Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: Sione Moataki, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Sione Moataki, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Sione Moataki
(1792–1871)
Sione Moataki, fakafuofua ki he 1850, laʻitā, Church History Library, PH 1700 2782.
Naʻe fāʻeleʻi ʻa Sione Moataki ʻi Kotilaiti, Niu ʻIoke ʻi he 1792. Naʻá ne mali mo Sūlia Kelepi ʻi he 1823. ʻI Nōvema 1830, naʻe papitaiso ai ʻa Moataki ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi Ketilani, ʻOhaiō pea fakanofo ia ko ha kaumātuʻa. ʻI he 1831, naʻe mālōlō hono uaifí hili haʻane fanauʻi ha ongo māhanga, ʻa ia naʻe pusiakiʻi kinaua ʻe Siosefa mo ʻEma Sāmita. Naʻe hoko ha ngaahi fakahā kimuʻa ke ui ai ʻa Moataki ke ne ngāue fakafaifekau (Tokāteline mo e Ngaahi Fuakava 52:8; 99:1). Naʻá ne fakahoko ha ngaahi ngāue fakafaifekau kehekehe, kau ki ai ʻene ngāue ki Mīsuli, ʻOhaiō, Vesīnia pea mo e fakahahake ʻo e ʻIunaiteti Siteití ʻi he vahaʻa ʻo e 1831 mo e 1833; Veamoni mo Niu ʻIoke ʻi he 1835 mo e 1836; ʻInitiana mei he 1844 ki he 1845; pea mo ʻAositelēlia ʻi he vahaʻa ʻo e 1851 mo e 1853.
ʻI he 1834, naʻe laka atu ʻa Moataki mei ʻOhaiō ki Mīsuli ko ha konga ʻo e fononga ʻa e ʻApitanga ʻo ʻIsilelí. Naʻe fokotuʻu ia ko e palesiteni ʻo e fakataha aleaʻanga māʻolunga ʻo Saioné ʻi he 1836. Naʻe mali ʻa Moataki mo ʻAmolanitā Tena ʻi he taʻu ko iá, ka naʻe mālōlō ʻa ʻAmonilanitā ʻi he taʻu hono hokó. Naʻá ne mali hoko mo ʻElekitā ʻĒleni. ʻI he 1839, naʻá ne hiki ki ʻIlinoisi, pea naʻá ne pīsope ʻi he Uooti Nima ʻo Nāvū, ʻIlinoisí mei he 1842 ki he 1844. Ne mālōlō hono uaifi fika tolú ʻi he 1845, pea naʻá ne mali mo Sela Sufeleti ʻi he 1846. ʻI he 1847 naʻá ne hiki ki he Vahefonua ʻIutaá, ʻa ia naʻá ne hoko ai ko ha aleaʻanga māʻolunga, pīsope ʻo e Uooti Sōleki Siti Hongofulu Mā Faá, mo ha pēteliake, kimuʻa peá ne nofo ʻi he Vāhenga Peivá.
Ngaahi Fakamoʻoni Fakafolofola ʻi he Tokāteline mo e Ngaahi Fuakavá