Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: Tōmasi B. Māʻasi, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Tōmasi B. Māʻasi, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Tōmasi B. Māʻasi
(1800–66)
Tōmasi B. Māʻasi, laʻitā, Church History Library, MS 12377.
Naʻe fanauʻi ʻa Tōmasi B. Māʻasi ʻi ʻAkitoni, Masasūseti. Naʻá ne mali mo ʻElisapeti Kotikini ʻi he 1820. Naʻá ne hiki mo hono fāmilí ki Palemaila, Niu ʻIoke ʻi he aʻu ki Sepitema 1830, ʻi he taimi naʻá ne papitaiso ai ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea naʻe fakanofo ko ha kaumātuʻa. Naʻa nau hiki mo e Kāingalotú ki Ketilani, ʻOhaiō ʻi he 1831 pea naʻe fakanofo ia ai ko ha taulaʻeiki lahi. Hili hono uiuiʻi ia ʻi ha fakahā (Tokāteline mo e Ngaahi Fuakava 52:22; 56:5; 75:31), naʻá ne ʻalu ʻo ngāue fakafaifekau ki Mīsuli pea ki he fakahahake ʻo e ʻIunaiteti Siteití. Naʻá ne hiki mo hono fāmilí ki Mīsuli ʻi he 1832. Naʻe ui ʻa Māʻasi ʻi he 1834 ke hoko ko ha mēmipa ʻo e fakataha alēlea māʻolunga ʻo Saioné ʻi he Vāhenga Keleí, Mīsuli. ʻI he taʻu hono hokó, naʻe fakanofo ia ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá pea naʻe hikinimaʻi ia ko e palesiteni ʻo e kōlomu ko iá.
ʻI he taimi naʻe pulusi ai ʻa e Tokāteline mo e Ngaahi Fuakavá ʻi he 1835, naʻe tānaki atu ʻe Māʻasi mo e kau mēmipa kehe ʻo e Kōlomu ʻo e Toko Hongofulu Mā Uá ʻenau fakamoʻoni ko e tohí naʻe “foaki mai ia ʻi he fakamānava ʻa e ʻOtuá” (Tokāteline mo e Ngaahi Fuakavá). Naʻe ʻi ai ha ongo fakahā ʻi he tohí naʻefakapatonu pē ia kia Māʻasi, ʻo faleʻi fakataautaha ia ʻi heʻene hoko ko e palesiteni ʻo e Kōlomu ʻo e Toko Hongofulu Mā Uá (Tokāteline mo e Ngaahi Fuakava 31; 112).
Naʻe mavahe ʻa Māʻasi mei he Siasí ʻi he 1838 pea naʻe tuʻusi ia mei he Siasí ʻi he 1839. ʻI he 1857, naʻe toe papitaiso mai ia pea naʻá ne hiki ki he Vahefonua ʻIutā.
Ngaahi Fakamoʻoni Fakafolofola ʻi he Tokāteline mo e Ngaahi Fuakavá