1 Nana, i pahawa ianei ake nō muri tata i tā Moronai tuku atu i tana pukapuka ki te kāwana matua, ka whiwhi ia i tētahi pukapuka i a Pahorana, te kāwana matua. Ā, koinei ngā kupu i whiwhi ai ia:

2 Ko au, a Pahorana, ko au te kāwana matua o tēnei whenua, e tuku atu ana i ēnei kupu ki a Moronai, te kaiwhakahau matua i runga i te tauā. Nana, ko taku kupu tēnei ki a koe, e Moronai, kāore au i te koa mō ō koutou whakamamaetanga, āe rā, e pōuri ana tōku wairua i tēnā.

3 Engari nana, kei reira ētahi e koa ana i ō koutou whakamamaetanga, āe rā, nā konā kua ara ake rātou ki te haututū mai ki ahau, me ērā tāngata āku ko rātou nei he tāngata herekore, āe rā, he tini noa atu te hunga kua ara ake nei.

4 Ā, ko taua hunga anō ngā mea kua whai ki te muru atu i te nohoanga-whakawā i ahau, nā, koinei te pūtake o tēnei hara nunui; nā te mea kua kaha whakamahia te whakapatipati, he maha ngā ngākau o ngā tāngata kua ārahina atu e rātou, mā reira e puta mai ai tētahi whakamamaetanga nanakia ki waenganui i a mātou; kua kaiponu rātou i ō mātou ō, ā, kua whakawehi rātou i ō mātou tāngata herekore nā konei tē haere atu rātou ki a koe.

5 Ā nana, kua āia atu au e rātou i tō rātou aroaro, ā, kua tahuti atu au ki te whenua o Kiriona, me ngā tāngata katoa i āhei ai i a au te mau.

6 Ā nana, kua tukuna atu e au tētahi whakapuakitanga puta noa i tēnei wāhanga o te whenua; ā nana, e huihui mai ana rātou ki a mātou ia te rā, ia te rā, hei tiaki i tō rātou whenua me tō rātou herekoretanga, ki te rapu utu mō ō mātou hē.

7 Ā, kua haere mai rātou ki ahau, nā konā kua whakawehi te hunga kua haututū mai ki a mātou, āe rā, nā konā kei te wehi rātou i a mātou, ā, kāore rātou e māia ana ki te whawhai mai ki a mātou.

8 Kua riro i a rātou te whenua, te pā rānei, o Harahemara; kua whakatūria he kīngi i runga i a rātou, ā, kua tuhituhi atu ia ki te kīngi o ngā Rāmana, nā tēnei anō kua hono atu i tētahi whakaritenga ki a ia; nā tēnei anō kua whakaae mai ki te pupuri i te pā o Harahemara, e whakaaro ana ia mā taua pupuritanga e taea ai e Rāmana te rapu i te toenga atu o te whenua, ā, ka whakatūria ia hei kīngi i runga i tēnei iwi ina pēhia rātou i raro i ngā Rāmana.

9 Ināianei ā, kua whakahēngia au i roto i tō pukapuka, engari kāore he take ki ahau; kāore au i te riri, engari kei te hari au i te nui o tō ngākau. Kāore au, a Pahorana e whaiwhai i te mana, hāunga anake i taku whakamauranga anō i tōku nohoanga-whakawā kia taea ai e au te tiaki i ngā tika me te herekoretanga o tōku iwi.

10 Ināianei ā, nana, ka karo tātou i te kino tae atu ana ki te whakaheke toto. Kua kore tātou e whakaheke i te toto o ngā Rāmana mēnā rānei kua noho rātou i tō rātou ake whenua.

11 Kua kore mātou e whakaheke i te toto o ō tāua teina mēnā rānei kua kore rātou e ara ake i runga i te haututū me te hāpai ake i te hoari ki a mātou.

12 Kua pai ki a mātou kia whakaiti i a mātou anō ki raro i te ioka hereheretanga mēnā rānei i te tika kia pērāhia i tā te Atua tika, mēnā rānei ka whakahau ia i a mātou kia pērā ai.

13 Engari nana kāore nei ia i te whakahau mai ki a mātou kia whakaiti mātou i a mātou anō ki ō mātou hoariri, engari kia whakawhirinaki mātou ki a ia, ā, māna tātou e whakaputa.

14 Nō reira, e taku teina aroha, e Moronai, tukua tāua kia karo i te kino, me ērā atu kino katoa tē taea te karo ki ā tāua kupu, āe rā, pērā i ngā haututūtanga me ngā tītorehanga, tukua tātou kia karo ai i ēnā ki ō tāua hoari, kia mau tonu i a tāua tō tātou herekoretanga, kia hari anō ai tātou i ngā tikanga nui o tō tāua hāhi, ā, i te tikanga o tō tātou Kaihoko me tō tātou Atua.

15 Nō reira, haere wawe mai koutou ko ētahi o āu tāngata ki ahau, ā, mahue atu te toenga i raro i te whakahau o Rīhai rāua ko Teanakumu; whakamanaia rāua kia taea ai te whakahaere i ngā tikanga pakanga i tērā wāhanga o te whenua, e rite ana ki te Wairua o te Atua, koia hoki te wairua o te herekoretanga kei roto nei i a rāua.

16 Nana kua tukuna e au ētahi ō ki a rātou, kia kore ai rātou e mate kia tae mai rā anō koe ki ahau.

17 Whakakaongia ngātahitia ngā tāngata e taea ana e koe i a koe e hīkoi mai ana i reira, kātahi ka haere wawe atu tātou ki ērā kaitītore, i runga i te kaha o tō tātou Atua e rite ana ki te whakapono kei roto nei i a tātou.

18 Ā, ka riro i a tātou te pā o Harahemara, kia hopu kai anō hei tuku atu ki a Rīhai rāua ko Teanakumu; āe rā, ka tū atu tātou ki a rātou i runga i te kaha o te Ariki, ā, ka whakamutua tēnei kino nunui.

19 Ināianei ā, e Moronai, e hari ana tōku ngākau i runga i te rironga mai o tāu pukapuka, nā te mea i te āhua āwangawanga ahau mō ngā mea me mahi mātou, mēnā rānei kua tika tā mātou tatau atu ki ā tāua teina.

20 Engari nāu anō te kī, ki te kore rātou e rīpenetā kua whakahau te Ariki ki a koe kia tū atu koe ki a rātou.

21 Kei wareware koe ki te whakaū i a Rīhai rāua ko Teanakumu i roto i te Ariki; kī atu ki a rāua kei wehi, nā te mea ka whakaputa te Atua i a rāua, āe rā, me te hunga katoa e tū kaha ana i taua herekoretanga nā konā rātou i herekoretia ai e te Atua. Ināianei ā, ka whakakōpanihia taku pukapuka ki taku teina aroha, ki a Moronai.