Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: Uilifooti Utalafi, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Uilifooti Utalafi, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Uilifooti Utalafi
(1807–98)
Uilifooti Utalafi, ca. 1843–1844, laʻitā fakakuongamuʻa, Church History Library, PH 10143.
Naʻe fanauʻi ʻa Uilifooti Utalafi ʻi Fāmingitoni, Konetikati ʻi he 1807. Naʻe papitaiso ia ʻi Tīsema 1833 ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ofi ki Lisilani, Niu ʻIoke. Naʻá ne hiki ki Ketilani, ʻOhaiō ʻi he 1834, peá ne kau he fononga ‘a e ʻApitanga ‘o ʻIsilelí ki Mīsulí. Naʻá ne ngāue fakafaifekau ki ʻĀkenisā, Tenesī mo Kenitaki mei he 1834 ki he 1836. Naʻe fakanofo ia ko ha Fitungofulu ʻi he 1836. ʻI he taʻu hono hokó, naʻá ne mali ai mo Fīpē Kata ʻi Ketilani. Lolotonga e 1837 mo e 1838, naʻe ngāue fakafaifekau ai ʻa Utalafi ki Niu ʻIngilani mo e ʻOtu Motu Fōkasí. Naʻe uiuiʻi ia ʻi ha fakahā ʻi Siulai 1838 ke ne fakafonu ha tuʻunga ne ʻatā ʻi he Kōlomu ʻo e Kau ʻAposetolo ʻe Toko Hongofulu Mā Uá (Tokāteline mo e Ngaahi Fuakava 118:6). Hili iá naʻá ne ngāue fakafaifekau ki Pilitānia Lahi mei he 1839 ki he 1841. Naʻá ne hiki ki Nāvū, ʻIlinoisi ʻi he 1841 ʻo ne hoko ai ko ha mēmipa ʻo e Fakataha Alēlea ʻo e Toko Nimangofulú. Naʻe tokangaʻi ʻe Utalafi ʻa e Misiona Pilitāniá mei he 1844 ki he 1846. ʻI he 1846–47 naʻá ne hiki ai ki he Teleʻa Sōlekí ʻi he Vahefonua ʻIutaá . Naʻá ne fua ha ngaahi fatongia kehekehe ʻi he Siasí ʻi he taʻu ʻe fāngofulu tupu hono hokó, kau ai ʻa ʻene hoko ko e faihisitōlia ʻa e Siasí mo e palesiteni ʻo e temipale ʻi Seni. Siaosí, Vahefonua ʻIutaá. Hili e pekia ʻa Sione Teila ʻi he 1887, naʻe hikinimaʻi ʻa Utalafi ko e Palesiteni hono fā ʻo e Siasí. Naʻá ne maʻu ha fakahā naʻe fanongonongo ʻi he Manifesto ʻi he 1890 (Fanongonongo Fakamafaiʻi 1), naʻe iku ai ki hono fakangata ʻo e mali tokolahí ʻi he Siasí. Naʻá ne fakatāpui ʻa e Temipale Sōlekí ʻi he 1893. Naʻe fanongonongo ʻe Palesiteni Utalafi ha fakahā ʻi he 1894 ke fakangatangata ʻa e ngaahi sila ohí kae nofotaha ʻi he sila ʻo e nofo-malí mo e ngaahi vā fetuʻutaki mātuʻá ki he fānaú. Naʻá ne naʻinaʻi ki he kāingalotú ke “nau fakatotoloʻi ʻenau tohi hohokó ki he mamaʻo taha te nau lavá, pea fakamaʻu kinautolu ki heʻenau ngaahi tamaí mo ʻenau ngaahi faʻeé.” (Vakai, Tefito ʻi he Hisitōlia ʻo e Siasí, “Sila.”) Naʻá ne pekia ‘i Sepitema ʻo e 1898.
Ngaahi Fakamoʻoni Fakafolofola ʻi he Tokāteline mo e Ngaahi Fuakavá
Tokāteline mo e Ngaahi Fuakavá 118, 124, 136, 138, Fanongonongo Fakamafaiʻi 1