te iti.

35 Nō reira kīhai rātou i wehi i a Amona, nā te mea i whakaaro rātou e āhei ana i te mea kotahi o ō rātou tāngata ki te patu i a ia e rite nei ki tāna e āhuareka ai, nā te mea kāore rātou i mōhio kua whakaari te Ariki ki a Mōhia māna āna tama e whakaputa i ō rātou ringaringa; kāore rānei rātou i te mōhio ki tētahi paku aha e pā ana ki te Ariki; nō reira pai ki a rātou te whakangaromanga o ō rātou teina; ā, nā tēnei take rātou i tū ai ki te whakamarara i ngā kāhui a te kīngi.

36 Engari ka tū atu a Amona, ā, ka tīmata tana karawhiu atu i ngā kohatu ki a rātou ki tana kōtaha; āe rā, i runga i te kaha nui i piu ai ia i ngā kohatu ki a rātou; ā, i pēnei tana whakamate i ētahi o rātou nā konā ka mīharo haere rātou i tōna kaha; hei aha koaka riri rātou nā te matenga o ā rātou teina, ā, ka whakatau rātou me mate ia; nō reira, e kite ana kāore e taea ana e rātou te pā atu ki a ia ki ā rātou kāhatu, ka whakaeke mai rātou me ā rātou patu ki te whakamate i a ia.

37 Engari nana, tapahia ana ki tana hoari te ringa o tēnā tangata, o tēnā tangata i hāpai ake i tōna patu ki te patu i a Amona; nā te mea i ārai atu ia i ā rātou patunga nā te tapahi iho i ō rātou ringa ki te rau o tana hoari, nā konā ka mīharo haere rātou, ā, ka tīmata tā rātou tahuti haere i tōna aroaro; āe rā, ehara tō rātou tokomaha i te iti; ā, ka meatia rātou e ia kia tahuti atu ai e te kaha o tōna ringa.

38 Nā, tokoono rātou i hinga ai i tana kōtaha, engari kāore tētahi i whakamatea ai ki tana hoari hāunga ko tō rātou rangatira; ā, ka tapahia e ia ngā ringaringa katoa i hāpai atu ki a ia, ehara tō rātou tokomaha i te iti.

39 Ā, i tana pananga atu i a rātou ki tawhiti, ka hoki atu ia kātahi ka whakainu rātou i ā rātou kāhui, ā, ka whakahokia ērā ki te pārae a te kīngi, kātahi ka tomo atu ki te kīngi, e mau ana ki ngā ringa kua tapahia atu e te hoari a Amona, o taua hunga i whai ki te whakamate i a ia; ā, ka mauria atu ērā ki te kīngi hei whakaaturanga mō ngā mea i mea ai rātou.