1 Ā nana, i pahawa ianei ake, nā, ko tā mātou whainga i muri iho mai, arā, ko te hopu i te pā Manati; engari nana, kāore he huarahi e ārahina atu ai rātou ki waho i te pā e ō mātou ope iti. Nana rā, i mahara rātou ki tā mātou i mahi nei i mua; nō reira kāore i taea te whakapoapoa mai i a rātou ki waho i ō rātou pā kaha;

2 Ā, he tini noa atu rātou i tō mātou tauā nā konā kīhai mātou i māia ki te whakaeke atu ki a rātou i roto i ō rātou pākaha.

3 Āe rā, kua tika haere tā mātou whakamahi i ō mātou tāngata hei tiaki i aua wāhanga o te whenua kua whakahokia mai nei ki a mātou; nō reira ka tika haere kia tatari ai mātou, kia whiwhi kaha anō mātou i te whenua o Harahemara me ētahi atu kawenga ō hou hoki.

4 Ā, i pahawa ake, nā, ka tuku atu au i tētahi karere ki te kāwana o tō mātou whenua, kia whakamōhiotia atu e pā ana ki ngā kōnekehanga o tō mātou iwi. Ā, i pahawa ake, nā, ka tatari mātou kia whiwhi ō, ā, kia whiwhi kaha hoki mai i te whenua o Harahemara.

5 Engari nana, he iti te pai i puta i tēnei; nā te mea i te whiwhi kaha nui ngā Rāmana i tēnei rā, i tēnei rā, me ngā ō anō hoki; ā pēnei ngā āhuatanga i pā ai ki a mātou i tēnei wā.

6 Ā, e whakaeke mai ana ngā Rāmana ki a mātou mai i tētahi wā ki tētahi wā, e mea ana mā te mahere rautaki hei whakangaro i a mātou; hei aha koa kīhai i taea e mātou te haere tahi atu ki te whawhai ki a rātou, nā ō rātou wāhi haumaru me ō rātou piringa kaha.

7 Ā, i pahawa ake, nā, i tatari mātou i roto i ēnei momo āhuatanga uaua mō te takiwā o ngā marama maha, tae noa atu ki te wā whano ka hemo mātou i te matekai.

8 Engari i pahawa ake, nā, i whiwhi kai mātou, he mea tiakina mai ki a mātou e tētahi tauā tāngata rua mano hei āwhina mai i a mātou; ā, koinei noa iho te āwhina i whiwhi ai mātou, hei tiaki i a mātou me tō mātou whenua kei taka iho ki roto i ngā ringaringa o ō mātou hoariri, āe rā, hei kakari atu ki tētahi hoariri kāore nei e taea te tatau.

9 Ināianei ā, ko te pūtake o ēnei mea whakamā o mātou, ko te pūtake rānei kīhai i nui atu te kaha i tukuna mai ai ki a mātou, kāore mātou i mōhio; nō reira i te pōuri mātou, ā, i te kikī i te wehi, kei tau iho mai rā anō pea ngā whakawākanga a te Atua ki runga i tō mātou whenua, hei turaki, ā, hei whakangaro rawa i a mātou.

10 Nō reira ka ringihia e mātou ō mātou wairua i runga i te inoi ki te Atua, kia whakakahangia mātou e ia, ā, kia whakaputaina mai mātou i ngā ringaringa o ō mātou hoariri, āe rā, kia tuku kaha mai ki a mātou anō hoki hei pupuri mātou i ō mātou pā, me ō mātou whenua, me ō mātou rawa, hei oranga mō tō mātou iwi.

11 Āe rā, i pahawa ake, nā, ka torotoro mai te Atua ki a mātou e mōhio ai mātou māna mātou e whakaputa; āe rā, nā konā ia kōrero rangimārie mai ki ō mātou wairua, ā, i tukuna mai ki a mātou te whakapono nui, ā, i meatia mātou kia tūmanako atu ki tētahi whakaputanga i roto i a ia.

12 Ā, ka whai māia mātou i runga i tō mātou ope iti i whiwhi ai mātou, ā, ka pūmau ngā whakaaro kia whai wikitōria ki runga i ō mātou hoariri, me te pupuri i ō mātou whenua, me ō mātou rawa, me ā mātou hoawahine, me ā mātou tamariki, me te tikanga o tō mātou herekoretanga.

13 Ā pēnei ka haere whakamua atu mātou i runga i tō mātou kaha katoa ki ngā Rāmana, kei roto nei i te pā o Manati; ā, i whakatūria e mātou ō mātou tēneti ki te taha koraha, e tata atu ana ki te pā.

14 Ā, i pahawa ake i te aonga ake o te rā, i te kitenga ake o ngā Rāmana kei roto mātou i ngā rohe e pātata atu ana ki te koraha e tūtata ana ki te pā, nā, ka tonoa atu ā rātou tūtei taiāwhio noa i a mātou e kite ai rātou i tō mātou tokomahatanga me te kaha anō o tō mātou tauā.

15 Ā, i pahawa ake, nā, i tā rātou kitenga ake ehara mātou i te kaha, e rite ana ki tō mātou tokomahatanga, me te wehi anō kei hātepe atu mātou i a rātou mai i tō rātou tautoko ki te kore rātou e puta mai ki te pakanga ki a mātou me te whakamate i a mātou, waihoki i te whakaaro anō hoki rātou ka ngāwari noa iho tā rātou whakangaro i a mātou ki tō rātou mano tini, nō reira ka tīmata ā rātou whakariterite mō te haere mai ki a mātou ki te whawhai.

16 Ā, i tā mātou kitenga atu i te whakariterite rātou mō te haere mai ki a mātou, nana, ka mea au i a Kire, me tētahi ope tāngata tokoiti, kia huna ia i a ia anō i te koraha, waihoki kia huna anō hoki a Teomonere rātou ko tētahi ope tāngata tokoiti i a rātou anō hoki i te koraha.

17 Nā, i te taha matau a Kire rātou ko ana tāngata, ā, i te taha mauī ērā atu; ā, i te wā kua pēnei tā rātou huna i a rātou anō, nana, ka noho tonu au me te toenga atu o taku tauā, i taua wāhi anō i whakatūria tuatahitia ō mātou tēneti hei whakarite mō te wā e puta mai ai ngā Rāmana ki te whawhai.

18 Ā, i pahawa ake, nā, ka puta mai ngā Rāmana me tō rātou tauā mano tini ki a mātou. Ā, i te wā kua haere mai rātou, ā, whano ka taka iho ki runga i a mātou ki te hoari, ka mea au i āku tāngata, ko te hunga i tōku taha, kia tahuti atu ki roto i te koraha.

19 Ā, i pahawa ake, nā, ka hohoro rawa te aruaru a ngā Rāmana i a mātou, nā te mea i te tino hiahia rawa rātou kia hopu ai i a mātou me te whakamate i a mātou; nō reira ka whai mai rātou i a mātou ki roto i te koraha; ā, i tōhipa atu mātou i te taha i a Kire rāua ko Teomonere, nā konā kīhai rātou i kitea ake e ngā Rāmana.

20 Ā, i pahawa ake, nā, i te hipanga atu a ngā Rāmana, i te wā rānei i hipa atu ai te tauā, ka ara ake a Kire rāua ko Teomonere i ō rātou wāhi huna, ā, ka hātepe atu i ngā tūtei a ngā Rāmana kia kore ai e taea e rātou te hoki atu ki te pā.

21 Ā, i pahawa ake, nā, i te wā kua hātepea atu rātou e rātou, ka oma atu rātou ki te pā kātahi ka taka iho ki runga i ngā kaitiaki kua mahue atu i reira ki te tiaki i te pā, nā konā whakangaromia atu ai rātou, ā, ka riro i a rātou te pā.

22 Nā, i meatia tēnei nā te mea i tukuna e ngā Rāmana tō rātou tauā katoa, hāunga ngā kaitiaki ruarua noa, kia ārahina atu ai ki roto i te koraha.

23 Ā, i pahawa ake, nā, mā tēnei āhuatanga ka riro i a Kire rāua ko Teomonere ō rātou pākaha. Ā, i pahawa ake, nā, ka whakatika atu mātou, nō muri iho i te haerenga roatanga i te koraha whakatewhenua o Harahemara.

24 Ā, i te kitenga o ngā Rāmana i a rātou e hīkoi atu ana whakatewhenua o Harahemara, ka tino mataku rawa rātou, kei whakatakotoria iho tētahi mahere hei ārahi atu i a rātou ki tō rātou whakangaromanga; nō reira ka tīmata anō tā rātou tahutitanga atu ki roto i te koraha, āe rā, mā taua ara rā anō i haere mai ai rātou.

25 Ā nana, kua pō, ā, kua whakatūria e rātou ō rātou tēneti, nā te mea i whakaaro ake ngā rangatira nui o ngā Rāmana kua ngenge ngā Nīwhai nā tō rātou hīkoiranga; ā, e whakaaro ana kua āia e rātou tō rātou tauā katoa nō reira kāore ā rātou whakaaro e pā ana ki te pā o Manati.

26 Nā, i pahawa ake i te taunga iho o te pō, ka mea au i aku tāngata kia kaua e moe, engari kia hīkoi tonu atu mā tētahi atu huarahi ki te whenua o Manati.

27 Ā, nā tēnei tā mātou hīkoi i te pō, nana, kua hipa atu mātou i ngā Rāmana i te aonga ake o te rā, nā konei tae tuatahi atu mātou i mua i a rātou ki te pā o Manati.

28 Ā, i pahawa pēnei ake, nā tēnei rautaki ka riro i a mātou te pā o Manati i runga i te whakaheke toto kore.

29 Ā, i pahawa ake, nā, i te whakatatanga mai o ngā tauā Rāmana ki te pā, me tā rātou kitenga atu kua rite mātou ki te tūtaki ki a rātou, ka mīharo rawa atu rātou, ā, kua pāngia e te wehi, nā konei tahuti atu ki roto i te koraha.

30 Āe rā, i pahawa ake, nā, ka tahuti atu ngā tauā Rāmana ki waho atu i tēnei takiwā katoa o te whenua. Engari nana, kua haria mai e rātou ngā wāhine me ngā tamariki tokomaha ki waho i te whenua.

31 Ā, ko aua pā i riro atu ai i ngā Rāmana, kei ō mātou ringaringa i tēnei wā tonu; ā, kei te hokihoki atu ō mātou matua me ō mātou whaea me ā mātou tamariki ki ō rātou kāinga, ko rātou katoa hāunga ngā mea kua mauhere atu, ā, kua kahakina atu e ngā Rāmana.

32 Engari nana, he iti ō mātou tauā hei tiaki i ēnei pā tino maha me ngā rohe tino nunui.

33 Engari nana, e whakawhirinaki ana mātou ki tō mātou Atua nāna nei i homai ki a mātou te wikitōria i runga i aua whenua, nā konā kua riro i a mātou aua pā me aua whenua, nō mātou anō i mua.

34 Nā, kāore mātou i te mōhio he aha te pūtake kāore te kāwana e tuku anō ai i te kaha; kāore rānei ērā tāngata i haere mai ai ki a mātou i te mōhio he aha te pūtake kāore mātou i whiwhi kaha anō.

35 Nana, kāore mātou i te mōhio mēnā rānei kei te mūhore koe, ā, kua tōia atu e koe ngā ope tauā ki roto i tērā takiwā o te whenua; ki te pēnei, kāore mātou i te hiahia kia amuamu.

36 Ā, ki te kore e pēnei, nana, e hopohopo ana mātou kua tipu pea tētahi wehenga i roto i te kāwana, koinā kāore rātou e tuku tāngata mai hei āwhina; nā te mea e mōhio ana mātou he nui ake tō rātou i ērā mea kua tukuna mai.

37 Engari, nana, kāore ōna tikanga—e whakawhirinaki nei mātou mā te Atua mātou e whakaputa, hei aha koa te ngoikoretanga o ō mātou tauā, āe rā, ka whakaputaina mātou i ngā ringaringa o ō mātou hoariri.

38 Nana, koinei te tau rua ngahuru mā iwa, i te pito whakamutunga, kei a mātou ō mātou whenua; ā, kua tahuti atu ngā Rāmana ki waho i te whenua o Nīwhai.

39 Ā, ko aua tama a te iwi o Amona, kua kōrerotia nuitia e au, kei te taha i ahau i te pā o Manati; ā, kua tautokona rātou e te Ariki, āe rā, kua tiakina rātou kei hinga i te hoari, nā konā kāore i whakamatea te wairua kotahi.

40 Engari nana, he maha ō rātou tūnga; hei aha koa tū pūmau ana rātou i taua herekoretanga i herekoretia ai rātou e te Atua; ā, e ū kaha ana rātou ki te maumahara ki te Ariki tō rātou Atua mai i tētahi rā ki tētahi rā; āe rā, ka ū rātou ki te pupuri i āna ture, me āna whakawākanga, me āna whakahaunga i ngā wā katoa; ā, e kaha ana tō rātou whakapono ki ngā poropititanga e pā ana ki ērā e puta mai ai.

41 Ināianei ā, e aku teina aroha, e Moronai, mā te Ariki tō tāua Atua, nāna nei tāua i hoko, i mawheto nei i a tāua, e pupuri tonu koe ki tōna aroaro; āe rā, māna tonu e whakamakau ki tēnei iwi, kia waimārie koe i runga i te rironga i a koe ngā mea katoa kua riro atu i ngā Rāmana i a tātou, koia hei tautoko i a mātou. Ināianei ā, nana, ka whakakōpanihia taku pukapuka. Ko Heramana ahau, te tama a Arami.