1 Ināianei ā, koinei ngā kupu a Amona ki ana teina, e mea ana tēnei: E aku teina tūturu me aku teina, nana ko taku kupu tēnei ki a koutou, anō tō tātou whaitake kia hari; nā te mea kua taea e tātou te whakaaro i te tīmatanga o tā tātou wehenga i te whenua o Harahemara, nā, ka pēnei te nui o ana manaakitanga nui ki a tātou?

2 Ināianei ā, kei te ui atu au, he aha ngā manaakitanga nui nāna nei i whakatau ki runga i a tātou? E taea ana rānei e koutou te kōrero?

3 Nana, ka whakautu au mō koutou; nā te mea, i te pōuritanga ō tātou tuākana, ngā Rāmana, āe rā, i roto pū anō i te tawhā pōuri rawa atu, engari nana, tokohia o rātou kua kumea mai nei kia tirohia ai te mārama miharo o te Atua! Ā, koinei te manaakitanga kua whakataua iho ki runga i a tātou, nā konā kua meatia tātou hei taputapu i ngā ringaringa o te Atua kia whakaputa ake i tēnei mahi nui.

4 Nana, kei te hari ngā mea manomano o rātou, ā, kua kumea mai ki roto i te kāhui a te Atua.

5 Nana, i te pakari te whīra, ā, kua manaakitia koutou, nā te mea i tīhoka iho te toronaihi, ā, i kokoti ai i runga i tō kaha, āe rā, i mahi koutou mō te roanga ake o te rā; ā, tirohia te maha o āu paihere! Ā, ka kohikohia ērā ki roto i ngā pātaka, kia kore ai e moumouria.

6 Āe rā, e kore ērā e haua iho e te tūpuhi hei te rā whakamutunga; āe rā, e kore rānei ērā e hutia ake e ngā āwhiowhio; engari ka whakakotahitia ērā i tō ērā wāhi ina tae mai te tūpuhi, nā, tē taea e te tūpuhi te wero atu ki ērā; āe rā, e kore rānei ērā e āia atu e ngā hau pūkeri ki ngā wāhi e pai ai ki te hoariri hei kawenga atu.

7 Engari nana, kei roto ērā i ngā ringaringa o te Ariki o te kokotinga, ā, nōna ērā; ā, māna ērā e whakaara ake hei te rā whakamutunga.

8 Whakapaingia te ingoa o tō tātou Atua; tukuna tātou kia waiata ai i tōna whakamoemiti, āe rā, tukuna tātou kia whakamoemiti ai i tōna ingoa tapu, nā te mea e mahi tika ana ia mō āke tonu atu.

9 Nā te mea me i kore tātou i haere mai ai i waho i te whenua o Harahemara, ēnei ō tātou tino tuākana aroha, kua arohaina nuitia tātou, kua kino tonu te ngau o tō rātou mauāhara ki a tātou, āe rā, kua tauhou tonu anō hoki rātou ki te Atua.

10 Ā, i pahawa ake, nā, i te kōrerotanga o Amona i ēnei kupu, ka kohete tōna tuakana a Arona i a ia, e mea ana: E Amona, e wehi ana au kei kahakina atu koe e tō hari ki te whakamanamana.

11 Engari ka kī atu a Amona ki a ia: Kāore au i te whakamanamana ki tōku ake kaha, kāore rānei ki tōku ake mātauranga; engari nana, kua kī tōku hari, āe rā, e pūrena ana tōku ngākau i te hari, ā, ka hari au i tōku Atua.

12 Āe rā, e mōhio ana au he korekore noa iho au; he ngoikore au e hāngai ana ki tōku kaha; nō reira e kore au e whakamanamana mōku ake anō, engari ka whakamanamana au mō tōku Atua; āe rā, nana, he maha ngā merekara nunui i mahia ai e tātou i tēnei whenua, nō konā tātou whakawhetai ai i tōna ingoa mō āke tonu atu.

13 Nana, e hia manomano o ō tātou tuākana kua wetekina atu i ngā mamaetanga o te ao rēwera; ā, kua meinga rātou kia waiata i te aroha o te hokonga, ā, ko tēnei nā te kaha o tana kupu kei roto nei i a tātou, nō reira kāore rānei tātou e whaitake ana kia hari?

14 Āe rā, e whaitake ana tātou kia whakawhetai atu ki a ia mō āke tonu atu, nā te mea ko ia te Atua Tiketike Rawa, ā, kua wetekina ō tātou tuākana i ngā mekameka o te ao rēwera.

15 Āe rā, i te taiāwhiotia rātou ki te pōuritanga me te whakangaromanga mau tonu; engari nana, nāna rātou i kawe mai ki roto i te māramatanga mau tonu, āe rā, ki roto i te whakoranga mau tonu; ā, i te taiāwhiotia ki tōna aroha nunui tē taea te whakataurite; āe rā, kua meinga tātou hei taputapu i ōna ringaringa o te meatanga i ngā mahi whakamīharo nunui.

16 Nō reira, tukuna tātou kia whakakorōria, āe rā, ka whakakorōria tātou i te Ariki; āe rā, ka hari tātou, nā te mea kua kī tō tātou hari; āe rā, ka whakawhetai atu tātou i tō tātou Atua mō āke tonu atu. Nana, ko wai e nui rawa atu ana tana whakakorōria atu i te Ariki? Āe rā, ko wai e nui rawa atu ana tana kōrero mō tōna mana nui, mō tōna aroha, mō tana manawaroa ki ngā tamariki a te tangata? Nana, ko taku kupu tēnei ki a koutou, kāore e taea ana e ahau te kōrero i te wāhi iti rawa e rongo nei ahau.

17 Ko wai e taea te whakaaro ka tino nui te whakaaroha o tō tātou Atua hei kapo ake i a tātou mai i tō tātou āhuatanga weriweri, hara, poke?

18 Nana, i haere atu tātou i runga pū anō i te riri, i runga i te whakawehi kia whakangaromia ai tana hāhi.

19 Nā konā, he aha ia i kore ai e tuku i a tātou ki tētahi whakangaromanga weriweri, āe rā, he aha ia i kore ai e tuku kia taka iho ai te hoari o te tika ki runga i a tātou me te tuku anō i a tātou ki te rāwakiwaki tonutanga?

20 Auē, ko tōku wairua, e tata tahuti atu ana i te whakaaro. Nana, kīhai ia i whakahaere i tōna tika ki runga i a tātou, engari i runga i tōna whakaaroha nui kua kawea tātou ki tua atu i te tawhā mutunga kore o te mate me te pōuri, tae atu ana ki te whakaoranga o ō tātou wairua.

21 Ināianei ā nana, e aku teina, ko wai te tangata ngākau māori e mōhio ana ki ēnei mea? Ko taku kupu tēnei ki a koutou, kāore he tangata e mōhio ana ki ēnei mea, hāunga ko te hunga rīpenetā.

22 Āe rā, ko te tangata e rīpenetā ana, ā, e whakahaere ana i tana whakapono me te whakaputa i ngā mahinga pai, me te inoi tonu atu tē ai e mutu—kua hoatu ngā mea ngaro a te Atua ki te hunga pērā; āe rā, ka hoatu ki te hunga pērā kia whakakitea atu ngā mea kīhai rawa i whakakitea; āe rā, ka hoatu ki te hunga pērā kia kumea mai ngā wairua manomano ki te rīpenetātanga, pēnei i tana homai ki a tātou kia kumea ai ēnei ō tātou tuākana ki te rīpenetātanga.

23 Nā, kei te mahara koutou, e aku teina, nā, i kī atu tātou ki ā tātou teina i te whenua o Harahemara, ka haere ake tātou ki te whenua o Nīwhai, kia kauhau atu ai ki ā tātou tuākana, ngā Rāmana, ā, i kataina kinotia tātou?

24 Nā, i kī mai rātou ki a tātou: E whakapono ana rānei koutou ka taea e koutou te kukume mai i ngā Rāmana ki te mātauranga o te tika? E whakapono ana rānei koutou e taea ana e koutou ngā Rāmana te whakapakepake mō te hē o ngā whakarerenga iho a ō rātou tūpuna, nā te mea he iwi kakī mārō rātou; e āhuareka ana ō rātou ngākau ki te whakahekenga toto; kua whakapaua ō rātou rā i runga i te hara kino rawa atu; ko ō rātou huarahi ngā huarahi o tētahi kaihara mai i te tīmatanga? Nā, e aku teina, e mahara ana koutou koinei tā rātou i kōrero ai.

25 Ā, waihoki i kī anō rātou: Tukuna tātou kia hāpai patu ki a rātou, kia whakangaro tātou i a rātou me tō rātou kino i te whenua, kei popokina tātou, ā, kei whakangaromia tātou anō e rātou.

26 Engari nana, e aku teina aroha, kāore tātou i haere mai ki roto i te koraha i runga i te whakaaro kia whakangaromia ai ō tātou tuākana, engari i runga i te whakaaro me kore pea tātou e whakaora i ētahi o ō rātou wairua.

27 Nā, i ō tātou ngākau e pēhia ana, ā, whano tātou ka hoki anō, nana, i whakaāiotia tātou e te Ariki, ā, ka mea: Haere atu ki waenganui i ō tuākana, ngā Rāmana, ā, kia pīkauria ōu whakamamaetanga i runga i te manawaroa, ā, ka tuku waimārietanga au ki a koutou.

28 Ināianei ā nana, kua haere mai tātou, ā, kua haere atu tātou ki waenganui i a rātou; ā, kua manawaroa tātou i ō tātou whakamamaetanga, ā, kua kaiponuhia ngā mea katoa ki a tātou; āe rā, kua haere atu tātou ki tēnā whare, ki tēnā whare, e whakawhirinaki ana ki ngā atawhainga o te ao—kāore i runga i ngā atawhainga o te ao anake engari i runga i ngā atawhainga o te Atua.

29 Ā, kua tomo atu tātou ki roto i ō rātou whare, ā, kua whakaakona rātou, ā, kua whakaakona rātou e tātou i roto i ngā tiriti; āe rā, kua whakaakona rātou e tātou i runga i ō rātou puke; ā, kua tomo atu anō tātou ki roto pū anō i ō rātou temepara me ō rātou whare karakia ki te whakaako i a rātou; ā, kua makaia atu tātou, kua whakatoingia tātou, ā, kua tuhaina tātou, ā, kua pākia ō tātou pāpāringa; ā, kua ākina tātou ki te kōhatu, ā, kua kahakina atu, ā, kua herea ki ngā taura kaha, ā, kua makaia ki roto i te whareherehere; ā, mā roto i te mana me te mātauranga o te Atua kua whakaputaina tātou anō.

30 Ā, kua rongo tātou i nga whakamamaetanga katoa o ia āhua, o ia āhua, ā, ko tēnei katoa, me kore pea tātou e riro ai hei take e whakaorangia ai tētahi wairua; ā, i whakapono tātou ka kī ake tō tātou hari mēnā rānei kua taea e tātou hei take e whakaorangia ai ētahi.

31 Nana ināianei, ka taea e tātou te titiro atu me te kite anō i ngā hua o ō tātou mahinga; ā, he ruarua ērā? Ko taku kupu tēnei ki a koutou, Kāo, he maha ērā; āe rā, e taea ana e tātou te whakaatu atu i tō rātou tapahitanga, nā tō rātou aroha ki ō rātou tuākana, ā, ki a tātou anō hoki.

32 Nana rā, he pai ake ki a rātou kia tuku iho i ō rātou oranga i te muru i te oranga o tō rātou hoariri; ā, kua tanumia hōhonutia e rātou ā rātou rākau whawhai o te pakanga ki roto i te whenua, nā tō rātou aroha ki ō rātou tuākana.

33 Ināianei ā nana ko taku kupu tēnei ki a koutou, he aroha pēnei te nui i runga i te whenua katoa? Nana, ko taku kupu tēnei ki a koutou, Kāo, kāore anō, i roto pū anō rānei i waenganui i ngā Nīwhai.

34 Nana rā, ka hāpai patu rātou ki ō rātou tuākana; kāore rātou e tuku kia patua ai rātou. Engari nana, tokohia o ēnei mea i whakatakotohia iho ō rātou oranga; ā, e mōhio ana tātou kua haere atu rātou ki tō rātou Atua, nā tō rātou aroha me tō rātou mauāhara ki te hara.

35 Nā, kāore rānei ō tātou take kia hari? Āe rā, ko taku kupu tēnei ki a koutou, kāore he tangata i mua i whaitake nui pēnei i a tātou, mai i te tīmatanga rā anō o te ao; āe rā, kua kahakina atu tōku hari, tae atu ana ki te whakamanamana i tōku Atua; nā te mea kei a ia te mana katoa, te mātauranga katoa me te māramatanga katoa; e mōhio ana ia ki ngā mea katoa, ā, he Mea tino aroha nui ia, tae atu ana ki te whakaoranga, ki te hunga e rīpenetā ai me te whakapono ki runga i tōna ingoa.

36 Nā, mehemea he whakamanamana tēnei, ka whakamanamana ahau; nā te mea koinei tōku oranga me tōku māramatanga, ko tōku haringa me tōku whakaoranga me tōku hokonga mai i te auē mutunga kore. Āe rā, kia whakapaingia te ingoa o tōku Atua, kua whaiwhakaaro nei ki tēnei iwi, ko rātou nei tētahi manga o te rākau o Iharaira, ā, kua ngaro atu nei i tōna pūtake i tētahi whenua kē; āe rā, ko tāku, kia whakapaingia te ingoa o tōku Atua, kua whaiwhakaaro nei ia ki a tātou, ngā tangata kaewa i tētahi whenua kē.

37 Nā, e aku teina, e kite ana tātou i te Atua e whaiwhakaaro ana ki ngā iwi katoa, ahakoa he aha te whenua e noho ai rātou; āe rā, e tatauria ana e ia tana iwi, ā, kei runga te aroha o tōna ate i runga i te ao katoa. Nā, koinei tōku hari me tōku whakawhetai nui; āe rā, māku tonu tōku Atua e whakawhetai mō āke tonu atu. Āmine.