1 Nana e aku teina aroha, e kitea ana kua tukuna au kia haere mai ki a koutou, nō reira ka ngana au ki te kōrero atu ki a koutou i roto i tōku reo; āe rā, mā tōku māngai ake, e kitea ana koinei te wā tuatahi kua kōrero atu au ki a koutou mā ngā kupu o tōku māngai, nā te mea i puritia katoatia au ki te nohoanga-whakawā, nā te nui o aku mahi kīhai i taea e au te haere mai ki a koutou.

2 Ā, kua kore i taea e au te haere mai ināianei i tēnei wā me i kore i hoatu te nohoanga-whakawā ki tētahi atu, hei whakahaere mōku; ā, kua tukuna au e te Ariki i runga i te whakaaroha nui kia haere mai ai au ki a koutou.

3 Ā nana, kua haere mai au i runga i te tūmanako nui me te hiahia nui kia kite ai au kua whakaiti koutou i a koutou anō i mua i te aroaro o te Atua, me te mau tonu ā koutou inoi ki tōna aroha, kia kite au i a koutou e hē kore ana i tōna aroaro, kia kite ai au, nā, kāore i pā atu tētahi āhuatanga weriweri pērā i ā tātou teina i Harahemara.

4 Engari kia whakapaingia te ingoa o te Atua, mōna i homai ki ahau kia mōhio ai, āe rā, mōna i homai ki ahau te hari nui whakaharahara o te mōhioranga kia whakapūmauhia anōtia rātou i te huarahi o tōna tika.

5 Ā, e tūmanako ana ahau, e ai ki te Wairua o te Atua kei roto i ahau, kia hari anō hoki au mō koutou; hei aha koa kāore au i te hiahia kia tau mai tōku hari mō koutou i runga i ngā whakamamaetanga me ngā pōuritanga nui kua pā mai ki ahau mō ngā teina i Harahemara, nana rā, kua tau mai tōku hari mō rātou nō muri iho i tōku kaunga i roto i ngā whakamamaetanga me ngā pōuritanga nui.

6 Engari nana, e tūmanako ana ahau, nā, kāore koutou i tētahi āhuatanga o te tino whakapono kore pērā i ā koutou teina; e tūmanako ana ahau, nā, kāore koutou i neke ake ō koutou ngākau i runga i te whakapehapeha o ō koutou ngākau; āe rā, e tūmanako ana ahau, nā, kāore koutou e whakatau iho ana i ō koutou ngākau ki runga i ngā taonga me ngā mea tekateka o tēnei ao; āe rā, e tūmanako ana ahau, nā, kāore koutou e koropiko ana ki ngā whakapakoko, engari e koropiko ana ki te Atua pono e ora ana, me te titiro whakamua koutou ki te murunga i ō koutou hara, i runga i te whakapono mutunga kore, koia e puta mai ai.

7 Nana rā, ko taku kupu tēnei ki a koutou he maha ngā mea e puta mai ai; ā nana, kei konā tētahi mea e nui kē atu tōna whakahirahiratanga i ērā mea katoa—nana rā, kāore i tawhiti te wā e ora nei te Kaihoko, ā, e haere mai nei ki waenganui i tōna iwi.

8 Nana, kāore au e kī ana ka haere mai ia ki waenganui i a tātou a te wā e noho ana ia i tōna tapenākara matemate; nana rā, kāore te Wairua i kī mai ai ki ahau ka pēnei te āhua. Nā, kāore au i te mōhio e pā ana ki tēnei mea; engari e mōhio ana au ki tēnei, nā, he mana tō te Ariki te Atua ki te mahi i ngā mea katoa e rite nei ki tana kupu.

9 Engari nana, kua kōrero mai te Wairua i tēnei ki ahau, e mea ana: Karangahia atu tēnei iwi, e mea ana—E rīpenetā koutou, me te whakarite i te huarahi o te Ariki, me te hīkoi i ōna ara, koia he mea torotika; nana rā, kua tata mai nei te kīngitanga o te rangi, ā, ka haere mai te Tama a te Atua ki runga i te mata o te whenua.

10 Ā nana, ka whānau mai ia i a Mere, ki Hiruharama ko te whenua ia o ō tātou tūpuna, koia tētahi puhi, he oko tongarerewa, ā, he oko kōwhiria, ka taumarutia ia, ā, ka whakahapūtia e te mana o te Wairua Tapu, me te whānau mai i tētahi tama, āe rā, ko te Tama a te Atua pū anō.

11 Ā, ka haere whakamua atu ia, e mamae ana i ngā whakamamaetanga me ngā whakawainga o ia āhua, o ia āhua; ā, ka pēnei kia tutuki ai te kupu e mea ana māna ngā mamae me ngā māuiuitanga o tana iwi e tango.

12 Ā, māna e waha te mate, kia wewete ai ia i ngā hereherenga o te mate e herea nei tōna iwi; ā, māna e waha ō rātou ngoikoretanga, kia kī ai tōna ate i te whakaaroha, i runga i tō te kikokiko, kia mōhio ai ia e ai ki tō te kikokiko me pēhea e āwhina ai i tōna iwi e rite ana ki ō rātou ngoikoretanga.

13 Nā, e mōhio ana te Wairua ki ngā mea katoa; hei aha koa ka mamae te Tama a te Atua ki tō te kikokiko ritenga kia waha ai ia i ngā hara o tōna iwi, kia mukua e ia ō rātou hara e rite ana ki te kaha o tana whakaputanga; ināianei ā nana, koinei te whakaaturanga kei roto nei i ahau.

14 Nā, ko taku kupu tēnei ki a koutou me rīpenetā koutou, ā, me whānau mai anō; nā te mea e mea ana te Wairua ki te kore koutou e whānau mai anō tē taea e koutou te whiwhi i te kīngitanga o te rangi; nō reira haere mai kia rumakina ai ki te rīpenetātanga, kia horoia ai koutou i ō koutou hara, kia whai whakapono koutou i runga i te Reme a te Atua, ko ia e tango atu ana i ngā hara o te ao, ko ia e kaha ana ki te whakaora me te whakamā i ngā hē katoa.

15 Āe rā, ko taku kupu tēnei ki a koutou, haere mai, kei wehi hoki, ā, me whakataha atu i ia hara whakaeke tata katoa, e herea iho nei koutou ki te whakangaromanga, āe rā, haere mai, haere atu, me te whakaatu atu ki tō koutou Atua e hiahia ana koutou ki te rīpenetā i ō koutou hara me te uru atu ki roto i tētahi kawenata ki a ia ki te pupuri i āna whakahaunga, me te whakaatu atu ki a ia i tēnei rā mā te tapokotanga iho i ngā wai o te rumakitanga.

16 Ā, ko te mea e mahi pēnei ai, me te pupuri i ngā whakahaunga a te Atua mai i tēnei wā haere ake nei, ko taua mea anō e mahara ai ki taku kupu tēnei ki a ia, āe rā, ka mahara ia kua kī atu au ki a ia, ka whiwhi ia i te oranga tonutanga, e ai ki te whakaaturanga o te Wairua Tapu, e whakaatuhia mai nei i roto i ahau.

17 Ināianei ā, e aku teina aroha, e whakapono ana koutou ki ēnei mea? Nana, ko taku kupu tēnei ki a koutou, āe rā, e mōhio ana ahau kei te whakapono koutou ki ēnei mea; ā, nā te whakakitenga a te Wairua kei roto nei i ahau te huarahi e mōhio ai au kei te whakapono koutou ki ēnei mea. Ināianei ā, nā te mea he kaha tō koutou whakapono e pā ana ki tērā, āe rā, e pā ana ki ngā mea kua kōrerotia e au, he nui tōku hari.

18 Nā te mea he rite ki tāku i kī atu ai ki a koutou mai i te tīmatanga, nā, he nui tōku manako kāore koutou i te āhuatanga weriweri pērā i ā koutou teina, waihoki, kua kite au kua ea ōku hiahia.

19 Nā te mea e kite ana ahau kei ngā ara o te tika koutou; e kite ana ahau kei te ara koutou e ārahina atu ana ki te kīngitanga o te Atua; āe rā, e kite ana ahau kei te whakatōtika koutou i ōna ara.

20 E kite ana ahau kua whakamōhiotia atu ki a koutou, mā te whakaaturanga o te kupu, nā, tē taea e ia te hīkoi i ngā ara kōpikopiko; kāore rānei ia e kōtiti atu i tāna i kī ai; kāore rānei ōna ātārangi o te tahuri mai i te matau ki te mauī, mai i ngā mea tika rānei ki ngā mea hē; nō reira, he porowhita kotahi tōna huarahi.

21 Ā, kāore ia e noho ana i ngā temepara tapu kore; kāore rānei e taea ana e te pokenga, e ngā mea mā kore rānei te whakawhiwhia ki roto i te kīngitanga o te Atua; nō reira ko taku kupu tēnei ki a koutou ka tae mai te wā, āe rā, hei te rā whakamutunga, nā, ka noho tonu taua tangata e poke ana i roto i tōna pokenga.

22 Ināianei ā e aku teina aroha, kua kōrero atu au i ēnei mea ki a koutou kia whakaoho au i a koutou ki tētahi whakaarotanga ki tō koutou haepapa ki te Atua, kia hīkoi hē kore koutou i mua i tōna aroaro, kia hīkoi koutou i runga i te ritenga tapu o te Atua, ki te mea kua whakaaengia nei koutou.

23 Ināianei ā, e hiahia ana ahau kia māhaki koutou, ā, kia ngohengohe, ā, kia ngāwari; kia ngāwari ki tā te kaitonotono; e kī ana i te manawanui me te manawaroa; e pūhoi ana ki te riri i roto i ngā mea katoa; e ū ana ki te pupuri i ngā whakahaunga a te Atua i ngā wā katoa; e inoi atu ana mō ngā mea katoa e hapa ana koutou, ā-wairua mai, ā-tīnana mai; e whakahokia ana ngā whakawhetai ki te Atua mō ngā mea katoa e whiwhi nei koutou.

24 Me whakaaro iho anō kia whai whakapono koutou, kia whai tūmanako, ā, kia whai aroha kātahi koutou ka hua tonu i ngā mahinga pai.

25 Ā, mā te Ariki koutou e manaaki, me te pupuri i ō koutou kākahu kia koha kore, kia kūmea iho koutou i te mutunga kia noho iho me Aperahama, me Īhaka, me Hākopa anō hoki, me ngā poropiti tapu anō hoki i ora ai mai i te orokotīmatanga rā anō o te ao, e koha kore ana ō koutou kākahu pērā i ō rātou kākahu e koha kore ana, i roto i te kīngitanga o te rangi e kore anō e puta ki waho.

26 Ināianei ā e aku teina aroha, kua kōrero atu au i ēnei kupu ki a koutou e rite ana ki te Wairua e whakaatuhia ana i roto i ahau; ā, e hari nui ana tōku wairua, nā tō koutou tino ū me tō koutou whakarongo ki taku kupu.

27 Ināianei ā, kia tau te rangimārie o te Atua ki runga i a koutou, ā, ki runga anō i ō koutou whare me ō koutou whenua, ā, ki runga anō i ā koutou kāhui o ia tū, o ia tū, ā, ki runga i ngā mea katoa kei a koutou, ā koutou wahine me ā koutou tamariki, e rite ana ki tō koutou whakapono me ā koutou mahinga pai, mai i tēnei wā haere ake nei mō āke tonu atu.