Lilipeni W. Pōkesi

(1796–1860)

Lilipeni W. Pōkesi, laʻitā litokālafi.

Naʻe fāʻeleʻi ʻa Lilipeni W. Pōkesi ʻi Lekisingitoni, Kenitaki. Naʻá ne faifatongia ʻi he Tau ʻo e 1812 peá ne hiki leva ki he Vahefonua Mīsulí. ʻI he 1817, naʻá ne mali ai mo Sūlia ʻAna Peniti; hili ʻa e mālōlō ʻa Sūliá, naʻe mali ʻa Pōkesi mo Panatia Kalānite Puuni ʻi he 1823. ʻI he 1826, naʻá ne hiki ki Tauʻatāina, Mīsuli. Naʻe fili ia ki he senatoa ʻo e siteití ʻi he tikite Fakatemokālati ʻi he 1826 mo e 1828. ʻI he 1832, naʻe fili ia ko e lafitani kōvana ʻo e siteití. Naʻá ne hoko ko e kōvana ʻi he taimi naʻe fakafisi ai ʻa e tokotaha kimuʻa ʻiate iá, ko Taniela Tangikilini, ʻi he 1836; naʻe ngāue ʻa Pōkesi ʻo aʻu ki he 1840. ʻI heʻene hoko ko e kōvaná, naʻá ne fakamafaiʻi ai ʻa e tuli ʻo e Kāingalotu ʻo e Siasí ʻi he 1838 mei Mīsulí ʻi he malumalu ʻo e meʻa naʻe ui ko hono “tuʻutuʻuni ke fakaʻauhá” (vakai, Tokāteline mo e Ngaahi Fuakava 124, ʻuluʻi vahé). Hili ʻene ngāue ko e kōvaná, naʻá ne foki ki Tauʻatāina. Naʻe fakalaveaʻi lahi ia ʻe ha feinga fakapoongi ʻi Mē 1842 peá ne tukuakiʻi ʻa Siosefa Sāmita ki he ngāue fakataha mo ʻOlini Poota Lokiueli ʻi hono fakahoko ʻo e hiá. Naʻá ne fakaakeake ʻo sai, naʻá ne ngāue ʻi he senatoa ʻo e siteití ʻi he 1842–46, pea faifai peá ne hiki ki Kalefōnia, ʻo ne mālōlō ai.

Ngaahi Fakamoʻoni Fakafolofola ʻi he Tokāteline mo e Ngaahi Fuakavá

Tokāteline mo e Ngaahi Fuakava 124

Fakamatala Lahi Ange

Ngaahi moʻoni meʻa mo e maʻuʻanga fakamatala fakapiokālafi, The Joseph Smith Papers (Ko e Ngaahi Pepa ʻa Siosefa Sāmitá)

Kau Māʻoniʻoní, voliume 1, Ko e Fuka ʻo e Moʻoní

Vakai, Lilburn W. Boggs ʻi he FamilySearch