1 Ināianei ā i pahawa ake i te marama tuangahuru mā tahi o te tau tuangahuru mā iwa, i runga i te rā tuangahuru o te marama, ka kitea ngā tauā a ngā Rāmana e whakatata ana ki te whenua o Amonaiha.

2 Ā nana, kua hanga houtia te pā, kua whakanōhia tētahi tauā e Moronai i te taha o ngā rohe o te pā, ā, kua maiorotia te puehu huri noa hei ārai atu i a rātou mai i ngā pere me ngā kōhatu a ngā Rāmana; nana rā, i whawhai rātou ki ngā kōhatu me ngā pere.

3 Nana, i kī ai au kua hanga houtia te pā o Amonaiha. Ko taku kupu tēnei ki a koutou, āe rā, i āhua hanga houtia; ā, nā te mea kua whakangaromia e ngā Rāmana i mua nā te kino o te iwi, i whakaaro rātou ka ngāwari anō te tūrakinga iho mō rātou.

4 Engari nana, anō te nui o tō rātou pōhēhē; nana rā, kua keria e ngā Nīwhai tētahi parepare tāwhio noa i a rātou, ā, kīhai i taea e ngā Rāmana te whiu i ā rātou kōhatu me ā rātou pere ki a rātou hei whakamate i a rātou, kīhai rānei i taea e rātou te whakaeke ake ki runga i a rātou, atu i tō rātou tomokanga.

5 Nā, i te mīharo nui ngā kaiwhakahau matua o ngā Rāmana, nā te mātauranga o ngā Nīwhai i tā rātou whakariterite i ō rātou wāhi nohonga.

6 Nā, i whakaaro ai ngā kaiwhakahau a ngā Rāmana, nā te tini o ō rātou tatauranga, āe rā, i whakaaro rātou ka tukua rātou kia huaki ai ki runga i a rātou pērā i tā rātou i mua; āe rā, kua whakaritea rātou anō ki te puapua, me ngā ārai uma; ā, kua whakaritea rātou anō ki ngā kahu kiri, āe rā, he kākahu mātotoru hei uhi i ō rātou tahangatanga.

7 Ā, nō te pērātanga o tō rātou whakaritenga i whakaaro ai rātou ka ngāwari tā rātou whakauru atu i a rātou ki roto i te ioka o te hereheretanga, ki te patu rānei me te parekura i a rātou e rite ana ki tā rātou e āhuareka ai.

8 Engari nana, ki tō rātou tino mīharo nui, kua whakaritea rātou mō rātou, i runga i tētahi ritenga kāore anō kia kitea i waenganui i ngā tamariki a Rīhai. Nā, i te rite rātou mō ngā Rāmana, ki te pakanga atu i runga i te āhuatanga o ngā tohutohu a Moronai.

9 Ā, i pahawa ake, nā, i te mīharo rawa atu ngā Rāmana, ngā Amarikaia rānei i ā rātou tū whakaritenga mō te pakanga.

10 Nā, mehemea i heke iho a kīngi Amarikaia i te whenua o Nīwhai, i te upoko o tana tauā, tērā pea kua whakahaua e ia ngā Rāmana kia whakaeke atu ki ngā Nīwhai i te pā o Amonaiha; nana rā, kāore ōna whakaaro ki ngā toto o tana iwi.

11 Engari nana, kīhai a Amarikaia ake anō i heke iho ai ki te whawhai. Ā nana, kāore i māia ana kaiwhakahau matua ki te whakaeke atu ki ngā Nīwhai i te pā o Amonaiha, nā te mea kua whakarerekē a Moronai i ngā whakahaeretanga o ngā āhuatanga i waenganui i ngā Nīwhai, nā konā i nanu ai ngā Rāmana i ō rātou wāhi haumaru nā te mea kāore i taea te whakaeke atu ki ērā e rātou.

12 Nō reira ka hoki atu rātou ki roto i te koraha, ā, ka haria tō rātou puni kātahi ka hīkoi whakatewhenua o Noa, e whakaaro ana rātou ko reira te wāhi pai tuarua hei whakaekenga atu mā rātou ki ngā Nīwhai.

13 Nā te mea kāore rātou i mōhio nā Moronai i whakatūwatawatahia ai, kua hangaia rānei ngā pā whawhai hei haumarutanga, mō ngā pā katoa huri noa, huri noa i te whenua; nō reira, i hīkoi atu rātou ki te whenua o Noa i runga i te whakaaro pūkeke; āe rā, i puta mai ō rātou kaiwhakahau matua, ā, ka oati rātou i tētahi oati ki te whakangaro i te iwi o taua pā.

14 Engari nana, ki tō rātou whakamīharotanga atu, ko te pā o Noa, kua ngoikore i mua, ināianei, nā ngā mahi a Moronai, kua pakari, āe rā, kua kaha ake i te kaha o te pā o Amonaiha.

15 Ināianei ā, nana, koinei te mātauranga nui o Moronai; nā te mea i whakaaro ia ka mataku rātou i te pā o Amonaiha; ā, i te mea hoki ko te pā o Noa te pā ngoikore rawa i te whenua i ngā wā o mua, nō reira ka hīkoi atu rātou ki reira ki te whawhai; ā, pēnei e rite ai ki ōna hiahia.

16 Ā nana, kua whakataua e Rīhai hei kaiwhakahau matua i runga i ngā tāngata o taua pā; ā, ko taua Rīhai pū anō i whawhai ai ki ngā Rāmana i te raorao i te taha rāwhiti o te awa o Hairona.

17 Ināianei ā nana i pahawa ake, nā, i tā ngā Rāmana kitenga atu ko Rīhai te kaiwhakahau o te pā ka nanu anō rātou, nā te mea i tino mataku rawa rātou i a Rīhai, hei aha koa kua oati ō rātou kaiwhakahau matua ki te whakaeke atu i te pā; nō reira, ka kawea ake e rātou ā rātou tauā.

18 Nana ināianei, kāore i taea e ngā Rāmana te tomo atu ki roto i ō rātou pā tūwatawata atu i te kuhu ki roto i te tomokanga, nā te teitei o te maioro kua kēria ake, me te hōhonu o te awakari kua kēria taiāwhio noa, hāunga i te taha o te tomokanga.

19 Ā, pēnei kua noho takatū ngā Nīwhai ki te whakangaro i ngā mea pērā katoa e ngana ai ki te piki ake kia tomokia ai te pā mā tētahi huarahi kē atu, he mea makamaka kōhatu me ngā pere ki a rātou.

20 Pēnei kua takatū rātou, āe rā, he ope nō ō rātou tāne kaha rawa, me ā rātou hoari me ā rātou kōtaha, kia hahau iho ai i ngā mea katoa e ngana ai ki te tomo ki roto i tō rātou wāhi haumaru mā te tomokanga; ā, pēnei tā rātou takatūtanga ki te tiaki i a rātou anō i ngā Rāmana.

21 Ā, i pahawa ake, nā, ka mauria e ngā kaiwhakahau o ngā Rāmana ā rātou tauā ki mua i te tomokanga, ā, ka tīmata tā rātou whawhai ki ngā Nīwhai, kia tomo atu ai ki roto i tō rātou wāhi haumaru; engari nana, kua āia atu rātou i tēnei wā, i tēnei wā, nā konā i parekuratia rātou ki tētahi parekura nui.

22 Nā, i tā rātou kitenga atu tē taea e rātou te rapu kaha i runga i ngā Nīwhai mā te tomokanga, ka tīmata tā rātou kēri iho i ō rātou maioro e puta ai tētahi ara ki ā rātou tauā, kia ōrite ai te papa tauwhawhainga; engari nana, i ēnei mahinga ka heua iho rātou e ngā kōhatu me ngā pere kua makaia ki a rātou; ā, mahue tā rātou whakakī i ngā awakari mā te tō iho i ngā maioro, kua whakakīa kētia e ō rātou tūpāpaku me ō rātou tāngata taotū.

23 Pēnei i ngā Nīwhai te kaha katoa i runga i ō rātou hoariri; ā pēnei ka ngana tonu ngā Rāmana ki te whakangaro i ngā Nīwhai tae noa atu ki te wā i mate katoa ai ō rātou kaiwhakahau katoa; āe rā, neke atu i te kotahi mano Rāmana i whakamatea ai; heoi, i tērā taha, kāore te tangata kotahi o ngā Nīwhai i mate ai.

24 Kua āhua rima tekau ngā mea i toutū ai, kua pākia ai e ngā pere o ngā Rāmana mā te tomokanga, engari kua rīa nei e ō rātou puapua, me ō rātou ārai uma, me ō rātou ārai māhunga, nā konā kei ō rātou waewae ō rātou toutūnga, he mea kino rawa ngā mea maha.

25 Ā, i pahawa ake, nā, i te kitenga ake o ngā Rāmana kua mate katoa ō rātou kaiwhakahau katoa ā, ka tahuti atu rātou ki roto i te koraha. Ā, i pahawa ake, nā, ka hoki atu rātou ki te whenua o Nīwhai, ki te whakamōhio atu ki tō rātou kīngi, a Amarikaia, i whānau mai ia he Nīwhai, e pā ana ki tō rātou hinganga nui.

26 Ā, i pahawa ake, nā, i tino riri rawa ia ki tōna iwi, nā te mea kīhai ia i rapu i tāna i hiahia ai i runga i ngā Nīwhai; kāore ia i kukume iho i a rātou ki raro i te ioka o te hereheretanga.

27 Āe rā, i te tino pukuriri ia, ā, i kangaia e ia te Atua, me Moronai anō hoki, e oati ana i tētahi oati nui māna ō Moronai toto e inu; ā, koinei katoa nā te mea i pupuri a Moronai i ngā whakahaunga a te Atua i te whakaritenga o te haumarutanga o tana iwi.

28 Ā, i pahawa ake, i tērā taha, i whakawhetai te iwi o Nīwhai i te Ariki tō rātou Atua, nā tōna mana kāore nei ōna rite i te whakaputanga i a rātou i ngā ringaringa o ō rātou hoariri.

29 Ā, pēnei whakamutua ai te tau tuangahuru mā iwa o te whakahaeretanga a ngā kaiwhakawā i runga i te iwi o Nīwhai.

30 Āe rā, hono tonu ai te maungārongo i waenganui i a rātou, ā, he nui te whaioranga i roto i te hāhi nā tō rātou ū me tō rātou ngohengohe i tukuna ai e rātou ki te kupu a te Atua, kua whakapuakina mai ki a rātou e Heramana rātou ko Hipirona, ko Korianato me Amona rātou ko ana teina, āe rā, me te hunga katoa kua whakamanaia e te ritenga tapu o te Ariki, kua rūmakina ki te rīpenetātanga, ā, kua tonoa atu ki te kauhau ki waenganui i te iwi.