1 Ināianei ā, i pahawa ake i te tau rua ngahuru mā ono o te whakahaeretanga a ngā kaiwhakawā i runga i te iwi o Nīwhai, nana, i te ohonga ake o ngā Rāmana i te ata tuatahi o te marama tuatahi, nana, ka kite rātou kua mate a Amarikaia i tōna ake tēneti; ā, i kite anō rātou kua rite a Teanakuma ki te whawhai ki a rātou i taua rā.

2 Ināianei ā, i te kitenga a ngā Rāmana i tēnei ka mataku rātou; ā, ka whakarērea e rātou tā rātou mahere ki te hīkoi atu ki roto i te whenua whakateraki, ā, ka hoki atu rātou me tō rātou tauā ki roto i te pā o Mureke, ā, ka whai atu rātou i te oranga i roto i ō rātou pā tūwatawata.

3 Ā, i pahawa ake, nā, ka whakatūria te teina a Amarikaia hei kīngi i runga i te iwi; ā, ko Amonoro tōna ingoa; pēnei ka whakatūria a kīngi Amonoro, te teina o kīngi Amarikaia hei kaiwhakakapi mōna.

4 Ā, i pahawa ake, nā, i whakahau ia i tana iwi kia tiakina tonutia aua pā, kua riro i a rātou i runga i te whakaheke toto; nā te mea kīhai i riro i a rātou tētahi pā engari i runga anake i te nui o te whakahekenga o te toto.

5 Ināianei ā, i kite a Moronai i tō rātou ū ki te pupuri i aua pā kua riro atu i a rātou, me ērā atu wāhi o te whenua kua riro atu nei i a rātou; me tā rātou kite atu i te nui o tō rātou tokomahatanga, ka whakaaro a Teanakuma ehara i te mea me whakaeke atu rātou ki roto i ō rātou pā tūwatawata.

6 Engari i pupuri ia i āna tāngata kia tata mai, anō nei i te whakariterite mō te pakanga; āe rā, i te tino pono tana whakariterite hei tiaki i a ia anō i a rātou, mā te whakatū taiapa huri noa me te whakarite i ngā wāhi haumaru.

7 Ā, i pahawa ake, nā, i te whakarite tonu ia mō te whawhai tae noa ki te wā i tonoa e Moronai tētahi ope tangata nui ki te whakakaha i tana tauā.

8 Ā, ka tuku whakahau a Moronai ki a ia kia mau tonu i a ia ngā mauhere katoa kua taka ai i ōna ringaringa; i te mea he tokomaha ngā mauhere i riro ai i ngā Ramana, nā konā me mau i a ia ngā mauhere Rāmana katoa hei utu mō aua mea i riro atu ai i ngā Rāmana.

9 Ā, i tuku whakahau anō ia ki a ia kia whakatūwatawatahia te whenua o Mōmona, ā, ki te whakamaioro anō i te ara kūiti i ārahina atu nei ki te whenua whakateraki, kei riro i ngā Rāmana taua pito me te rapu kaha ki te whakatīwheta i a rātou i tētahi taha, i tētahi taha.

10 Ā, ka tuku anō a Moronai ki a ia, e hiahia ana kia ū ia ki te tiaki i taua takiwā o te whenua, ā, kia kimi huarahi anō ia kia whakapau i tōna kaha ki te whakawhiu i ngā Rāmana, kia tango atu ia mā te rautaki, mā tētahi atu huarahi rānei aua pā kua riro atu i ō rātou ringaringa; ā, kia whakatūwatawata, kia whakakaha ia i ngā pā huri noa, ko ngā mea kāore anō kia taka atu ki roto i ngā ringaringa o ngā Rāmana.

11 Ā, i kī atu anō hoki ia ki a ia, kua haere atu au ki a koe, engari nana, kua whakaekea mai ngā Rāmana ki runga i a mātou i ngā rohe o te whenua e pātata ana ki te taha o te moana uru; ā nana, kei te tū atu au ki a rātou, nō reira kāore e taea ana e au te haere atu ki a koe.

12 Nā, ka wehe atu te kīngi (a Amonoro) i te whenua o Harahemara, ā, kua whakamōhiotia atu te kuini e pā ana ki te matenga o tōna tuakana, ā, kua whakaminea mai tētahi ope nunui, ā, ka hīkoi atu ki ngā Nīwhai i roto i ngā rohe e pātata atu ana ki te moana uru.

13 Ā, pēnei tana tohe atu ki te whakatīwheta atu i ngā Nīwhai, ā, ki te kukume atu i tētahi wāhi o ā rātou tauā ki taua wāhi o te whenua, engari kua whakahaua e ia ērā kua mahue i a ia kia nōhia ai ngā pā kua riro i a rātou, kia whakatīwheta anō hoki i ngā Nīwhai kei ngā rohe e pātata atu ana ki te moana rāwhiti, ā, kia whakamaua e rātou ō rātou whenua e rite ana ki tō rātou kaha, e rite ana ki te kaha o ō rātou tauā.

14 Ā, kei roto ngā Nīwhai i aua āhuatanga mōrearea i te mutunga o te tau rua ngahuru mā ono o te whakahaeretanga a ngā kaiwhakawā i runga i te iwi o Nīwhai.

15 Engari nana, i pahawa ake i te tau rua ngahuru mā whitu o te whakahaeretanga a ngā kaiwhakawā, nā, ko Teanakuma, nā runga i te whakahau a Moronai—nāna nei ngā tauā i whakatū ai hei tiaki i ngā rohe i te tonga me te uru o te whenua, ā, kua tīmata tana hīkoi whakatewhenua o Mōmona, kia āwhina ia i a Teanakuma me āna tāngata i tā rātou whakahokiranga i ngā pā kua riro atu i a rātou—

16 Ā, i pahawa ake, nā, kua whiwhi whakahau a Teanakuma kia whakaekea te pā o Mureke, ā, kia whakahokia mai anō mēnā e taea ana.

17 Ā, i pahawa ake, nā, ka whakariterite a Teanakuma ki te whakaeke atu ki runga i te pā o Mureke, me te hīkoi atu tana tauā ki ngā Rāmana; engari i kite ia e kore rawa rātou e taea ana e ia i a rātou e noho ana i roto i ō rātou pā tūwatawata; nō reira, ka whakarērea e ia ōna rautaki, ā, ka hoki anō ki te pā o Mōmona, kia tāria ai te haerenga mai a Moronai, nā, kia whiwhi kaha ia ki tana tauā.

18 Ā, i pahawa ake, nā, ka tae atu a Moronai me tana tauā ki te whenua o Mōmona, i te pito whakamutunga o te tau rua ngahuru mā whitu o te whakahaeretanga a ngā kaiwhakawā i runga i te iwi o Nīwhai.

19 Ā, i te tīmatanga o te tau rua ngahuru mā waru, ka whakatūria e Moronai rātou ko Teanakuma me ngā rangatira maha tētahi rūnanga whawhai—me aha rātou kia tō mai ai ngā Rāmana ki waho ki te whawhai ki a rātou; kia maunu ai rānei rātou i a rātou ki waho i ō rātou wāhi kaha, kia whaikaha ai rātou i runga i a rātou me te riro mai anō i a rātou te pā o Mureke.

20 Ā, i pahawa ake tā rātou tono karere ki te tauā o ngā Rāmana, i tiakina ai te pā o Mureke, ki tō rātou rangatira, ko Hākopa tōna ingoa, e hiahia ana kia puta ia me āna tauā ki ngā mānia i waenganui i ngā pā e rua. Engari nana, kāore a Hākopa, koia tētahi Hōrama, e puta mai ai ki te tūtaki i a rātou i runga i ngā mānia.

21 Ā, i pahawa ake i a Moronai, kāore ōna tūmanako ki te tūtaki ki a rātou i runga i te papa taurite, nō reira, ka huri atu ia ki tētahi rautaki e whakapoapoa ai ia i ngā Rāmana ki waho i ō rātou pākaha.

22 Nō reira ka mea ia kia mau a Teanakuma ki tētahi ope iti o ngā tāngata me te hīkoi whakararo e pātata ana ki te takutai moana; ā, ka hīkoi a Moronai me tana tauā, i te pō, ki roto i te koraha, i te taha uru o te pā o Mureke; ā, pēnei, i te aonga ake o te rā, i te kitenga atu o ngā Rāmana i a Teanakuma, ka oma atu rātou ki te whāki atu ki a Hākopa, tō rātou rangatira.

23 Ā, i pahawa ake, nā, ka hīkoi atu ngā tauā o ngā Rāmana ki a Teanakuma, e whakaaro ana nā tō rātou tokomaha ka taea a Teanakuma e rātou nā te tokoiti o tana ope. Ā, i te kitenga atu o Teanakuma i ngā tauā o ngā Rāmana e puta mai ana ki te whawhai ki a rātou ka tīmata tana tahuti iho ki te takutai moana, whakateraki.

24 Ā, i pahawa ake, nā, i te kitenga o ngā Rāmana i tā rātou tahutitanga atu, ka māia rātou, ā, ka arumia rātou i runga i te hīkaka. Ā, i a Teanakuma e pēnei ana tana arataki atu i ngā Rāmana ko rātou nei e whaiwhai poka noa ana i a rātou, nana, ka whakahau a Moronai i taua wāhi o tana tauā i reira kia hīkoi atu ki roto i te pā, ā, kia riro ai i a rātou te pā.

25 Ā, pēnei tā rātou i mahi ai, ā, ka whakamatea te hunga katoa i mahue ai i reira ki te tiaki i te pā, āe rā, ko te hunga katoa kīhai i whakaae ki te tuku ake i ā rātou rākau whawhai.

26 Ā, pēnei tā Moronai rapu i te pā o Mureke, he mea nā te wāhi iti o tana tauā, i a ia e hīkoi atu ana me te toenga atu ki te tūtaki ki ngā Rāmana i te wā e hoki mai ai rātou i te arumanga atu i a Teanakuma.

27 Ā, i pahawa ake, nā, ka aruaru ngā Rāmana i a Teanakuma tae noa ki tā rātou whakatatanga atu ki te pā o Mōmona, kātahi rātou ka tūtaki ki a Rīhai me tētahi ope iti, kua mahue nei ki te tiaki i te pā o Mōmona.

28 Ināianei ā nana, i te kitenga ake o ngā kaiwhakahau matua o ngā Rāmana i a Rīhai me tana tauā e whakaeke ana ki a rātou ka tahuti atu ratou i runga i te pororaru nui, kei riro pea i a rātou te pā o Mureke i mua i tā Rīhai hopunga i a rātou; nā te mea kua ngenge rātou i tā rātou hīkoi, ā, kua whaikaha ngā tāngata a Rīhai.

29 Nā, kāore ngā Rāmana i te mōhio i tō rātou hiku a Moronai me tana tauā; ā, i te wehi anake rātou i a Rīhai rātou ko ōna tāngata.

30 Nā, kāore i hiahia a Rīhai ki te mau ki a rātou kia tūtaki rā anō rātou ki a Moronai me tana tauā.

31 Ā, i pahawa ake, nā, i mua i tā ngā Rāmana hoki tawhiti atu kua karapotia rātou e ngā Nīwhai, e ngā tāngata o Moronai i tētahi taha, ā, i nga tāngata o Rīhai i tētahi taha, he whaikaha katoa rātou; engari i te ngenge ngā Rāmana nā tā rātou hīkoi roa.

32 Ā, ka whakahau a Moronai i āna tāngata kia taka iho ki runga ki a rātou tae noa ki te wā kua tukuna ake ā rātou rākau whawhai.

33 Ā, i pahawa ake i a Hākopa, koia tō rātou rangatira, he Hōrama anō hoki ia, ā, he wairua anō tōna e kore nei e taea ana, ka ārahina atu e ia ngā Rāmana ki te whawhai i runga i te riri nanakia ki a Moronai.

34 I te mea e huapae ana a Moronai i tō rātou ara, nō reira i te pūmau te whakaaro a Hākopa ki te patu i a rātou me te para atu i tana huarahi ki te pā o Mureke. Engari nana, he whaikaha ake a Moronai me āna tāngata; nō reira kīhai rātou i tuohu iho i te aroaro o ngā Rāmana.

35 Ā, i pahawa ake, nā, i whawhai rātou i ngā taha e rua i runga i te riri nanakia; ā, he tokomaha ngā mea i patua ai i ngā taha e rua; āe rā, i taotūngia a Moronai, ā, i whakamatea a Hākopa.

36 Ā, he nanakia anō te huaki i huaki ai a Rīhai rātou ko āna tāngata kaha i tō rātou hiku, nā konā tuku atu ai ngā Rāmana i te hiku i ā rātou rākau whawhai; ā, ko te toenga o rātou, i runga i te pōkaikaha nui, kāore i mōhio ki hea haere ai, ki hea rānei whakaeke ai.

37 Nā, ka kite a Moronai i tō rātou pōkaikaha, ka kī atu ia ki a rātou: Mehemea ka haria mai ā koutou rākau whawhai me te tuku mai, nana, kāore mātou e whakaheke i ō koutou toto.

38 Ā, i pahawa ake, nā, i te rongonga o ngā Rāmana i ēnei kupu, ka puta mai ō rātou kaiwhakahau matua, ko te hunga katoa kāore i whakamatea, kātahi ka whiua iho ā rātou rākau whawhai ki ngā waewae o Moronai, hei āpiti atu, ka whakahaua e rātou ā rātou tāngata kia pērāhia anōtia.

39 Engari nana, he tokomaha anō kīhai rawa i pai kia pērāhia; ā, ka haria atu te hunga kīhai i pai kia tukuna atu ō rātou hoari, ā, ka herea, ā, ka tangohia atu ō rātou rākau whawhai i a rātou, ā, i tonoa rātou kia hīkoi atu me ā rātou teina ki roto i te whenua o Mōmona.

40 Ināianei ā, he nui noa ake te tokomahatanga o ngā mauhere i te tokomahatanga o te hunga kua whakamatea, āe rā, he nui ake i te tokomahatanga o te hunga kua whakamatea i ngā taha e rua.