1 E taku tama, kia whai taringa mai ki aku kupu, nā, ko taku kupu tēnei ki a koe, e rite ana ki tāku i mea atu nei ki a Heramana, nā, ki te pupuri koe i ngā whakahaunga a te Atua ka whaioranga koe i te whenua; ā, ki te kore koe e pupuri i ngā whakahaunga a te Atua ka hātepea atu koe i tōna aroaro.

2 Ināianei ā, e taku tama, e tūmanako ana au ka whai hari nui au i roto i a koe, nā tō ū me tō whakapono ki te Atua; nā te mea e rite ana ki tāu tīmatanga ki te titiro atu ki te Ariki tō Atua i a koe e taiohi ana, waihoki ko taku tūmanako ia ka ū tonu atu koe i tō pupuritanga i āna whakahaunga; nā te mea kua manaakitia te tangata e ū ai ki te mutunga.

3 Ko taku kupu tēnei ki a koe, e taku tama, nā, kua whaihari nui kē au i roto i a koe, nā tō whakapono me tō ū, me tō manawanui me tō manawaroa i waenganui i te iwi o ngā Hōrama.

4 Nā te mea e mōhio ana ahau i roto koe i ngā herehere; āe rā, e mōhio ana anō au i ākina koe ki te kōhatu mō te tika te take; ā, i manawanui koe i roto i ēnei mea katoa nā te mea i a koe te Ariki; ināianei ā, e mōhio ana koe nā te Ariki koe i whakaputa.

5 Ināianei ā e taku tama e Hipirona, e hiahia ana ahau kia mahara koe, ka rite te whakaputanga i a koe i āu whakamātautauranga, me āu pōraruraru, me āu whakamamaetanga ki te nui o tō whakawhirinaki ki te Atua, ā, ka hāpaingia ake koe hei te rā whakamutunga.

6 Nā, e taku tama, kāore au i te hiahia kia whakaaro koe nōku ake anō tēnei mātauranga, engari nā te Wairua o te Ariki kei roto nei i ahau i whakamōhio mai nei i ēnei mea ki ahau; nā te mea mehemea kīhai au i whānau mai i te Atua kua kore au i mōhio ki ēnei mea.

7 Engari nana, i tonoa e te Ariki i runga i tōna aroha tētahi anahera ki te whakapuaki mai ki ahau, nā, me mutu i ahau te mahi whakangaromanga i waenganui i tana iwi; āe rā, kua kite au i tētahi anahera kanohi ki te kanohi, ā, i kōrero mai ia ki ahau, ā, i rite tōna reo ki te whatitiri, ā, i whakangāueuetia te whenua katoa.

8 Ā, i pahawa ake, nā, i roto au i te tino mamae kino rawa atu me te auē o te wairua mō ngā rā e toru me ngā pō e toru; ā, kīhai rawa au i whiwhi i tētahi murunga i ōku hara, tae atu ki taku karangatanga ake ki te Ariki a Ihu Karaiti mō tōna aroha. Engari nana, i karanga ake au ki a ia, ā, i whiwhi au i te okiokinga mō tōku wairua.

9 Ināianei ā, e taku tama, kua kōrero au i tēnei ki a koe kia ako ai koe i te mātauranga, kia ako ai koe i ahau, nā, kāore he huarahi kē atu e whakaorangia ake ai te tangata, mā roto anake i te Karaiti. Nana, ko ia te oranga me te māramatanga o te ao. Nana, ko ia te kupu o te pono me te tika.

10 Ināianei ā, i te mea kua tīmata koe ki te whakaako i te kupu, nō konā au e hiahia ana kia whakaako tonu koe; ā, e hiahia ana au kia ū koe, ā, kia mauritau koe i roto i ngā mea katoa.

11 Tirohia kia kaua koe e neke ake i te whakapehapeha; āe rā, tirohia kia kaua koe e whakamanamana i tōu ake mātauranga, i tō kaha nui rānei.

12 Kia māia tāu, engari kaua e whakatuanui; ā, tirohia anō hoki kia paraerehia ōu mate kanehe, kia kī ai koe i te aroha; tirohia kia tahuri atu koe i te hakirara.

13 Kaua e inoi pērā i tā ngā Hōrama, nā te mea kua kite koe e inoi ana rātou kia rangona ai e te tangata, ā, kia whakamihia mō tō rātou mātauranga.

14 Kaua e kī: E te Atua, e whakawhetai atu ana au ki a koe mō mātou e pai ake nei i ō mātou teina; engari kē me kī ake: E te Ariki, murua mai aku kino, ā, kia mahara ki aku tuākana i runga i te aroha—āe rā, whakaaetia tō kino i te aroaro o te Atua i ngā wā katoa.

15 Ā, kia manaakitia tō wairua e te Ariki, ā, kia whakawhiwhia koe i tōna kīngitanga hei te rā whakamutunga, kia noho iho ai i te rangimārie. E haere ināianei, me te whakaako i te kupu ki tēnei iwi. Kia whaiwhakaaro. E taku tama, hei konei rā.