1 Ināianei ā i pahawa ake, nā, i whiwhi au i tētahi pukapuka i a Amona, te kīngi, e mea ana mēnā ka tukuna atu e au aua mauhere pakanga kua kahakina atu e mātou, nā, māna te pā o Anatipara e tuku ki a mātou.

2 Engari nāku tētahi pukapuka i tuku atu ki te kīngi, e mea ana kua tino mōhio mātou kua taea e ā mātou tauā te muru i te pā o Anatipara; ā, e whakaaro ana he heahea mēnā ka tukuna atu e mātou ērā mauhere mō taua pā, ā, ka tukuna atu anake e mātou ā mātou mauhere i runga i ngā tikanga whakawhitiwhiti.

3 Ā, kāore a Amonoro i whakaae ki taku pukapuka, nā te mea kāore ia i pai ki te whakawhitiwhiti mauhere; nō reira i tīmata ā mātou whakaritenga ki te whakaeke atu ki te pā o Anatipara.

4 Engari i whakarere te iwi o Anatipara i te pā, ā, ka tahuti atu ki ērā atu pā ō rātou, kua riro nei i a rātou, kia whakatūwatawatahia ērā; ā, pēnei ka taka iho te pā o Anatipara ki roto i ō mātou ringaringa.

5 Ā, pēnei ka whakamutua te tau rua ngahuru mā waru o te whakahaeretanga a ngā kaiwhakawā.

6 Ā, i pahawa ake, nā, i te tīmatanga o te tau rua ngahuru mā iwa, i whiwhi mātou i tētahi kawenga ō me tētahi tāpirihanga ki tō mātou tauā, mai i te whenua o Harahemara, mai i te whenua huri noa anō hoki, e ono mano tō rātou tokomahatanga, hāunga rā ngā tama ono tekau a ngā Amona kua haere mai ki te hono atu ki ō rātou teina, ko taku ope rua mano iti. Ināianei ā nana, he kaha mātou, āe rā, he maha ngā ō i kawea mai ai ki a mātou.

7 Ā, i pahawa ake, nā, ka hiahia mātou ki te whawhai i tētahi whawhai ki te tauā kua whakatūria nei ki te tiaki i te pā o Kumeni.

8 Ināianei ā nana, māku e whakaatu nei ki a koe kāore i roa tā mātou whakatutuki i tō mātou hiahia; āe rā, i runga i tō mātou tauā kaha, i runga rānei i tētahi wāhi o tō mātou tauā kaha, i karapoti mātou, i te pō, te pā o Kumeni, i mua tata i te whiwhinga i tētahi kawenga ō ki a rātou.

9 Ā, i pahawa ake, nā, i noho hōpuni mātou huri noa i te pā mō ngā rā maha; engari i moe mātou i runga i ō mātou hoari, me te whakatū kaitiaki, kia kore e taea e ngā Rāmana te whakaeke mai ki runga i a mātou i te pō me te whakamate i a mātou, he maha ngā wā i whai ai rātou kia pērā ai; engari hei ia te wā i pēnei ai ka whakahekea ō rātou toto.

10 Nāwai rā ka tae mai ā rātou ō, whano ka tomo rātou ki roto ki te pā i te pō. Ā, ko mātou nei, ehara i te Rāmana, he Nīwhai kē; nō reira, ka mau mātou ki a rātou me ā rātou ō.

11 Ā, hei aha koa kua aukatia atu ngā Rāmana i tō rātou oranga i runga i tēnei āhuatanga, i te ū tonu tō rātou hiahia ki te pupuri i te pā; nō reira ka meinga hei mea tika kia mau i a mātou ērā ō me te tuku atu i ērā ki Huria, ā, ko ā mātou mauhere ki te whenua o Harahemara.

12 Ā, i pahawa ake, nā, kāore i pahure atu ngā rā maha kātahi ka ngaro haere ngā tūmanako katoa o ngā Rāmana e whiwhi kai ai rātou; nō reira ka tukuna ake e rātou te pā ki ō mātou ringaringa; ā, pēnei kua tutuki mātou i ō mātou rautaki i te rironga mai o te pā Kumeni.

13 Engari i pahawa ake, nā te tini o ā mātou mauhere, nā, hei aha koa te tokomaha o ā mātou tatauranga, i meinga ai mātou kia aro katoa atu tō mātou tauā ki te tiaki i a rātou, ki te whakamate rānei i a rātou.

14 Nana rā, ka whati atu rātou i ngā ope nunui, ā, ka whawhai ki te kōhatu, ki ngā patu hoki, ki ngā mea katoa rānei i taea ai e rātou te hopu i ō rātou ringaringa, nā konā kua neke atu i te rua mano o rātou i whakamatea ai e mātou whai muri iho i tā rātou tukunga mai i a rātou anō hei mauhere pakanga.

15 Nō reira i meinga hei mea tika mō mātou, kia whakamutua ō rātou oranga, kia tiaki rānei i a rātou, e mau hoari ana, tae noa iho ki te whenua o Harahemara; hei āpiti anō, kāore ā mātou ō i kō atu i te mea e tika ana mō tō mātou iwi ake, hei aha koa ērā mea kua murua atu i ngā Rāmana.

16 Ināianei ā, i roto i ērā āhuatanga kakawa, ka meinga tēnei take hei mea tino taumaha ki te whakatakoto whakaaro e pā ana ki ēnei mauhere pakanga; hei aha koa, i whakatau iho mātou kia tukuna iho rātou ki te whenua o Harahemara; nō reira, i kōwhiria e mātou tētahi wāhi o ō mātou tāngata, ā, ka hoatu ki a rātou te tikanga i runga i ā mātou mauhere kia haere iho ki te whenua o Harahemara.

17 Engari i pahawa ake, nā, i hoki mai ratou i te rā whai muri. Ināianei ā nana, kāore mātou i ui atu ki a rātou e pā ana ki ngā mauhere; nana rā, kua huaki mai ngā Rāmana ki runga i a mātou, ā, i hoki mai rātou i te wā pai ki te whakaora i a mātou i te takanga iho ki roto i ō rātou ringaringa. Nana rā, kua tukuna e Amonoro ki a rātou tētahi kawenga ō hou me tētahi ope tāne nunui.

18 Ā, i pahawa ake, nā, ka tae mai aua tāngata i tukuna atu ai e mātou me ngā mauhere i te wā pai hei aukati i a rātou, i te wā whano ka taea mātou e rātou.

19 Engari nana, he nanakia rawa te whawhai i whawhai ai taku ope rua mano ono tekau iti; āe rā, i tokatū moana rātou i te aroaro o ngā Rāmana, ā, whakamatea ana te hunga katoa i tū atu ai ki a rātou.

20 Ā, i te wā whano ka tuohu iho te toenga atu o te tauā i te aroaro o ngā Rāmana, nana, i tokatū moana, ā, i wehi kore aua rua mano ono tekau.

21 Āe rā, ka whakarongo, ā, ka ngohengohe rātou ki ia kupu whakahau i runga i te āhua tino tika rawa atu; āe rā, i rite anō ki tō rātou whakapono te meatanga ki a rātou; ā, i mahara au ki ngā kupu i kōrero ai rātou ki ahau nā ō rātou whaea rātou i whakaako.

22 Ināianei ā nana, nā ēnei tama āku me aua tāngata i kōwhiria ai hei kawe atu i ngā mauhere tēnei wikitōria nui; nā te mea nā rātou ngā Rāmana i hinga ai; nō reira i āia atu rātou ki te pā o Manati.

23 Ā, i pupuri mātou i te pā o Kumeni, ā, kāore i whakangaromia katoatia ki te hoari; hei aha koa, he tokomaha o mātou i mate ai.

24 Ā, i pahawa ake, nā, whai muri iho i tā ngā Rāmana tahutitanga atu, ka whakahau au i taua wā tonu kia haria atu ngā tāngata kua taotūngia i waenganui i ngā mate, ā, ka meatia kia tākaia ō rātou tūnga.

25 Ā, i pahawa ake, nā, e rua rau i aku rua mano, ono tekau, kua hemo i te toto kore; hei aha koa, i runga i te painga o te Atua me tō mātou mīharo, ā, i runga hoki i te koa o te tauā katoa, kāore i mate tētahi wairua o rātou; āe rā, kāore hoki tētahi wairua i wenganui i a rātou kāore nei ōna tūnga maha.

26 Ināianei ā, he mea whakamīharo ki tā mātou tauā katoa tā rātou tiakanga, āe rā, kua tiakina rātou ahakoa kua whakamatea ō rātou tuakana kotahi mano. Ā, e tika ana tā mātou kī ake, nā te mana whakamīharo o te Atua, nā tō rātou whakapono nui i taua mea kua whakaakona hei whakaponotanga mā rātou—arā he Atua tika anō, ā, ko te tangata kāore nei e rangirua, nā, ka tiakina e tōna mana whakamīharo.

27 Nā, koinei te whakapono o te hunga kua kōrerotia nei e ahau; he taiohi rātou, he tokatū ō rātou hinengaro, ā, ka whakawhirinaki tonu rātou ki te Atua.

28 Ināianei ā i pahawa ake, nā, whai muri iho i tā mātou tiaki i ō mātou tāngata kua tūnga, ā, i tā mātou tanu i ō mātou mate me ngā mate hoki ō ngā Rāmana, he tokomaha rātou, nana, ka uiui atu mātou i a Kire e pā ana ki ngā mauhere kātahi anō ka haria tahitia iho ki te whenua o Harahemara.

29 Nā, ko Kire te rangatira nui i runga i te ope kua whakataua hei tiaki i rātou tae iho ana ki te whenua.

30 Ināianei ā, koinei ngā kupu i kōrero mai ai a Kire ki ahau: Nana, i tīmata tā mātou haere iho ki te whenua o Harahemara me ā mātou mauhere. Ā, i pahawa ake, nā, i tūtaki mātou i ngā tūtei o ō tātou tauā, kua tonoa atu nei ki te mātakitaki i te hōpuni o ngā Rāmana.

31 Ā, ka karanga mai rātou ki mātou, e mea ana—Nana, kei te hīkoi atu ngā tauā o ngā Rāmana whakatepā o Kumeni; ā nana, ka taka iho rātou ki runga i a rātou, āe rā, ka whakangaromia tō tātou iwi.

32 Ā, i pahawa ake, nā, ka rongo ā mātou mauhere i ā rātou karanga, nā konā ka māia haere rātou; ā, ka ara ake rātou i runga i te tutū ki a mātou.

33 Ā, i pahawa ake nā tā rātou haututūtanga ka meatia e mātou kia taka iho ō mātou hoari ki runga i a rātou. Ā, i pahawa ake, nā, ka rere tōpū mai rātou ki runga i ō mātou hoari, nā konei, he tokomaha ake o rātou i whakamatea ai; ā, ka whatia atu, ā, ka tahuti atu i a mātou.

34 Ā nana, i te wā i tahuti atu rātou, ā, kāore nei i taea rātou e mātou, ka hohoro atu tā mātou hīkoi atu ki te pā o Kumeni; ā nana, i tae tika atu mātou ki reira kia āwhinatia ai rātou i te tiakanga o te pā.

35 Ā nana, kua whakaputaina anōtia mātou i ngā ringaringa o ō tātou hoariri. Ā, kia whakapaingia te ingoa o tō tātou Atua; nana rā, nāna mātou i tiaki; āe rā, nāna tēnei mea nui mō tātou.

36 Nā, i pahawa ake i tāku, i tā Heramana, rongonga atu i ēnei kupu a Kire, i kī katoa au i te hari nui nā te pai o te Atua i tana tiakanga i a mātou, ki kore katoa mātou e ngaro; āe rā, e tūmanako ana ahau kua tomo atu ērā wairua o te hunga kua whakamatea ki roto i te okiokinga o tō rātou Atua.