1 Nā, i pahawa ake, nā, i muri iho i te whakamutunga o Koriho, i te mea kua tae te rongo ki a Arami, nā, i te whakapeau ngā Hōrama i ngā huarahi o te Ariki, me te aha ko Hōrama, ko ia tō rātou rangatira, e ārahi atu ana i ngā ngākau o te iwi kia tuohu iho ki ngā whakapakoko reo kore, ka māuiui haere anō tōna ngākau i te hara o te iwi.

2 Nā te mea he take tino pōuri tēnā ki a Arami kia mōhio ki te hara i waenganui i te iwi; nō reira i te tino pōuri rawa atu tōna ngākau nā te wehenga o ngā Hōrama i ngā Nīwhai.

3 Nā, kua whakahuihui tahi ngā Hōrama i a rātou anō i te whenua i karangatia ai e rātou ko Anationuma, kei te taha rāwhiti o te whenua o Harahemara, e takoto pātata ana ōna rohe ki te takutai moana, i te taha tonga o te whenua o Herehona, e pātata ana ōna rohe ki te koraha i te taha tonga, kua muia taua koraha e ngā Rāmana.

4 Nā, i tino wehi nui ngā Nīwhai kei hono atu ngā Hōrama i runga i tētahi tikanga whakawhitinga kōrero ki ngā Rāmana, ā, ka ai i reira te ngarohanga nui ki te taha ki ngā Nīwhai.

5 Ināianei ā, nā te mea he rite tonu te kauhautanga i te kupu kia mea rawa i te iwi ki te mahi i ērā e tika ana—āe rā, he nui rawa ake tōna whakaaweawe ki runga i ngā hinengaro o te iwi i tō te hoari, i tō tētahi atu mea, kua meatia ki a rātou—nō reira ka whakaaro ake a Arami e tika pū ana kia whakamātauria te mana pono o te kupu a te Atua.

6 Nō reira ka mau ia ki a Amona, me Arona, me Omonere; ā, ka mahue i a ia a Himini i roto i te hāhi i Harahemara; engari ka mauria e ia ērā tokotoru o mua, me Amureke rāua ko Tēroma anō hoki, i Mereke rāua; ā, i mauria anō hoki e ia āna tama tokorua.

7 Nā, kāore i mauria atu e ia te mātāmua o āna tama, ā, ko Heramana tōna ingoa; engari ko ngā ingoa o te hunga i mauria atu ai e ia ko Hipirona rāua ko Koriatono; ā, koinei ngā ingoa o te hunga i haere tahi atu ai me ia ki waenganui i ngā Hōrama, ki te kauhau atu i te kupu ki a rātou.

8 Nā, he kaitītore ngā Hōrama mai i ngā Nīwhai; nō reira i kauhautia ki a rātou te kupu a te Atua.

9 Engari kua taka iho rātou i roto i ngā hē nui, nā te mea kīhai i pai ki a rātou te pupuri i ngā whakahaunga a te Atua, me ana ture, e ai ki te ture a Mohi.

10 Kīhai rānei rātou i pai kia ū ki ngā meatanga o te hāhi, kia ū tonu i runga i te inoi me te karakia ki te Atua i ia rā, i ia rā, kia kore ai rātou e tomo atu ai ki roto i te whakawainga.

11 Āe rā, hei whakarāpopoto, he maha rawa atu ngā wā i whakapeau ai rātou i ngā huarahi o te Ariki; nō reira, mō tēnei take, i haere atu ai a Arami rātou ko ana teina ki roto i te whenua ki te kauhau atu i te kupu ki a rātou.

12 Nā, i tā rātou taenga atu ki te whenua, nana, ka ohorere rawa atu rātou i tā rātou kitenga atu kua hanga ngā Hōrama i ngā whare karakia, ā, i huihui tahi rātou i a rātou anō i te rā kotahi i te wiki, i karangatia ai e rātou taua rā ko te rā o te Ariki; ā, kāore anō a Arami rātou ko ana teina kia kite atu i te āhuatanga o tā rātou koropiko;

13 Nā, kua hangaia e rātou tētahi wāhi i te pokapū o tō rātou whare karakia, he tūrangawaewae, e teitei ake ana i runga i te māhunga; ā, e āhei ana i te tangata kotahi anake te wāhi o runga rawa.

14 Nō reira, me haere atu te tangata e hiahia ana ki te koropiko kia tū ai i te wāhi i runga rawa, kātahi ka toro whakaterangi atu i ōna ringaringa, me te karanga ake i runga i te reo kaha, e mea ana:

15 Tapu, tapu te Atua; e whakapono ana mātou ko koe te Atua, ā, e whakapono ana mātou he tapu koe, ā, he wairua koe i mua, he wairua koe ināianei, ā, ka wairua tonu koe mō āke tonu atu.

16 E te Atua Tapu, e whakapono ana mātou nāu mātou i whakawehe i ō mātou teina; ā, kāore mātou i te whakapono ki ngā whakarerenga iho a ō mātou teina, kua tukuna iho ki a rātou e ngā whakaaro tamariki a ō rātou tūpuna; engari e whakapono ana mātou nāu mātou i kōwhiriwhiri hei tamariki tapu māu; ā, nāu anō hoki mātou i whakamōhio mai kāore e puta mai te Karaiti.

17 Engari he rite tonu koe inānahi, ināianei, āke tonu atu; ā, nāu mātou i kōwhiriwhiri kia whakaorangia mātou, i ngā tāngata e karapotia ana mātou e kōwhiriwhiria nei kia makaia iho ki te riri o te aorēwera; mō tēnei tapunga, E te Atua, e whakawhetai nei mātou ki a koe; ā, e whakawhetai ana anō mātou mōu mātou i kōwhiriwhiri kia kore ai mātou e ārahina atu ai ki ngā whakarerenga iho kuare a ō mātou teina, e herea iho nei rātou ki tētahi whakapono ki a te Karaiti, nā konā ārahina atu ō rātou ngākau kia ātiutiu tawhiti atu i a koe, e tō mātou Atua.

18 Hei āpiti anō, e whakawhetai atu ana mātou ki a koe, E te Atua, nā te mea he iwi kōwhiria mātou, ā, he iwi tapu mātou. Āmine.

19 Nā, i pahawa ake i muri iho i tā Arami rātou ko ana teina rongonga atu i ēnei inoi, ka tino ohorere rawa atu rātou nōhea e taea te mehua.

20 Nana rā, i haere ake ia tangata, ia tangata, ā, ka tukua ēnei inoi pū anō.

21 Nā, kua karangatia ake taua wāhi e rātou ko te Ramaumutomo, koia, ko tōna whakamāoritanga, ko te tūranga tapu.

22 Nā, atu i tēnei tūranga i tukua ake, ia tangata, ia tangata, taua inoi pū anō ki te Atua, e whakawhetai ana ki tō rātou Atua mō rātou i kōwhiria nei e ia, me te mea anō nāna rātou i ārahi atu i ngā whakarerenga iho a ō rātou tūpuna, me te aha, kīhai ō rātou ngākau i whānakotia atu ai kia whakapono ai ki ngā mea e puta mai ai, kāore nei rātou i mōhio noa ki aua mea.

23 Nā, nō muri iho i tā te iwi tuku whakawhetai ake i runga i tēnei ritenga, ka hokihoki rātou ki ō rātou kāinga, kāore e kōrero ana anō mō tō rātou Atua tae noa ki te wā i huihui tahi anō ai rātou kia tū ai i runga i te tūranga tapu, ki te tuku whakawhetai ake i runga i taua ritenga.

24 Nā, i te kitenga o Arami i tēnei ka tangi tōna ngākau; nā te mea i kite ia ko rātou nei tētahi iwi kino, ā, he iwi parori kē; āe rā, i kite ia kua tau ō rātou ngākau ki runga i te kōura, me te hiriwā, i runga i ngā tūmomo rawa papai katoa.

25 Āe rā, i kite anō hoki ia i ō rātou ngākau kua neke ake i runga i te whakamanamana, i runga i tō rātou whakapehapeha.

26 Ā, ka hāpainga ake tōna reo ki te rangi, ā, ka karanga, e mea ana: Auē, me pēhea te roa, E te Ariki, māu e tuku kia noho iho nei āu pononga i roto i te kikokiko, kia tirohia ai te whakarihariha nui i waenganui i ngā tamariki a te tangata?

27 Nana, E te Atua, kei te karanga rātou ki a koe, heoi, kua horomia ake ō rātou ngākau e te whakapehapeha. Nana, E te Atua, e karanga ake ana ō rātou māngai ki a koe, i a rātou e whakahihi ana, tae atu ana ki te whakakake nui, i runga i ngā mea tekateka o te ao.

28 Nana, E tōku Atua, ko ō rātou kākahu utu nui, me ō rātou rīngi, me ō rātou poroporo, me ō rātou whakapaipai kōura, me ō rātou mea pai whakaharahara katoa; ā nana, kua tau iho ō rātou ngākau ki runga i ērā mea, heoi, kei te karanga ake rātou ki a koe me te kī ake—E whakawhetai ana mātou ki a koe, E te Atua, nā te mea he iwi kōwhiria mātou ki a koe, i ētahi atu e mate ana.

29 Āe rā, e kī ana anō hoki rātou nāu rātou i whakamōhio kāore e puta te Karaiti.

30 E te Ariki te Atua, ka pēhea te roa e tukua ai e koe ngā kino me ngā whakapono kore i waenganui i tēnei iwi? E te Ariki, māu te kaha e homai ai ki ahau, kia taea ai e au te waha i runga i ōku ngoikoretanga. Nā te mea e ngoikore ana ahau, ā, e mamae ana tōku wairua i te whakarihariha pēnei i waenganui i tēnei iwi.

31 E te Ariki, kei te pōuri rawa atu tōku ngākau; māu tōku ngākau e whakaāio i roto i te Karaiti. E te Ariki, māu e tuku ki ahau kia whai kaha ai ahau, kia whakamanawanui au i ēnei whakamamaetanga e tau mai ai ki runga i ahau, nā te hara o tēnei iwi.

32 E te Ariki, māu tōku wairua e whakaāio, kia homai ai he waimārietanga, ā, ki ōku hoamahi kei te taha i ahau—āe rā, ko Amona, me Arona, me Omonere, me Amureke hoki, me Tēroma, me aku tama tokorua anō hoki—āe rā, māu pū anō ēnei e whakaāio, e te Ariki. Āe rā, māu ō rātou wairua e whakaāio i roto i te Karaiti.

33 Māu e tuku ki a rātou kia whai kaha ai rātou, kia waha ai rātou i ō rātou whakamamaetanga e tau ai ki runga i a rātou nā ngā hara o tēnei iwi.

34 E te Ariki, māu e tuku ki a mātou kia waimārie mātou i te kukumetanga mai i a rātou ki a koe i roto i te Karaiti.

35 Nana, E te Ariki, he utu nui ō rātou wairua, ā, he teina te tokomaha o rātou ki a mātou; nō reira, homai ki a mātou, E te Ariki, te kaha me te mātauranga kia taea ai e mātou ēnei, ā mātou teina, te kukume mai anō ki a koe.

36 Nā, i pahawa ake, nā, i te kōrerotanga a Arami i ēnei kupu, nā, ka pākia iho ōna ringaringa ki runga i a rātou katoa i tana taha. Ā nana, i a ia e pākia iho ana ōna ringaringa ki runga i a rātou, kua kī rātou i te Wairua Tapu.

37 Ā, whai muri iho i tēnā ka wehe atu rātou tētahi i tētahi, kāore ō rātou whakaaro ki a rātou anō he aha hei kai, he aha rānei hei inu, he aha rānei hei kākahu.

38 Ā, i tuku mea te Ariki ki a rātou kia kore ai rātou e hiakai ai, e hiainu ai rānei; āe rā, nāna te kaha i homai ai ki a rātou, kia kore ai rātou e rongo noa i ētahi whakamamaetanga, hāunga ia kua horomia ake i roto i te haringa o te Karaiti. Nā, he mea rite ki te inoi a Arami; ā, tēnei anō nā tana inoi i runga i te whakapono.