1 Hei āpiti anō, e aku teina, e hiahia ana ahau kia tohutohu i ō koutou hinengaro kia titiro whakamua ki te wā i homai ai e te Ariki te Atua ēnei whakahaunga ki ana tamariki; ā, e hiahia ana ahau kia maumahara koutou, nā, i whakamanahia e te Ariki te Atua he pirihi, e rite ana ki te ritenga tapu, koia he mea e rite ana ki te ritenga o tana Tama, kia whakaakona ēnei mea ki te iwi.

2 Ā, i whakamanahia ērā pirihi i runga i te ritenga o tana Tama, i runga i tētahi ritenga e mōhio ai te iwi me pēhea e titiro whakamua atu ki tana Tama mō te hokonga.

3 Ā, koinei te ritenga i whakamanahia ai rātou—he mea karanga, ā, he mea whakarite mai i te orokohanganga o te ao e ai ki te mātauranga tōmuatanga o te Atua, he meatanga hoki nā tō rātou tino whakapono nui me ā rātou mahi pai; i te tuatahi rā i waiho ai rātou hei whiriwhiri i te pai, i te kino rānei; nō reira i whiriwhiri rātou i te pai, ā, kua whakahaeretia te whakapono tino nui, kua karangatia ki tētahi karangatanga tapu, āe rā, ki taua karangatanga tapu i whakaritea nei, e rite ana anō, ki tētahi hokonga whakatakatū mō ngā mea pērā.

4 Ā, pēnei kua karangatia rātou ki tēnei karangatanga tapu he mea nā tō rātou whakapono, i ērā atu rā e whakaparahako ana i te Wairua o te Atua i runga i te pakeketanga o ō rātou ngākau me te kāpōtanga o ō rātou hinengaro, heoi, me i kore tēnei tērā pea kua nui tō rātou waimārie pērā i ā rātou teina.

5 Hei whakarāpoto rānei, i taurite tō rātou tūrangawaewae ki tō ō rātou teina i te tuatahi; pēnei he mea whakarite tēnei karangatanga mai i te orokohanganga o te ao nā te mea kua kore ngā mea pērā e whakapakeke i ō rātou ngākau, he meatanga mā roto i te whakamārietanga o te Tama Kotahi Anake, i whakaritea ai—

6 Ā, i karangatia pēneitia e tēnei karangatanga tapu, ā, ka karangatia ki te tohungatanga teitei o te ritenga tapu o te Atua, ki te whakaako i ana whakahaunga ki ngā tamariki a te tangata, kia tomo anō hoki rātou ki roto i tōna okiokinga—

7 E rite ana tēnei tohungatanga teitei ki te ritenga o tana Tama, ko taua ritenga he mea i ahu mai ai i te orokohanganga o te ao; kia pēnei kē rānei te kōrero, kāore he tīmatanga o ōna rā, kāore he mutunga rānei o ōna tau, kua whakaritea mai i te āke tonu atu ki te āke tonu atu katoa, e ai ki tōna mātauranga tōmuatanga o ngā mea katoa—

8 Nā, i whakamanahia rātou i runga i tēnei ritenga—kua karangatia ki tētahi karangatanga tapu, kua whakamanahia ki tētahi tikanga tapu, ā, e tango ana ki runga i a rātou te tohungatanga teitei o te ritenga tapu, ko taua karangatanga, me taua tikanga teitei, me taua tohungatanga teitei, kāore ōna tīmatanga, kāore rānei ōna mutunga—

9 Ka meinga pēnei hei pirihi teitei mō āke tonu atu, i runga i te ritenga o te Tama, ko te Tama Kotahi Anake a te Matua, kāore he tīmatanga o ōna rā, kāore rānei he mutunga o ōna tau, kua kī i te aroha noa, te tika me te pono. Ā, koia anō. Āmine.

10 Nā, he pērā anō ki tāku i kī ai e pā ana ki te ritenga tapu, tēnei pirihitanga teitei rānei, he tokomaha ngā mea i whakamanahia, ā, i meinga hei pirihi teitei o te Atua; ā, he mea nā tō rātou tino whakapono nui me tā rātou rīpenetātanga, me tō rātou tika i te aroaro o te Atua, e whiriwhiri ana rātou ki te rīpenetā me te mahi tika, kīhai i te whakangaronga;

11 Nō reira, i karangatia rātou i runga i tēnei ritenga tapu, kātahi ka whakatapua, ā, ka whakamākia ō rātou kākahu mā roto i te toto o te Reme.

12 Nā, ko rātou nei, i muri iho i tā rātou whakatapunga e te Wairua Tapu, kua meatia ō rātou kākahu kia mā, he mea poke kore, ā, he mea kohakore i te aroaro o te Atua, tē taea te titiro atu ki te hara hāunga i runga i te konekone; ā, he tokomaha, i whakatapua ai, ā, i tomo atu ai ki roto i te okiokinga o te Ariki tō rātou Atua.

13 Ināianei ā, e aku teina, e hiahia ana ahau kia whakaiti koutou i a koutou anō i te aroaro o te Atua, me te whakaputa mai i ngā hua e tika ana mō te rīpenetātanga, kia tomo anō koutou ki roto i taua okiokinga.

14 Āe rā, whakaitia koutou anō kia pērā i te iwi i ngā rā o Merekihereke, koia tētahi pirihi teitei i runga i tēnei ritenga anō kua kōrerotia nei e au, nāna hoki te tohungatanga teitei i tango ki runga ki a ia mō āke tonu atu.

15 Ā, i tukuna e Aperahama ngā whakatekau ki tēnei Merekihereke anō; āe rā, nā tō tātou matua a Aperahama anō i tuku i ngā whakatekau kotahi hau-ngahuru o ngā mea katoa i a ia.

16 Nā, i tukuna ēnei tikanga tapu i runga i tēnei ritenga, mā reira titiro whakamua atu ai te iwi i runga i te Tama a te Atua, koia tētahi momo o tōna ritenga, ko tōna ritenga rānei, ā, ka pēneitia e titiro whakamua atu ai rātou ki a ia mō tētahi murunga i ō rātou hara, kia tomo atu ai rātou ki roto i te okiokinga o te Ariki.

17 Nā, he kīngi tēnei Merekihereke i runga i te whenua o Harema; ā, kua pakari haere tōna iwi i runga i te hē me te mōrikarika; āe rā, kua kōtiti kē atu rātou katoa; kua kī rātou i ngā tūmomo whakarihariha katoa;

18 Engari, i whakahaeretia e Merekihereke te whakapono nui, kātahi ka whiwhi i te tūranga o te pirihi teitei e rite ana ki te ritenga tapu o te Atua, i kauhau atu i te rīpenetātanga ki tōna iwi. Ā nana, i rīpenetā rātou; ā, i whakapūmautia e Merekihereke te rangimārie i te whenua i ōna rā; nō reira ia i karangatia ai ko te wheao o te rangimārie, nā te mea ko ia te kīngi o Harema; ā, i whakahaere ia i raro i tōna matua.

19 Nā, he tokomaha i mua i a ia, ā, he tokomaha anō whai muri iho, engari kāore tētahi i nui ake; nō reira, kua kaha kōrero rātou mōna.

20 Nā, ehara i te mea me tōai au i tēnei; kua ranea tāku i kōrero ai. Nana, kei mua i a koutou ngā karaipiture; mēnā ka whakariroi koutou i ērā ka ai tēnā hei whakangaromanga mō koutou.

21 Ināianei ā, i pahawa ake, nā, i te kōrerotanga atu a Arami i ēnei kupu ki a rātou, ka torona atu tōna ringa ki a rātou kātahi ka karanga atu i runga i te reo kaha, e mea ana: Ko tēnei te wā kia rīpenetā ai, nā te mea e tata mai ana te rā whakaoranga;

22 Āe rā, ko te reo o te Ariki, mā te reo o ngā anahera, e whakapuaki atu i tērā ki ngā iwi katoa; āe rā, kei te whakapuakina tērā, kia rongo ai rātou i te rongo whakahari nui; āe rā, e whakapuaki ana ia i te rongo whakahari nui ki waenganui i tana iwi katoa, āe rā, tae atu ana ki a rātou e marara atu ana ki runga i te mata o te whenua; nā reira kua haere mai rātou ki a tātou.

23 Ā, kua whakamōhiotia ērā ki a tātou i runga i ngā kupu mārama, kia mārama ai tātou, kia kore ai tātou e pōhēhē; ā, i pēnei ai nā te mea he manene tātou i tētahi whenua kē; nō reira, kua makautia nuitia tātou, nā te mea kua whakapuakina mai ēnei rongo whakahari ki a tātou i ngā wāhi katoa o te māra waina.

24 Nana rā, e whakapuaki ana ngā anahera ki ngā mea tokomaha i tēnei wā i roto i tō tātou whenua; ā, ko tōna tikanga he whakarite i ngā ngākau o ngā tamariki a te tangata kia whiwhi ai i tana kupu hei te wā o tana haerenga mai i runga i tana korōria.

25 Ināianei ā, e tatari noa ana tātou kia rongo ai i te rongo whakahari e whakapuakina ai e te māngai o ngā anahera, mō tana haerenga mai; nā te mea e tata mai ana te wā, kāore tātou i te mōhio e pēhea nei tōna tata. E tino manako ana au ki te Atua kia puta mai ai i ōku rā; engari ka hari tonu au ahakoa ka puta wawe, ahakoa ka whakaroa.

26 Ā, ka whakakitea ki ngā tangata tika, ki ngā tangata tapu, e te māngai anahera, hei te wā o tana haerenga mai, kia tutuki ai i ngā kupu a ō tātou tūpuna, e ai ki ērā mea kua kōrerotia e rātou e pā ana ki a ia, i rite nei ki te wairua o te poropititanga i roto nei i a rātou.

27 Ināianei ā, e aku teina, e popore ana au nō te pokapū o tōku ngākau, āe rā, i runga i te mānukanuka nui tae atu ki te mamaetanga, kia whakarongo mai koutou ki aku kupu, me te ruke atu i ō koutou hara, ā, kia kaua e whakaroahia atu te rā o tō rīpenetātanga;

28 Engari, kia whakaiti koutou i a koutou anō i mua i te Atua, me te karanga ake i tōna ingoa tapu, me te mataara, me te inoi tonu, kia kaua koutou e nui ake tō koutou whakawainga i ērā e taea ana te waha, ā, kia ārahina pērātia e te Wairua Tapu, e meinga ana hei mea whakaiti, hei mea māhaki, hei mea ngākau ngāwari, hei mea manawaroa, e kī ana i te aroha, ā, e pūhoi ana ki te riri;

29 E mau ana te whakapono ki te Ariki; e manako ana anō ka whiwhi koutou i te oranga tonutanga; e mau tonu ana i ngā wā katoa te aroha o te Atua i roto i ō koutou ngākau, kia whakaarahia ake koutou hei te rā whakamutunga me te tomo atu ki roto i tōna okiokinga.

30 Ā, mā te Ariki te rīpenetātanga e tuku ki a koutou, kia kore ai e tōia iho mai tōna riri ki runga i a koutou, kia kore ai koutou e hereherea iho e ngā mekameka o te ao rēwera, kia kore ai koutou e mamae i te matenga tuarua.

31 Ā, i nui atu ngā kupu i kōrerotia ai e Arami ki te iwi, kīhai i tuhia i tēnei pukapuka.