Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: ʻOasoni Haiti, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
ʻOasoni Haiti, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
ʻOasoni Haiti
(1805–78)
ʻOasoni Haiti, ca. 1852, laʻitā ʻa Marsena Cannon, Church History Library, PH 100.
Naʻe fanauʻi ʻa ʻOasoni Haiti ʻi ʻOkisifooti, Konetikati ʻi he 1805. Naʻe papitaiso ia ʻi Ketilani, ʻOhaiō ʻi ʻOkatopa 1831 pea fakanofo ko ha taulaʻeiki lahi hili pē ha taimi nounou mei ai. ʻI he 1832, hili hano ui ia ʻi ha fakahā (Tokāteline mo e Ngaahi Fuakava 75:13), naʻá ne malanga ʻi he fakahahake ʻo e ʻIunaiteti Siteití mo Samuela Sāmita. Hili iá, naʻe foki ʻa Haiti ki Ketilani ʻo kau ki he Akoʻanga ʻo e Kau Palōfitá, pea fokotuʻu ia ko e kalake kia Siosefa Sāmita mo hono tokonÍ, pea naʻá ne hoko ko ha mēmipa ʻo e fakataha alēleaʻanga māʻolunga ʻi Ketilaní (Tokāteline mo e Ngaahi Fuakava 102:3). ʻI he 1834, naʻe fokotuʻu ia ʻi ha fakahā ke tānaki mai ha paʻanga mo ha kakai ki he fononga ʻa e ʻApitanga ʻo ʻIsilelí (Tokāteline mo e Ngaahi Fuakava 103:40). Naʻá ne kau atu ki he fononga ‘o e ʻApitanga ‘o ʻIsilelí, ʻo laka mei ʻOhaiō ki Mīsuli ʻi he konga kimui ʻo e taʻu ko iá. ʻI he taʻu tatau pē, naʻá ne mali ai mo Melinitā Nenisī Sionisoni. Naʻe fakanofo ʻa Haiti ʻi he 1835 ke hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻI he vahaʻa ʻo e 1836 mo e 1838, naʻá ne ngāue fakafaifekau ai ki Niu ʻIoke, Konga ki ʻOlunga ʻo Kānatá, mo ʻIngilani, pea hili iá naʻá ne hiki ki Hihifo Mamaʻo, Mīsuli. Naʻe tukuange ia mei he Toko Hongofulu Mā Uá ʻi Mē 1839 ka naʻe toe fakafoki pē ia ki hono fatongiá ʻi he māhina hono hokó. Naʻá ne ngāue fakafaifekau mei he 1840 ki he 1842, ʻo malanga ʻi he fakahahake ʻo e ʻIunaiteti Siteití mo ʻIulope pea fakatapui ʻa Palesitaine ki hono tānaki fakataha ʻo e kakai Siú. Naʻá ne haʻu leva ʻo nofo ʻi Nāvū, ʻIlinoisi. Naʻá ne toe ngāue fakafaifekau pē ki Pilitānia Lahi ʻi he 1846 mo e 1847. Naʻá ne hiki ki he Vahefonua ʻIutaá ʻi he 1852.
Ngaahi Fakamoʻoni Fakafolofola ʻi he Tokāteline mo e Ngaahi Fuakavá
Tokāteline mo e Ngaahi Fuakava 68, 75, 100, 102, 103, 112, 124