Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: Pilikihami ʻIongi, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Pilikihami ʻIongi, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Pilikihami ʻIongi
(1801–77)
Pilikihami ʻIongi, fakafuofua ki he 1850–1860, laʻitā fakakuongamuʻa, Laipeli Hisitōlia ʻo e Siasí, PH 100.
Naʻe fāʻeleʻi ʻa Pilikihami ʻIongi ʻi Uaitingihemi, Veamoni, ʻi he 1801. Naʻá ne mali mo Meliame ʻEniselina Uoki ʻi he 1824. ʻI ʻEpeleli ʻo e 1832, naʻe papitaiso ai ʻa ʻIongi ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he hili ʻa e mālōlō ʻa Meliame ʻi Sepitema ʻo e 1832, naʻá ne ʻalu ai ʻo ngāue fakafaifekau ki Niu ʻIoke mo e Konga ʻo Kānata ki ʻOlungá (Upper Canada). Naʻá ne hiki ʻi he 1833 ki Ketilani, ʻOhaiō, ʻa ia naʻá ne mali ai mo Mele ʻAna ʻEniselō ʻi Māʻasi ʻo e 1834. Kimui ange ʻi he taʻu ko iá, naʻá ne kau ʻi he fononga ʻa e ʻApitanga ‘o ʻIsilelí. ʻI he 1835, naʻe fakanofo ai ʻa ʻIongi ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻá ne fakahoko ha ngaahi ngāue fakafaifekau mei he 1835 ki he 1837, ki Niu ʻIoke mo Niu ʻIngilani. Naʻe hiki ʻa ʻIongi ki Hihifo Mamaʻo, Mīsuli, ʻi he 1838, peá ne tokoni kimui ange ki hono tataki ʻa e fetukutuku ʻo e Kāingalotu ʻo e Siasí mei Mīsuli ki ʻIlinoisí. Naʻá ne ngāue fakafaifekau ki ʻIngilani mei he 1839 ki he 1841. Naʻá ne hiki leva ki Nāvū, ʻIlinoisi, ʻa ia naʻá ne kau ai ki he Fakataha Alēlea ʻo e Toko Nimangofulú. Naʻe fokotuʻu ʻa ʻIongi ko e Palesiteni ʻo e Kōlomu ʻo e Toko Hongofulu Mā Uá ʻi he 1840 pea naʻe fakahā ke ne ʻi he tuʻunga ko iá ʻi ha maʻu fakahā ʻi Sānuali 1841 (Tokāteline mo e Ngaahi Fuakava 124:127). Naʻe hikinimaʻi ʻa e Toko Hongofulu Mā Uá ʻi he ʻaho 8 ʻo ʻAokosi 1844, hili ʻa e pekia ʻa Siosefa Sāmitá, ke nau tokangaʻi ʻa e ngaahi ngāue ʻa e Siasí. ʻI ʻEpeleli 1845, naʻe fakahā ai ʻa ʻIongi ko e “Palesiteni ʻo e Siasí fakakātoa” ʻi ha konifelenisi ʻi Nāvū. ʻI he vahaʻa ʻo e 1846 mo e 1848, naʻá ne tataki ai ʻa e hikifonua ʻa e Siasí ki he Teleʻa Sōlekí, ʻi he Vahefonua ʻIutaá, pea toe fokotuʻutuʻu foʻou ʻa e Kau Palesitenisī ʻUluakí. Naʻá ne hoko ko e Palesiteni ʻo e Siasí ʻi ʻIutā peá ne ngāue ʻi ha ngaahi tuʻunga fakapuleʻanga kehekehe, kau ai ʻa e kōvana mo e pule ʻo e ngaahi fengāueʻaki mo e kau ʻInitiá maʻá e Vahefonua ʻIutaá.
Ngaahi Fakamoʻoni Fakafolofola ʻi he Tokāteline mo e Ngaahi Fuakavá