Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá: Siaosi A. Sāmita, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Siaosi A. Sāmita, Ngaahi Maʻuʻanga Fakamatala Fakahisitōlia ʻo e Tokāteline mo e Ngaahi Fuakavá (2025)
Siaosi A. Sāmita
(1817–75)
Siaosi A. Sāmita, fakafuofua ki he 1867, laʻitā meia Edward Martin, Church History Library, PH 5095.
Ko Siaosi A. Sāmitá ko ha tokoua ʻaki ia ʻo Siosefa Sāmita ko e Siʻi, mo e kui tangata ʻa e Palesiteni ʻo e Siasí ko Siaosi ʻAlipate Sāmitá, naʻe fāʻeleʻi ia ʻi Potitemi, Niu ʻIoke ʻi he 1817. Naʻe papitaiso ia ʻi Sepitema 1832 ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi Potitemi. ʻI he taʻu hono hokó, naʻá ne hiki ki Ketilani, ʻOhaiō, ʻa ia naʻá ne ngāue ai ʻi he Temipale Ketilaní. ʻI he 1834, naʻá ne laka atu mei ʻOhaiō ki Mīsuli ko ha konga ʻo e fononga ʻa e ʻApitanga ʻo ʻIsilelí. ʻI he 1835, naʻe fakanofo ia ko ha Fitungofulu peá ne ʻalu fakataha mo Laimani Sāmita ʻi ha ngāue fakafaifekau ki he fakahahake ʻo e ʻIunaiteti Siteití. ʻI he 1838, naʻá ne hiki ki Hihifo Mamaʻo, Mīsuli, pea ʻi ha taimi nounou pē mei ai naʻá ne hiki ki ʻĀtama-ʻonitai-ʻĀmani, ʻa ia naʻá ne ngāue ai ʻi he fakataha alēleaʻanga māʻolungá. ʻI he 1839, naʻe fakanofo ia ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, pea hili iá naʻá ne ngāue fakafaifekau ki ʻIngilani ʻo aʻu ki he 1841. ʻI he taʻu ko iá, naʻá ne kau fakataha ai mo e Kāingalotu ʻi Nāvū, ʻIlinoisí, peá ne mali ai mo Patisepa W. Pikilā. Naʻá ne hoko ko ha mēmipa ʻo e Fakataha Alēlea ʻo e Toko Nimangofulú. Naʻá ne hoko foki ko e talāsiti ʻo e Kautaha Fale ʻo Nāvuú. ʻI Sānuali 1847, naʻe fokotuʻu ai ia ʻe ha maʻu fakahā ke tokoni ʻi hono tokangaʻi ʻo e hiki ʻa e Kāingalotú ki he Vahefonua ʻIutaá (Tokāteline mo e Ngaahi Fuakava 136:14). Naʻe fokotuʻu ia ʻi ʻIutā ko e faihisitōlia mo e tauhi lekooti ʻa e Siasí, pea ʻi he 1868 naʻá ne hoko ai ko e Tokoni ʻUluaki kia Pilikihami ʻIongi ʻi he Kau Palesitenisī ʻUluakí.
Ngaahi Fakamoʻoni Fakafolofola ʻi he Tokāteline mo e Ngaahi Fuakavá