1 Ā, i pahawa ake i te tīmatanga o te tau tuarima o te whakahaeretanga o tā rātou whakahaeretanga ka tīmata tētahi tautohetohenga i waenganui i te iwi; ko tētahi tangata, e karangatia ana ko Amariki, he tangata tinihanga rawa ia, āe rā, he tangata matatau e pā ana ki te mātauranga o te ao, he tangata nō te ritenga o te tangata nāna a Kiriona i patu ki te hoari, i whakamatea ai ia e ai ki te ture—

2 Nā, ko tēnei Amariki, i runga i tana tinihanga, ka kukume atu i ngā tāngata tokomaha kia whai atu i a ia; nā te tino tokomaha rawa atu ka tino whai kaha haere rātou; ā, ka tīmata tā rātou whai kia whakatūria a Amariki hei kīngi i runga i te iwi.

3 Nā, he mea ohorere ki te iwi o te hāhi, ā, ki te hunga katoa kīhai i kūmea atu e ngā whakapakepaketanga a Amariki; nā te mea i mōhio rātou, nā, e ai ki tō rātou ture me whakapūmau ērā momo mea e te reo o te iwi.

4 Nō reira, mehemea i taea kia hopu ai a Amariki i te reo o te iwi, i te mea ko ia tētahi tangata kino, ka whakakāhoretia rātou i ō rātou tikanga me ō rātou kōwhiringa o te hāhi; nā te mea i te hiahia ia kia whakangaro i te hāhi o te Atua.

5 Ā, i pahawa ake, nā, ka whakahuihui te iwi i a rātou katoa puta noa i te whenua, ia tangata, ia tangata e rite ana ki tōna hinengaro, mēnā rānei e tautoko ana, e whakahē ana rānei i a Amariki, i ngā rōpū rerekē, he nui ā ratou totohe me ā rātou ngangare whakamīharo tētahi ki tētahi.

6 Ā, i whakahuihui pēnei rātou i a rātou anō kia whiua atu ō rātou reo e pā ana ki te take; ā, ka whakatakotoria ki mua i te aroaro o ngā kaiwhakawā.

7 Ā, i pahawa ake, nā, ka whakahē atu te reo o te iwi i a Amariki, nā konā kīhai ia i whakatūria hei kīngi i runga i te iwi.

8 Nā konei i puta ake ai te hari nui i ngā ngākau o te hunga whakahē i a ia; engari ka whakaohoohokia ake e Amariki te hunga tautoko i a ia kia riri ai ki te hunga kāore i te tautoko i a ia.

9 Ā, i pahawa ake, nā, ka whakahuihuia tahitia rātou e rātou anō, ā, ka whakatapua a Amariki hei kīngi mō rātou.

10 Nā, i te wā i whakatūria ai a Amariki hei kīngi i runga i a rātou ka whakahaua rātou kia hāpai patu ki ā rātou teina; ā, i pēneitia e ia kia whakatauhia ai tōna mana ki runga i a rātou.

11 Nā, i waitohungia te iwi o Amariki e te ingoa o Amariki, arā, i karangatia ko ngā Amariki; ā, ko te toenga atu i karangatia ai ko ngā Nīwhai, ko te iwi o te Atua rānei.

12 Nō reira, i mōhio te iwi o ngā Nīwhai ki te whakaaro a ngā Amariki, koia rātou i whakarite ai ki te tūtaki ki a rātou; āe rā, ka whakamaua rātou e rātou anō ki te hoari, me ngā hemita, me ngā kōpere, me ngā pere, me ngā kōhatu, me ngā kōtaha, ā, ki ngā tūmomo rākau whawhai katoa, o ia āhua, o ia āhua.

13 Nā konā kua rite rātou ki te tūtaki ki ngā Amariki i te wā o tā rātou haerenga mai. Ā, ka whakatūria he kāpene, me ngā kāpene i runga ake, me ngā kāpene rangatira, e pērā ana ki ō rātou tatauranga.

14 Ā, i pahawa ake, nā, ka whakamaua e Amariki ana tangata ki ngā tūmomo rākau whawhai katoa o ia āhua, o ia āhua; ā, i whakatūria anōtia e ia he kaiwhakahaere, ā, he kaiārahi i runga i tana iwi, kia ārahina atu rātou ki te pakanga ki ā rātou teina.

15 Ā, i pahawa ake, nā, ka haere ake ngā Amariki ki runga i te puke ki Amanihu, i te taha rāwhiti o te awa Hairona, e rere ana i te whenua o Harahemara, ā, i reira rātou tīmata ai ki te whawhai ki ngā Nīwhai.

16 Nā, ko Arami te kaiwhakawā nui me te kāwana i runga i te iwi o Nīwhai, nō reira, ka haere ake ia me tana iwi, āe rā, me ana kāpene, me ana kāpene rangatira, āe rā, i mua i ana tauā, ki te whawhai ki ngā Amariki.

17 Ā, ka tīmata rātou ki te patupatu i ngā Amariki i runga i te puke ki te taha o Hairona. Ā, ka whawhai atu ngā Amariki ki ngā Nīwhai i runga i te kaha nui, nō konei ka hingahinga iho ngā Nīwhai tokomaha i mua i ngā Amariki.

18 Hei aha koa ka whakakahangia e te Ariki te ringa o ngā Nīwhai, nā, ka patua e rātou ngā Amariki ki tētahi parekura nui, nā, ka tīmata tā rātou tahuti atu i mua i a rātou.

19 Ā, i pahawa ake, nā, ka whai atu ngā Nīwhai i ngā Amariki mō te roanga o te rā, ā, ka parekuratia nuitia rātou, nā konā neke atu i te tekau mā rua mano, e rima rau, e toru tekau mā rua ngā wairua o ngā Amariki i patua ai; ā, neke atu i te ono mano, e rima rau, e ono tekau mā rua ngā wairua o ngā Nīwhai i patua ai.

20 Ā, i pahawa ake, nā, i te wā kāore i taea tonutia e Arami ngā Amariki te whai ka meatia e ia tana iwi kia whakatūria ō rātou tēneti i te raorao o Kiriona, kua karangatia te raorao mō taua Kiriona i patua ai e te ringa o Neho ki te hoari; ā, ka whakatūria e ngā Nīwhai ō rātou tēneti i tēnei raorao mō te pō.

21 Ā, ka tonoa e Arami ngā tūtei ki te aru i ngā mōrehu o ngā Amariki, kia mōhio ai ia e pā ana ki ā rātou mahere me ā rātou whakaritenga, mā konā taea e ia te tiaki i a ia anō i a rātou, kia tiakina ai tōna iwi i te whakangaromanga.

22 Nā, ko ngā ingoa o te hunga i tonoa atu e ia hei tūtei i te puni o ngā Amariki, arā, ko Herama, ko Amanore, ko Manati rātou ko Rimihera; koinei te hunga i haere atu ai me ō rātou tāngata hei tūtei i te puni o ngā Amariki.

23 Ā, i pahawa ake, nā, i te aonga ake ka hohoro rawa atu tā rātou hokinga ki te puni o ngā Nīwhai, e whakamīharo nuitia ana, ā, kua pākia e te wehi nui, e mea ana:

24 Nana, i aru atu mātou i te puni o ngā Amariki, ā, ko te mea whakamīharo rawa atu ki a mātou, i te whenua o Minono, i runga ake i te whenua o Harahemara, i runga i te huarahi ki te whenua o Nīwhai, i kite mātou i tētahi ope tini o ngā Rāmana; ā nana, kua hono atu ngā Amariki ki a rātou;

25 Ā, kei runga rātou i ō tātou teina i te whenua rā; ā, e tahuti atu ana rātou me ā rātou kāhui, me ā rātou hoawāhine, me ā rātou tamariki, e ahu ana ki tō tātou pā; ā, ki te kore tātou e hohoro ka riro i a rātou tō tātou pā, ā, ka patua ō tātou matua, me ā tātou hoawāhine, me ā tātou tamariki.

26 Ā, i pahawa ake, nā, ka haria atu e te iwi o Nīwhai ō rātou tēneti, ā, ka wehe atu ki waho i te raorao o Kiriona e ahu atu ana ki tō rātou pā, koia ko te pā o Harahemara.

27 Ā nana, i a rātou e whakawhiti ana i te awa o Hairona, ka huaki mai ngā Rāmana me ngā Amariki, kua tata rite tō rātou tokomahatanga, anō nei, ko ngā oneone o te moana, ki te whakangaro i a rātou.

28 Hei aha koa, i whakakahangia ngā Nīwhai e te ringa o te Ariki, kua inoi kaha ake rātou ki a ia kia whakaputaina ai rātou i ngā ringaringa o ō rātou hoariri, nō reira whakarongo ai te Ariki i ā rātou karanga, ā, i whakakahangia rātou, ā, ka hingahinga iho ngā Rāmana me ngā Amariki i mua i a rātou.

29 Ā, i pahawa ake, nā, ka whawhai tahi a Arami ki a Amariki ki te hoari, kanohi ki te kanohi; ā, i nui tā rāua kakaritanga, tētahi ki tētahi.

30 Ā, i pahawa ake i a Arami, nā te mea he tangata nō te Atua, kua whakangungua ki te whakapono nui, ka karangahia, e mea ana: E te Ariki, kia aroha mai, ā, kia tohungia tōku oranga, kia meinga au hei taputapu i roto i ō ringaringa ki te whakaora me te tiaki i tēnei iwi.

31 Nā, i te wā i kōrero ai a Arami i ēnei kupu ka kakari anō rāua ko Amariki; ā, i whakakahangia ia, nā konā i whakamate ia i a Amariki ki te hoari.

32 Ā, i kakari anō rāua ko te kīngi o ngā Rāmana; engari tahuti ana te kīngi o ngā Rāmana i te aroaro o Arami, ā, ka tonoa ana kaitiaki kia kakari ai ki a Arami.

33 Engari ka kakari a Arami, me ana kaitiaki ki ngā kaitiaki o te kīngi o ngā Rāmana tae atu ki te wā ka whakamatea, ā, ka āia atu rātou e ia.

34 Ā, i whakawāteahia pēneitia e ia te whenua, te tahatika kē rānei, i te taha uru o te awa o Hairona, e makaia ana ngā tūpāpaku o ngā Rāmana kua patua iho ki roto i ngā wai o Hairona, kia whaiwāhi ai i konā tana iwi ki te whakawhiti atu me te kakari atu ki ngā Rāmana me ngā Amariki i te taha uru o te awa o Hairona.

35 Ā, i pahawa ake, nā, whakawhiti katoa ana rātou i te awa o Hairona ka tīmata ngā Rāmana me ngā Amariki ki te tahuti atu i mua i a rātou, ahakoa he tokomaha whāioio rātou tē taea te tatau i a rātou.

36 Ā, i tahuti atu rātou i te aroaro o ngā Nīwhai whakatekoraha i te uru me te raki, kei tua atu i ngā rohe o te whenua; ā, ka arumia rātou e ngā Nīwhai i runga i tō rātou kaha, ā, ka patupatua iho rātou.

37 Āe rā, i tūtaki rātou i tēnei taha, i tēnei taha, ā, ka patua, ā, ka āia atu, tae atu ki tā rātou whakamararatanga atu ki te uru, ā, ki te raki, kia tae rā anō rātou ki te koraha, kua karangatia nei ko Heamauta; ā, ko taua koraha anō kua muia e ngā kararehe mohoao me ngā kararehe horomiti.

38 Ā, i pahawa ake, nā, he tokomaha i mate ai i te koraha i ō rātou tūnga, ā, i kainga e aua kararehe me ngā whatura o te rangi; ā, kua kitea ō rātou kōiwi, ā, kua pūrangahia i runga i te whenua.