1 Nā, i muri iho i te kōrerotanga a Arami i ēnei kupu, ka tonoa ia e rātou e huahia ana kia mōhio ai mehemea me whakapono rātou i te te Atua kotahi, kia whiwhi ai rātou i tēnei hua kua kōrerotia nei e ia, me pēhea rānei rātou e whakatō iho ai i te kākano, i te kupu rānei kua kōrerotia nei e ia, kua kōrerotia nei e ia me whakatō e rātou ki roto i ō rātou ngākau; me pēhea rānei rātou e tīmata ai ki te whakamahi i tō rātou whakapono.

2 Ā, ka kī atu a Arami ki a rātou: Nana, kua kī mai koutou tē taea e koutou te koropiko atu i tō koutou Atua nā te mea kua makaia atu koutou i ō koutou whare karakia. Engari nana, ko taku kupu tēnei ki a koutou, mehemea e whakaaro ana koutou tē taea e koutou te koropiko atu ki te Atua, kei te hē rawa koutou, ā, me whakataki koutou i ngā karaipiture; mehemea e whakaaro ana koutou nā ēnā koutou i ako, kāore koutou e mārama ana ki ēnā mea.

3 E maumahara ana rānei koutou i tā koutou pānuitanga i tā Henohi, te poropiti onamata, i kī ai e pā ana ki te inoi me te koropiko?

4 Nā te mea i kī ai ia: He nui tō aroha, E te Atua, nā te mea kua rongo koe i taku inoi, i ahau noa i te koraha; āe rā, i aroha nui koe i taku inoitanga e pā ana ki te hunga ko rātou nei aku hoariri, ā, nāu rātou i tahuri mai ki ahau.

5 Āe rā, E te Atua, i aroha nui mai koe ki ahau i taku inoitanga atu ki a koe i taku pārae; i taku karangatanga ake ki a koe i taku inoi, ā, i rongo mai koe i ahau.

6 Hei āpiti anō, E te Atua, i taku tahuritanga atu ki tōku kāinga i rongo koe i ahau i taku inoi.

7 Ā, i taku tahuritanga atu ki taku rūma, E te Ariki, me taku inoitanga atu ki a koe, i rongo koe i ahau.

8 Āe rā, he nui tō aroha ki āu tamariki i a rātou e karanga ake ana ki a koe, kia rangona ai e koe kaua e te tangata, ā, ka rongo koe i a rātou.

9 Āe rā, E te Atua, kua aroha nui koe ki ahau, ā, i rangona aku karanga i waenganui i ngā whakaminenga.

10 Āe rā, i rongo anō hoki koe i ahau e makaia atu ana, ā, i ahau e whakahāweatia ana e ōku hoariri; āe rā, i rongo koe i aku karanga, ā, i te riri ki aku hoariri, ā, i toro atu koe ki a rātou i runga i tō riri, i runga i te whakangaromanga wawetanga.

11 Ā, i rongo koe i ahau nā ōku whakamamaetanga me tōku ngākau pono; ā, nā tāu Tama koe i aroha nui mai ki ahau, nō reira ka karanga ake au ki a koe i roto i ōku whakamamaetanga katoa, nā te mea kei roto i a koe tōku haringa; nā te mea kua whakatahuritia atu ōu whakawākanga i ahau, nā tāu Tama.

12 Ināianei ā, ka kī atu a Arami ki a rātou: E whakapono ana rānei koutou i aua karaipiture kua tuhituhia e te hunga onamata?

13 Nana, ki te pērā koutou, me matua whakapono koutou ki tā Henohi i kī ai; nā te mea, nana i kī ai ia: Kua whakatahurita atu e koe ōu whakawākanga nā tāu Tama.

14 Nana ināianei, e aku teina, kei te hiahia au ki te pātai atu ki a koutou mehemea kua pānui koutou i ngā karaipiture? Mehemea āe, me pēhea koutou e whakapono kore ki te Tama a te Atua?

15 Nā te mea kāore i tuhituhia ko Henohi anake te mea i kōrero ai mō ēnei mea, engari i kōrero anō a Henoka mō ēnei mea—

16 Nana rā, i kī ai ia: Kei te riri koe, E te Atua, ki tēnei iwi, nā te mea kāore i pai ki a rātou kia mārama ki ōu whakaarohatanga kua whakataua iho ki runga i a rātou nā tāu Tama.

17 Ināianei ā, e aku teina, e kite ana koutou kua whakaatuhia mai tētahi atu poropiti onamata mō te Tama a te Atua, ā, nā te mea kīhai i pai ki te iwi kia mārama ai i ana kupu ka ākina ia e rātou ki te kōhatu.

18 Engari nana, ehara tēnei i te katoa; ehara ēnei anake i ngā mea kua kōrerotia nei e pā ana ki te Tama a te Atua.

19 Nana, i kōrerotia ia e Mohi; āe rā, ā nana, i mairangatia ake tētahi momo i te koraha, nā, ka ora te tangata e titiro atu ai ki reira. Ā, he tokomaha ngā mea i titiro atu ai, ā, i ora ai.

20 Engari he tokoiti noa ngā mea i mōhio ai ki te tikanga o aua mea, ā, nā te pakeketanga o ō rātou ngākau i pēnei ai. Engari he tokomaha ngā mea kīhai i pai ki a rātou te titiro atu nā tō rātou tino pakeketanga, nō reira ka mate rātou. Nā, kāore rātou i whakapono mā reira mahu ai rātou koinā te take kīhai i pai ki a rātou te titiro atu.

21 E aku teina, mehemea kua taea koutou te mahu mā te karawhiu noa atu i ōu karu e mahu ai koutou, kua kore koutou e titiro wawe atu, kua pai kē atu rānei kia whakapakeke i ō koutou ngākau i runga i te whakapono kore, ā, kia māngere, nā konā kāore koutou mō te karawhiu noa atu i ōu koutou karu, kia mate koutou?

22 Ki te pērā, ka tau iho te auē ki runga i a koutou; engari ki te kore e pērā, tēnā karawhiua atu ōu karu, ā, kia tīmata ki te whakapono i te Tama a te Atua, nā, ka haere mai ia ki te hoko i tana iwi, ā, ka mamae ia, ā, ka mate ia hei whakamārie i ō rātou hara; ā, ka ara ake anō ia i te mate, mā konā e whakaputa ai te aranga, kia tū ai ngā tāngata katoa i mua i tōna aroaro, kia whakawākia ai hei te rā whakamutunga, e ai ki ā rātou mahinga.

23 Ināianei ā, e aku teina, e hiahia ana ahau kia whakatōngia iho tēnei kupu i ō koutou ngākau, ā, i a ia e tīmata ana tōna pupuhi, nā, whāngaia e te whakapono. Ā nana, ka meinga ia hei rākau, e tupu ake ana i roto i a koutou ki te oranga tonutanga. Kō reira te Atua tuku ai ki a koutou kia māmā ō koutou pīkaunga, mā roto i te hari o tana Tama. Ā, koinei katoa e taea ana e koutou te mahi ki te hiahia koutou. Āmine.