1 Ā, i pahawa ake, nā, i whakahaua a Arami rāua ko Amureke kia wehe atu i taua pā; ā, ka wehe atu rāua, ā, ka wehe atu pū anō ki roto i te whenua o Hiromo; ā nana, i reira kitea ai ngā tāngata katoa kua wehe atu i te whenua o Amonaihā, ko te hunga i ākiritia atu, ā, i āki ki te kōhatu, nā tō rātou whakapono ki ngā kupu a Arami.

2 Ā, ka kōrero atu rāua ki a rātou i ngā mea katoa i tūpono ai ki ā rātou hoawahine me ā rātou tamariki, me ngā mea anō hoki e pā ana ki a rāua anō, me tō rāua mana whakaputanga.

3 Ā, i te takoto māuiui a Tēroma i Hiromo, i te kirikā, he mea nā te pāweratanga o tōna hinengaro mō tana whakarihariha, nā te mea i hua noa ake ia kua whakamatea a Arami rāua ko Amureke; ā, i whakaaro ake ia kua whakamatea rāua nā ana hē. Ā, ko tēnei hara nui, me ērā atu o ana hara, e rakaraka ana i tōna hinengaro nō konā meinga ai hei mea mamae rawa atu, ā, kāore ōna whakaputanga; nō reira ka pākāngia ia e te wera e mura ana.

4 Nā, i tana rongo atu kei te whenua o Hiromo a Armi rāua ko Amureke, ka māia haere tōna ngākau; ā, ka tuku tōtika ia i tētahi karere ki a rāua, e hiahia ana kia haere rāua ki a ia.

5 Ā, i pahawa ake, nā, ka haere tōtika atu rāua, e whakarongo ana rāua ki te karere kua tukuna e ia ki a rāua; ā, ka kuhu atu rāua ki roto i te whare ki a Tēroma; ā, ka kitea ia i runga i tōna moenga, e māuiui ana, e tino ngoikore ana i te kirikā; ā, i te tino mamae tōna hinengaro nā ōna hara; ā, i tana kitenga atu i a rāua ka torona atu tōna ringa, ā, ka inoi atu ia ki a rāua kia mahu rāua i a ia.

6 Ā, i pahawa ake, nā, ka kī atu a Arami ki a ia, e mau anō ana ki tōna ringa: E whakapono ana rānei koe i te mana o te Karaiti hei whakaora?

7 Ā, ka whakautu ia, ā, ka mea: Āe rā, e whakapono ana ahau i ngā kupu katoa nāu i ako.

8 Ā, ka kī atu a Arami: Ki te whakapono koe i te hokonga a te Karaiti ka taea anō koe te mahu.

9 Ā, ka kī atu ia: Āe rā, e whakapono ana au e rite nei ki āu kupu.

10 Kātahi ka karanga ake a Arami ki te Ariki, e mea ana: E te Ariki tō tātou Atua, kia aroha mai ki tēnei tangata, ā, whakamahungia rā ia kia rite nei ki tōna whakapono i roto nei i te Karaiti.

11 Ā, i te kōrerotanga ake a Arami i ēnei kupu, ka rūpeke ake a Tēroma ki runga i ōna waewae, ā, ka tīmata ia ki te hīkoi; ā, i tino mīharo nui te iwi katoa i tēnei meatanga; ā, hau atu ana te rongo puta noa i te whenua katoa o Hiromo.

12 Ā, ka rumakina a Tēroma e Arami ki te Ariki; ā, ka tīmata ia i taua wā ake ki te kauhau ki te iwi.

13 Ā, ka whakapūmauhia e Arami tētahi hāhi i te whenua o Hiromo, ā, ka whakatapua ētahi pirihi me ētahi kaiako i te whenua, kia rumaki ai ki te Ariki i te hunga katoa e hiahia ana kia rumakina.

14 Ā, i pahawa ake, nā, he tokomaha rātou; nā te mea i tomo tōpū nui atu rātou mai i ngā wāhi katoa o te rohe e pātata ana ki Hiromo, ā, ka rumakina.

15 Engari kia huri ake ki te iwi i te whenua o Amonaihā, he iwi ngākau-pakeke tonu, ā, he iwi kakī mārō tonu tō rātou āhua; ā, kīhai rātou i rīpenetā i ō rātou hara, e kīa ana e rātou nō te rēwera katoa te mana o Arami rāua ko Amureke; nā te mea nō te ritenga rātou o Nīho, ā, kīhai i whakapono ki te rīpenetātanga o ō rātou hara.

16 Ā, i pahawa ake, nā, ko Arami rāua ko Amureke, i te mea kua whakarērea e Amureke ana kōura katoa, me ana hiriwā, me ana mea utu nui katoa, i roto nei i te whenua o Amonaihā, mō te kupu a te Atua, kua whakaparahakotia ia e te hunga ko rātou nei he hoa nōna i mua, ā, e tōna matua anō hoki me ōna huānga;

17 Nō reira, i muri iho i tā Arami whakapūmau i te hāhi i Hiromo, e kitea ana tētahi whakaitanga nui, āe rā, e kitea ana tō te iwi whakaitanga e pā ana ki te whakapehapeha o ō rātou ngākau, ā, ka tīmata ki te whakaiti i a rātou anō i te aroaro o te Atua, ā, ka tīmata tā rātou whakahuihui i a rātou anō i ō rātou āhuru mōwai ki te koropiko atu ki te Atua i mua i te ahurewa, e mataara tonu ana, ā, e inoi tonu ana, kia whakaputaina ai rātou mai i a Hātana, ā, mai i te mate, me te whakangaromanga—

18 Nā, pēnei i tāku, i te mea i kite atu a Arami i ēnei mea katoa, nō reira ia i mau atu ai ki a Amureke kātahi ka haere tahi ki te whenua o Harahemara, ā, ka mauria atu ia ki tōna ake kāinga, ā, ka atawhaitia ia i roto i ana uauatanga, ā, ka whakapakarihia ia i roto i te Ariki.

19 Ā, ko te mutunga pēnei o te tau tuangahuru o te whakahaeretanga a ngā kaiwhakawā i runga i te iwi o Nīwhai.