1 Ināianei ā, e taku tama, he paku kōrero atu anō tāku ki a koe i tua atu i tāku i mea ai ki tō tuakana; nana rā, kāore rānei koe i kite i te ū pono o tō tuakana, tōna whakapono, me tōna ū ki te pupuri i ngā whakahaunga a te Atua? Nana, kāore rānei ia i whakatakoto iho i te tauira pai mōu?

2 Nā, kīhai i rite tō whakarongo mai ki aku kupu ki tā tō tuakana, i waenganui i te iwi o ngā Hōrama. Nā, koinei tāku hei whakahē i a koe; i haere atu koe i runga i te whakamanamanatanga mō tō kaha me tō mātauranga.

3 Ā, ehara tēnei i te katoa, e taku tama. Nāu i mahi tērā mea e pāpōuri ana ki ahau; nā te mea nāu te minitatanga i whakarere, ā, i haere atu ki roto i te whenua o Hirona ki waenganui i ngā rohe o ngā Rāmana, e whai ana i te wahine pūremu a Ihipera.

4 Āe rā, nāna ngā manawa maha i whānako atu; engari ehara tēnei i te mea hei tukunga atu mōu, e taku tama. Kua tika kē mehemea i aro pūmau atu koe ki te minitatanga kua whakataungia atu ki a koe.

5 Kāore koe i te mōhio, e taku tama, he mōrikarikatanga ēnei mea i te tirohanga a te Ariki; āe rā, he mōrikarika rawa ake i ngā hara katoa hāunga ko te whakahekenga i te toto hara kore, ko te whakaparahakotanga rānei i te Wairua Tapu?

6 Nana rā, ki te whakaparahako koe i te Wairua Tapu whai muri iho i tana whaiwāhitanga atu ki roto i a koe, ā, e mōhio ana koe kei te whakaparahako koe i a ia, nana, he hara tēnei tē taea te muru; ā, ko te tangata e kōhuru nei ahakoa kei a ia te māramatanga me te mātauranga o te Atua, ehara i te ngāwari mōna kia whiwhi ai i tētahi murunga hara; āe rā, ko taku kupu tēnei ki a koe, e taku tama, ehara i te ngāwari mōna kia whiwhi ai i tētahi murunga hara.

7 Ināianei ā, e taku tama, ko tāku e inoi nei ki te Atua kīhai koe i hara i taua hara nui. Kāore au e kōrero tonu mō ōu hara, kia rakaraka ake i tō wairua, mehemea kāore tēnei i pai mōu.

8 Engari nana, tē taea e koe te huna i ōu hara i te Atua; ā, ki te kore koe e rīpenetā ka tū ēnā hei whakahē mōu hei te rā whakamutunga.

9 Nā, e taku tama, ko tāku e inoi nei kia rīpenetā koe me te whakarere i ōu hara, ā, kia kaua e haere tonu atu i runga i ngā mate kanehe o ōu karu, engari kia whakakāhoretia koe e koe anō i roto i ēnei mea katoa; nā te mea ki te kore koe e mahi pēnei kua kore rawa e taea ai e koe te whiwhi i te kīngitanga o te Atua. Auē, kia mahara, ā, kia tango ki runga ki a koe, ā, kia whakakāhoretia koe e koe anō i roto i ēnei mea.

10 Ā, kei te whakahau ahau ki a koe kia tango ki runga ki a koe te haepapa kia rūnanga tahi ki ōu tuākana i roto i āu mahinga; nana rā, kei te taiohi tonu koe, ā, e hapa ana koe i te atawhainga o ō tuākana. Ā, kia whakarongo koe ki ā rāua kupu.

11 Kaua e tuku kia ārahina atu koe e tētahi mea teka, e tētahi mea heahea rānei; kaua e tuku kia ārahina anōtia atu ai tō ngākau e te rēwera kia whai atu i ērā wāhine pūremu whakarihariha. Nana, E taku tama, anō te nui o te hē i kūmea ai e koe ki runga i ngā Hōrama; nā te mea i tā rātou kite atu i tō whakahaere kīhai rātou i pai ki te whakarongo ki aku kupu.

12 Ināianei ā, e mea mai ana te Wairua o te Ariki ki ahau: Whakahaua ō tamariki kia mahi pai, kei ārahina atu ai e rātou ngā ngākau o te iwi ki te whakangaromanga; nō reira kei te whakahau au ki a koe, e taku tama, i runga i te wehi ki te Atua, kia māwehe atu koe i ō hē;

13 Kia tahuri koe ki te Ariki i runga i tō hinengaro katoa, tō kaha me tō mārohirohi; kia kore tonu koe e ārahi atu i ngā ngākau ki te mahi kino; engari kē kia hoki atu ki a rātou, me te whakaae i ōu hē me taua hē kua mahia e koe.

14 Kaua e whaiwhai i ngā taonga, i ngā mea teka noa rānei o tēnei ao; nana rā, kāore e taea ana e koe ērā mea te mau atu.

15 Ināianei ā, e taku tama, kei te hiahia au kia paku kōrero atu ki a koe e pā ana ki te haerenga mai a te Karaiti. Nana, ko taku kupu tēnei ki a koe, nā, ka haere mārika mai ia ki te tango atu i ngā hara o te ao; āe rā, e haere mai ana ia ki te whakapuaki i ngā rongo whakahari o te whakaoranga ki tana iwi.

16 Ināianei ā, e taku tama, koinei te minitatanga kua karangatia mai nei koe, ki te whakapuaki i ēnei rongo whakahari ki tēnei iwi, ki te whakarite i ō rātou hinengaro; kia tau mai rānei te whakaoranga ki a rātou, kia whakarite rātou i ngā hinengaro o ā rātou tamariki ki te whakarongo ki te kupu hei te wā o tana haerenga mai.

17 Ināianei ā ka āhua whakamāmā au i tō hinengaro e pā ana ki tēnei kaupapa. Nana, e mīharo ana koe ki te take e mōhiotia ēnei mea i mua noa atu i tōna haerenga mai. Nana, ko taku kupu tēnei ki a koe, kāore e rite ana te utu mō tētahi wairua ki te Atua i tēnei wā ki te utu hei te wā o tana haerenga mai?

18 Kāore e tino tika ana rānei kia whakamōhiotia atu te mahere o te hokonga ki tēnei tana iwi, ā, ki ā rātou tamariki anō hoki?

19 Kāore rānei e tino ngāwari ana i tēnei wā mō te Ariki ki te tono i tana anahera ki te whakapuaki i ngā rongo whakahari ki a tātou me ā tātou tamariki, ki tō te mea rānei i muri i tana haerenga mai?