1 Ināianei ā i pahawa ake i te tīmatanga o te tau rua ngahuru mā iwa o ngā kaiwhakawā, ka tonoa atu e Amonoro ki a Moronai e hiahia ana ki te whakawhitiwhiti mauhere.

2 Ā, i pahawa ake, nā, i tino hari a Moronai i tēnei tono, nā te mea i te hiahia ia ki ngā ō i hoatu ai ki ngā mauhere Rāmana hei wāwāhitanga atu ki tōna ake iwi; ā, i te hiahia anō ia ki ōna ake tāngata hei whakakaha i tana tauā.

3 Nā, he tokomaha ngā wāhine me ngā tamariki i kahakina atu ai e ngā Rāmana, ā, kāore kau noa te wahine, te tamaiti kotahi rānei i waenganui i ngā mauhere katoa o Moronai, i ngā mauhere rānei i kahakina atu ai e Moronai; nō reira, i whakarautaki a Moronai kia hopukina ai ngā mauhere Nīwhai katoa e taea ana mai i ngā Rāmana.

4 Nō reira i tuhi ia i tētahi pukapuka, ā, ka haria atu e tētahi pononga a Amonoro, ko taua mea anō nāna nei tētahi pukapuka i hari mai ki a Moronai. Nā, koinei ngā kupu i tuhia ai e ia ki a Amonoro, e mea ana:

5 Nana, e Amonoro, kua tuhi atu nei au ki a koe e pā ana ki tēnei pakanga nāu anō i huaki ki tōku iwi, nā tō tuakana rānei i huaki mai ki a rātou, ā, e ū tonu ana koe ki te whakahaere tonu atu nō muri iho i tana matenga.

6 Nana, e hiahia ana ahau ki te kōrero atu ki a koe e pā ana ki te tika a te Atua, me te hoari o tana riri nui e tāwēwē nei ki runga i a koe ki te kore koe e rīpenetā me te whakahoki atu i ō tauā ki roto i ō koutou ake whenua, te whenua rānei e nōhia ana e koutou, koia ko te whenua o Nīwhai.

7 Āe rā, e hiahia ana ahau ki te kōrero atu ki a koe i ēnei mea me i āhei i a koe te whakarongo ki ēnei mea; āe rā, e hiahia ana ahau ki te kōrero atu ki a koe e pā ana ki te ao rēwera weriweri e tatari ana kia whiwhi ai i te hunga kōhuru pērā i a kōrua ko tōu tuakana, ki te kore koe e rīpenetā me te whakahoki i ō tikanga kōhuru, me te hoki atu me ō tauā ki roto i ō koutou ake whenua.

8 Engari i te mea kua whakaparahako koe i ēnei mea i mua, ā, kua whawhai atu ki te iwi o te Ariki, waihoki rā kei te whakapae au ka mahia pērātia anō e koe.

9 Ināianei ā nana, kua rite mātou ki te whakawhiwhi i a koutou; āe rā, ki te kore koutou e whakahoki atu i ō koutou tikanga, nana, ka tōia iho e koutou te riri o te Atua nā koutou nei anō i whakaparahako ki runga ki a koutou, tae atu ana ki tō koutou whakangaromanga katoatanga.

10 Engari, e ora ana te Ariki, ka whakaeke atu ō mātou tauā ki runga i a koutou ki te kore koutou e hoki atu, ā, ka torona atu koutou ākuanei ki te mate, nā te mea ka mau tonu i a mātou ō mātou pā me ō mātou whenua; āe rā, ka pūmau tonu mātou ki tō mātou whakapono me ngā tikanga o tō mātou Atua.

11 Engari nana, e whakaaro ana ahau tērā pea e auare ake ana tāku kōrerotanga atu ki a koe e pā ana ki ēnei mea; e whakaaro ana rānei au tērā pea he tamaiti koe nā te ao rēwera; nō reira māku taku pukapuka e whakakapi i runga i taku kōrero atu ki a koe e kore au e whakawhitiwhiti mauhere, hāunga i runga i ngā tikanga e pēnei ana, māu e whakawhiti mai i te tāne me tāna wahine me āna tamariki, mō te mauhere kotahi; mehemea ka pēnei te āhuatanga e mahi nei koe, ā, māku e whakawhitiwhiti.

12 Ā nana, ki te kore koe e pēnei, māku e whakaeke atu ki runga i a koutou me aku tauā; āe rā, ka whakamaua e ahau aku wāhine me aku tamariki ki te patu, ā, māku e whakaeke atu ki a koutou, ā, ka arumia pū anō koutou e ahau ki roto i tō koutou ake whenua, koia tō mātou whenua tuku iho tuatahi; āe rā, ka ai he toto mō te toto, āe rā, he oranga mō te oranga; ā, māku hoki e whawhai atu ki a koutou tae noa atu ki te wā kua whakangaromia koutou i te mata o te whenua.

13 Nana, kei roto au i tōku riri, me taku iwi anō hoki; nāu i whai ki te kōhuru i a mātou, ā, kua whai noa iho mātou ki te tiaki i a mātou anō. Engari nana, ki te whai tonu koutou ki te whakangaro i a mātou ka whai mātou ki te whakangaro i a koutou; āe rā, ka whai mātou i tō mātou whenua, arā, ko tō mātou whenua tuku iho tuatahi.

14 Nā, ka mutu i ahau taku pukapuka. Ko Moronai ahau; Ko au tētahi rangatira o te iwi o ngā Nīwhai.

15 Nā, i pahawa ake, nā, ka riri a Amonoro, i tana whiwhinga i tēnei pukapuka; ā, ka tuhituhi atu ia i tētahi atu pukapuka ki a Moronai, ā, koinei ngā kupu i tuhia ai e ia, e mea ana:

16 Ko Amonoro ahau, te kīngi o ngā Rāmana; ko au te teina o Amarikaia nāu anō nei i kōhuru. Nana, māku ōna toto e ngaki ki runga i a koutou, āe rā, māku e whakaeke atu ki runga i a koutou me aku tauā nā te mea kāore ōku wehi i āu kupu whakaweti.

17 Nana rā, i mahi hē ō tūpuna ki ō rātou tuākana, nā rātou tō rātou tikanga ki te kāwanatanga i muru atu, i te mea e tika ana nō rātou kē taua tikanga.

18 Ināianei ā nana, mehemea ka whakatakotohia iho koutou i ā koutou rākau whawhai, ā, ki te tuku iho koutou i a koutou anō kia kāwanatia ai e te hunga nō rātou kē te kāwanatanga, kātahi au ka mea i tōku iwi kia whakatakotohia iho ā rātou rākau whawhai, ā, kāore e whawhai atu anō.

19 Nana, nāu ngā kupu whakaweti maha i whakahāhāngia mai ki ahau me tōku iwi; engari nana, kāore ō mātou wehi ki āu nā whakawetiweti.

20 Hei aha koa, māku e whakaae ki tāu tono whakawhitwhiti mauhere, i runga i te hari, kia penapena ai āku kai mō ōku toa ika ā-whiro; ā, ka whawhai tonu mātou i tētahi whawhai mau tonu, tae noa atu ki te whakataurekarekatanga i ngā Nīwhai ki tō mātou mana, ki tō rātou whakangaromanga mau tonu rānei.

21 Ā, ki te taha ki taua Atua nāu anō i kī kua whakaparahakotia e mātou, nana, kāore ō mātou mōhioranga ki tētahi mea pērā; kāore anō hoki tō koutou; engari mehemea he mea pērā, kāore mātou i te mōhio atu i te mea nāna mātou i hanga pērā i a koutou anō.

22 Ā, mehemea he rēwera me tētahi ao rēwera, nana, kāore rānei ia e tono atu i a koutou ki reira kia nohotahi ai me tōku tuakana nā koutou anō i kōhuru, i kīa ai e koe kua haere atu ia ki taua tū wāhi? Engari nana kāore he tikanga ō ēnei mea.

23 Ko Amonoro ahau, he uri nō Hōrama, i whakapēhia ai e ō koutou tūpuna, ā, i kūmea atu i Hiruharama.

24 Ināianei ā nana, he Rāmana māia ahau; nana, kua whawhaitia tēnei whawhai hei ngaki i ō rātou mate, ā, ki te pūmau me te whakamau i ō rātou tikanga ki te kāwanatanga; heoi ka mutu i ahau taku pukapuka ki a Moronai.