1 Nana ināianei, i pahawa ake, nā, ka tukuna atu e te kīngi o ngā Rāmana tētahi whakapuakitanga ki waenganui i tōna iwi, kia kaua rātou e pā i ō rātou ringaringa ki runga i a Amona, i a Arona rānei, i a Omonere rānei, i a Himini rānei, me tētahi o ā rātou teina rānei i a rātou e haere atu ana ki te kauhau i te kupu a te Atua, ahakoa ko hea rātou i ngā wāhi katoa o tō rātou whenua.

2 Āe rā, ka tukuna e ia tētahi ture ki waenganui i a rātou, kia kaua rātou e pā atu i ō rātou ringaringa ki runga i a rātou, kia kaua rānei e makaia atu rātou ki roto i te whareherehere; kia kaua rānei e tuwha ki runga i a rātou, e pāpaki rānei i a rātou, e maka atu rānei i a rātou ki waho i ō rātou whare karakia, e whakawhiu rānei i a rātou; kia kaua anō rānei e ākina rātou ki te kōhatu, engari kia tukuna noatia rātou ki ō rātou whare, ki ō rātou temepara hoki me ō rātou āhuru mōwai.

3 Ā, pēnei ka tukuna rātou kia haere atu ai ki te kauhau i te kupu e rite ana ki ō rātou hiahia, nā te mea kua whakatahuritia te kīngi ki te Ariki me tōna whare katoa; nō reira ka tukuna e ia tētahi whakapuakitanga puta noa i te whenua o tōna iwi, kia kore ai te kupu a te Atua e āraia atu, engari kia haere atu ai puta noa i te whenua, kia whakapakepake ai i tōna iwi e pā ana ki ngā whakarerenga iho whakarihariha a ō rātou tūpuna, ā, kia whakapakepake ai i a rātou ki te mea he teina, he tuakana rātou katoa, ā, kia kaua rātou e kōhuru, e pāhua rānei, e whānako rānei, e mahi pūremu rānei, e mahi rānei i tētahi tūmomo whakarihariha.

4 Ināianei ā, i pahawa ake, nā, i te tukunga atu o te kīngi i tēnei whakapuakitanga, nā, ka haere atu a Arona rātou ko ana teina i tētahi pā ki tētahi atu pā, ā, i tētahi whare karakia ki tētahi atu, e whakapūmau hāhi ana, ā, e whakatapu ana i ngā pirihi me ngā kaiako puta noa i te whenua o ngā Rāmana, ki te kauhau me te whakaako i te kupu a te Atua i waenganui i a rātou; ā, pēnei i waimārie nui rātou.

5 Ā, he manomano ngā mea i kumea mai ai ki te mātauranga o te Ariki, āe rā, he manomano ngā mea i kumea mai ai ki te whakapono i ngā whakarerenga iho a ngā Nīwhai; ā, i whakaakona ngā tuhinga me ngā poropititanga ki a rātou, arā, ko ngā mea kua tukuna iho nei tae noa ki tēnei wā.

6 Ā, he pono e ora ana te Ariki, he pērā te tokomaha i whakapono ai, he pērā rānei te tokomaha i kumea mai ai ki te mātauranga o te pono, he mea nā ngā kauhautanga a Amona rātou ko ana teina, e ai ki te wairua o te whakakitenga me te poropititanga, me te mana o te Atua e mahi merekara ana i roto i a rātou—āe rā, ko taku kupu tēnei ki a koutou, e ora ana te Ariki, ko te hunga katoa o ngā Rāmana i whakapono ai ki ā rātou kauhautanga, ā, i whakatahuritia ki te Ariki, kīhai i taka atu.

7 Nā, ka meinga rātou hei iwi tika; i whakatakotohia iho e rātou ngā rākau whawhai o tō rātou haututūtanga, nā, kāore rātou i whawhai anō ki te Atua, ki ētahi rānei o ā rātou teina.

8 Nā, koinei te hunga i whakatahuritia ki te Ariki:

9 Ko te iwi o ngā Rāmana i te whenua o Ihimaera;

10 Ā, ko te iwi o ngā Rāmana anō hoki i te whenua o Mironi;

11 Ā, ko te iwi o ngā Rāmana anō hoki i te pā o Nīwhai;

12 Ā, ko te iwi o ngā Rāmana anō hoki i te whenua o Hiroma, i te whenua anō o Hemerona me te pā o Remuere, me te pā o Himinirona.

13 Ā, koinei ngā ingoa o ngā pā o ngā Rāmana i whakatahuritia ai ki te Ariki; ā, koinei te hunga i whakatakotohia iho ngā rākau whawhai o tō rātou haututūtanga, āe rā, ā rātou rākau whawhai katoa; ā, he Rāmana katoa rātou.

14 Ā, kīhai i whakatahuritia mai ngā Amareki, hāunga te mea kotahi; kīhai rānei tētahi o ngā Amurono; engari i whakapakeke rātou i ō rātou ngākau, ā, ko ngā ngākau o ngā Rāmana anō hoki i taua wāhi o te whenua i noho ai rātou, āe rā, me ō rātou papakāinga katoa, me ō rātou pā katoa.

15 Nō reira, kua whakaingoatia katoatia e mātou ngā pā katoa o ngā Ramana i rīpenetā ai, ā, i tae mai ai ki te mātauranga o te pono, ā, i whakatahuritia ai.

16 Ināianei ā, i pahawa ake, nā, i hiahia te kīngi rātou ko te hunga i whakatahuritia nei kia whai ingoa rātou, mā konā e motuhake ai rātou i ō rātou tuākana; nō reira kōrerorero tahi ai te kīngi ki a Arona me ō rātou pirihi tokomaha e pā ana ki te ingoa e tango atu ki runga i a rātou, kia motuhake ai rātou.

17 Ā, i pahawa ake, nā, i karangatia ō rātou ingoa ko Anati-Nīwhai-Rīhai; ā, i karangatia rātou ki tēnei ingoa, ā, kāore i karangatia atu anō he Rāmana.

18 Ā, ka meinga rātou hei iwi pukumahi; āe rā, i whakahoahoa tahi ki ngā Nīwhai; nō reira, i whakatūwheratia ai e rātou tētahi ara whakawhitinga kōrero ki a rātou, ā, kīhai te kanga o te Atua i whaiwhai tonu i a rātou.