Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: Pita Haasi, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Pita Haasi, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Pita Haasi
(1796–1862)
Naʻe fanauʻi ʻa Pita Haasi ʻi he Vāhenga Lītí, Vahe Sionisitauní (kimui ange ʻi ʻOnitaliō), Konga ʻo Kānata ki ʻOlungá. Naʻá ne mali mo Sālote Halingitoni. Hili hono papitaiso ia ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻá ne hiki ki Ketilani, ʻOhaiō. Naʻá ne ngāue fakafaifekau mo ʻIlasitasi Sinou ki ʻIlinoisi ʻi he 1839 pea naʻá ne hiki ki ʻIlinoisi ʻi he meimei taʻu tatau pē. Naʻe ngāue fakataimi ʻa Haasi ʻi he fakataha alēleʻanga māʻolunga ʻi Nāvū, ʻIlinosí mei he 1840 ki he 1844. Naʻá ne toe ngāue foki ko ha talāsiti ʻo e Kautaha Fale ʻo Nāvuú (vakai, Tokāteline mo e Ngaahi Fuakava 124:62, 70). Naʻe fakanofo ia ko ha taulaʻeiki lahi ʻi he 1841. Naʻá ne ngāue fakafaifekau mo ʻAmasa Laimani ʻi he 1843 ke tānaki ha paʻanga ki hono langa ʻo e Temipale Nāvuú pea mo e Fale ʻo Nāvuú; ʻi he konga kimui ʻo e taʻu ko iá, naʻá ne ngāue fakafaifekau ki Misisipi mo ʻAlapama. Naʻe fakahū ia ki he Fakataha Alēlea ʻo e Toko Nimangofulú ʻi Māʻasi 1844. ʻI he 1846, naʻe hiki ʻa Haasi ki he feituʻu naʻe hoko kimui ko Kaunisila Palafu, Vahefonua ʻAiouā. Hili ʻene ʻaʻahi ki he kolonia ʻo Laimani Uaiti ʻi Tekisisi ʻi he 1848, naʻá ne foki ki Kaunisila Palafu, pea naʻe tuʻusi ai ia mei he siasí ʻi he 1849.
Ngaahi Fakamoʻoni Fakafolofola ʻi he Tokāteline mo e Ngaahi Fuakavá