1 Ā, i pahawa ake, nā, ko ngā Nīwhai kīhai i patua e ngā rākau whawhai, nō muri iho i tā rātou tanumi i te hunga i patua ai—nā, kīhai i tatauria te hunga mate, nā te nui o tō rātou tatauranga—nō muri iho i tā rātou tanumitanga i ō rātou mate katoa ka hoki atu rātou ki ō rātou whenua, ā, ki ō rātou kāinga, me ā rātou hoawahine, me ā rātou tamariki.

2 Nā, he tokomaha ngā wāhine me ngā tamariki i patua ai ki te hoari, ā, he maha anō ā rātou kāhui o ia tū, o ia tū; ā, he maha anō ā rātou māra kākano i whakangaromia ai, nā te mea kua takatakahia e ngā ope tangata.

3 Ināianei ā, ka makaia ngā Rāmana me ngā Amariki i patupatua ai i runga i te tahatika o te awa o Hairona ki roto i ngā wai o Hairona; ā nana, kei ngā hōhonutanga o te moana ō rātou kōiwi, ā, he maha rawa ērā.

4 Ā, i rerekē ngā Amariki i ngā Nīwhai, nā te mea i whaitohungia ō rātou rae e rātou anō ki te whero i runga i te ritenga o ngā Rāmana; hei aha koa kīhai i heua e rātou ō rātou māhunga kia rite ki ngā Rāmana.

5 Nā, kua heua ngā māhunga o ngā Rāmana; ā, kua tahanga rātou, hāunga ko te hiako kua whītikiria i ō rātou hope, me ō rātou kākahu whawhai, kua whītikiria i a rātou, me ā rātou kōpere, me ā rātou pere, me ā rātou kōhatu, me ā rātou kōtaha, me ētahi atu mea.

6 Ā, he pōuriuri te kiri o ngā Rāmana, e pērā ana ki te tohu i whakataua ai ki runga i ō rātou tūpuna, koia tētahi kanga i whakataua ai ki runga i a rātou nā ō rātou hara me ā rātou haututū ki ā rātou teina, arā, ko Nīwhai, ko Hākopa, ko Hōhepa rātou ko Hāmi, he tangata tika, ā, he tangata tapu rātou.

7 Ā, i whai ō rātou tuākana ki te whakangaro i a rātou, nō reira i kangaia rātou; ā, ka whakataua tētahi tohu ki runga i a rātou e te Atua, āe rā, ki runga i a Rāmana rāua ko Remuere, me ngā tama a Ihimaera anō hoki, me ngā wāhine Ihimaera.

8 Ā, i pēnei kia rerekē ai ō rātou uri i ngā uri o ā rātou teina, mā konā tiakina ai e te Ariki te Atua tōna iwi, kia kaua rātou e hanumi atu me te whakapono i ngā whakarerenga hē, ā, ko tōna mutunga he whakangaromanga.

9 Ā, i pahawa ake, nā, i kukume iho te tangata i hanumi atu ai ki ngā uri o ngā Rāmana i taua kanga anō ki runga i ōna uri.

10 Nō reira, ka karangatia te tangata i tuku i a ia anō kia whakakōtiti kētia e ngā Rāmana i raro i te maru o tērā upoko, ā, ka whakataua tētahi tohu ki runga i a ia.

11 Ā, i pahawa ake, nā, ko te tangata kīhai nei i whakapono ki ngā whakarerenga iho a ngā Rāmana, engari i whakapono kē i aua tuhinga kua haria mai ki waho i te whenua o Hiruharama, i ngā whakarerenga iho anō a ō rātou tūpuna, koia nei he tika, i whakapono anō i ngā whakahaunga a te Atua, ā, i puritia ēnā, i karangatia ko ngā Nīwhai, ko te iwi o Nīwhai rānei, mai i tērā wā haere ake nei—

12 Ā, ko rātou anō ngā mea kua tuhia ngā tuhinga e pono ana mō tō rātou iwi, mō te iwi anō hoki o ngā Rāmana.

13 Nā, ka huri anō tātou ki ngā Amariki, nā te mea kua whakataua anōtia tētahi tohu ki runga i a rātou; āe rā, nā rātou anō rātou i whaitohu ai, āe rā, ko tētahi tohu whero ki runga i ō rātou rae.

14 Pēnei kua mana te kupu a te Atua, nā, koinei ngā kupu i kōrero ai ki a Nīwhai: Nana, ko ngā Rāmana nāku i kanga, ā, ka whakatau au i tētahi tohu ki runga i a rātou kia whakawehea rātou me ō rātou uri i a koe me ō uri, mai i tēnei wā haere ake nei mō āke tonu atu, hāunga ka rīpenetā rātou i ō rātou whakarihariha me te tahuri mai ki ahau kia whakaaroha atu au ki a rātou.

15 Hei āpiti anō: Māku tētahi tohu e whakatau ki runga i te tangata e hanumi ai i ōna uri ki ōu tuākana, kia kangaia rātou anō hoki.

16 Hei āpiti anō: Māku tētahi tohu e whakatau ki runga i te tangata e whawhai ai ki a koe me ō uri.

17 Hei āpiti anō, ko tāku, e kore rawa te tangata e wehe atu ai i a koe e karangatia tonutia he uri nōu; ā, māku koe e manaaki, me te hunga katoa e karangatia ai he uri nōu, haere ake nei mō āke tonu atu; ā, koinei ngā whakaari a te Ariki ki a Nīwhai me ana uri.

18 Nā, kīhai ngā Amariki i mōhio i te whakatutuki rātou i ngā kupu a te Atua i te wā i tīmata ai rātou ki te whaitohu i a rātou anō ki ō rātou rae; hei aha koa kua puta mārire mai tā rātou tutū ki te Atua; nō reira i tika pū kia taka iho ai te kanga ki runga i a rātou.

19 Nā, e hiahia ana ahau kia kite ai koutou nā rātou anō te kanga i kukume ai ki runga i a rātou; ā, he pērā anō tā ia tangata kua kangaia nei kukume iho ki runga i a ia anō tōna ake whakahēnga.

20 Nā, i pahawa ake, nā, kāore i maha ngā rā whai muri iho i te whawhai i whawhaitia ai i te whenua o Harahemara, e ngā Rāmana me ngā Amariki, nā, i reira anō tētahi atu tauā a ngā Rāmana i whakaeke mai ai ki runga i te iwi o Nīwhai, i taua wāhi anō i tūtaki ai te tauā tuatahi ki ngā Amariki.

21 Ā, i pahawa ake, nā, kua tonoa tētahi tauā kia āia atu ai rātou i ō rātou whenua.

22 Nā, nā te mea i te mamae a Arami i tētahi tūnga kīhai ia i haere ake ki te whawhai i tēnei wā ki ngā Rāmana;

23 Engari i tonoa e ia tētahi tauā nui ki a rātou; ā, ka haere ake rātou, ā, ka patua ngā tāngata tokomaha o ngā Rāmana, ā, ka āia atu te toenga o rātou ki waho i ngā rohe o tō rātou whenua.

24 Kātahi ka hoki anō rātou, ā, ka tīmata ki te whakapūmau i te rangimārie i runga i te whenua, kāore rātou i raru anō i ō rātou hoariri mō tētahi wā.

25 Nā, i meatia katoatia ēnei mea, āe rā, i tīmataria, ā, i whakamutua ēnei whawhai me ēnei tautohetohenga katoa i te tau tuarima o te whakahaeretanga a ngā kaiwhakawā.

26 Ā, i te tau kotahi i tonoa atu ai ngā wairua manomano, ā, he mano tekau o ngā mano ki te ao mutunga kore, kia kokoti ai rātou i ō rātou utu e rite ana ki ā rātou mahinga, ahakoa i pai, ahakoa rānei i kino, kia kokoti ai i te hari mutunga kore, i te pōuri mutunga kore rānei, e ai ki te wairua i whāia atu ai rātou, mehemea he wairua pai, he wairua kino rānei.

27 Nā te mea ka whiwhi utu ia tangata, ia tangata mai i te mea e whāia atu ai e ia, ā, ka pēneitia e ai ki ngā kupu a te wairua poropititanga; nō reira tukua kia rite ki te pono. Ā, i pēnei te whakamutunga o te tau tuarima o te whakahaeretanga a ngā kaiwhakawā.