1 Nā, i a Amona e whakaako pēnei ana i te iwi o Ramoni i ngā wā katoa, ka hoki anō tātou ki te tuhinga o Arona rātou ko ana teina; nā te mea i muri iho i tana wehenga atu i te whenua o Mironi ka ārahina ia e te Wairua ki te whenua o Nīwhai, tae atu pū anō ki te whare o te kīngi i runga nei i te whenua katoa hāunga ko te whenua o Ihimaera; ā, ko ia te matua o Ramoni.

2 Ā, i pahawa ake, nā, ka haere atu ia ki roto ki a ia i te whare kīngi, me ana teina, ā, ka tuohu iho ia i te aroaro o te kīngi, ā, ka kī atu ki a ia: Nana, E te kīngi, ko mātou ngā teina o Amona, nāu nei i whakaputa i te whareherehere.

3 Ināianei ā, E te kīngi, ki te tohu koe i ō mātou oranga, ka mahi mātou hei pononga māu. Ā, ka kī atu te kīngi ki a rātou: E ara, nā te mea māku ō koutou oranga e tohu, ā, e kore au e tuku i a koutou kia mahi ai hei ponoonga māku; engari ka akiaki au i a koutou kia minita mai ki ahau; nā te mea i te āhua raru ā-hinengaro au nā te mākohakoha me te nui o ngā kupu a tō koutou teina a Amona; ā, kei te hiahia au kia mōhio ai he aha te take kāore nei ia i haere tahi mai ai i te whenua o Mironi.

4 Ā, ka kī atu a Arona ki te kīngi: Nana, kua karangatia ia e te Wairua o te Ariki ki tētahi atu huarahi; kua haere ia ki te whenua o Ihimaera ki te whakaako i te iwi o Ramoni.

5 Nā, ka kī atu te kīngi ki a rātou: He aha tēnei kua kōrerotia e koe e pā ana ki te Wairua o te Ariki? Nana, koinei te mea e whakararu nei i ahau.

6 Hei āpiti anō, he aha tēnei kua kōrerotia nei e Amona—Ki te rīpenetā koe ka whakaorangia koe, ā, ki te kore koe e rīpenetā, ka makaia atu koe hei te rā whakamutunga?

7 Ā, ka whakautu atu a Arona ki a ia: E whakapono ana rānei koe he Atua anō? Ā, ka kī ake te kīngi: E mōhio ana au, nā, e kī ana ngā Amareki he Atua anō, ā, nāku rātou i tuku kia hangaia ai ō rātou whare tapu, kia whakahuihui tahi rātou i a rātou anō ki te koropiko ki a ia. Ā, mēnā rānei ka kī mai koe ināianei he Atua anō, nana, ka whakapono au.

8 Ināianei ā, i tā Arona rongonga i tēnei, ka hari haere tōna ngākau, ā, ka kī ia: Nana, he pērā i a koe e ora ana, E te kīngi, he Atua anō.

9 Ā, ka kī ake te kīngi: Ko te Atua taua Wairua Nui nāna nei ō tātou tūpuna i hari mai i te whenua o Hiruharama?

10 Ā, ka kī atu a Arona ki a ia: Āe rā, ko ia taua Wairua Nui, ā, nāna ngā mea katoa i hanga i te rangi me te whenua. E whakapono ana rānei koe ki tēnei?

11 Ā, ka kī ia: Āe rā, kei te whakapono au nā te Wairua Nui ngā mea katoa i hanga, ā, e hiahia ana au kia kōrero mai koe e pā ana ki ēnei mea katoa, ā, ka whakapono au ki āu kupu.

12 Ā, i pahawa ake, nā, i te kitenga a Arona ka whakapono te kīngi ki ana kupu, ka tīmata ia i te hanganga o Arama, e pānui ana i ngā karaipiture ki te kīngi—mō te hanganga o te Atua i te tangata i runga i tōna ake āhua, ā, mō te tukunga mai o te Atua i ngā whakahaunga ki a ia, ā, nā te hara, kua taka te tangata.

13 Ā, i whakamāramatia atu e Arona ki a ia mai i ngā karaipiture te hanganga o Arama, e whakatakotohia ana te takanga ki mua i a ia, me tō rātou āhuatanga kikokiko me te mahere o te hokonga anō hoki, i whakaritea ai i te tūāpapatanga o te ao, mā roto i te Karaiti, mō te hunga katoa e whakapono ai ki tōna ingoa.

14 Ā, i te mea kua taka te tangata kāore e taea e ia te whakatikanga i tētahi mea i a ia anō; engari kua whakamārietia ō rātou hara e ngā whakamamaetanga, ā, e te matenga hoki o te Karaiti, mā roto i te whakapono me te rīpenetātanga, me ērā atu mea; ā, kua motuhia e ia ngā herehere o te mate, kia kaua e whai wikitōria te rua tūpāpaku, ā, ka horomia ake te wero o te mate i roto i ngā manako o te korōria; ā, i whakamāramatia atu e Arona ēnei mea katoa ki te kīngi.

15 Ā, i pahawa ake, nā, i muri iho i tā Arona whakamārama atu i ēnei mea katoa ki a ia, ka kī ake te kīngi: Me aha ahau kia whiwhi ai au i tēnei oranga tonutanga kua kōrerotia nei e koe? Āe rā, me aha au kia whānau mai au i te Atua, kua hutia atu nei tēnei wairua kino i tōku uma, hei whakawhiwhi i tōna Wairua, kia kī ai au i te hari, kia kore ai au e makaia atu i te rā whakamutunga? Nana, ka mea ia, ka tukuna atu ngā mea katoa kei ahau, āe rā, ka whakarere ahau i tōku kīngitanga, kia whiwhi ai au i tēnei hari nui.

16 Engari ka kī atu a Arona ki a ia: Mēnā kei te hiahia koe i tēnei, ki te tuohu iho koe i mua i te Atua, āe rā, ki te rīpenetā koe i ō hara katoa, me te tuohu iho i mua i te Atua, me te karanga ake i tōna ingoa i runga i te whakapono, e whakapono ana ka whiwhi koe, kātahi koe ka whiwhi i te tūmanako e hiahia nei koe.

17 Ā, i pahawa ake, nā, i te rongonga o Arona i ēnei kupu, ka tuohu iho te kīngi i mua i te Ariki, i runga i ōna turi; āe rā, i takoto whārōrō ia i runga i te whenua, ā, ka tangi nui, e mea ana:

18 E te Atua, kua kōrero mai a Arona ki ahau he Atua anō; ā, mehemea he Atua anō, ā, mēnā ko koe te Atua, ka whakakitea mai koa koe ki ahau, ā, māku ōku hara katoa e tuku atu kia mōhio ai au ki a koe, ā, kia whakaarahia ake au i te mate, ā, kia whakaorangia i te rā whakamutunga. Ināianei ā, i te kōrerotanga o te kīngi i ēnei kupu, kua pākia ia me te mea nei kua mate ia.

19 Ā, i pahawa ake, nā, ka oma atu ana pononga ki te kōrero atu ki te kuini i ngā mea katoa i pā ai ki te kīngi. Ā, ka tomo atu ia ki te kīngi; ā, i tana kitenga atu i a ia e takoto ana me te mea nei kua mate ia, me Arona rātou ko ana teina e tū ana me te mea nei ko rātou te take i hinga ai ia, ka riri ia ki a rātou, ā, ka whakahaua ana pononga, ngā pononga rānei a te kīngi, kia mauria atu rātou, ā, kia whakamatea rātou.

20 Nā, i kite ngā pononga i te pūtake i hinga ai te kīngi, nō reira rātou wehi ai ki te pā i ō rātou ringaringa ki a Arona rātou ko ana teina; ā, ka tohe atu ki te kuini e mea ana: He aha koe e whakahau ai i a mātou kia whakamate ai i ēnei tāngata, i te mea he kaha kē ake tētahi o rātou i a mātou katoa? Nō reira ka hinga mātou i mua i a rātou.

21 Nā, i te kitenga o te kuini i te wehi o ngā pononga ka tino wehi haere anō hoki ia, kei tau iho tētahi kino ki runga i a ia. Ā, ka whakahau ia i ana pononga kia haere atu me te karanga ake ki te iwi, kia whakamate ai rātou i a Arona rātou ko ana teina.

22 Nā, i te kitenga o Arona i te mārō o te whakaaro o te kuini, i te mōhio hoki ia ki te pakeketanga o ngā ngākau o te iwi, nā konā ia, i wehi kei hui tahi anō te iwi i a rātou anō, kātahi ka hua ake tētahi tautohetohenga nui me tētahi raruraru i waenganui i a rātou; nō reira ia toro atu ai i tōna ringa, ā, ka whakaohokia ake te kīngi i te whenua, ā, ka kī atu ki a ia: E tū. Ā, ka tū ia i runga i ōna waewae, e whiwhi ana i tōna kaha.

23 Nā, i pēneitia i te aroaro o te kuini me ngā pononga tokomaha. Ā, ka tino mīharo rātou i tā rātou kitenga ake, ā, ka wehi rātou. Ā, ka tū atu te kīngi, ā, ka tīmata ki te minita ki a rātou. Ā, i minita atu ia ki a rātou, nā konā whakatahuritia tōna whare katoa ki te Ariki.

24 Nā, kua whakaminea mai tētahi whakaminenga nā te whakahau a te kuini, ā, ka tīmata ngā amuamu nui i waenganui i te iwi i a Arona rātou ko ana teina.

25 Engari ka tū atu te kīngi ki waenganui i a rātou, ā, ka minita ki a rātou. Ā, i whakaāiohia rātou ki a Arona me te hunga i a ia.

26 Ā, i pahawa ake, nā, i te kitenga o te kīngi kua whakaāiohia te iwi, ka meatia e ia kia tū atu a Arona rātou ko ana teina ki waenganui i te whakaminenga, ā, kia kauhau atu rātou ki a rātou.

27 Ā, i pahawa ake, nā, ka tukuna atu e te kīngi tētahi whakapuakitanga puta noa i te whenua, ki waenganui i tōna iwi katoa e noho ana i tōna whenua katoa, i ngā rohe huri noa, e tata atu ana ki te moana, i te taha rāwhiti me te taha uru, ā, kua whakawehea nei i te whenua o Harahemara e tētahi koraha whāiti, e toro atu ana i te takutai i te rāwhiti tae atu pū anō ki te takutai i te uru, ā, taiāwhio noa i ngā wāhi takutai, me ngā rohe o te koraha e tata ana ki te whenua o Harahemara, i roto i ngā rohe o Manati, e tata ana ki te mātāpuna o te awa o Hairona, e takoto haere ana i te rāwhiti whakateuru—ā, i pēnei te wehenga o ngā Rāmana i ngā Nīwhai.

28 Nā, i noho te wāhi māngere rawa o ngā Rāmana i te koraha, ā, i noho tēneti ai; ā, i te noho whānui rātou puta noa i te koraha ki te uru, i te whenua o Nīwhai; āe rā, i te taha rāwhiti anō hoki o te whenua o Harahemara, i roto i ngā rohe e tata ana ki te takutai, i te taha uru anō hoki i te whenua o Nīwhai, i te wāhi o te whenua tuku iho tuatahi o ō rātou tūpuna, ā, e takoto pēnei ana i te taha o te takutai.

29 Ā, he tokomaha anō ngā Rāmana i te rāwhiti i te taha takutai, i ngā wāhi i āia ai rātou e ngā Nīwhai. Ā, i tata karapotia pēneitia ngā Nīwhai e ngā Rāmana; hei aha koa kua riro i ngā Nīwhai ngā wāhi whakateraki o te whenua e tata ana ki te koraha, kei te mātāpuna o te awa o Hairona, mai i te rāwhiti ki te uru, huri noa i te taha koraha; i te raki, tae atu ana ki tā rātou taenga ki te whenua i karangatia nei e rātou ko Mōmona.

30 Ā, i te piri tata ki te whenua i karangatia nei e rātou ko te Whakangaromanga, e takoto ana i te taha e tino whakateraki ana nā konei hono atu ai ki te whenua i nōhia ai e te tangata, ā, ko rātou kua oti nei te whakangaro, kua kōrerotia mō ō rātou kōiwi, i kitea ai e te iwi o Harahemara, koia te wāhi i noho tuatahi ai rātou.

31 Ā, i haere mai rātou i reira ki roto ki te koraha ki te tonga. Pēnei i karangatia te whenua whakateraki ko te Whakangaromanga, ā, i karangatia te whenua whakatetonga ko Mōmona, koia te koraha i kapi nei i ngā kararehe mohoao o ia āhua, o ia āhua, ko ētahi i ahu mai ai i te whenua whakateraki hei rapu kai.

32 Ināianei ā, kotahi te rā me te hāwhe noa iho te tawhiti o te haere mō tētahi Nīwhai, i te rārangi o Mōmona me te whenua o te Whakangaromanga, mai i te rāwhiti ki te uru; ā, pēnei i tata karapotia te whenua o Nīwhai me te whenua o Harahemara e te wai, he whenua whāiti i reira e takoto ana ki waenganui i te whenua whakateraki me te whenua whakatetonga.

33 Ā, i pahawa ake, nā, i nōhia e ngā Nīwhai te whenua o Mōmona, mai i te rāwhiti tae noa atu ki te moana ki te uru, ā, pēnei ngā Nīwhai i runga i tō rātou whaimātauranga, i katia atu ngā Rāmana ki te tonga he mea nā ō rātou kaitiaki, nā ō rātou ope tauā kia kore ai rātou e whai kāinga i te raki, kia kore rātou e kapi i a rātou te whenua whakateraki.

34 Nō reira kāore i taea e ngā Rāmana te noho i te whenua atu i te whenua o Nīwhai me te whenua huri noa. Nā, he whaimātauranga tēnei nō ngā Nīwhai—i te mea he hoariri ngā Rāmana ki a rātou, kāore rātou e tuku kia whakamamaetia rātou i ngā taha katoa, hei āpiti anō, kia whai kāinga ai rātou hei tahutiranga atu mō rātou, e rite ana ki ō rātou hiahia.

35 Ināianei ā, ko au, i muri iho i taku kōrerotanga i tēnei, ka hoki anō ki te tuhinga mō Amona rātou ko Arona, ko Omonere, ko Himini me ā rātou teina.