1 Ā, i pahawa ake, nā, i whakanōhia e rātou ngā kaitiaki i runga i ngā mauhere o ngā Rāmana, ā, ka tonoa rātou kia haere atu ai ki te tanu i ō rātou mate, āe rā, me ngā mate anō o ngā Nīwhai i whakamatea ai; ā, ka whakatūria e Moronai he tāngata hei tiaki i runga i a rātou i a rātou e mahi ana i ā rātou mahi.

2 Ā, ka haere atu a Moronai rāua ko Rīhai ki te pā o Mureke, ā, ka riro i a rāua te mana whakahaere o te pā, ā, ka tukuna atu ki a Rīhai. Nana ināianei, ko tēnei Rīhai te tangata i piri ai ki a Moronai i te nuinga o āna whawhai katoa; ā, he tangata e rite ana ki a Moronai, ā, i hari rātou i ō rāua oranga; āe rā, i arohaina rāua e rāua, ā, i arohaina anō hoki e te iwi katoa o Nīwhai.

3 Ā, i pahawa ake, nā, i muri iho i tā ngā Rāmana tanumanga i ō rātou mate me ngā mate o ngā Nīwhai, ka hīkoia atu anō rātou ki te whenua o Mōmona; ā, ka mea a Teanakuma, nā ngā whakahau a Moronai, kia tīmata tā rātou kēri i tētahi awakari huri noa i te whenua, i te pā rānei, a Mōmona.

4 Ā, ka mea anō ia kia hangaia ai e rātou tētahi tīwatawata rākau i runga i te taha whakaroto o te awakari; ā, ka whiua te onepū ki waho atu i te awakari ki te taha o te tīwatawata rākau; ā, pēnei tā rātou meatanga i ngā Rāmana kia mahi ai tae noa ki te wā kua karapotia e rātou te pā o Mōmona huri noa ki ngā taiapa kaha kua hangaia ki te rākau me te onepū, he tino tiketike rawa anō hoki.

5 Ā, ka meinga tēnei pā hei pā tino kaha i ngā rā i muri mai; ā, i tiakina e rātou nga mauhere Rāmana i roto i tēnei pā; āe rā, kei roto anō i tētahi taiapa i meatia ai rātou e rātou kia hangaia ai ki ō rātou ake ringaringa. Nā, kua tika mā Moronai e mea ai i ngā Rāmana kia mahi, nā te mea i ngāwari tā rātou tiaki i a rātou i a rātou e mahi ana; ā, i te hiahia ia ki āna tauā katoa ina whakaeke atu ia ki runga i ngā Rāmana.

6 Ā, i pahawa ake, nā, kua wikitōria a Moronai ki runga i tētahi o ngā tauā nunui rawa atu o ngā Rāmana, ā, kua riro i a ia te pā o Mureke, koia tētahi o ngā pākaha o ngā Rāmana i te whenua o Nīwhai; ā, pēnei kua hangaia e ia tētahi pākaha ki te pupuri i āna mauhere.

7 Ā, i pahawa ake, nā, kāore ia i whai ki te whawhai atu anō ki ngā Rāmana i taua tau, engari i whakamahia āna tāne kia whakariterite rātou mō te pakanga, āe rā, i whakatūwatawatahia te pā hei ārai atu i ngā Rāmana, āe rā, i whakaputaina anō hoki ā rātou wāhine me ā rātou tamariki i te hemokai me te whakamamaetanga, me te tuku kai ki ō rātou tauā.

8 Ināianei ā i pahawa ake, nā, kua rapu kaha anō ngā tauā o ngā Rāmana i runga i ngā Nīwhai, i te moana uru, te tonga, i a Moronai e ngaro atu ana nā tētahi tikanga tinihanga i waenganui i ngā Nīwhai, āe rā, nā konā ahu ai ngā tītorehanga i waenganui i a rātou, āe rā, nā konā kua riro i a rātou ētahi o ō rātou pā i taua wāhi o te whenua.

9 Ā, pēnei nā te kino i roto i a rātou anō, āe rā, nā ngā tītorehanga me ngā tikanga tinihanga i waenganui i a rātou anō kua whakanohoia rātou i roto i tētahi āhuatanga tino mōrearea rawa atu.

10 Ināianei ā nana, he kōrero anō tāku hei kōrero e pā ana ki te iwi o Amona, he Rāmana rātou, i te tīmatanga; engari nā Amona rātou ko ana teina, nā te mana rānei me te kupu a te Atua, kua whakatahuritia rātou ki te Ariki; ā, kua kukume iho rātou ki roto i te whenua o Harahemara, ā, kua tiakina rātou mai i taua wā e ngā Nīwhai.

11 Ā, kua whakakorea rātou ki te hāpai patu ki ō rātou tuākana nā tō rātou oati; nā te mea kua oati rātou kia kore anō rātou e whakaheke toto ā muri ake nei; ā, e rite ana ki tō rātou oati kua mate rātou; āe rā, me i kore te ngākau nui me te aroha nui o Amona rātou ko ana teina mō rātou kua tukuna rātou kia taka iho ai ki roto i ngā ringaringa o ō rātou tuākana.

12 Ā, nō tēnei take i kūmea iho ai rātou ki roto i te whenua o Harahemara; ā, kua roa rātou e tiakina ana e ngā Nīwhai.

13 Engari i pahawa ake, nā, i tā rātou kitenga atu i te mōreareatanga, me ngā whakamamaetanga maha, me ngā tūkinotanganga i pīkauria ai e ngā Nīwhai mō rātou, kua korikoria rātou e te aroha, ā, i te hiahia anō rātou ki te hāpai patu hei tiaki i tō rātou whenua.

14 Engari nana, i a rātou e tata ana ki te hiki i ō rātou rākau whawhai, kua warea rātou e te kaha o Heramana rātou ko ana teina, nā te mea whano ka whati rātou i te oati i oati ai rātou.

15 Ā, i wehi a Heramana kei ngaro ō rātou wairua me ka pērāhia; nō reira i meinga te hunga kua uru atu nei ki roto i tēnei oati kia kite ai i ā rātou teina e kautū haere ana i roto i ō rātou whakamamaetanga, i roto i ō rātou āhuatanga mōrearea i taua wā.

16 Engari nana, i pahawa ake, he tokomaha ā rātou tama, kīhai i uru atu ai ki roto i tētahi kawenata kia kaua rātou e hiki i ā ratou rākau whawhai hei tiaki i a rātou anō i ō rātou hoariri; nō reira i whakahuihui tahi anō rātou i a rātou anō i tēnei wā, ko te hunga katoa e taea ana te hāpai patu, ā, i karangatia rātou e rātou anō he Nīwhai.

17 Ā, i uru atu ai rātou ki roto i tētahi kawenata ki te whawhai mō te herekoretanga o ngā Nīwhai, āe rā, ki te tiaki i te whenua tae noa ki te whakatakotoranga iho i ō rātou oranga; āe rā, i kawenata pū anō rātou e kore rawa rātou e tuku atu i tō rātou herekoretanga, engari ka whawhai rātou i ngā whawhai katoa hei tiaki i ngā Nīwhai, ā, hei tiaki i a rātou anō i te hereheretanga.

18 Nana ināianei, e rua mano o aua taiohi tāne, i uru atu ai ki roto i tēnei kawenata, ā, i hikina ai ā rātou rākau whawhai hei tiaki i tō rātou whenua.

19 Ināianei ā nana, i te mea kīhai rawa rātou i taumaha ki ngā Nīwhai, ka meinga rātou ināianei hei tautoko nui anō hoki i tēnei wā; nā te mea i hīkina ake ā rātou rākau whawhai, ā, i te hiahia rātou ki a Heramana hei kaiārahi mō rātou.

20 Ā, he taiohi tāne katoa rātou, ā, i mātātoa tō rātou māia, tō rātou kaha anō hoki me tō rātou kakama; engari nana, ehara tēnei i te katoa—he tāne katoa rātou i pono ai i ngā wā katoa ahakoa he aha taua mea i riro atu ki a rātou.

21 Āe rā, he tangata pono, ā, he tangata whaiwhakaaro, nā te mea kua ākona rātou kia puritia ai ngā whakahaunga a te Atua me te hīkoi tōtika i tōna aroaro.

22 Ināianei ā nana i pahawa ake, nā, i hīkoi atu a Heramana i te upoko o tana ope taiohi tāne rua mano, hei tautoko i te iwi i roto i ngā rohe o te whenua i te taha tonga e tata ana ki te moana uru.

23 Ā, pēnei te whakamutunga o te tau rua ngahuru mā waru o te whakahaeretanga a ngā kaiwhakawā i runga i te iwi o Nīwhai.