1 Ā, i pahawa ake, nā, ka whakamutu tā rātou, ā, ka neke atu rātou i a rātou. Ā, ka kī atu a Moronai ki a Herahemena: Nana, e Herahemena, kāore ō mātou hiahia kia tū ai hei tāngata whakaheke toto. E mōhio ana koe kei ō mātou ringaringa koutou, heoi, kāore mātou i te hiahia ki te patu i a koutou.

2 Nana, kāore mātou i haere mai ki te whawhai ki a koutou kia whakaheke iho ai i ō koutou toto mō te mana; kāore rānei mātou e hiahia ana kia tōia iho tētahi ki raro i te ioka o te hereheretanga. Engari koinei te pūtake pū anō nāna nei koutou i tō mai ki te pakanga ki a mātou; āe rā, e riri ana koutou ki a mātou nā tō mātou whakapono.

3 Engari, e kite ana koutou kei a mātou te Ariki; ā, e kite ana koutou nāna nei koutou i tuku mai ki ō mātou ringaringa. Ināianei ā, e hiahia ana au kia mārama ai koutou kua pēneitia ki a mātou nā tō mātou hāhi me tō mātou whakapono i te Karaiti. Ināianei ā, e kite ana koutou tē taea e koutou te whakangaro i tō mātou whakapono.

4 Nā, e kite ana koutou koinei te whakapono tūturu o te Atua; āe rā, e kite ana koutou ka tautoko te Atua, ka puritia, ā, ka tiaki i a mātou, mehemea ka ū mātou ki a ia, ki tō mātou whakapono, me tō mātou hāhi; ā, kua kore rawa te Atua e tuku kia whakangaromia ai mātou ki te kore mātou e taka iho ki te hē me te whakakore i tō mātou whakapono.

5 Ināianei ā, e Herahemena, kei te whakahau au ki a koe, i runga i te ingoa o taua Atua kaha-rawa, nāna nei ō mātou ringa i whakakaha nā konā kua whaimana mātou ki runga i a koutou, i runga i tō mātou whakapono, i runga i tō mātou hāhi, ā, i runga i ō mātou ritenga karakia, me tō mātou hāhi, ā, i runga i te tautoko tapu o ā mātou hoawāhine me ā mātou tamariki, nā te herekoretanga e herea nei mātou ki ō mātou māra me tō mātou whenua; āe rā, i runga anō hoki i te pupuritanga i te kupu tapu a te Atua, nāna nei tō mātou haringa katoa; me ngā mea katoa e tino arohaina nei e mātou—

6 Āe rā, ehara tēnei i te katoa; kei te whakahau au ki a koutou i runga i ngā hiahia katoa e hiahia nā koutou ki te ora, kia tukuna mai ā koutou rākau whawhai ki a mātou, ā, e kore nei mātou e whai i ō koutou toto, engari ka tohua ō koutou oranga e mātou, mehemea ka haere koutou i runga i tō koutou haere, ā, kia kaua e haere mai anō ki te pakanga ki a mātou.

7 Ināianei ā, ki te kore koutou e pēneitia, nana, kei ō mātou ringaringa koutou, māku āku tāngata e whakahau kia taka iho ki runga i a koutou, me te hahau iho i ngā tūnga o te mate ki runga i ō koutou tīnana, kia mate moa ai koutou; kātahi ka kite tātou mā wai te mana i runga i tēnei iwi; āe rā, ka kite tātou ko wai ka kukume iho ki roto i te hereheretanga.

8 Ā, ināianei ā, nā, i te rongonga a Herahemena i ēnei kōrero, nā, ka haere mai ia ki mua, ā, ka tukuna mai tana hoari me tana hemita, me tana kōpere ki roto i ngā ringaringa o Moronai, ā, ka kī atu ki a ia: Nana, anei ā mātou rākau whawhai; ka tukuna atu ēnā ki a koutou, engari e kore nei mātou e tuku i a mātou anō kia tangohia ake ki runga i a mātou tētahi oati ki a koutou, e mōhio nei mātou ka whatia e mātou, me ā mātou tamariki anō hoki; engari tangohia atu ā mātou rākau whawhai, ā, tukuna mātou kia wehe atu ki roto i te koraha; ki te kore ka puritia ā mātou hoari, ā, ka mate mātou, ka wikitōria rānei.

9 Nana, ehara mātou nō tō koutou whakapono; kāore mātou e whakapono ana nā te Atua mātou i tuku i ō koutou ringaringa; engari e whakapono ana mātou nā tō koutou tinihanga koutou i ora ai i ā mātou hoari. Nana, nā ō koutou ārai uma me ō koutou puapua koutou i ora ai.

10 Ināianei ā, i te whakakapinga o Herahemena i ēnei kupu, ka whakahokia e Moronai te hoari me ngā rākau whawhai, kua whakawhiwhia nei e ia, ki a Herahemena, e mea ana: Nana, ka whakamutua tēnei whawhai.

11 Nā, kāore e āhei ana i a au te whakahoki i ngā kupu katoa kua kōrerotia nei e ahau, nō reira e ora ana te Ariki, e kore nei koutou e wehe atu ki te kore koutou e wehe atu i runga i te oati kia kaua nei koutou e hoki mai anō ki te whawhai ki a mātou. Nā, i te mea kei ō mātou ringaringa koutou, ka maringi iho ō koutou toto i mātou ki runga i te whenua, ka tuohu iho rānei koutou ki ngā tikanga kua tāpaea atu nei e ahau.

12 Ināianei ā, i te wā i kōrero ai a Moronai i ēnei kupu, ka tīkina mai anō e Herahemena tana hoari, ā, i te riri ia ki a Moronai, ā, ka kōkiri atu ia kia patu ai i a Moronai; engari i a ia e hāpai ake ana i tana hoari, nana, ka haua iho tēnā ki te whenua e tētahi o ngā hōia a Moronai, ā, ka pakaru iho i te taha o te kakau; ā, nāna hoki i tapahi iho tōna kiri angaanga, ā, ka taka iho ki te papa. Ā, ka hoki atu a Herahemena i tō rātou aroaro ki waenganui i ana hōia.

13 Ā, i pahawa ake, nā, ko te hōia i tū tata mai nei, nāna nei te kiri angaanga o Herahemena i tapahi iho, ka tīkina ake te kiri angaanga i te papa mā ōna huruhuru, ā, ka whakatakotoria ki te pito o tana hoari, ā, ka torona atu ki a rātou, e mea ana ki a rātou i runga i te reo kaha:

14 I te mea kua taka iho tēnei kiri angaanga ki te papa, koia te kiri angaanga o tō koutou rangatira, ka pērā anō tā koutou takanga iho ki te kore koutou e tuku mai i ā koutou rākau whawhai me te wehe atu i runga i tētahi kawenata maungārongo.

15 Nā, he tokomaha rātou, i te wā i kite atu i te kiri angaanga i runga i te hoari, ka pākia e te wehi; ā, he tokomaha rātou i haere mai ai, ā, ka makaia iho ā rātou rākau whawhai ki ngā waewae o Moronai, ā, ka uru atu ki tētahi kawenata maungārongo. Ā, ka tukuna e rātou te hunga katoa i uru ai ki roto i tētahi kawenata kia wehe atu ai ki roto i te koraha.

16 Nā, i pahawa ake, nā, i te tino pukuriri a Herahemena, ā, nāna te toenga atu o ngā hōia i whakaohooho ake ki te riri, ki te whawhai kaha atu ki ngā Nīwhai.

17 Ināianei ā, i riri a Moronai, nā te taikaha o ngā Rāmana; nō reira ka whakahau ia i tana iwi kia taka iho ki runga i a rātou me te whakamate i a rātou. Ā, i pahawa ake, nā, ka tīmata tā rātou whakamate i a rātou; āe rā, ka whawhai ngā Rāmana ki ā rātou hoari i runga i tō rātou kaha.

18 Engari nana, i te pahore ō rātou kiri tahanga me ō rātou māhunga pākira ki ngā hoari koi a ngā Nīwhai; āe rā, nana, i werohia rātou, ā, i patua rātou, āe rā, i hinga tino wawe rawa atu i mua i ngā hoari a ngā Nīwhai; ā, ka heua haeretia iho rātou, e pērātia ana ki tā te hōia a Moronai i poropititia ai.

19 Nā, i te kitenga o Herahemena meake rātou katoa whakamatea ai, ka karanga kaha ake ki a Moronai, e whakaari ana ka kawenata rātou ko tana iwi ki a rātou, mēnā ka tohungia te oranga o te toenga o rātou, nā, kua kore rātou e haere mai anō ki te pakanga ki a rātou.

20 Ā, i pahawa ake, nā, ka meatia e Moronai anō kia whakamutua te mahi whakamate i waenganui i te iwi. Ā, ka tangohia e ia ngā rākau whawhai i ngā Rāmana; ā, ka tukuna rātou e ia kia wehe atu ai ki roto i te koraha whai muri iho i tā rātou uru ki roto i tētahi kawenata ki a ia kia mau ai te rongo.

21 Nā, kāore i tatauria te tokomahatanga o ō rātou mate nā te nui hoki o te tatauranga; āe rā, he tokomaha rawa atu te tatauranga o ō rātou mate; i te taha o ngā Nīwhai me te taha o ngā Rāmana.

22 Ā, i pahawa ake, nā, i makaia e rātou ō rātou mate ki roto i ngā wai o Hairona, ā, kua rere atu rātou, ā, kua tanumia iho i ngā rire o te moana.

23 Ā, ka hoki ngā tauā a ngā Nīwhai, a Moronai rānei, ki ō rātou whare me ō rātou whenua.

24 Ā, ka whakamutua pēneitia te tau tuangahuru mā waru o te whakahaeretanga a ngā kaiwhakawā i runga i te iwi o Nīwhai. Ā, ka whakamutua pēneitia te tuhinga a Arami, kua tuhia ki runga i ngā papa a Nīwhai.