1 Ā, i pahawa ake, nā, ka whakahuihui tahi te hunga katoa kāore i pai ki te whakarongo ki ngā kupu a Heramana rātou ko ana teina kia tū atu ai ki ā rātou teina.

2 Ināianei ā nana, i te tino pukuriri rātou, nā konā i te tino hiahia rātou ki te whakamate i a rātou.

3 Nā, ko te kaiārahi o te hunga i tino pukuriri ai ki ā rātou teina, arā, ko tētahi tangata kaitā, ko tētahi tangata kaha; ā, ko Amarikaia tōna ingoa.

4 Ā, i te hiahia a Amarikaia kia tū ai ia hei kīngi; ā, i te hiahia te hunga anō e pukuriri ana kia tū ai ia hei kīngi mō rātou; ā, ko te wāhi nui o rātou ko ngā kaiwhakawā iti o te whenua, ā, i te whaiwhai mana rātou.

5 Ā, kua ārahina rātou e ngā whakapatipatinga a Amarikaia, nā, mēnā ka tautoko rātou i a ia me te whakapūmau i a ia hei kīngi mō rātou, māna rātou e whakarite hei kaiwhakahaere tikanga i runga i te iwi.

6 Pēnei tā rātou ārahitanga atu e Amarikaia ki roto i ngā tītorehanga, hei aha koa te kauhautanga a Heramana rātou ko ana teina, āe rā, hei aha koa tō rātou tiakanga tino nui i runga i te hāhi, nā te mea he pirihi teitei rātou i runga i te hāhi.

7 Ā, he tokomaha ngā mea i roto i te hāhi i whakapono ai ki ngā kupu whakapatipati a Amarikaia, nō reira ka tītore atu rātou i te hāhi; ā, pēnei kua tino rangirua, ā, kua tino mōrearea ngā āhuatanga o te iwi o Nīwhai, hei aha koa tō rātou wikitōria nui i wikitōria ai rātou i runga i ngā Rāmana, me ā rātou haringa nui i hari ai rātou nā tō rātou whakaputanga e te ringa o te Ariki.

8 Pēnei ka kite tātou i te hohoro o ngā tamariki a te tangata ki te wareware i te Ariki tō rātou Atua, āe rā, anō te hohoro ki te mahi kino, kia ārahina kētia atu e te mea kino.

9 Āe rā, ka kite anō hoki tātou i te nui o te whakarihariha e taea ana e te tangata kino kotahi i waenganui i ngā tamariki a te tangata.

10 Āe rā, ka kite tātou i a Amarikaia, nā te mea he tangata tinihanga ia, ā, he tangata kōrero whakapatipati maha, nāna nei ngā ngākau maha i ārahi atu ki te maha kino; āe rā, kia whai ki te whakangaro i te hāhi a te Atua, me te whakangaro i te tūāpapa o te herekoretanga kua tukuna mai nei e te Atua, i te manaakitanga rānei i tukuna mai nei e te Atua ki runga i te mata o te whenua hei painga mō te hunga tika.

11 Ināianei ā i pahawa ake, nā, i te rongonga o Moronai, ko ia te kaiwhakahau matua o ngā tauā a ngā Nīwhai i ēnei tītorehanga, ka riri ia ki a Amarikaia.

12 Ā, i pahawa ake, nā, ka tīhaea tōna koti; ā, ka tīkina tētahi wāhanga o reira, ā, ka tuhia e ia ki runga rā—Hei maharatanga ki tō tātou Atua, tō tātou whakapono me te herekoretanga, me tō tātou rangimārie, ā tātou hoawahine, me ā tātou tamariki—ā, ka herea ki te pito o tētahi tokotoko.

13 Ā, ka pōtaetia tōna ārai māhunga, me tōna ārai uma, me ōna puapua, ā, ka whītikiria ōna kākahu whawhai ki tōna hope; ā, ka mauria te tokotoko, i tōna pito o reira tōna koti haehae, (ā, ka karangatia tēnā ko te kara o te herekoretanga) ā, ka tuohu iho ia ki te whenua, ā, ka inoi kaha ia ki tōna Atua kia tau iho ai ngā manaakitanga herekoretanga ki runga i ana teina, i ngā wā katoa e toe ai tētahi ope Karaitiana hei noho i te whenua—

14 Nā te mea he pērā katoa te hunga whakapono tūturu a te Karaiti, ko te hunga nō te hāhi a te Atua, i karangatia nei e te hunga ehara nō te hāhi.

15 Ā, he tangata ū te hunga nō te hāhi; āe rā, ka tangohia ki runga ki a rātou, i runga i te ngākau koa, te ingoa o te Karaiti, o te Karaitiana rānei e pērā ana ki tā rātou i karangatia ai, nā tō rātou whakapono i te Karaiti e haere mai ai.

16 Ā, nō reira, i tēnei wā, i inoi ai a Moronai kia whakamakauhia te taha ki ngā Karaitiana, ā, kia whakamakauhia te herekoretanga o te whenua.

17 Ā, i pahawa ake, nā, i te wā i maringi iho ia i tōna wairua ki te Atua, ka whakaingoatia ngā whenua katoa i te taha tonga o te whenua ko Whakangaromanga, āe rā, hei whakarāpopoto, ko ngā whenua katoa, kei te raki me te tonga—He whenua kōwhiria, ā, he whenua herekore.

18 Ā, ka kī ia: Kāore e kore engari te Atua mō te tuku i a tātou, te hunga e whakahāwea ana nā te mea kua tangohia te ingoa o te Karaiti ki runga i a tātou, kia takahia iho ai, ā, kia whakangaromia ai, tae atu ki te wā e kūmea ai e tātou anō nā ō tātou hē.

19 Ā, i te kōrerotanga a Moronai i ēnei kupu, ka haere atu ia ki waenganui i te iwi, e pōwhiriwhiri ana i te wāhi haehae o tana kahu ki runga, kia kite ai te katoa i ngā tuhinga kua tuhia e ia i runga i te wāhi haehae, ā, e karanga ake ana i te reo kaha, e mea ana:

20 Nana, ko te tangata e pupuri ai i tēnei kara ki runga i te whenua, tukuna ia kia haere mai ai i runga i te kaha o te Ariki, ā, kia uru ai ki roto i tētahi kawenata kia pupuri tonu ai i ō rātou tikanga, me tō rātou whakapono, kia manaakitia ai rātou e te Ariki te Atua.

21 Ā, i pahawa ake, nā, i te whakapuakitanga a Moronai i ēnei kupu, nana, ka omaoma mai te iwi me ō rātou kahu whawhai kua whītikiria i ō rātou hope, e haehaea ana ō rātou kākahu hei tohu, hei kawenata rānei, e kore nei rātou e whakarere atu i te Ariki tō rātou Atua; kia pēnei rawa te kōrero rānei, mehemea ka takahia e rātou ngā whakahaunga a te Atua, ka taka iho rānei ki roto i te hē, ā, ka whakamā kia tangohia ai ki runga i a rātou te ingoa o te Karaiti, ka tīhaea rātou e te Ariki pērā i tā rātou tīhaehae i ō rātou kākahu.

22 Nā, koinei te kawenata i meatia ai e rātou, ā, ka makaia iho ō rātou kākahu ki ngā waewae o Moronai, e mea ana: E kawenata ana mātou ki tō tātou Atua, nā, ka whakangaromia mātou, pērā pū anō i ō mātou tuākana i te whenua whakateraki, ki te taka iho mātou ki roto i te hē; āe rā, māna mātou e maka ki ngā waewae o ō mātou hoariri, he pērā i tā mātou makanga i ō mātou kākahu ki ōu waewae kia takahia iho ai e te waewae, ki te taka mātou ki roto i te hē.

23 Ka kī atu a Moronai ki a rātou: Nana, ko tātou ngā mōrehu o ngā uri o Hākopa; āe rā, ko tātou ngā mōrehu o ngā uri o Hōhepa, ko tōna koti i tīhaea ai e ōna tuākana kia maha ōna wāhi; āe rā, ināianei ā nana, tukuna tātou kia mahara ai i ngā whakahaunga a te Atua, ki te kore ka tīhaea ō tātou kākahu e ō tātou teina, ā, ka makaia rānei tātou ki rō whareherehere, kia hokona atu rānei, kia whakamatea rānei.

24 Āe rā, tukuna tātou kia tiakina ai tō tātou herekoretanga kia rite ki tētahi mōrehu o Hōhepa; āe rā, tukuna tātou kia mahara ki ngā kupu a Hākopa, i mua i tōna matenga, nana rā, i kite ia i te tiakanga o tētahi wāhi o te koti o Hōhepa, ā, kīhai i pirau. Ā, i kī ia—I te mea kua tiakina tētahi wāhi o te koti o taku tama, ka tiakina anōtia ētahi mōrehu o ngā uri o taku tama e te ringa o te Atua, ā, ka tīkina ki a ia anō, heoi ka whakangaromia te toenga atu o ngā uri o Hōhepa, e pērā ana ki te toenga o tōna koti.

25 Nana ināianei, ka pōuri tōku wairua i tēnei; hei aha koa, e koa ana tōku wairua ki taku tama, nā te wāhanga o ōna uri e haria atu ai ki te Atua.

26 Nana ināianei, ko tēnei te reo a Hākopa.

27 Ināianei ā, ko wai e mōhio ana mehemea ko ngā uri o Hōhepa, e whakangaromia ai e pērā ai i tōna kahu, ko aua mea pea kua tītore atu i a tātou? Āe rā, ko tātou anō tērā ki te kore tātou e ū i te whakapono o te Karaiti.

28 Ināianei ā i pahawa ake, nā, i te kōrerotanga ake a Moronai i ēnei kupu ka haere atu ia, ā, ka tonoa atu anō hoki ki ngā wāhi tītore katoa o te whenua, ā, ka whakahuihui ngātahi i ngā tāngata katoa i te hiahia kia pupuri ai i tō rātou herekoretanga, kia tū atu ai ki a Amarikaia me te hunga i tītore atu ai, i karangatia ai ko ngā Amarikaia.

29 Ā, i pahawa ake, nā, i te kitenga a Amarikaia kua tokomaha ake te iwi o Moronai i ngā Amarikaia—i tana kitenga atu anō kua rangirua tana iwi e pā ana ki te tika o tā rātou i uru atu ai—nō reira, ka wehi ia kei kore tāna e tutuki, ka mau ia ki te hunga o tōna iwi i pai ai, ā, ka wehe atu ki te whenua o Nīwhai.

30 Nā, i whakaaro a Moronai kāore e tika ana kia whiwhi kaha anō ngā Rāmana; nō reira, ka whakaaro ake ia kia haukoti atu i te iwi o Amarikaia, ki te hopu rānei i a rātou me te whakahoki anō i a rātou, ā, kia whakamate ai i a Amarikaia; āe rā, nā te mea i te mōhio ia māna ngā Rāmana e whakaohooho ake ki a rātou, ā, ka meatia rātou kia haere mai ai ki te pakanga ki a rātou; ā, koinei tāna i mōhio ai e pā ana ki tā Amarikaia e mahi ai kia tutuki ai i āna hiahia.

31 Nō reira, i whakaaro a Moronai e tika ana kia mauria atu ana tauā, ko rātou kua whakahuihui tahi i a rātou anō, ā, ka whakamaua ki ngā patu whawhai, ā, ka uru atu ki roto i tētahi kawenata ki te whakapūmau tonu i te maungārongo—ā, ka pahawa ake, nā, ka mau ia ki tana tauā, ā, ka hīkoi atu me ōna tēneti ki roto i te koraha, ki te haukoti atu i te ara o Amarikaia i te koraha.

32 Ā, i pahawa ake, nā, ka pērā ia ki ōna hiahia, ā, ka hīkoi atu ki roto i te koraha, ā, ka haukotia atu ngā tauā a Amarikaia.

33 Ā, i pahawa ake, nā, ka tahuti atu a Amarikaia me tētahi ope iti o ana tāngata, ā, ka tukuna ake te toenga atu ki roto i ngā ringaringa o Moronai, ā, i whakahokia atu ki roto i te whenua o Harahemara.

34 Nā, he tangata a Moronai kua whakataua e ngā kaiwhakawā matua me te reo o te iwi, nō reira i a ia te tikanga kia mahia tāna e pai ai ki ngā tauā a ngā Nīwhai, ki te whakapūmau me te whakamahi i te mana whakahaere i runga i a rātou.

35 Ā, i pahawa ake, nā, ko te hunga kīhai i whakaae kia uru atu ai ki roto i tētahi kawenata ki te tautoko i te kaupapa herekoretanga, kia riro i a rātou he kāwanatanga herekore, ka meatia e ia kia whakamatea ai; ā, he tokoiti noa ngā mea i whakaparahako ai i te kawenata herekoretanga.

36 Ā, i pahawa ake anō hoki, nā, ka meatia e ia kia whakatūria ake te kara o te herekoretanga ki runga i ngā pourewa katoa i roto nei i te whenua, kua nōhia nei e ngā Nīwhai; ā, pēnei ka whakatō a Moronai i te kara o te herekoretanga ki waenganui i ngā Nīwhai.

37 Ā, ka tīmata anō te rangimārie i runga i te whenua; ā, pēnei ka mau tonu i a rātou te rangimārie i runga i te whenua tata tae noa atu ki te mutunga o te tau tuangahuru o te whakahaeretanga a ngā kaiwhakawā.

38 Ā, i whakapūmau tonu a Heramana rātou ko ngā pirihi teitei i te rangimārie i roto i te hāhi; āe rā, mō te takiwā o ngā tau e whā pū anō i ranea ai te rangimārie me te harikoa i roto i te hāhi.

39 Ā, i pahawa ake, nā, he tokomaha te hunga i mate atu ai, e whakapono tūturu ana kua hokona ō rātou wairua e te Ariki Ihu Karaiti; pēnei ka haere hari atu rātou i tēnei ao.

40 Ā, ka mate ētahi i te kirikā, i pā putuputu mai ai i runga i te whenua i ētahi kaupeka o te tau—engari kāore i nui i te kirikā, nā te tino pai hoki o ngā māhuri maha me ngā pakiaka maha kua whakaritea nei e te Atua hei tango atu i te pūtake o ngā mate e pā noa ai ki te tangata nō te āhua o taua taiao.

41 Engari he tokomaha te hunga i mate kaumātua atu; ā, e hari ana i roto i a ia te hunga i mate ai i roto i te whakapono o te Karaiti, ko te mea hoki tēnei e tika ana hei whakaarohanga mā tātou.