Ko te Pukapuka a Arami
te Tama a Arami

1 Nā, i pahawa ake, nā, i te tau tuatahi o te whakahaeretanga a ngā kaiwhakawā i runga i te iwi o Nīwhai, nō tēnei wā haere ake nei, i te mea kua haere a kīngi Mōhia i te huarahi o te ao katoa, kua pakangatia te pakanga pai, e hīkoi tōtika ana i te aroaro o te Atua, kāore he tangata i waiho e ia hei whakahaere i muri i a ia; hei aha koa nāna ngā ture i whakapūmau ai, ā, i whakaaetia ērā e te iwi; nō reira rātou i meinga ai kia ngohengohe ai ki ngā ture i whakatakotoria e ia.

2 Ā, i pahawa ake, nā, i te tau tuatahi o te whakahaeretanga a Arami i te nohoanga-whakawā, i reira tētahi tangata i kawea ki mua i tōna aroaro kia whakawākia ai, he tangata kaitā ia, ā, kua rongonui mō tōna kaha nui.

3 Ā, kua hāereere ia i waenganui i te iwi, e kauhau ana ki a rātou i taua mea i kī ai ia ko te kupu a te Atua, e whakahē ana i te hāhi; e whakapuaki ana ki te iwi me rorotu haere ia pirihi me ia kaiako; ā, me kaua hoki rātou e mahi ki ō rātou ake ringaringa, engari mā te iwi kē e mahi hei oranga mō rātou.

4 Ā, nāna anō i whakaatu ki te iwi, nā, ka whakaorangia ngā tāngata katoa hei te rā whakamutunga, ā, kāore ō rātou take kia wehi, kia tūwiri rānei, engari kia ara ake rātou i ō rātou māhunga kia hari; nā te mea kua hangaia ngā tāngata katoa e te Ariki, ā, kua hokona anōtia ngā tāngata katoa; hei te mutunga, ka riro i ngā tāngata katoa te oranga tonutanga.

5 Ā, i pahawa ake, nā tana kaha kauhau i ēnei mea ka whakapono te tokomaha i ana kupu, nā te tino tokomaha ka tīmata rātou ki te tautoko i a ia me te hoatu pūtea ki a ia.

6 Ā, ka tīmata ia ki te neke ake i runga i te whakapehapeha o tōna ngākau, me te whakakākahu i ngā kākahu utu nui, āe rā, ka tīmata anō ki te whakapūmau i tētahi hāhi i runga i te ritenga o tana kauhautanga.

7 Ā, i pahawa ake i a ia e haere ana, ki te kauhau ki te hunga i whakapono ai i tana kupu, ka tūtaki ia ki tētahi tangata nō te hāhi o te Atua, āe rā, ko tētahi o ōna kaiako pū anō; ā, ka tīmata ia ki te kaha tohetohe ki a ia, kia whakakōtititia atu e ia te iwi o te hāhi; engari ka māia te tū o te tangata, e whakatūpatoria ana ia ki ngā kupu a te Atua.

8 Nā, ko Kiriona te ingoa o te tangata; ā, koia anō hei taputapu i ngā ringaringa o te Atua i te whakaputanga atu i te iwi o Rimihi i te hereheretanga.

9 Nā tā Kiriona tū atu ki a ia i runga i te māia me ngā kupu a te Atua ka pukuriri ia ki a Kiriona, ā, ka unuhia e ia tana hoari, ā, ka tīmata ki te patu i a ia. Nā, kua koroheketia rawatia a Kiriona, nō reira kīhai i taea e ia te ārai atu i ana patunga, nō reira i whakamatea ia e te hoari.

10 Ā, ka haria te tangata nāna ia i patu e te iwi o te hāhi, ā, ka mauria atu ki te aroaro o Arami, kia whakawākia ai kia rite ai ki ana hara kua meatia e ia.

11 Ā, i pahawa ake, nā, i tū ia i te aroaro o Arami, ā, ka totohe atu mōna anō i runga i te māia nui.

12 Engari ka kī atu a Arami ki a ia: Nana, koinei te wā tuatahi i whakaurua ai te mahi tohunga teka ki waenganui i tēnei iwi. Ā nana, ehara tōu hē i te mahi tohunga teka anake, engari kua ngana nei kia whakauruhitia tēnā ki te hoari; ā, mēnā ka whakaurua mai te mahi tohunga teka ki waenganui i tēnei iwi koia kē tō rātou whakangaromanga katoatanga.

13 Ā, nāu i whakaheke te toto o tētahi tangata tika, āe rā, he tangata nāna nei ngā mea pai nunui i mahi ai i waenganui i tēnei iwi; ā, mēnā rānei ka tohua koe e mātou ka tau mai ōna toto ki runga i a mātou hei rapu utu.

14 Nō reira, kua whakatauhia koe kia mate, e ai ki te ture kua homai nei ki a tātou e Mōhia, tō tātou kīngi whakamutunga; ā, kua whakaaengia ēnā e tēnei iwi; nō reira me ngohengohe tēnei iwi ki te ture.

15 Ā, i pahawa ake, nā, ka mauria ia e rātou; ā, ko Neho tōna ingoa; ā, ka kawea atu ia e rātou ki runga i te puke o Manati, ā, i reira ia meinga ai, i whakaae ai rānei, i waenganui i ngā rangi me te whenua, nā, ko ngā mea i whakaakona ai e ia ki te iwi he mea tauaro i tā te kupu a te Atua; ā, i reira ka whakamatea ia ki tētahi matenga taurekareka.

16 Hei aha koa, kīhai i mutu i tēnei te horapa haeretanga o te mahi tohunga teka puta noa i te whenua; nā te mea he tokomaha te hunga i aroha ki ngā mea tekateka o te ao, ā, ka haere whakamua atu rātou e kauhau ana i ngā whakaakoranga teka; ā, i pēnei rātou he whakaaro ki ngā taonga me te hōnore.

17 Hei aha koa, kīhai rātou i māia ki te rūkahu, mehemea e mōhiotia ana, nā te mataku ki te ture, nā te mea ka whakawhiua te hunga rūkahu; nō reira i whakataruna rātou anō nei kei te kauhau atu e ai ki tō rātou whakapono; ināianei ā, kāore he kaha tō te ture i runga i te tangata kotahi mō tōna whakapono.

18 Ā, kāore rātou i māia ki te tāhae, nā te mataku ki te ture, nā te mea ka whakawhiua te hunga pērā; kāore rānei rātou i māia ki te pāhua, ki te kōhuru rānei, nā te mea ki te kōhuru tētahi ka whakawhiua kia mate.

19 Engari, i pahawa ake, nā, ka tīmata ngā tāngata ehara nō te hāhi o te Atua ki te whakatoi i te hunga nō te hāhi o te Atua, ā, ko ngā mea kua tangohia ki runga i a rātou te ingoa o te Karaiti.

20 Āe rā, i whakatoi rātou i a rātou, ā, i karawhiua rātou ki ngā tūmomo kupu katoa, ā, i pēnei nā tō rātou whakaiti; nā te mea kāore rātou i te whakahīhī i ō rātou ake karu, ā, nā tā rātou wāwāhi atu i te kupu a te Atua, tētahi ki tētahi, kāore he moni, ā, kāore he utu.

21 Nā, i reira tētahi ture uaua i waenganui i te iwi o te hāhi, kia kore ai te tangata kotahi, nō te hāhi, e ara ake me te whakatoi i te hunga ehara nō te hāhi, ā, kia kore ai he whakatoinga i waenganui i a rātou anō.

22 Hei aha koa, he tokomaha i waenganui i a rātou i tīmata ai ki te whakahīhī, ā, ka tīmata rātou ki te totohe riri atu ki ō rātou hoariri, tae noa atu ki te patu; āe rā, ka mekemeke rātou tētahi ki tētahi.

23 Nā, koinei i te tau tuarua o te whakahaeretanga a Arami, ā, he nui te mamae i roto i te hāhi nā ēnei mea; āe rā, koia te pūtake o ngā whakamātautauranga nunui i te hāhi.

24 Nā te mea i whakapakekehia ngā ngākau o te hunga tokomaha, ā, ka mukua atu ō rātou ingoa, nā, kāore i maumaharatia tonutia rātou i waenganui i te iwi o te Atua. Ā, he tokomaha anō i tango atu i a rātou anō i waenganui i a rātou.

25 Nā, he whakamātautau nui tēnei ki te hunga i tū kaha i roto i te whakapono; hei aha koa, i toka tū moana rātou i tā rātou pupuri i ngā whakahaunga a te Atua, ā, i manawanui tā rātou waha i ngā whakatoinga i pūrangatia ai ki runga i a rātou.

26 Ā, i te wā i wehe atu ai ngā pirihi kia wāwāhi atu ai i te kupu a te Atua ki te iwi, ka wehe anō te iwi i ā rātou mahi ki te whakarongo atu ki te kupu a te Atua. Ā, i te wā i wāwāhia atu ai e te pirihi te kupu a te Atua ki a rātou ka hokihoki ngākaunui atu rātou katoa ki ā rātou mahi; ā, ko te pirihi, kīhai i whakateitei ia i a ia anō i runga ake i te hunga whakarongo, nā te mea kāore nei i pai ake te kaikauhau i te kaiwhakarongo, kāore rānei i pai ake te kaiako i te ākonga; ā, i taurite pēnei rātou, ā, i mahi katoa rātou, tēnā tangata, tēnā tangata e pērā ana ki tōna kaha.

27 Ā, i wāwāhi atu rātou i ā rātou rawa, ia tangata, ia tangata e ai ki tāna, ki te hunga rawakore, me te hunga hapa, me te hunga tūroro, me te hunga e whakamamaetia ana; ā, kīhai rātou i whakakākahu i ngā kākahu utu nui, heoi, he tōrire, ā, he ātaahua tonu rātou.

28 Ā, i pēnei tā rātou whakapūmau i ngā āhuatanga o te hāhi; ā, ka tīmata pēnei tā rātou mau i te rangimārie tonutanga anō, ahakoa ā rātou whakatoinga katoa.

29 Ināianei ā, nā te toka tū moana a te hāhi ka tino whairawa haere rātou, e ranea ana ngā mea katoa e hiahiatia ana e rātou—he ranea ngā kāhui o ia tū, o ia tū, me ngā kūao mōmona o ia tū, o ia tū, he ranea hoki ngā kākano, me ngā kōura, me ngā hiriwa, me ngā mea utu nui, he ranea anō hoki ngā hiraka me ngā rīnena miro pai, me ngā kākahu kōkau papai o ia āhua, o ia āhua.

30 Ā, i pēnei, i runga i tō rātou āhua whai pai, kīhai rātou i whakakāhore i tētahi e kākahu-kore ana, e hiakai ana rānei, e hiainu ana rānei, e māuiui ana rānei, i tētahi rānei kīhai ia i atawhaitia; ā, kīhai i tau ō rātou ngākau ki runga i ngā taonga; nō reira i ngākau tūwhera ki ngā tāngata katoa, pakeke mai, rangatahi mai, herehere mai, herekore mai, tāne mai, wahine mai, ahakoa kei waho i te hāhi ahakoa rānei kei roto i te hāhi, kāore ō rātou tikanga kōwhiri tangata e pā ana ki te hunga hapa.

31 Ā, i pēnei tā rātou kakenga, ā, ka tino whairawa ake rātou i te hunga ehara nei i tō rātou hāhi.

32 Nā te mea ka tuku te hunga ehara i te hāhi i a rātou anō ki te mahi makutu, ā, me te karakia whakapakoko, me te hakirara rānei, me te ngaungau, i te pūhaehae me te totohe; e whakakākahu ana i ngā kākahu utu nui; kua neke ake i runga i te whakapehapeha o ō rātou karu; e whakatoi ana, e rūkahu ana, e whānako ana, e pāhua ana, e mahi pūremu ana, e kōhuru ana hoki, me ngā tūmomo whakarihariha katoa o ia āhua, o ia āhua; hei aha koa, kua whakahaeretia te ture ki runga i ngā kaitakahi ture katoa, ina taea te pērā.

33 Ā, i pahawa ake, nā te whakahaeretanga a te ture ki runga i a rātou, e whakawhiua ana ia tangata, ia tangata e ai ki tāna i mahi ai, ka nui ake tō rātou āta noho, ā, kīhai rawa rātou i māia ki te mahi i tētahi mahi whakarihariha mehemea ka mātauria; nō reira, he nui te rangimārie i waenganui i te iwi o Nīwhai tae atu ki te tau tuarima o te whakahaeretanga a ngā kaiwhakawā.